யாழ்ப்பாணத்தில் இடம்பெற்று வரும் சமூக விரோத செயல்கள் மற்றும் வாள்வெட்டு சம்பவங்களுடன் தொடர்புபட்ட பிரதான சந்தேகநபர்களாக அடையாளம் காணப்பட்ட தேவா, சன்னா, பிரகாஸ் ஆகியோர் தொடர்பாக தகவலறிந்தால் உடனடியாக தம்மை தொடர்பு கொள்ளுமாறு சுன்னாகம் பொலிஸ் நிலைய பொறுப்பதிகாரி தெரிவித்துள்ளார்.

யாழ்ப்பாணத்தில் அண்மைக் காலமாக பல்வேறு சமூகவிரோத மற்றும் வாள்வெட்டு சம்பவங்களில் இவர்கள் ஈடுபட்டு வந்திருந்தனர்.

இந் நிலையில் இவர்களில் தேவா என்பவர் மீது சுன்னாகம் பொலிஸ் நிலையத்தில் வாள்வெட்டு தொடர்பான மூன்று குற்றச்சாட்டுக்கள் பதிவு செய்யப்பட்டுள்ளது.
அத்துடன் வேறு பொலிஸ் நிலையங்களிலும் இவருக்கு எதிரான குற்றச்சாட்டுக்கள் பதிவு செய்யப்பட்டுள்ளன.

இந்நிலையில் குறித்த நபர் உட்பட மூன்று பேரையும் கைது செய்வதற்காக விசாரணைகளையும் ஏற்பாடுகளையும் யாழ்ப்பாணத்திலுள்ள பொலிஸ் நிலையங்கள் அனைத்தும் மேற்கொண்டிருந்தன.

இவற்றில் இவர்கள் தொடர்பான குற்றச்சாட்டுக்கள் பதிவு செய்யப்பட்டுள்ள சுன்னாகம், யாழ்ப்பாணம், கோப்பாய் ஆகிய பொலிஸ் நிலையங்களால் இவர்கள் தீவிரமாக தேடப்பட்டு வருகின்றனர்.

இந்நிலையில் கடந்த சில மாதங்களுக்கு முன்னர் இணுவில் பகுதியில் வைத்து வாள்வெட்டு நடவடிக்கை ஒன்றுக்கு தயாராக இருப்பதாக கிடைத்த தகவலையடுத்து அவர்களை கைது செய்வதற்கான நடவடிக்கைகளை சுன்னாகம் பொலிஸார் மேற்கொண்டிருந்தனர்.

இருந்த போதிலும் அவர்கள் தப்பிச்செல்ல முற்பட்டபோது தேவா என்பவர் மீது துப்பாக்கி பிரயோகம் மேற்கொண்டு கைது செய்ய முயற்சித்திருந்த போதும் குறித்த பிரதான சந்தேக நபரான தேவா என்பவர் அங்கிருந்து தப்பிச்சென்றிருந்தார்.

எனினும் இவ் விடயம் தொடர்பாக தாம் துப்பாக்கி பிரயோகம் எதனையும் மேற்கொள்ளவில்லையென சுன்னாகம் பொலிஸார் மறுத்திருந்தனர்.

பின்னர் ஒர் ரொக்டீம் எனும் வாள்வெட்டு கும்பலொன்றை பொலிஸார் கைது செய்திருந்தனர்.

அத்துடன் அதன் பின்னர் தேவா மற்றும் ஏனைய இருவர்களுடனும் தொடர்புடையவர்கள் என்ற குற்றச்சாட்டில் பலரை சுன்னாகம் மற்றும் யாழ்ப்பாண பொலிஸார் கைது செய்திருந்தனர்.

இந்நிலையில் யாழ்ப்பாணத்திலிருந்து வெளி இடங்களில் தஞ்சம் புகுந்துள்ள மேற்குறித்த மூன்று பிரதான சந்தேகநபர்கள் தொடர்பாக தகவலறிந்தவர்கள் உடனடியாக சுன்னாகம் பொலிஸாரை தொடர்புகொள்ளுமாறு சுன்னாகம் பொலிஸ் நிலைய பொறுப்பதிகாரி கோரியுள்ளார்.

இதன்படி தகவலறிந்தவர்கள் 0718591331 அல்லது 0724 339000 அல்லது 077899 8901 அல்லது 0772336249 ஆகிய பொலிஸ் தொலைபேசி இலக்கங்களுடன் தொடர்பு கொண்டு தகவலை தெரிவிக்குமாறு பொலிஸார் கேட்டுள்ளனர்.

யாழில் சாதாரண தரத்தில் கல்வி பயிலும் மாணவி ஒருவரைக் காணவில்லை என, பெற்றோர் சுன்னாகம் பொலிஸ் நிலையத்தில் முறைப்பாடு பதிவு செய்துள்ளனர். சுன்னாகம் பகுதியைச் சேர்ந்த 16 வயதான மாணவி ஒருவரே இவ்வாறு காணாமல் போயுள்ளதாக தெரியவந்துள்ளது.

மாலையில் மேலதிக வகுப்புக்காக சென்ற இவர், இரவாகியும் வீடு திரும்பாத நிலையில், நேற்று திங்கட்கிழமை இரவு 11.00 மணியளவில் பெற்றோர் பொலிஸாரின் உதவியை நாடியுள்ளனர். இதன்படி சம்பவம் குறித்த மேலதிக விசாரணைகளை சுன்னாகம் பொலிஸார் மேற்கொண்டு வருகின்றனர்.

 
கொஸ்கம சாலாவ இராணுவ முகாம்ஆயுதக்களஞ்சியசாலையில் ஏற்பட்ட தீ விபத்தினால் அப்பிரதேசங்களிலிருந்து வெளியேறி விகாரையிலும் வேறு பகுதிகளிலும் தங்கியிருந்த மக்களை நேற்று வன்னி மாவட்ட பாராளுமன்ற உறுப்பினரும் அபிவிருத்திக்குழு இணைத்தலைவருமான கே.காதர் மஸ்தான் நேரில் சென்று பார்வையிட்டார்.

குறித்த விபத்தினால் பாதிக்கப்பட்ட பூகொட குமாரிமுல்ல பகுதிக்கு விஜயம் செய்த அவர்அங்குள்ள மக்களின் தற்போதைய நிலைமைகள் தொடர்பில் ஆராய்ந்தார்.

அத்துடன் குமாரிமுல்ல பெரிய பள்ளிவாசல் நிர்வாகிகளுடன் இடம்பெற்ற கலந்துரையாடலில் அப்பகுதியிலுள்ள நீரை குடிநீர்த்தேவைக்கு பயன்படுத்தவேண்டாமென வைத்திய அதிகாரிகளால் அறிவுருத்தப்பட்டிருப்பதாக தெரிவித்ததையடுத்து உடனடியாக தனது சொந்த செலவில் அம்மக்களுக்கு முதற்கட்ட நடவடிக்கையாக 250 குடும்பங்களுக்கு 5லீற்றர் விகிதம் போத்தலில் அடைக்கப்பட்ட குடிநீர் போத்தல்கள் வழங்கப்பட்டன.

குறித்த தீ விபத்தினால் பாதிக்கப்பட்டு பூகொட பெப்பிலிவெல மஹாவிஹாரையில் தங்கியிருந்த மக்களை பார்வையிட்டதுடன் விஹாரையின் தலைவரான முஸ்லிம் சமய பண்பாட்டலுவல்கள் பிரதியமைச்சர் துலிப் விஜய சேகரவுடனும் கலந்துரையாடல்களில் ஈடுபட்டதுடன், அந்த மக்களுக்கான உடனடி தேவைகள் ஏற்ப்படும்போது தான் உதவுவதாகவும் வாக்குறுதியளித்தமை குறிப்பிடத்தக்கது.

காலி-போத்தல பிரதேசத்தில் இளைஞர் ஒருவர் கூரிய ஆயுதத்தால் தாக்கப்பட்ட கொலை செய்யப்பட்டுள்ளார்.போத்தல பிரதேசத்தைச் சேர்ந்த 28 வயதான இளைஞரே இவ்வாறு கொல்லப்பட்டுள்ளார்.

குறித்த இளைஞர் நேற்றைய தினம் பத்தேகம நீதவான் நீதிமன்றில் வழக்கொன்றில் ஆஜராகி மீண்டும் வீடு திரும்பிய வேளையில் அடையாளம் தெரியாத நபர்களினால் தாக்கப்பட்டு கொலை செய்யப்பட்டுள்ளதாக தெரிவிக்கப்பட்டுள்ளது.

உயிரிழந்தவர் இராணுவத்தில் பணிபுரிந்தவர் என்றும் போத்தல பொலிஸார் தெரிவித்துள்ளனர்.இந்தச் சம்பவம் தொடர்பான மேலதிக விசாரணைகளை போத்தல பொலிஸார் முன்னெடுத்து வருகின்றனர்.

காலி – இமாதுவப் பகுதியில் உள்ள நறுமணப் பொருட்கள் மற்றும் மூலிகைகள் விற்பனை செய்யும் கடை ஒன்றில், சுமார் 40,000 ரூபா பெறுமதியான பணத்தை மூன்று வெளிநாட்டு சுற்றுலாப் பயணிகள் நேற்று திருடிச் சென்றுள்ளனர்.இவர்களில் இரு பெண்கள் மற்றும் ஒரு ஆண் உள்ளடங்குவதாக கடை உரிமையாளர் பொலிஸாரிடம் தெரிவித்துள்ளார்.

குறித்த சுற்றுலாப் பயணிகள், நறுமணப் பொருட்கள் மற்றும் மூலிகைகள் கொள்வனவு செய்வதில் தமக்கு மிகுந்த ஆர்வம் எனக் கூறியதோடு, “எங்களிடம் வெளிநாட்டு நாணயங்கள் மாத்திரமே இருக்கின்றன, உள்நாட்டு நாணயங்களை எங்களுக்கு காண்பியுங்கள் என்றும் உரிமையாளரிடம் கேட்டுக் கொண்டபோது, அவரும் இதற்கு சம்மதித்துள்ளார்.கடையை நன்கு அவதானித்த வெளிநாட்டவர்கள் எங்களது பணத்தை உள்ளூர் பணமாக மாற்றி மீண்டும் கடைக்கு வருகின்றோம் என கூறி விட்டு கடையை விட்டுச் சென்றுள்ளனர்.

வெளிநாட்டு சுற்றுலாப் பயணிகள் கடையை விட்டுச் சென்ற பின் குறித்த உரிமையாளர் தன் பாதுகாப்பில் இருந்த 40,000 ரூபா காணாமல் போயுள்ளதாக பொலிஸாரிடம் முறைப்பாடு செய்திருந்தார்.சம்பவம் தொடர்பில் இமாதுவப் பொலிஸார் மேலதிக விசாரணைகளை முன்னெடுத்து வருகின்றனர்.

பல்வேறுபட்டவர்கள் சில பல கருத்துக்களைக் கூறினாலும் நியாயமான நிரந்தர தீர்வொன்றை ஏற்படுத்துவதற்குரிய முயற்சிகள் தற்போது நடைபெற்று வருவதாக எதிர்க்கட்சித் தலைவரும் தமிழ்த் தேசியக் கூட்டமைப்பின் தலைவருமான இரா.சம்பந்தன் தெரிவித்தார்.

எதிர்க்கட்சியான தமிழ்த் தேசியக் கூட்டமைப்பு நேற்று திங்கட்கிழமை இலங்கைக்கு விஜயம் செய்திருந்த பிரித்தானிய வெளிவிவகார மற்றும் பொதுநலவாய உயர் அதிகாரிகள் அடங்கிய குழுவினரை சந்தித்திருந்தது.இச்சந்திப்பின் பின்னர், இனப்பிரச்சினைக்கான தீர்வு குறித்து ஊடகவியலாளர்களால் எழுப்பப்பட்ட கேள்விகளுக்கு பதிலளிக்கையிலேயே மேற்கண்டவாறு தெரிவித்தார்.

அவர் மேலும் தெரிவிக்கையில்,

நியாயமான நிரந்தரமான அரசியல் தீர்வு இந்த வருட இறுதிக்குள் ஏற்படவேண்டும் என்பதே எமது நிலைப்பாடாகும்.அவ்விதமான தீர்வொன்றை ஏற்படுத்துவதற்கான முயற்சிகள் தற்போது நடைபெற்று வருகின்றன.வேறுபட்டவர்கள் சில பல கருத்துக்களைக் கூற முடியும். அவ்வாறான கருத்துக்களால் நாம் குழம்ப வேண்டிய அவசியமில்லை. நாம் நிதானமாக இருக்க வேண்டும். நிரந்தரமான தீர்வை நோக்கிச் செல்லவேண்டும்.

நாட்டில் வாழும் அனைத்து மக்களும் ஏற்றுக்கொள்ளக்கூடிய வகையிலும் தமிழ் மக்களுக்கும், தமிழ் பேசும் மக்களுக்கும் நியாயமான நிரந்தரமானதும் நாட்டிற்கு உகந்ததுமான தீர்வாகவும் அமையவேண்டும்.அதேநேரம் இனப்பிரச்சினைக்கான பேச்சுவார்த்தை குறித்து கருத்து வெளியிட்ட சம்பந்தன்,இனப்பிரச்சினைக்கான தீர்வு தொடர்பான பேச்சுவார்த்தை தற்போது ஆரம்பிக்கப்பட்டுள்ளது.

பாராளுமன்றம் ஒரு அரசியல் சாசன சபையாக மாற்றப்பட்டுள்ளது. வழிநடத்தும் குழு நியமிக்கப்பட்டிருக்கின்றது. உப குழுக்கள் நியமிக்கப்பட்டுள்ளன. நிபுணர்கள் நியமிக்கப்பட்டிருக்கின்றார்கள்.மக்களுடைய அபிப்பிராயத்தை அறிவதற்காக நியமிக்கப்பட்ட குழு தங்களுடைய அறிக்கையை சமர்ப்பித்துள்ளது. அனைத்து தரப்புக்களும் தமது பணிகளை முன்னெடுக்கின்றன.ஆகவே அவ்விடயம் தொடர்பான கருமங்கள் இடம்பெற்றுக் கொண்டிருக்கின்றன என்றார்.மேலும் சர்வதேச மட்டத்திற்கு பேச்சுவார்த்தைகளை கொண்டு செல்வது குறித்து தற்போது கூறமுடியாதெனவும் சுட்டிக்காட்டினார்.

அவிசாவெல்ல நகர மத்தியில் இளைஞர் ஒருவர் நேற்று முன்தினம் தீ வைத்துகொண்டதாக சமூக ஊடகங்களில் புகைப்படங்கள் தீயாக பரவி வருகின்றன.

காதல் தோல்வியே இதற்கு காரணம் என தெரிவிக்கப்படுகிறது. பலத்த தீக் காயங்களுக்கு இலக்கான குறித்த இளைஞன் பிரதேச வாசிகளின் உதவியுடன் வைத்தியசாலைக்கு எடுத்துச் செல்லப்பட்டதாக தகவல்கள் தெரிவிக்கின்றன.

திருக்கேதீஸ்வர மனிதப் புதைகுழி தொடர்பான வழக்கில் குற்றப்புலனாய்வுத் திணைக்களத்தினர் நீதிமன்றத்தில் முன்வைத்த பரிந்துரையை பிரதிவாதிகளின் சட்டத்தரணிகள் நிராகரித்துள்ளனர்.

மனிதப் புதைக்குழி தொடர்பான வழக்கு மன்னார் நீதவான் ஏ ஜி அலெக்ஸ்ராஜா முன்னிலையில் இன்று இடம்பெற்றது.

இதன் போது புதைக்குழியிலிருந்து கண்டெடுக்கப்பட்ட மனித எச்சங்கள் பகுப்பாய்விற்காக அமெரிக்காவின் புளோரிடா மாநிலத்திலுள்ள நிறுவனமொன்றுக்கு கொண்டு செல்ல வேண்டுமென குற்றப் புலனாய்வுத் திணைக்களத்தினர் நீதிமன்றத்தில் கோரிக்கை விடுத்துள்ளனர்.

தாம் பரிந்துரைத்த மூன்று இடங்களை நிராகரித்து குற்றப்புலனாய்வுத் திணைக்களம் அமெரிக்காவின் புளோரிடாவுக்கு அனுப்ப தீர்மானித்துள்ளமை குறித்து தமது எதிர்ப்பை வௌியிடுவதாக காணாமல் போனோர் சார்பில் ஆஜரான சட்டத்தரணிகளுள் ஒருவரான வி எஸ் நிரஞ்சன் கூறினார்.

இதேவேளை மனிதப் புதைகுழிக்கு அருகில் அடையாளங்காணப்பட்ட கிணறு சம்பந்தமான வழக்கும் மன்னார் நீதவான் முன்னிலையில் விசாரணைக்கு எடுத்துக் கொள்ளப்பட்டது.

தற்போது சட்ட வைத்திய அதிகாரி டீ ஏல் வைத்தியரத்தினவால் மனிதப் புதைகுழி அகழ்வுப் பணிகள் தொடர்பான ஒழுங்குவிதிகள் தயாரிக்கப்பட்டு வருவதுடன் அதற்கான அனுமதி கிடைத்தவுடன் அகழ்வுப் பணிகளை முன்னெடுக்க முடியும் என பொலிஸார் நீதிமன்றத்தில் அறிவித்துள்ளனர்.

இரு தரப்பு வாதங்களையும் கேட்டறிந்த நீதவான் இரண்டு நிறுவனங்கள் அறிக்கை மற்றும் மேலதிக அறிக்கைகளையும் நீதிமன்றத்தில் சமர்ப்பிக்குமாறு நீதவான் உத்தரவிட்டுள்ளார்.

அத்துடன் புதைகுழி அகழ்வுகள் தொடர்பான ஒழுங்குவிதிகள் மற்றும் இறுதித் தீர்மானம் தொடர்பிலும் நீதிமன்றத்தில் அறிவிக்குமாறும் பொலிஸாருக்கு உத்தரவிடப்பட்டுள்ளது.

இரண்டு வழக்குகளையும் எதிர்வரும் ஆகஸ்ட் மாதம் 01 ஆம் திகதி வரை ஒத்திவைப்பதற்கு நீதவான் உத்தரவிட்டார்.

-News First-