பண்டாரவளை – பூணாகலை பகுதியிலுள்ள பாடசாலையொன்றில் வழங்கப்பட்ட விற்றமின் மாத்திரைகளை உட்கொண்ட மாணவர்கள் தொடர்ந்தும் வைத்தியசாலையில் சிகிச்சை பெற்று வருகின்றனர்.ஒவ்வாமை காரணமாக வாந்தி, மயக்கம் போன்றவற்றால் நேற்று 93 மாணவர்கள் பண்டாரவளை ஆதார வைத்தியசாலையில் சேர்க்கப்பட்டனர்.

எவ்வாறாயினும் மாணவர்கள் ஆபத்தான நிலையில் இல்லை என வைத்தியசாலை வட்டாரங்கள் தெரிவிக்கின்றன.சுகாதார வைத்திய அதிகாரிகளின் ஆலோசனைக்கு அமைய குறித்த பாடசாலை மாணவர்களுக்கு நேற்று காலை உணவுக்குப் பின்னர் விற்றமின் மாத்திரைகள் வழங்கப்பட்டுள்ளதாக பொலிஸார் குறிப்பிட்டனர்.

தரம் 8,9,10 இல் கல்வி பயிலும் மாணவர்களுக்கே அயன் மாத்திரைகள் உள்ளிட்ட விற்றமின்கள் வழங்கப்பட்டுள்ளதாக தெரிவிக்கப்படுகின்றது.இதனையடுத்து நேற்று பிற்பகல் சுகயீனமுற்ற நிலையில் மாணவர்கள் வைத்தியசாலையில் அனுமதிக்கப்பட்டதாக பொலிஸார் தெரிவிக்கின்றனர்.

பண்டாரவளைப் பொலிஸார் இது தொடர்பான விசாரணைகளை மேற்கொண்டு வருவதுடன், மாணவர்களுக்கு வழங்கப்பட்ட விற்றமின் மாத்திரைகளின் மாதிரிகளை, வைத்திய ஆய்வுபிரிவிற்கும் அனுப்பியுள்ளனர்.

இம்மாத்திரைகள் 2018ம் ஆண்டுவரை பாவிக்கலாமென்றும் கால எல்லை குறிப்பிடப்பட்டிருப்பதும் குறிப்பிடத்தக்கது.

இது பற்றி வித்தியாலய அதிபர் ரெ.மோகனிடம் வினவிய போது, ‘’உணவு உண்ட பின்னரே, இம்மாத்திரைகளை விழுங்க வேண்டும். ஆனால், மாணவ மாணவிகள் உணவு உண்ணாமலேயே மாத்திரைகளை விழுங்குவதும் நோய்வாய்ப்படுவதற்கு ஒரு காரணமாகும்’’ என்று கூறினார்.இந்த சம்பவம் தொடர்பில் மேலதிக விசாரணைகளை பண்டாரவளை பொலிஸார் முன்னெடுத்து வருகின்றனர்.

இளம் பௌத்த பிக்கு (வயது – 23) ஒருவர் கை, கால்கள் கட்டப்பட்டு வாயில் துணி அடைக்கப்பட்ட நிலையில் அம்பலாங்கொடை ரன்தொம்பே பிரதேசத்திலுள்ள பாழடைந்த வீடொன்றின் அருகிலிருந்த பற்றைக் காடொன்றிலிருந்து மீட்கப்பட்டுள்ளார்.

நேற்றுக் காலை அம்பலாங்கொடை பொலிஸாரால் மீட்கப்பட்ட இவர், உடனடியாக பலப்பிட்டிய வைத்தியசாலையில் சேர்க்கப்பட்டதாகவும், மீட்கப்பட்ட சமயம் அவர் பேசமுடியாத நிலையில் இருந்ததாகவும் தெரிவிக்கப்படுகின்றது.

ஆரம்ப சிகிச்சையின் பின் பொலிஸாருக்கு வாக்குமூலம் கொடுத்த அவர், நேற்றுமுன்தினம் இரவு தான் தங்கியிருந்த அக்குரஸ்ஸ, சலகொட போதிராஜாராம விகாரைக்குள் ஆயுதபாணிகளாகப் புகுந்த ஐவர் தன்னைக் கடத்தி வாகனமொன்றில் ஏற்றியதாகவும், அங்கிருந்து குறிப்பிட்ட தூரம் சென்றபின் தன்னை இறக்கி கை, கால்களைக் கட்டியதுடன், வாயில் துணியை அடைத்து பற்றைக்காட்டில் போட்டுவிட்டுச் சென்றதாகவும், அவர்கள் போவதற்கு முன் தான் தேவையில்லாத விடயங்களில் மூக்கை நுழைத்தால் கொலை செய்யப்படுவேன் என மிரட்டி விட்டுச் சென்றதாகவும் தெரிவித்தார்.

கொழும்பு காலி பிரதான வீதியில் அம்பலாங்கொடை, ரன்தொம்பே பிரதேசத்திலுள்ள பாழடைந்த வீட்டுக்குப் பக்கத்தில் இந்தப் பிக்கு கிடந்ததைக் கண்ட இளைஞர் ஒருவர் அம்பலாங்கொடை பொலிஸ்நிலையத்துக்குத் தெரிவித்த தகவலொன்றின் அடிப்படையிலேயே இவர் மீட்கப்பட்டார்.

இவரைக் கடத்தியவர்கள் பற்றிய எவ்வித தகவலும் இதுவரை கிடைக்கவில்லை எனவும், மேலதிக விசாரணைகள் நடைபெற்று வருகின்றன எனவும் அம்பலாங்கொடை தலைமையகப் பொலிஸ் பொறுப்பதிகாரி டபிள்யூ.ஏ.மஹிந்த தெரிவித்தார்.

திருக்கோவில் பிரதேச செயலகப் பிரிவிலுள்ள விநாயகபுரம் பகுதியில் 14 வயது சிறுமி ஒருவரை பாலியல் துஷ்பிரயோகம் செய்ததாக கூறப்படும் நபர் கைதுசெய்யப்பட்டுள்ளார். சந்தேகநபரான 31 வயதுடைய குடும்பஸ்தரை இன்று மாலை கைதுசெய்துள்ளதாக பொலிஸார் குறிப்பிட்டுள்ளனர்.

அயல் வீட்டில் வசிக்கும் குறித்த சிறுமியை சந்தேகநபர் ஆசைவார்த்தை காட்டி கடந்த ஜனவரி மாதம் 16ம் திகதி பிறிதொரு இடத்துக்கு அழைத்துச் சென்று பாலியல் துஷ்பிரயோகத்தில் ஈடுபடுத்தியுள்ளார் எனவும் தெரியவந்துள்ளது.

இதனையடுத்து நேற்று வியாழக்கிழமை (03) மாலை 03.00 மணியளவில் குறித்த நபர் சிறுமியுடன் உரையாடிக் கொண்டிருந்தபோது சிறுமியின் தாயார் சந்தேகம் கொண்டு வினவியுள்ளார். இதனையடுத்து சிறுமி தனக்கு நடந்த விடயத்தை தெரிவித்ததையடுத்து பெற்றோர் பொலிஸ் நிலையத்தில் முறைப்பாடு செய்துள்ளனர்.

இதன்படி குறித்த நபரை கைதுசெய்துள்ளதுடன் பாதிக்கப்பட்ட சிறுமி திருக்கோவில் வைத்தியசாலையில் அனுமதிக்கப்பட்டுள்ளதாக பொலிசார் தெரிவித்தனர். இது தொடர்பாக திருக்கோவில் பொலிசார் மேலதிக விசாரணைகளை மேற்கொண்டுவருகின்றனர்.

களனி கங்கையில் கழிவுகளை கொட்டியது சம்பந்தமாக விசாரணைக்கு எடுத்துக் கொள்ளப்பட்ட வழக்கில் குற்றவாளியாக இணங்காணப்பட்ட பாதணி தயாரிப்பு நிறுவனத்திடம் தண்டம் விதிக்கப்பட்டுள்ளது.

மாளிகாவத்தை நீதவான் நீதிமன்றில் குறித்த வழக்கு விசாரணைக்கு எடுத்துக் கொள்ளப்பட்டதுடன் குறித்த நிறுவனம் 250,000 ரூபா தண்டம் செலுத்த வேண்டும் என உத்தரவிடப்பட்டுள்ளது.