அரிய வகை மீன் இனம் ஒன்று புத்தளம் வாவியில் மீன்பிடியில் ஈடுபட்ட மீனவர்களினால் பிடிக்கப்பட்டுள்ளது.

மீன் பிடிப்பதற்காக சென்ற மீனவர்களின் வலையிலேயே பாரிய பாம்பினைப் போன்ற வடிவிலான இந்த மீன் பிடிபட்டுள்ளது.

‘குழுவி’ என அழைக்கப்படும் இந்த மீன் இனம் மிக அரிதாகவே காணப்படுவதாகவும் , இந்த மீன் வகையினை ‘சேனைப் பாம்பு’ என மறு பெயர் கொண்டும் அழைப்பதாக தெரிவிக்கப்பட்டுள்ளது.

யாழ்ப்பாணம் மானிப்பாய் பகுதியில் பாடசாலை மாணவி ஒருவர் கடத்தப்பட்டு பாலியல் துஷ்பிரயோகத்துக்கு உட்படுத்தப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

உயர்தரத்தில் கல்வி கற்றுவரும் குறித்த மாணவி நேற்றுமுன்தினம் பாடசாலையில் நடக்கவுள்ள விளையாட்டுப் போட்டிக்காகப் பயிற்சியில் ஈடுபட்டிருந்துள்ளார்.

இதன்பின்னர் குறித்த மாணவியை அவரது ஒன்று விட்ட சகோதரன் ஒருவர் முச்சக்கர வண்டியில் அழைத்துச் சென்றதாகவும் அதனையடுத்து மாணவி தொடர்பாக எந்த தகவல் எதுவும் தெரியாத நிலை காணப்பட்டதாவும் தெரிவிக்கப்படுகிறது.

இந்நிலையில் குறித்த மாணவி மயக்கமடைந்து அநாதரவாக யாழ்ப்பாணம் கோட்டைக்கு அண்மையான வீதியில் கிடந்துள்ளார். அவ்வாறு கிடந்த மாணவியை அப்பகுதிக்கு சென்றவர்கள் கண்டு யாழ்ப்பாணம் வைத்தியசாலையில் சேர்த்துள்ளனர்.

வைத்திய பரிசோதனைகளில் அவர் பாலியல் துஷ்பிரயோகத்துக்கு உட்படுத்தப்பட்டமை தெரிய வந்துள்ளதாக வைத்தியசாலைத் தகவல்கள் தெரிவிக்கின்றன. இது குறித்து விசாரணைகளை மேற்கொண்டுள்ள மானிப்பாய் பொலிஸார் இருவரைக் கைது செய்துள்ளனர் எனத் தெரிவிக்கப்படுகின்றது.

பாதிக்கப்பட்ட சிறுமியின் குடும்பத்தினர் பொலிஸில் முறைப்பாடு செய்ததை அடுத்து, சிறுமியின் ஒன்றுவிட்ட சகோதரர் கைது செய்யப்பட்டுள்ளார்.

பாதிக்கப்பட்ட சிறுமி யாழ் போதனா வைத்தியசாலையில் சிகிச்சை பெறுவதாகவும் பொலிஸார் குறிப்பிட்டனர். கைது செய்யப்பட்டுள்ள சந்தேகநபரை நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளது.

இச்சம்பவம் தொடர்பில் மானிப்பாய் பொலிஸார் மேலதிக விசாரணைகளை மேற்கொண்டு வருகின்றனர்.

மீனவர்கள் பிரச்சினைக்கு தீர்வு காண இலங்கையும் இந்தியாவும் இணைந்து செயற்படுவதாகவும் ஆனால் இலங்கை கடல் எல்லைக்குள் அத்துமீறும் எவர் மீதும் துப்பாக்கிச்சூடு நடத்த இலங்கை கடற்படையினருக்கு அதிகாரம் உள்ளதென பிரதமர் ரணில் விக்ரமசிங்க மீண்டும் தெரிவித்துள்ளார்.

இந்தியாவின் ´NDTV´ ஊடகத்திற்கு வழங்கிய விசேட செவ்வியில் அவர் இவ்வாறு தெரிவித்துள்ளார்.

ஏற்கனவே இந்தியாவின் தந்தி ஊடகத்திற்கு பிரதமர் ரணில் விக்ரமசிங்க வழங்கிய நேர்காணலில் இந்த கருத்தை தெரிவித்ததால் தமிழ்நாடு உள்ளிட்ட இந்தியாவில் பாரிய எதிர்ப்பு கிளம்பியது.

இந்நிலையில் இந்திய பிரதமர் நரேந்திர மோடியின் இலங்கை விஜயம் வெற்றியளித்துள்ளதாகவும் மோடி இலங்கை மக்களை வெற்றிகொண்டுள்ளதாகவும் மக்களுக்கும் மோடிக்கு பதிலளித்துள்ளதாகவும் ரணில் விக்ரமசிங்க குறிப்பிட்டுள்ளார்.

இலங்கையின் எல்லா பகுதிகளிலும் உள்ள கடற்பரப்பில் அத்துமீறுவோர் மீது துப்பாக்கிச்சூடு நடத்தும் அதிகாரம் இலங்கை கடற்படையினருக்கு உள்ளதாகவும் அதுவொன்றும் புதிதல்ல என்றும் பிரதமர் கூறியுள்ளார்.

அண்மையில் இலங்கை வந்த இந்திய வெளிவிவகார அமைச்சர் சுஸ்மா சுவராஜ் இந்திய மீனவர்கள் எல்லைத் தாண்டலை தடுக்க வேண்டும் என கூறியதாக பிரதமர் ரணில் விக்ரமசிங்க குறிப்பிட்டார்.

இந்தியா வடக்கு பகுதியை மாத்திரம் கவனத்தில் கொள்ளாது முழு இலங்கையையும் கவனத்தில் கொண்டுள்ளதாக பிரதமர் ரணில் விக்ரமசிங்க தெரிவித்துள்ளார்.

-அத தெரண-

மண்டபம் மேற்கு கடற்கரையில் சுற்றித்திரிந்த இலங்கையர் ஒருவர் மண்டபம் பொலிஸாரால் கைது செய்யப்பட்டுள்ளார். புத்தளத்தைச் சேர்ந்த 45 வயதுடைய கஜேந்திரன் என்பரே கைது செய்யப்பட்டதாக தெரியவந்துள்ளது.

இவர் ஒரு எயிட்ஸ் தொற்று நோயாளி என்றும் தமிழகத்தில் உள்ள அவரது மனைவியை பார்க்கவே வந்ததாகவும் பொலிஸ் விசாரணையில் தெரியவந்துள்ளது.

ராமநாதபுரம் மாவட்டம் மண்டபம் பகுதியில் இருந்து 500 படகுகளில் மீன்பிடிக்கச் சென்றவர்களில் வெள்ளிமுத்து, சமயன், நைனா முகம்மது, ஆறுமுகம் ஆகிய 4 மீனவர்கள் நடுக்கடலில் மீன்பிடித்துக் கொண்டிருந்த போது அங்கு பிளாஸ்டிக் படகு ஒன்று வந்துள்ளது.

அதில் இருந்த ஒருவர் மற்றுமொரு நபரை மீனவர்கள் படகில் ஏற்றிவிட்டு அவரை மண்டபத்தில் இறக்கிவிடும்படியும் மறுத்தால் மீன்பிடிக்க விடமாட்டோம் என்றும் மிரட்டியதாக இந்திய ஊடகத் தகவல்கள் தெரிவிக்கின்றன.

அதனை அடுத்து அச்சமடைந்த மீனவர்கள் குறித்த நபரை மண்டபம் கடற்கரையில் இறக்கிவிட்டு மண்டபம் பொலிஸாருக்கு தகவல் வழங்கியதை அடுத்து அங்கு சென்ற பொலிஸார் சந்தேகநபரான க​ஜேந்திரனை கைது செய்துள்ளனர்.

கஜேந்திரன் மீது வழக்குப்பதிவு செய்து மண்டபம் பொலிஸார் விசாரணை நடத்தி வருகின்றனர்.

-மாலைமலர்-

பண்டாரவளை – அம்பதன்டேகம – கலஹிட்டியாவ பகுதியில் இடம்பெற்ற நிலச்சரிவு காரணமாக 17 குடும்பங்கள் அங்கிருந்து அகற்றப்பட்டுள்ளன. 25 அடி உயரமுடைய பகுதியில் நிலச்சரிவு ஏற்பட்டுள்ளதாக தெரிவிக்கப்பட்டுள்ளது.

கட்டிட ஆராய்ச்சி நிறுவன அதிகாரிகளின் ஆலோசனைக்கு அமைய, அப்பகுதியில் வாழ்ந்த 17 குடும்பங்கள் அகற்றப்பட்டுள்ளதுடன் அவர்கள் தங்கள் உறவினர்கள் வீடுகளில் தங்கியுள்ளனர்.

இந்த நிலச்சரிவினால் தெய்வாதீனமாக உயிர், சொத்துச் சேதங்கள் எதுவும் ஏற்படவில்லை.

ஒரு கோடி ரூபாவிற்கும் அதிகம் பெறுமதியான தங்க பிஸ்கட்கள் கட்டுநாயக்க விமான நிலையத்தில் மீட்கப்பட்டுள்ளது.

குற்றப் புலனாய்வுப் பிரிவினருக்கு கிடைத்த இரகசிய தகவல் ஒன்றை அடுத்து மேற்கொள்ளப்பட்ட தேடுதலில் குறித்த தங்க பிஸ்கட்கள் மீட்கப்பட்டுள்ளன.

எச்.சி 782 பயணிக்கவிருந்த இரண்டு பயணிகளின் பயணப் பையை சோதனை செய்தபோது 2 கிலோ 521 கிராம் நிறையுடைய 20 தங்க பிஸ்கட்கள் மீட்கப்பட்டுள்ளன. இதன் பெறுமதி ஒரு கோடி 30 லட்சத்திற்கும் அதிகம் என சுங்கப் பிரிவு தெரிவித்துள்ளது.

குறித்த தங்க பிஸ்கட்களை வைத்திருந்த மட்டக்களப்பு காத்தான்குடி பகுதியைச் சேர்ந்த 39, 40 வயதுடைய இருவர் குற்றப் புலனாய்வு பிரிவினரால் கைது செய்யப்பட்டுள்ளனர்.

மேலதிக விசாரணைகளுக்காக மீட்கப்பட்ட தங்கத்துடன் இரு சந்தேகநபர்களும் கட்டுநாயக்க விமான நிலைய சுங்கப் பிரிவிடம் ஒப்படைக்கப்பட்டுள்ளனர்.

கல்விப் பொதுத் தராதர சாதாரண தரப் பரீட்சைப் பெறுபேறுகள் எதிர்வரும் ஏப்ரல் மாதம் 7ம் திகதிக்கு முன்னதாக வெளியிடப்பட உள்ளதாக அறிவிக்கப்பட்டுள்ளது.

2014ம் ஆண்டு சாதாரண தரப் பரீட்சைக்குத் தோற்றிய மாணவர்களின் பெறுபேறுகள் இவ்வாறு வெளியிடப்பட உள்ளதாக இலங்கை பரீட்சைகள் திணைக்களம் அறிவித்துள்ளது.

2013ம் ஆண்டு சாதாரண தரப் பரீட்சையில் தோற்றிய மாணவர்களுக்கான பெறுபேறுகள் 2014ம் ஆண்டு ஏப்ரல் மாத முதல் வாரத்தில் வெளியிடப்பட்டிருந்தமை குறிப்பிடத்தக்கது.

இம்முறை விடைத்தாள் மதிப்பீட்டு நடவடிக்கைகள், மழை வெள்ளத்தினால் பாதிப்பு ஏற்பட்டதாகத் தெரிவிக்கப்படுகிறது.

இதனால் மதிப்பீட்டுப் பணிகள் இரண்டு வார காலம் தாமதிக்கப்பட்ட போதிலும் ஏப்ரல் மாதம் 7ம் திகதிக்கு முன்னதாக பெறுபேறுகளை வெளியிட முடியும் எனவும் பரீட்சை ஆணையாளர் டபிள்யு.எம்.என்.ஜே.புஸ்பகுமார தெரிவித்துள்ளார்.