நக்கல்ஸ் மலைத்தொடர் பகுதியில் விலங்குகளை வேட்டையாடி பேஸ்புக்கில் பிரசுரித்தவர்கள் 6 பேரை பொலிஸார் கைது செய்துள்ளனர்.

வன விலங்குகளை வேட்டையாடி உணவாக்கினார் என இணையத்தளங்களில் வெளியான படங்களில் இந்த விலங்கு வேட்டையுடன் சம்பந்தப்பட்ட பிரதான நபரும் இதில் அடங்குவதாக பொலிஸார் தெரிவித்துள்ளனர்.

பன்வில பொலிஸார் இன்று காலை இந்த சந்தேகநபர்களை கைது செய்துள்ளனர். விலங்குகளை வேட்டையாட பயன்படுத்தப்பட்ட துப்பாக்கிகள் சிலவற்றையும் பொலிஸார் கைப்பற்றியுள்ளனர்.

சந்தேகநபர்கள் இன்று தெல்தெனிய நீதவான் முன்னிலையில் ஆஜர்ப்படுத்தப்பட உள்ளனர்.

பொருளாதார மத்திய நிலையம் தொடர்பில் அது அமைய உள்ளதாக கருதப்படும் வவுனியா மாவட்டத்தில் உள்ள மக்கள் பிரதிநிதிகளின் கருத்துக்கு முக்கியத்துவம் அளிக்கப்படும் என பா.உறுப்பினர் சிறீதரன் தெரிவித்தார்.

எதிர்க்கட்சி தலைமை காரியாலயத்தில் இன்று இடம்பெற்ற த.தே.கூட்டமைப்பின் மத்திய குழு கூட்டத்தின் பின் ஊடகவியலாளர்களுற்கு கருத்து தெரிவிக்கும் போதே அவர் மேற்கண்டவாறு குறிப்பிட்டார்.

பொருளாதார மத்திய நிலையத்தின் அமைவிடம் ஒமந்தையிலா, தாண்டிக்குளத்திலா என்பது தொடர்பில் ஜனநாயகக் கட்சி என்பதன் அடிப்படையில் நியாய பூர்வமான கருத்துக்கள் பரிமாறப்பட்டதாகவும் கூறினார்.

அதுமட்டுமின்றி, இன்று சமூகமளிக்காத பாராளுமன்ற உறுப்பினர்களினதும், வடக்கு மாகாண சபை உறுப்பினர்களினதும் கருத்துக்களையும் பெற்று விரைவில் மக்களுக்கான பொருளாதார மையத்தினை அமைப்போம் என்ற முடிவு எடுக்கப்பட்டதாக தெரிவித்தார்.

சரியான இடத்தினை தெரிவு செய்ததன் பிற்பாடு மிக தெளிவாக அதற்கான அஸ்த்திபாரம் இடப்படும் எனவும், ஜனநாயக கட்சி என்பதன் அடிப்படையில் அடுத்த சந்ததிக்கு இது ஒரு நல்ல விடயமாக இருக்கவேண்டும் என்பதற்காகவுமே முடிவு எடுப்பது ஒருவாரம் பிற்போடப்பட்டதாகவும் பா.உறுப்பினர் சிறீதரன் தெரிவித்தார்.

கட்டுநாயக்க விமான நிலையத்தின் பாதுகாப்பு தொடர்பில் மேற்கொள்ளப்பட வேண்டிய நடவடிக்கைகள் முன்னெடுக்கப்பட்டுள்ளதாக பாதுகாப்புத் தரப்பினர் தெரிவித்துள்ளனர்.

பல சர்வதேச நாடுகளில் மேற்கொள்ளப்பட்டுள்ள பயங்கரவாதத் தாக்குதல்களை தொடர்ந்தே கட்டுநாயக்க விமான நிலையத்தின் பாதுகாப்புத் அதிகரிக்கப்பட்டுள்ளது.

மேலும், விமான நிலையத்தின் பாதுகாப்பு தொடர்பில் தேவையான நடவடிக்கைகள் முன்னெடுக்கப்பட்டுள்ளதாக கட்டுநாயக்க விமான நிலையத்தின் பாதுகாப்புத் தலைமையதிகாரி தெரிவித்துள்ளார்.

அத்துடன் குறித்த பாதுகாப்பு நடவடிக்கைகளினால் பொதுமக்களுக்கு எவ்வித பாதிப்புக்களும் ஏற்படாது என தம்மிக விஜேசூரிய குறிப்பிட்டுள்ளார்.

இதேவேளை, விமான நிலைய சோதனை நடவடிக்கைகள் அதிகரிக்கப்பட்டுள்ளதாகவும் அவர் சுட்டிக்காட்டியுள்ளமை குறிப்பிடத்தக்கது.

காலி – வெலிவத்தை பகுதியில் ஹெரோயின் போதைப் பொருளுடன் 19 வயது இளம் யுவதி ஒருவர் கைதுசெய்யப்பட்டுள்ளார். இவர் வசம் இருந்து 20 கிராம் 10 மில்லிகிராம் ஹெரோயின் கைப்பற்றப்பட்டுள்ளது.

மேலும், சந்தேகநபர் ஹிக்கடுவை – நாரிகம பகுதியைச் சேர்ந்த, திருமணமாகாத பெண்ணொருவர் எனவும், தனியார் நிறுவனம் ஒன்றில் பணிபுரிபவர் எனவும், தெரியவந்துள்ளது.

இதேவேளை, குறித்த யுவதியின் தாய் மற்றும் தந்தையும் ஹெரோயின் வைத்திருந்தமை தொடர்பில் கைதுசெய்யப்பட்டு சிறையிலுள்ளமை குறிப்பிடத்தக்கது.

இந்தநிலையில், சந்தேகநபர், தனது தந்தையின் வற்புறுத்தலின் பெயரில் அடிக்கடி சிறைச்சாலைக்கு ஹெரோயின் கொண்டு சென்று அவரிடம் கொடுப்பதாக பொலிஸாரிடம் வழங்கிய வாக்குமூலத்தில் கூறியுள்ளார்.

சம்பவம் குறித்த மேலதிக விசாரணைகளை காலி பொலிஸார் மேற்கொண்டு வருகின்றனர்.

மட்டக்களப்பு – கல்லடி பழைய பாலத்தில் இருந்து பாய்ந்து சுமார் 19 வயதுடைய இளைஞர் ஒருவர் தற்கொலை செய்து கொண்டுள்ளார்.

குறித்த சம்பவம் இன்று பிற்பகல் 03.00 மணியளவில் இடம்பெற்றுள்ளது.

தற்கொலை செய்த இளைஞன் மட்டக்களப்பு – கூழாவடி பிரதேசத்தைச் சேர்ந்த ஒருவர் எனத் தெரிவிக்கப்படுகின்றது.

இது தொடர்பான மேலதிக விசாரணைகளை மட்டக்களப்பு தலைமையக பொலிஸார் மேற்கொண்டு வருகின்றனர்.

மட்டக்களப்பு ஏறாவூர், மீராகேணிப் பிரதேசத்தில் அமைந்துள்ள அநாதை இல்லம் ஒன்றின் வளாகத்தில் வாழைமரங்களுக்கு இடையில் கைவிடப்பட்ட நிலையில் 07 மாதச் சிசுவின் சடலம் நேற்று (02.07) இரவு மீட்க்கப்பட்டுள்ளதுடன், அச்சிசுவை பிரசவித்ததாகச் சந்தேகிக்கப்படும் பெண் ஒருவரைக் கைது செய்துள்ளதாகவும் பொலிஸார் தெரிவித்துள்ளனர்.

கடந்த ஒரு மாதகாலமாக குறித்த அநாதை இல்லத்தில் குடும்பத்தவருடன் தங்கியிருந்து சமையல் பணியில் ஈடுபட்டுவந்த இப்பெண்ணைக் கைதுசெய்து சிகிச்சைக்காக வைத்தியசாலையில் அனுமதித்ததாகவும் பொலிஸார் கூறியுள்ளார்.

இப்பெண்ணின் வயிறு வழமைக்கு மாறாக பெரிதாகக் காணப்பட்டபோது, அது தொடர்பில் கணவர் விசாரித்துள்ளார்.

குறித்த பெண் வயிற்றில் கட்டி உள்ளதாக வைத்தியப் பரிசோதனையில் தெரியவந்துள்ளது என கணவரிடம் கூறியுள்ளார்.

சம்பவதினம் இப்பெண்ணுக்கு அதிக இரத்தப் பெருக்கு காணப்பட்டதை அடுத்து, ஏறாவூர் ஆதார வைத்தியசாலையில் அனுமதிக்கப்பட்டு, சிசுவைப் பிரசவித்துள்ள்ளார்.

இதன் பின்னர், இப்பெண் சிசுவுடன் வைத்தியசாலையிலிருந்து தலைமறைவாகியுள்ளார்.

மேலும், இது தொடர்பில் தமக்குத் தகவல் கிடைத்த நிலையில் இப்பெண்ணைத் தேடிக் கைதுசெய்து விசாரணை மேற்கொண்டபோது, வாழைமரங்களுக்கு இடையில் சிசு இருந்தமை தெரியவந்துள்ளது என பொலிஸார் தெரிவித்துள்ளார்.

மேலும், இந்தச் சம்பவம் தொடர்பில் பொலிஸார் விசாரணை மேற்கொண்டு வருகின்றமை குறிப்பிடத்தக்கது.

ஸ்ரீலங்கன் எயார்லைன்ஸ் விமானம் தாமதத்தால் திருச்சி விமான நிலையத்தில் மேலாளர் அறையை முற்றுகையிட்டு இலங்கை செல்லவிருந்த பயணிகள் போராட்டம் நடத்தியது பரபரப்பை ஏற்படுத்தியது.

இலங்கை தலைநகர் கொழும்பில் இருந்து திருச்சி விமான நிலையத்திற்கு ஸ்ரீலங்கன் விமானம் தினமும் 2 சேவைகளை இயக்கி வருகிறது.

மதியம் 2.30 மணிக்கு திருச்சி வரும் விமானம் பயணிகளை ஏற்றிக்கொண்டு, பிற்பகல் 3.30 மணிக்கு புறப்பட்டு செல்லும்.

நேற்று மதியம் கொழும்பு விமானத்தில் செல்வதற்கு வந்த 137 பயணிகள் பலத்த சோதனைக்கு பின் பயணிகள் தங்கும் அறையில் காத்திருந்தனர்.

அப்போது தொழில்நுட்ப கோளாறு காரணமாக கொழும்பில் விமானம் புறப்படுவதில் சிக்கல் ஏற்பட்டது.

இதனால் மாலை 4.30மணிக்கு விமானம் திருச்சி விமான நிலையத்திற்கு வரும் என பயணிகளுக்கு அறிவிக்கப்பட்டது.

இதையடுத்து பயணிகள் 2 மணி நேரம் பயணிகள் காத்திருப்பு அறையில் காத்திருந்தனர். ஆனால் விமானம் மாலை 5 மணி ஆகியும் வராததால் பயணிகள் ஏர்லைன்ஸ் அதிகாரிகளிடம் வாக்குவாதத்தில் ஈடுபட்டனர்.

பின்னர் இரவு 10.55 மணிக்கு திருச்சி விமான நிலையத்திற்கு விமானம் வரும் என தெரிவித்தனர்.

இதில் கோபமடைந்த 50க்கும் மேற்பட்ட பயணிகள் ஏர்லைன்ஸ் மற்றும் டெர்மினல் மேலாளர் அறையை முற்றுகையிட்டு தங்கள் பயணத்தை ரத்து செய்து கொள்வதாக தெரிவித்தனர்.

இருந்த போதும் ஏர்லைன்ஸ் அதிகாரிகள் தொடர்ந்து பேச்சுவார்த்தை நடத்தினர்.

அப்போது எங்களுக்கு மாற்று ஏற்பாடு கூட செய்யாமல், பயணிகள் தங்கும் அறையிலேயே தங்க வைத்ததாக கூறி ஆதங்கப்பட்டனர்.

இதில் 50 பயணிகள் தங்களது பயணத்தை ரத்து செய்து விட்டு பணத்தை திரும்ப பெற்று சென்றனர்.

மீதமுள்ள பயணிகள் அறையில் காத்திருந்தனர். இந்நிலையில் தொழில்நுட்ப கோளாறு சரி செய்யப்பட்டு விமானம் இரவு 10.55 மணிக்கு வந்து 11.55 மணிக்கு 87 பயணிகளுடன் புறப்பட்டு சென்றது.

8 மணி நேர தாமதத்தால் பயணிகள் பெரிதும் அவதியடைந்தனர்.

-மாலை மலர்-