வடக்கு, கிழக்கு மாகாணத்தை இரண்டாக பிரிக்கும் தீர்ப்பை வழங்க போவதாக முன்னாள் பிரதம நீதியரசர் சரத் என் சில்வா, ஜனாதிபதி மகிந்த ராஜபக்ஷவிடம் கூறியிருந்தாகவும் அவர் அந்த தீர்ப்பை எதிர்த்ததாகவும் தெரியவந்துள்ளது.

முன்னாள் பிரதம நீதியரசர் வார இதழ் ஒன்றுக்கு வழங்கிய பேட்டியில் இந்த தகவலை வெளியிட்டுள்ளார்.

வடக்கு, கிழக்கு மாகாணத்தை இரண்டாக பிரிக்கும் தீர்ப்பை வழங்க தீர்மானித்த போது அழுத்தங்கள் கொடுக்கப்பட்டதா என ஊடகவியலாளர் எழுப்பிய கேள்விக்கு பதிலளித்துள்ள சரத் என் சில்வா,

வடக்கு, கிழக்கு பிரிக்கும் தீர்ப்பை மகிந்த ராஜபக்ஷ நேரடியாக எதிர்த்தார். வடக்கு கிழக்கு மாகாணத்தை இரண்டாக பிரிக்கும் தீர்ப்பு பற்றி அவருக்கு நான் தனிப்பட்ட ரீதியில் அறிவித்திருந்தேன்.

ஜனாதிபதி மகிந்த ராஜபக்ஷவை நான் சந்தித்தேன். மாகாணத்தை இரண்டாக பிரிக்கும் தீர்ப்பை கட்டாயம் வழங்க வேண்டும் என நான் கூறினேன்.

ஞாபகப்படுத்த வேண்டாம். பைத்தியமா, நாம் எப்படி யுத்தத்தை செய்வது என்று மகிந்த கூறினார். யுத்தத்தை செய்ய முடியாது என்பது வேறு. இந்த தீர்ப்பை இன்னும் நாட்களில் வழங்குவேன் என்று நான் அவரிடம் தெரிவித்தேன்.

இந்த தீர்ப்பின் பின்னர் மாவிலாறு அணை மூடப்பட்டதுடன் இடைவிடாத யுத்தம் ஆரம்பமானது என சரத் என் சில்வா இந்த பேட்டியில் தெரிவித்துள்ளார்.

மிஸ்டர் ஸ்ரீலங்கா ஆணழகன் போட்டியில் இம்முறை தமிழர் ஒருவர் தெரிவாகியுள்ளார். மிஸ்டர் ஸ்ரீலங்கா ஆணழகன் போட்டி நேற்று பண்டாரநாயக்க சர்வதேச மாநாட்டு மண்டபத்தில் இடம்பெற்றது.

தொடர்ச்சியாக 66வது வருடமாக இடம்பெறும் இந்த ஆணழகன் போட்டியில் 125 போட்டியாளர்கள் பங்குகொண்டனர். இந்தப் போட்டியில் கட்டான பலமேன் ஸ்போர்ட்ஸ் கழகத்தைச் சேர்ந்த அன்டன் புஸ்பராஜா சகல துறைகளிலும் வெற்றி பெற்றதன் பொருட்டு மிஸ்டர் ஸ்ரீலங்காவாக தெரிவானார்.

2ம் இடத்தை கடற்படையைச் சேர்ந்த சுபாஸ் சிறிவர்த்தனவும் மூன்றாம் இடத்தை இராணுவத்தைச் சேர்ந்த யூ.ஜே.அமிலவும் பெற்றுக்கொண்டனர்.

வெற்றி பெற்றவர்களுக்கான பரிசில்கள் நாடாளுமன்ற உறுப்பினர் ஆர். துமிந்த சில்வா, அமைச்சர் விநாயகமூர்த்தி முரளிதரன் மற்றும் விளையாட்டுத்துறை இயக்குனர் ரஞ்சனி ஜெயக்கொடி ஆகியோர் வழங்கி வைத்தனர்.

நாட்டு மக்கள் பாரிய பொருளாதார நெருக்கடிகளை எதிர்நோக்கி வருவதாக ஜனநாயகக் கட்சியின் தலைவர் சரத் பொன்சேகா தெரிவித்துள்ளார்.

மூன்று வேளை சாப்பிடும் குடும்பங்களின் எண்ணிக்கை நாட்டில் மிகவும் சொற்பளவானதே. 95 வீதமான மக்களினால் மூன்று வேளையும் சாப்பிட முடிவதில்லை.

பெரும் எண்ணிக்கையிலானவர்கள் உண்மையில் இரண்டு வேளை மட்டுமே உணவு உட்கொள்கின்றனர். இதுவே நாட்டின் தற்போதைய அபிவிருத்தி என அவர் குறிப்பிட்டுள்ளார்.

தன்னை ஆளுநர் பதவியில் இருந்து நீக்கக்கோரி, வடக்கு மாகாணசபை நிறைவேற்றிய தீர்மானத்தை மாகாண ஆளுனர் மேஜர் ஜெனரல் ஜி.ஏ.சந்திரசிறி நிராகரித்துள்ளார்.

தான் தமிழ்த் தேசியக் கூட்டமைப்புடன் நல்ல முறையிலேயே பணியாற்றி வருவதாகவும் அவர் கொழும்பு ஆங்கில வாரஇதழ் ஒன்றிடம் கூறியுள்ளார்.

மாகாணசபையில் இவர்களின் அழுத்தங்களுக்கு அடிபணிந்தோ, அச்சத்துடனோ பணியாற்ற முடியாது. ஒவ்வொரு எதிர்ப்பையும், அவர்கள் வெளிப்படுத்தும் கருத்தையும் நான் கேட்டுக் கொண்டிருந்தால் என்னால் வேலை செய்ய முடியாது.

எனக்கு தமிழ்த் தேசியக் கூட்டமைப்புடன் எந்த பிரச்சினையும் இல்லை. மாகாணசபையில் நாம் நல்ல முறையிலேயே பணியாற்றி வருகிறோம். நாம் ஒவ்வொருவரும் பேசிக்கொண்டால் எந்தப் பிரச்சினையும் இல்லை.

தமிழ்த் தேசியக் கூட்டமைப்பில் இருக்கும் குறிப்பிட்ட சில கட்சிகள் தான் பிரச்சினைகளை உருவாக்குகின்றன. அரசியலமைப்புக்கு விரோதமாக நான் எந்த தவறையும் இழைக்கவில்லை. எனவே அவர்கள் எப்படி என்னை நீக்க முடியும்.

நான் இராணுவத்தில் இருந்த போது நாட்டுக்கு நன்றாக சேவையாற்றினேன். அந்த மகத்தான சேவையை கௌரவிக்கும் வகையிலேயே என்னை வடக்கு மாகாண ஆளுனராக நியமிக்க சிறிலங்கா அதிபர் முடிவு செய்தார்.

இராணுவ சேவையில் இருந்து ஓய்வுபெற்ற பின்னர் இப்போது நான் ஒரு சிவிலியன். நான் இராணுவத்தில் இருந்து ஓய்வுபெற்ற பின்னர் ஒரு சிவிலியனாகவே இருக்கிறேன் என்பதை தமிழ்த் தேசியக் கூட்டமைப்பு கவனத்தில் கொள்ளவில்லை.

மனிதஉரிமைகள் விவகாரத்திலும் எமக்குள் எந்தப் பிரச்சினையும் இல்லை. எனவே என்னை நீக்குவதற்கு எந்தக் காரணத்தையும் என்னால் கண்டுபிடிக்க முடியவில்லை. என்னை நீக்குவதற்கு வடக்கு மாகாணசபையில் நிறைவேற்றப்பட்ட தீர்மானம் அரசியலமைப்புக்கு முரணானது.

அவர்களால் ஆளுனரை பதவி நீக்கும்படி தீர்மானம் நிறைவேற்ற முடியாது. மூன்று காரணங்களை முன்வைத்து மட்டுமே ஆளுனர் ஒருவரை நீக்கும் தீர்மானத்தை நிறைவேற்ற முடியும். ஊழல் செய்திருந்தால், மோசடி செய்திருந்தால், அல்லது அரசியலமைப்புக்கு முரணாக செய்ற்பட்டிருநதால் தான், அவ்வாறு கோர முடியும்.

நான் அவ்வாறு எந்தத் தவறையும் செய்யவில்லை. எனவே இந்த தீர்மானம் அரசியலமைப்புக்குட்பட்டது அல்ல என்றும் அவர் தெரிவித்துள்ளார்.

நாட்டின் பல பாகங்களில் இன்றும் இடி, மின்னலுடன் கூடிய மழை பெய்யக்கூடும் என எதிர்வு கூறப்பட்டுள்ளது.

குறிப்பாக தென் பகுதிகளில் அதிக மழை பெய்யலாம் எனவும் அது 100 மில்லி மீற்றர் வரை இருக்கலாம் எனவும் அனர்த்த முகாமைத்துவ மத்திய நிலையம் தெரிவித்துள்ளது.

இடி, மின்னலில் இருந்து பொது மக்கள் தங்களை பாதுகாத்துக் கொள்ள வேண்டும் என அறிவுறுத்தப்பட்டுள்ளது.

சிங்கள மற்றும் தமிழ் மக்களுக்கிடையில் நல்ல தொடர்புகளை ஏற்படுத்துவதற்காக, முதலில் சிங்கள – தமிழ் உறவு முறை தொடர்பில் இரு இனங்களுக்கும் தெளிவுப்படுத்த வேண்டும் என தமிழர் விடுதலைக் கூட்டணியின் தலைவர் வீ. ஆனந்தசங்கரி தெரிவித்துள்ளார். அவர் மேலும் தெரிவிக்கையில்..

தெற்கில் கோஷமிடும் சில அரசியல்வாதிகள் இலங்கை சிங்களவர்களின் நாடு என்று கூறுகின்றனர். எனினும் 700 பேருடன் இலங்கைக்கு வந்த இளவரசர் விஜயன் மதுராபுரியை சேர்ந்த தமிழ் பெண்ணை மணமுடித்தார்.

இதனால் சிங்களவர்கள் தமிழர்களில் பாதி. மகாவம்சத்தை அடிப்படையாக கொண்டே நான் இதனை கூறுகிறேன். இதனால் சிங்களவர்கள் தமிழர்களுக்கு எதிராகவும் தமிழர்கள் சிங்களவர்களுக்கு எதிராகவும் செயற்பட முடியாது என்றார்.

இலங்கையில் சுமார் ஆயிரத்து 500 ஆபாச இணையத்தளங்கள் தடை செய்யப்பட்டுள்ளதாக இலங்கை தொலைத் தொடர்புகளை ஒழுங்குப்படுத்தும் ஆணைக்குழுவின் பணிப்பாளர் அனுஷ பெல்பிட்ட தெரிவித்தார்.

அண்மையில் சில தினங்களுக்கு முன்னதாக இப்படியான நான்கு இணையத்தளங்கள் தடை செய்யப்பட்டன.

ஒரு ஆபாச இணையத்தளம் தடைசெய்யப்படும் போது, இது போன்ற பல ஆபாச இணையத்தளங்கள் புதிதாக ஆரம்பிக்கப்படுகின்றன. இதனால் தடை செய்யும் நடவடிக்கைகளை மேற்கொள்வதிலும் சிரமங்கள் இருப்பாக பெல்பிட்ட குறிப்பிட்டார்.