நாட்டில் அண்மையில் 10 ரூபாவினால் அதிகரிக்கப்பட்ட உணவுப்பொதி ஒன்றின் விலை மேலும் 10 அல்லது 15 ரூபாவினால் அதிகரிக்கப்பட உள்ளதாக தெரிவிக்கப்பட்டுள்ளது.

தேங்காயின் விலை அதிகரிக்கப்பட்டுள்ளமையே உணவுப்பொதிகளின் விலையும் அதிகரிப்பதற்கு தீர்மானித்துள்ளதாக இலங்கை உணவக உரிமையாளர் சங்கத்தின் தலைவர் அசேல சம்பத் தெரிவித்துள்ளார்.

அத்துடன், நாட்டில் தற்போது தேங்காய் பற்றாக்குறை ஏற்பட்டுள்ளதோடு, தேங்காய் ஏற்றுமதியை உடனடி​யாக நிறுத்த வேண்டும் எனவும் தெரிவித்தார்.

மேலும், அரசாங்க நிறுவனங்களின் ஊழியர்களுக்கு உணவுப் பொதியொன்றினை, 50 ரூபாவுக்கு வழங்க முடியாத நிலைமைக்கு தாம் தள்ளப்பட்டுள்ளதாகவும் அசேல சம்பத் குறிப்பிட்டுள்ளார்.

நாட்டில் உள்ள மக்கள் அனைவரும் முகப்புத்தகத்தில் பதிவு செய்யும் சில விடயங்களை தவிர்க்குமாறு பொதுமக்கள் உரிமைகளைப் பாதுகாக்கும் அமைப்பு தெரிவித்துள்ளது.

அந்த வகையில் குழந்தைகள் மற்றும் பெண்களின் வாழ்க்கையை பாதிக்காத வகையில், மக்கள் தங்கள் முகநூலில் பதிவுகளை பிரசுரிக்குமாறு அந்த அமைப்பு வேண்டுகோள் விடுத்துள்ளது.

மேலும், சமுதாய சீர்கேடுகள் ஏற்படாத வகையில் மக்கள் அனைவரும் ஒன்றிணைந்து செயற்பட வேண்டும். அதற்கு,மேற்கூறிய பதிவுகளை பதிவேற்றம் செய்வதை தவிர்க்க வேண்டும் என அறிக்கையில் தெரிவித்துள்ளது.

அத்துடன் இவ்வாறு சமூக வலைத்தளங்களின் பாவனை தொடர்பில், சட்டங்களை கொண்டுவருவதற்கு பதிலாக மேற்கூறியவற்றினை தவிர்க்க வேண்டும் என அந்த அமைப்பு தெரிவித்துள்ளது.

வாள் வெட்டு சம்பவங்களுடன் தொடர்புடையவர்கள் என சந்தேகிக்கப்படும் 11 பேரை கைது செய்துள்ளதாக யாழ்ப்பாணம் பொலிஸார் தெரிவித்துள்ளனர்.

யாழ்ப்பாணம் மற்றும் கோப்பாய் பகுதிகளில் இடம்பெற்ற வாள்வெட்டு சம்பவங்களுடன் தொடர்புடையவர்கள் என கருதப்படும் சந்தேகநபர்களே இவ்வாறு கைது செய்யப்பட்டுள்ளதாக கூறப்படுகின்றது.

கைது செய்யப்பட்ட சந்தேகநபர்களில் இருவர் கத்தி மற்றும் வாள் போன்றவற்றை செய்துகொடுத்தவர்கள் என தெரிவிக்கப்படுகின்றது.

கல்வியங்காடு, கோப்பாய், அளவெட்டி, சுன்னாகம், உரும்பிராய் பகுதிகளில் இடம்பெற்ற திருட்டு மற்றும் வாள்வெட்டு சம்பவங்களுடன் தொடர்புடையவர்களே இவ்வாறு கைது செய்யப்பட்டுள்ளனர்.

இதேவேளை, கைது செய்யப்பட்டுள்ள சந்தேகநபர்களிடம் தொடர்ந்தும் விசாரணைகள் மேற்கொள்ளப்பட்டு வருவதாகவும், அதன் அடிப்படையில் ஏனையவர்களை கைது செய்ய நடவடிக்கை எடுத்துள்ளதாக பொலிஸார் மேலும் தெரிவித்துள்ளனர்.

இலங்கை கிரிக்கெட் அணியின் இளம் வீரர் குசால் மெண்டிஸின் வீட்டில் கொள்ளைச் சம்பவமொன்று இடம்பெற்றுள்ளது.

பாணந்துறை கொரகான கல்கனுவ பகுதியில் அமைந்துள்ள வீட்டில் தங்க ஆபரணங்கள் மற்றும் பணம் கொள்ளையிடப்பட்டுள்ளது.
கடந்த 2ம் திகதி இந்தக் கொள்ளைச் சம்பவம் இடம்பெற்றுள்ளது.

சுமார் மூன்று லட்சம் ரூபா பெறுமதியான தங்க ஆபரணங்களும், 5000 ரூபா பணமும் கொள்ளையிடப்பட்டுள்ளது.

இது தொடர்பில் பாணந்துறை வடக்கு பொலிஸ் நிலையத்தில் முறைப்பாடு செய்யப்பட்டுள்ளது. அதிகாலை வேளையில் இந்த கொள்ளைச் சம்பவம் இடம்பெற்றுள்ளதாகத் தெரிவிக்கப்படுகிறது.

மூன்று மாடிகளைக் கொண்ட வீட்டில் கீழ் மாடியில் இவ்வாறு தங்க ஆபரணங்கள் மற்றும் பணம் கொள்ளையிடப்பட்டுள்ளதாக குசால் மெண்டிஸின் குடும்ப உறுப்பினர் தீப்த மெண்டிஸ் பொலிஸ் நிலையத்தில் முறைப்பாடு செய்துள்ளார்.

இந்த சம்பவம் தொடர்பில் இதுவரையில் எவரும் கைது செய்யப்படவில்லை. சம்பவம் தொடர்பில் பொலிஸார் விசாரணைகளை ஆரம்பித்துள்ளனர்.

குசால் மெண்டிஸ் தென் ஆபிரிக்காவில் நடைபெற்று வரும் கிரிக்கட் போட்டித் தொடரில் தற்போது விளையாடி வருகின்றார் என்பது குறிப்பிடத்தக்கது.

முல்லைத்தீவு சிலாவத்தை பகுதியில் இடம்பெற்ற வீதி விபத்தில் ஒருவர் உயிரிழந்துள்ளார். அளம்பிலயை சேர்ந்த சந்திரபோஸ் குணசீலன் (வயது 36) என்பவரே இவ்வாறு உயிரிழந்துள்ளார்

குறித்த நபர் நேற்று இரவு மோட்டார்சைக்கிளில் சென்று கொண்டிருந்த நிலையில், மாடு ஒன்று வீதியை கடக்க முற்பட்டபோது அவர் பயணித்த மோட்டார் சைக்கிள் மரத்தில் மோதி விபதுக்குள்ளாகியுள்ளதாக தெரிவிக்கப்படுகின்றது.

உயிரிழந்தவரின் சடலம் முல்லைத்தீவு மாவட்ட வைத்தியசாலையில் பிரத பரிசோதனைக்காக வைக்கப்பட்டுள்ள நிலையில், மேலதிக விசாரணைகளை பொலிஸார் மேற்கொண்டு வருகின்றனர்.