உலகக் கிண்ண டி20 பெண்களுக்கான போட்டியில் நேற்று தென்னாபிரிக்க மற்றும் இலங்கை அணிகள் மோதின. பெங்களூரு சின்னசாமி மைதானத்தில் நடைபெற்ற இந்தப் போட்டியில் நாணய சுழற்சியை வென்ற இலங்கை அணி முதலில் துடுப்பெடுத்தாடியது.

இலங்கை அணி 20 ஓவர்கள் முடிவில் 7 விக்கெட் இழப்பிற்கு 114 ஓட்டங்கள் எடுத்தது. அந்த அணியில் தலைவர் ஜெயங்கானி 52 ஓட்டங்கள் எடுத்து அசத்தினார். தென்னாபிரிக்கா தரப்பில் காப் மற்றும் லூஸ் இரு வீராங்கனைகளும் தலா 2 விக்கெட்டுக்களை கைப்பற்றினர்.

பின்னர் விளையாடிய தென்னாபிரிக்கா அணி 20 ஓவர்கள் முடிவில் 7 விக்கெட் இழப்பிற்கு 104 ஓட்டங்கள் மட்டுமே எடுத்தது. தொடக்க வீராங்கனைகளான நியேகெர்க் 24 ஓட்டங்களும், செட்டி 26 ஓட்டங்களும் எடுத்தனர். மற்றவர்கள் சொற்ப ஓட்டங்களில் ஆட்டமிழந்தனர். இதனால் இலங்கை அணி 10 ஓட்டங்கள் வித்தியாசத்தில் வெற்றி பெற்றது.

சிறப்பாக விளையாடி அரைசதம் அடித்த இலங்கை அணி வீராங்கனை ஜெயங்கானி ஆட்ட நாயகியாக தேர்வு செய்யப்பட்டார். இரு அணிகளும் அரையிறுதி சுற்றுக்கு தகுதி பெறவில்லை.

இதனிடையே, ஆண்கள் பிரிவில் தென் ஆப்பிரிக்கா அணியிடம் இலங்கை அணி தோல்வியுற்றது குறிப்பிடத்தக்கது.

கிரிக்கெட் போட்டியின் போது சூதாட்டத்தில் ஈடுபட்டதாக கூறப்படும் ஏழ்வர் இந்தியாவின் ஹைதராபாத்தில் வைத்து கைதுசெய்யப்பட்டுள்ளனர்.

இலங்கை மற்றும் தென்னாபிரிக்காவுக்கு இடையில் நேற்று இடம்பெற்ற போட்டியின் போது, இவர்கள் சூதாட்டத்தில் ஈடுபட்டுள்ளதாக, இந்திய ஊடகச் செய்திகள் தெரிவிக்கின்றன.

மேலும், சந்தேகநபர்கள் வசமிருந்து 11 இலட்சத்து 12,500 இந்திய ரூபாய்கள், கையடக்கத் தொலைபேசிகள் மற்றும் மோட்டார் சைக்கிள்களும் பொலிஸாரால் கைப்பற்றப்பட்டுள்ளன.

இதேவேளை, கைதானவர்களில் பொறியியல் மாணவர்கள் இருவரும் அடங்குவதாக தெரியவந்துள்ளது.

ஹைதராபாத்தின் குஷய்குடா நகரிலுள்ள சூதாட்ட விடுதி ஒன்றில் வைத்து அந்த நாட்டு பொலிஸார் மேற்கொண்ட சுற்றி வளைப்பின் போதே, இவர்கள் சிக்கியுள்ளனர்.

அத்துடன், இதனுடன் தொடர்புடைய ஏனையவர்கள் குறித்தும் விசாரணைகள் ஆரம்பிக்கப்பட்டுள்ளன.

உலகக்கிண்ண கிரிக்கெட் போட்டியின் முதல் பந்தில் ஆட்டமிழந்தவர்கள் அனேகர். ஒரு ஓட்டம் பெற்றால் வெற்றி எனும் நிலையில் அதை ஓடி எடுக்கமுடியாமல் ஆட்டமிழந்து அணியின் தோல்விக்கு காரணம் எனக் குற்றம் சாட்டப்படுபவர்களும் ஏராளமாக உள்ளனர். ஆனால் கைகளே இல்லாமல், ஒரு கிரிக்கெட்அணியின் தலைவராக பரிணமிப்பவர் தான் அமீர் ஹுசைன்.

ஜம்மு-காஷ்மீர் மாநிலத்தில் மாற்றுத்திறனாளிகளின் கிர்க்கெட் அணியின் தலைவராக அமீர் ஹுசைன் செயற்படுகின்றார். எட்டு வயதில் வீட்டில் இருந்த மரமறுக்கும் இயந்திரத்தில் சிக்கி ஏற்பட்ட விபத்தில் இரண்டு கைகளையும் அமீர் ஹுசைன் இழந்தாலும் உறுதியை இழக்கவில்லை.

கைகள் இல்லாமல் அண்டை-அயலாரின் பரிகாசங்களுக்கு ஆளான அவர், விடாமுயற்சியையும் தன்னம்பிக்கையையும் முதலீடாக்கி, வெற்றி எனும் இலக்கை நோக்கி பயணிக்கத் தொடங்கினார்.

இரண்டு கைகளையும் இழந்த நிலையில் யார் உதவியும் இன்றி வாழவேண்டும் என்ற உறுதிப்பாட்டின் காரணமாக சாப்பாட்டைக் கூட நாய் நக்கிச் சாப்பிடுவது போல உண்பதற்கு பழகிக் கொண்டதாகவும், தனது பாட்டி காலில் கரண்டியை பிடித்து சாப்பிடுவதற்கு பழக்கிக் கொடுத்ததாகவும் கூறுகிறார் ஹுசைன்.

கைகள் போனாலும் கால்களால் வெற்றியீட்ட முடியும் என பாட்டி கொடுத்த தன்னம்பிக்கையே கிரிக்கெட் வீரராக உருவாக உறுதுணையாக இருந்தது எனக் கூறும் அவர், காலால் பந்து வீசக் கற்றுக்கொண்டு விக்கெட்டுகளை வீழ்த்தி, ஒரு அணியை வழிநடத்தும் அளவுக்கு இப்போது முன்னேறியுள்ளதாக பெருமையாகக் கூறுகிறார்.

எந்த அளவுக்கு கைகளால் பந்தை வேகமாக வீசமுடியுமோ அதே அளவுக்கு தன்னால் காலால் பந்தை வீசமுடியும் என அமீர் ஹுசைன் கூறுகிறார். ஆடுகளத்தில் பந்துகளைத் தடுப்பதற்கு தனது கால்களையும் உடலையும் செவ்வனே பயன்படுத்தவும் அவர் கற்றுக்கொண்டுள்ளார்.