2016 ஆண்டு ஐரோப்பிய இலங்கை அழகு ராணியாக (Miss Sri Lanka in Europe 2016) சபிதா தோமஸ் தெரிவாகியுள்ளார்.

இம்முறை ஐரோப்பாவின் இலங்கை அழகு ராணியாக தெரிவாகியுள்ள சபிதா தோமஸ் நீர்கொழும்பில் இருந்து ஐரோப்பா சென்ற பெண்ணாகும்.

தற்போது டென்மார்க்கில் வசிக்கும் அவர் நீர்கொழும்பு கெபுன்கொட பிரதேசத்தை சேர்ந்த மீனவ குடும்பத்தை சேர்ந்தவர்.

ஐரோப்பா முழுவதும் இலங்கை கொடியை நாட்டும் எதிர்பார்ப்பில் சபிதா தோமஸ் உள்ளதாக தெரிவிக்கப்படுகின்றது.

சபிதா தோமஸ் தமது குடும்பத்தினருடன் அடிக்கடி இலங்கை வந்து செல்வதாக கொழும்பு ஊடகம் ஒன்று தகவல் வெளியிட்டுள்ளது.

இலங்கையில் 170 வயதுடைய நபர் ஒருவர் வாழ்வதாக அரசாங்கத்தினால் வழங்கப்பட்ட ஆவணங்களில் இருந்து தெரிய வந்துள்ளது.

முதியோர்களுக்கான தேசிய சபையினால் வழங்கப்பட்ட முதியோர் அடையாள அட்டையின் அடிப்படையில் இந்த வயதெல்லை வெளியாகி உள்ளது.

தெல்தோட்டையில் வசிக்கும் முதியவர் ஒருவர் 1847.08.30 இல் பிறந்துள்ளார். இதன் அடிப்படையில் இவருக்கு தற்போது 170 வயதாகின்றது.

உண்மையில் 1946.09.30 ஆம் திகதி பிறந்த இவருக்கு, முதியோருக்கான தேசிய சபையினால் வழங்கப்பட்ட அடையாள அட்டையில், இவ்வாறு தவறுதலாக பதிவிடப்பட்டுள்ளமை தெரிய வந்துள்ளது.

இரு பிள்ளைகளின் தந்தையான இவர், சிறு வியாபாரம் ஒன்றை மேற்கொண்டு வருகின்றார்.

இருதய நோயினால் பாதிக்கப்பட்டு சிகிச்சை பெற்று வரும் தனக்கு உதவும் பொருட்டு வழங்கப்பட்ட அடையாள அட்டையிலேயே இவ்வாறு பதிவிடப்பட்டுள்ளதால்,அசௌகரியங்களுக்கு முகங்கொடுப்பதாக அவர் குறிப்பிட்டுள்ளார்.

ஆயினும் குறித்த அடையாள அட்டையில் காணப்படும் பிழை சீர்செய்யப்படும் நிலையில் குறித்த அடையாள அட்டை, மேலும் பிரயோசனமானதாக அமையும் என இவர் தெரிவிக்கின்றார்.

நியூஸிலாந்து ஒக்லேன்ட்டில் தனது மனைவி, மகன், மனைவியின் தாய் என மூன்று பேரை பறிகொடுத்த இலங்கையர் தொடர்ந்தும் தீவிர சிகிச்சைக்கு உட்படுத்தப்பட்டு வருகிறார்.

கடந்த 22ஆம் திகதியன்று அதிகாலையில் அவரின் வீட்டில் ஏற்பட்ட தீவிபத்தின் போது மூன்று பேர் உயிரிழந்த நிலையில், 47வயதான கைலேசன் தனபாலசிங்கம் என்ற இலங்கையர் 40 வீதமான தீக்காயங்களுடன் வைத்தியசாலையில் அனுமதிக்கப்பட்டுள்ளார்

சில நேரங்களில் அவர் கண்விழித்துபார்ப்பதாக அவரின் நண்பர்கள் தெரிவித்துள்ளார்கள். இந்த தீவிபத்து சம்பவத்தின்போது கைலேசனின் 11வயது மகள் மாத்திரமே உயிர்தப்பியுள்ளார்.

அவரின் அம்மா, தம்பி, அம்மம்மா ஆகியோர் தீக்கு பலியாகினர். அவர்களின் இறுதிக்கிரியைகள் அடுத்த வாரத்தில் இடம்பெறவுள்ளன.

இந்தநிலையில் பாதிக்கப்பட்ட கைலேசனின் குடும்பத்துக்காக 75 ஆயிரம் டொலர் நிதி சேகரிக்கப்பட்டுள்ளது. அது உயிழந்த மூவரின் இறுதிக்கிரியைகளுக்காக பயன்படுத்தப்படவுள்ளதாக தெரிவிக்கப்பட்டுள்ளது.

இலங்கையர் ஒருவர் உலகிலேயே முதல் தடவையாக காற்றில்லாத டயர் ஒன்றைக் கண்டுபிடித்து சாதனை படைத்துள்ளார். லங்கா இன்வென்ஷன்ஸ் என்ற நிறுவனத்தின் தலைவரான தாஹிர் (மீலான்) மொகமட் என்பவரே இந்த நவீன சிந்தனையாளராவார்.

காற்றுக்குப் பதிலாக ஜெலி போன்ற ஒரு உறுதிமிக்க பொருள் டயரில் செலுத்தப்படுகிறது. இந்தப் பொருள் காற்று போல செயல்பட்டு பாதையில் செல்லும் போது ஏற்படக் கூடிய அழுத்தம் போன்றவற்றைத் தாங்கக் கூடிய சக்தி மிக்கதாக இருக்கிறது. இதனால், இந்த டயரில் துளைவிழாது. இதுதான் அதன் சிறப்பு அம்சம் என தனது கண்டு பிடிப்பு பற்றி தாஹிர் தெரிவித்தார்.

இந்த டயரை சர்வதேச ரீதியில் பிரபல்யப்படுத்த தாஹிர் திட்டமிட்டுள்ளார். இந்த டயர் எவ்வாறு செயல்படுகிறது என்பது பற்றி அவர் கைத்தொழில் மற்றும் வர்த்தக அமைச்சுக்கு தகவல் வழங்கியுள்ளார்.

சர்வதேச சமூகத்தின் முன்பாக இலங்கையின் தொழில்நுட்பத் திறன்களை வெளிப்படுத்தி வளர்ச்சியடைந்த நாடுகளில் தொழில்நுட்ப அபிவிருத்திக்கு பங்களிப்புச் செய்வதே தனது நோக்கம் எனவும் அவர் கூறுகின்றார்.

தாஹிர் இதற்கு முன்பும் ஒரு சாதனையைப் படைத்திருந்தார். அது அவராகவே வடிவமைத்த வாசிக்கப் பயன்படும் மூக்குக் கண்ணாடியாகும்.

இது பார்வைக் குறைபாடு உள்ளவர்களுக்கும், கண்பார்வை பாதிக்கப்பட்டவர்களுக்குமென தயாரிக்கப்பட்டது.

இந்த மூக்குக் கண்ணாடியின் வில்லைகள் முன்னோக்கி நகரும் போது பெரிய உருவங்கள் சிறிதாகவும், பின்னோக்கி நகரும் பொது சிறிய உருவங்கள் பெருதாகத் தெரியும்படி வித்தியாசம் காட்டுகிறது. பாவிப்பவரின் வசதிக்கு ஏற்றவாறு இதை சரி செய்யவும் முடியும்.

மேலும் தூரத்தில் உள்ள ஒருவர் கடைகளில் காணப்படும் பெயர் பலகைகளையும் வாசிக்கக் கூடிய வசதி இதில் இருக்கிறது. அதாவது, ஒரு பொருளைத் தெளிவாக பார்க்கும் வரையில் இந்த விசேட மூக்குக் கண்ணாடியை நகர்த்தலாம்.

தண்ணீரில் அணிந்து நடக்கக் கூடியதும், பல்வேறு பாதுகாப்பு காரணங்களுக்காக பயன்படுத்தக் கூடியதுமான ஒரு சப்பாத்தையும் வடிவமைத்திருப்பதாகவும் தாஹிர் மேலும் தகவல் தருகிறார்.

அண்மையில் வர்த்தக கைத்தொழில் அமைச்சர் ரிஷாட் பதியுதீன் தலைமையில் நடைபெற்ற ஒன்பதாவது உலகத் தமிழ் இஸ்லாமிய இலக்கிய மாநாட்டில் இவர் கௌரவிக்கப்பட்டது. இங்கு குறிப்பிடத்தக்கது.

இவர் தனது கண்டுபிடிப்புக்களை அறிமுகப்படுத்தவென என்ற இணையத்தளம் www.lankainvention.com ஒன்றையும் ஆரம்பித்துள்ளார்.

டெங்குக் காய்ச்சலினால் பீடிக்கப்பட்டிருந்த 5 வயது சிறுவன் கல்முனையில் உயிரிழந்த சம்பவம் டெங்கு நுளம்பு ஒழிப்பை வலுப்படுத்த வேண்டியதன் அவசியத்தை மீண்டும் உணர்த்தி நிற்கின்றது.

காய்ச்சலினால் பீடிக்கப்பட்ட நிலையில், கல்முனை வடக்கு ஆதார வைத்தியசாலையில் கடந்த 27 ஆம் திகதி அனுமதிக்கப்பட்ட சிறுவனே தீவிர சிகிச்சைகளின் பின்னர் நேற்று முன்தினம் (29.12) உயிரிழந்துள்ளார்.

கல்முனை குடி 16 ஐச் சேர்ந்த அகமது அதீப் என்ற 5 வயது சிறுவனின் உயிரையே டெங்குக் காய்ச்சல் பறித்துள்ளது.

இதேவேளை, கடந்த மாதம் 14ம் திகதி சாய்ந்தமருது பகுதியைச் சேர்ந்த 11 வயதான சிறுவன், டெங்குக் காய்ச்சலால் பீடிக்கப்பட்ட நிலையில், கல்முனை அஷ்ரஃப் ஞாபகார்த்த வைத்தியசாலையில் அனுமதிக்கப்பட்டிருந்த நிலையில் உயிரிழந்திருந்தமை குறிப்பிடத்தக்கது.

இந்த ஆண்டின் முடிவடைந்துள்ள காலப்பகுதியில் டெங்கு நுளம்பு பரவும் விதமாக சூழலை வைத்திருந்த ஒரு இலட்சத்திற்கும் அதிகமானவர்களுக்கு சிவப்பு அறிவித்தல் விடுக்கப்பட்டுள்ளதாக சுகாதார அமைச்சு கூறியுள்ளது.

எதிர்காலத்தில் டெங்கு பரவும் விதமாக செயற்படுவோருக்கு எதிராக கடுமையான சட்டநடவடிக்கை எடுப்பதாக சுகாதாரப் பணிப்பாளர் பாலித மஹிபால கூறினார்.

அது சம்பந்தமாக காணப்படுகின்ற சட்ட விதிமுறைகள் சம்பந்தமாக சட்ட மா அதிபரின் ஆலோசனையை பெற்றுக் கொள்ள சுகாதார அமைச்சர் நடவடிக்கை எடுத்துள்ளதாக அவர் கூறினார்.

புத்தளம் பகுதியில் பாடசாலை மாணவி ஒருவரை துஸ்பிரயோகத்திற்கு உட்படுத்திய இருவரை முந்தலம பொலிஸார் கைது செய்துள்ளனர்.

கைது செய்யப்பட்ட சந்தேகநபர்களில் ஒருவர் குறித்த பாடசாலை மாணவியின் தந்தை என்றும் மற்றையவர் மாமா என்றும் பொலிஸார் தெரிவித்துள்ளனர்.

குறித்த பாடசாலை மாணவியின் தாய் வெளிநாட்டிற்கு வீட்டுப் பணிப்பெண்ணாக சென்றுள்ளார். துஸ்பிரயோகத்திற்கு உட்படுத்திய சிறுமி 11 வயதுடையவர் என குறிப்பிடப்பட்டுள்ளது.

எனவே, பாதிக்கப்பட்ட சிறுமி தந்தையின் பாதுகாப்பின் கீழே வளர்ந்துள்ளார். தனது மகளை பக்கத்து வீட்டில் உள்ள இளைஞர் ஒருவர் பாலியல் துஸ்பிரயோகம் மேற்கொண்டுள்ளார் என குறித்த சிறுமியின் தந்தை பொலிஸ் நிலையத்தில் முறைப்பாடு செய்ய மகளுடன் சென்றுள்ளார்.

மேலும், புத்தளம் மருத்துவமனையில் மேற்கொண்ட மருத்துவ பரிசோதனைகளின் மூலம் இந்த சம்பவத்துடன் சிறுமியின் தந்தையும் தொடர்புப்பட்டுள்ளார் என தெரியவந்துள்ளது.

இந்த துஸ்பிரயோகத்துடன் தொடர்புடைய மற்றைய நபர் தொடர்பில் பொலிஸார் விசாரணைகளை மேற்கொண்டு வருகின்றனர்.

2016ம் ஆண்டு சமூக வலைத்தளங்கள் தொடர்பான பிரச்சினைகள் குறித்து சுமார் 2,200 முறைப்பாடுகள் பதிவு செய்யப்பட்டுள்ளதாக இலங்கை கணினி அவசர தயார் நிலை தெரிவித்துள்ளது.

வேறு நபர்களின் புகைப்படங்களை பயன்படுத்தி போலி பேஸ்புக் பக்கங்கள் திறக்கப்படுகின்றமை தொடர்பிலேயே அதிக இணைய முறைப்பாடுகள் கிடைத்துள்ளதாக தகவல் பாதுகாப்பு பொறியியலாளர் ரொஷான் சந்திரகுப்தா தெரிவித்துள்ளார்.

தனிநபர்கள் தங்களின் பேஸ்புக் ஊடாக முறைப்பாடு பதிவு செய்ய முடியும் என அவர் குறிப்பிட்டுள்ளார்.

மேலும் பேஸ்புக்கில் தங்கள் புகைப்படங்களை வெளியிடும் போது பாதுகாப்பு கருதி “நண்பர்களுக்கு மாத்திரம்” என்ற தேர்வினை தெரிவு செய்து புகைப்படங்களை பதிவிடுமாறு அவர் சுட்டிக்காட்டியுள்ளார்.

இந்த முறை போலி கணக்குகளில் வேறு நபர்களின் புகைப்படம் செல்கின்றமை மற்றும் பிழையான நபர்களுக்கு புகைப்படம் செல்வதனை தவிர்ப்பதற்கும் உதவியாக இருக்கும் என அவர் மேலும் குறிப்பிட்டுள்ளார்.