நாட்டில் “மின்வெட்டு” என்ற பேச்சுக்கே இடமில்லை. 24 மணிநேரமும் தொடர்ச்சியாக மக்களுக்கு மின்சாரம் வழங்கப்படும் என உறுதியளிக்கும் அரசாங்கம். அவசரத் தேவைகளுக்கு பயன்படுத்த “ஜெனரேட்டர்”களை (மின்பிறப்பாக்கிகளை) வெளிநாடுகளிலிருந்து கொள்வனவு செய்வதற்காக நாளைய அமைச்சரவைக் கூட்டத்தில் விசேட பத்திரமொன்றை சமர்ப்பிக்கவுள்ளதாகவும் அரசு அறிவித்தது.

கொழும்பில் அரசாங்க தகவல் திணைக்களத்தில் இன்று செவ்வாய்க்கிழமை இடம்பெற்ற ஊடகவியலாளர் மாநாட்டில் உரையாற்றும் போதே அரசு இதனை அறிவித்தது.

இங்கு உரையாற்றிய மின்வலு மற்றும் புதுப்பிக்கத்தக்க சக்தி தொடர்பான பிரதியமைச்சர் அஜித் பீ பெரேரா மேலும் உரையாற்றுகையில்,

இன்று நாட்டில் ஒரு புறம் வரட்சி அத்தோடு மின்மாற்றின் பழுதடைவு, சில மின்மாற்றிகள் தீப்பிடிப்பு, பராமரிப்பு தொடர்பான நெருக்கடிகள் உள்ளன. இவ்வாறானதொரு சூழ்நிலையில் மின்சாரத்தை தொடர்ச்சியாக வழங்க முடியாது. “மின்வெட்டை” அமுல்படுத்த வேண்டும் என அதிகாரிகள், பொறியியலாளர்கள் ஆலோசனைகளை வழங்கினர்.

இதில் உண்மையுள்ளது மறுப்பதற்கில்லை. ஆனால் மக்களுக்கு மின்சாரத்தை தடையின்றி வழங்க வேண்டியது அரசின் கடமையாகும்.
எனவே அதற்காக அரசாங்கம் எந்தத் தீர்மானத்தையும் எடுக்க தயாராகவே உள்ளது.

ஜனாதிபதியும் பிரதமரும் அரசும் இது தொடர்பில் அதிக கவனம் செலுத்தி வருகின்றது. எனவே எந்தக் காரணம் கொண்டும் நாட்டில் மின்வெட்டை அமுல்படுத்த வேண்டிய அவசியம் இல்லை.

அத்தோடு நல்லாட்சி மீது கடவுளும் கருணை காட்டியுள்ளார். நீர் தேக்கப் பிரதேசங்களில் நேற்று திங்கட்கிழமை நல்ல மழை பெய்திருக்கின்றது.

மின்சாரத்துறையில் இயந்திரங்கள் பராமரிப்பு, குறைபாடுகள் உட்பட பல்வேறு பிரச்சினைகள் உள்ளன, நெருக்கடிகள் இல்லாமல் இல்லை.

அவசரத் தேவைக்காக தற்காலிக அடிப்படையில் வெளிநாடுகளிலிருந்து மின் பிறப்பாக்கிகளை (ஜெனரேட்டர்கள்) கொள்வனவு செய்யவுள்ளோம்.

அதற்காக நாளை புதன்கிழமை இடம்பெறும் அமைச்சரவை கூட்டத்திற்கு விசேட அமைச்சரவை பத்திரமொன்று சமர்ப்பிக்கப்படவுள்ளது.

எனவே இவற்றையெல்லாம் தற்போது பழுதுபார்த்து வருகின்றோம். எனவே சில சில நிமிடங்கள் மின்சாரம் இல்லாமல் போகலாம். ஆனால் மின்வெட்டு அமுல்படுத்தப்படமாட்டாது என்றும் பிரதியமைச்சர் அஜித் பி.பெரேரா தெரிவித்தார்.

-வீரகேசரி-

 
எனது மகளை இரானுவ உடையில் வந்தவர்கள் தான் பிடித்துச் சென்றனர் என காசிப்பிள்ளை ஜெரோனியின் தாயார் காணாமல் போனோர் தொடர்பான விசாரணைகளை நடத்தும் ஜனாதிபதி ஆணைக்குழுவிடம் சாட்சியமளித்துள்ளார்.

காணாமல் போனோர் தொடர்பாக விசாரணைகளை நடத்தும் மக்ஸ்வெல் பரணகம தலைமையிலான ஜனாதிபதி ஆணைக்குழுவின் விசாரணைகள் இன்று (29.03) வவுனியா பிரதேச செயலகத்தில் இடம்பெற்ற போதே அவர் இவ்வாறு சாட்சியமளித்தார். அவர் தனது சாட்சியத்தில் தெரிவிக்கையில்..

நாங்கள் 2009ம் ஆண்டு நடந்த செல்தாக்குதல் காரணமாக இரட்டைவாய்க்கால் புதுமாத்தன் பகுதிக்கு இடம்பெயர்ந்த சமயத்தின் எனது கணவரை 2009.03.03 விடுதலைப் புலிகள் பணிவேலைக்காக அழைத்துச் சென்றனர். அதன் பின் கடுமையான செல்த்தாக்குதல் காரணமாக எனது பிள்ளைகளின் பாதுகாப்பு கருதி இடம்பெயர்ந்தோம்.

அதன் போது எனது மூத்தமகள் காசிப்பிள்ளை ஜெரோமியை (19வயது) இரானுவ உடையுடன் வந்தவர்கள் பிடித்தனர். நான் எவ்வளவே அழுதேன் ஆனால் எனது மகளை அழைத்துச் சென்றுவிட்டனர். எனது மகளை பிரிந்து வாடினேன். எனது மகளை தேடியபடியே திரிந்தேன்.

விடுதலைப் புலிகளினால் பிடித்துச்செல்லப்பட்ட எனது கணவர் பணிவேலைக்கு அவரை விட்டபோது அங்கிருந்து தப்பித்து வந்து எம்மை தேடிப்பிடித்து எம்முடன் இணைந்தார்.

2009.04ம் மாதம் வெள்ள முள்ளிவாய்க்காலுக்கு வந்தோம் 2009.05.16 இராணுவம் எம்மை முகாமிற்கு வருமாறு வற்புறுத்தினர். எனது மகள் இல்லாமல் நான் வர மாட்டேன் எனத் தெரிவித்தேன். அதன்பின் வற்புறுத்தல் காரணமாக எம்மை அழைத்துச் சென்று செட்டிக்குளம் இராமநாதன் முகாமில் அடைத்தனர்.

2009.12.25ம் திகதி கனகராயன்குளம் பாடசாலை முகாமிற்கு எம்மை இடமாற்றி 2010.01.15ம் திகதி எம்மை எமது இடத்திற்கு விட்டனர்.

எனது மகளைக் காணவில்லை என தினமும் அழுது கொண்டிருந்தேன். 2015.01.07 ஜனாதிபதியின் தேர்தல் பிரச்சாரத்தின் போது எனது மகன் தற்போதைய ஜனாதிபதி மைத்திரிபால சிறிசேனவுடன் இருந்த தேர்தல் பிரச்சாரத்துண்டினை காண்டேன்.

எனது மகள் ஜனாதிபதியுடன் இருக்கும் புகைப்படம் பற்றி உடனே தமிழ்த் தேசியக் கூட்டமைப்பினருக்கு அறிவித்தேன். 3ம் மாடிக்கும் என்னை அழைத்தனர். 8 மணித்தியாலங்களுக்கு மேல் என்னிடம் விசாரனை மேற்கொண்டனர்.

நான் ஒன்றுதான் தெரிவித்தேன் அது எனது மகள் தான் என. இன்னும் எனது மகள் கிடைக்கவில்லை. எனது மகள் இறக்கவில்லை உயிருடன் தான் இருக்கின்றாள் என்ற போதும் எனது மகள் எங்கே? இறுதியாக உங்களிடம் வந்துள்ளேன் என கண்ணீர் மல்க சாட்சியமளித்தார்.

மயிலை வேட்டையாடிய நபர் தொடர்பில் நேற்று இணைய செய்திகளில் பரவலாக பேசப்பட்டது. இதேவேளை, சந்தேகநபர் தொடர்பில் தகவல்களை வன ஜீவராசிகள் திணைக்களம் பொதுமக்களிடம் கோரியிருந்தது.

இதன்பிரகாரம், குறித்த நபர் தங்கொட்டுவை பிரதேசத்தின் பிரபல வர்த்தகர் ஒருவரின் மருமகன் என்ற விடயம் தெரியவந்துள்ளது.

குறித்த சந்தேகநபர் 2015ஆம் ஆண்டு ஆகஸ்ட் மாதம் ஆனமடுவ பிரதேசத்தில் சட்டவிரோத துப்பாக்கியை பயன்படுத்தி மயிலை வேட்டையாடியுள்ளதுடன், அதை புகைப்படம் எடுத்து தனது பேஸ்புக்கில் பதிவேற்றியுள்ளதாக ஆரம்பக்கட்ட விசாரணைகள் மூலம் தெரியவந்துள்ளதாக குறிப்பிடப்பட்டுள்ளது.

அத்துடன், இந்த நபர் இத்தாலியிருந்து வந்தவர் என்பதுடன் குறித்த நபர் தொடர்பான மேலதிக தகவல்களை வன ஜீவராசிகள் திணைக்களம் திரட்டியுள்ளதாகவும் குறிப்பிடப்பட்டுள்ளது.

மஹரகம பிரதேசத்தில் பல பகுதிகளில் நிர்வாண கோலத்தில் அலைந்து திரிந்த பெண்ணொருவரை இன்று முற்பகல் மஹரகம பொலிஸார் கைது செய்துள்ளனர்.

மஹரகம இளைஞர் சேவை மன்றம், புற்றுநோய் வைத்தியசாலை உள்ளிட்ட இடங்களிலேயே இப்பெண் பிறந்த மேனியுடன் அழைந்து திரிந்துள்ளார்.

இது தொடர்பில் பொலிஸாருக்கு கிடைத்த தகவலையடுத்து, குறித்த பெண் இருந்த இடத்துக்கு சென்ற பெண்பொலிஸார், அவரைக் கைது செய்துள்ளனர்.

அப்பெண்ணை கைது செய்யும் போது, அவரது உடலில் சட்டையொன்று போர்த்தப்பட்ட நிலையில் காணப்பட்டுள்ளார்.

குறித்த பெண் எல்பிட்டிய, பிட்டிகலயைச் சேர்ந்த பெண் திருமணமானவர் எனவும் இவரை வைத்திய பரிசோதனைக்கு உட்படுத்த நடவடிக்கை எடுத்துள்ளதாகவும் பொலிஸார் மேலும் தெரிவித்தனர்.

‘பகிடி’ வார்த்தைப் பிரயோகங்கள் தொடர்ந்தமையினால், இருவருக்கிடையில் முருகல் நிலை உருவாகி, கத்திக்குத்துவாக மாறி ஒருவர் ஸ்தலத்தில் பலியான சம்பவமொன்று, கொஸ்லந்தை நகரில் நேற்று மாலை இடம்பெற்றுள்ளது.

இச்சம்பவத்தில் பி.கே. அமரசேக்கர என்ற 45 வயது நிரம்பிய குடும்பஸ்தரே பலியானவராவார். இது குறித்து, கொஸ்லந்தை பொலிஸ் நிலையப் பொறுப்பதிகாரி சுனில் தயாசிரி தலைமையிலான குழுவினர் மேற்கொண்ட விசாரணையடுத்து, கொஸ்லந்தையைச் சேர்ந்த ஏ.சுப்ரமணியம் என்பவரைக் கைது செய்துள்ளனர்.

குறித்த சந்தேக நபரிடமிருந்து கொலைக்கு பயன்படுத்திய கத்தியும் மீட்கப்பட்டுள்ளதாகவும் பொலிஸார் தெரிவித்துள்ளனர்.

கொஸ்லந்தை வைத்தியசாலை சட்ட வைத்திய அதிகாரியின் விசாரணைக்கமைய, கத்தியினால் குத்தியமையினாலேயே, மரணம் சம்பவித்துள்ளமை தெரியவந்துள்ளதாகவும் பொலிஸார் குறிப்பிட்டுள்ளனர்.

இக்கொலையைத் தொடர்ந்து, கொஸ்லந்த பகுதியில் பெரும் பதட்ட நிலை தோன்றியுள்ளதாக பொலிஸார் சுட்டிக்காட்டியுள்ளனர்.

மேலும், இந்த சம்பவம் தொடர்பான மேலதிக விசாரணைகளை பொலிஸார் மேற்கொண்டுள்ளனர்.

நாட்டில் ஏற்பட்டுள்ள சீரற்ற காலநிலையால் மரக்கறி செய்கை பாதிப்படைந்துள்ளமையால் மரக்கறி வகைகளின் விலை இரட்டிப்பாக அதிகரிக்க தொடங்கியுள்ளதாக வர்த்தகர்கள் சுட்டிக்காட்டுகின்றனர்.

இந்த நிலை தொடர்ந்தால் பண்டிகை காலத்தில் பாதிப்புக்களை சந்திக்க நேரிடும் எனவும் வர்த்தகர்கள் கூறுகின்றனர்.

இன்று பிற்பகல் நாட்டின் பல பகுதிகளில் மழையுடன் கூடிய காலநிலையை எதிர்பார்க்கலாம் என, வானிலை அவதான நிலையம் தெரிவித்துள்ளது.

எதுஎவ்வாறு இருப்பினும் நிலவும் உஷ்ணமான காலநிலையில் மாற்றத்தை எதிர்பார்க்க முடியாது என, வானிலை அவதான நிலையத்தின் பணிப்பாளர் லலித் சந்திரபால குறிப்பிட்டுள்ளார்.