சமையல் எரிவாயு விலையை குறைக்குமாறு ஜனாதிபதி மஹிந்த ராஜபக்ஷ சம்பந்தப்பட்ட அதிகாரிகளுக்கு பணிப்புரை விடுத்துள்ளதாக ஜனாதிபதி ஊடகப் பிரிவு தெரிவித்துள்ளார்.

நாளைய தினத்தில் இருந்து அமுலுக்கு வரும் வகையில் கேஸ் விலையை 250 ரூபாவால் குறைக்குமாறு ஜனாதிபதி பணித்துள்ளார்.

களனியில் இடம்பெற்ற ஓய்வூதியம் பெறுவோரின் தினத்தை அனுஸ்டிக்கும் நிகழ்வில் ஜனாதிபதி இதனை தெரிவித்துள்ளார்.

ஊவா மாகாண சபை தேர்தலுக்கு முன் சீன ஜனாதிபதி இலங்கை வந்தபோது மின் கட்டணம் மற்றும் எரிபொருள்களின் விலையை குறைக்க ஜனாதிபதி நடவடிக்கை எடுத்தார் என்பது குறிப்பிடத்தக்கது.

15 வயது பாடசாலை மாணவியை காதலித்து கர்ப்பமாக்கிவிட்டு தப்பிச் சென்றுள்ள கட்டுனேரிய பிரதேசத்தைச் சேர்ந்த 25 வயது இளைஞரை மாரவில பொலிஸார் தேடி வருகின்றனர்.

கட்டுனேரிய – கல்பொக்கவத்த பகுதியைச் சேர்ந்த 11ம் தரத்தில் கல்வி கற்கும் மாணவியே இவ்வாறு கர்ப்பமாகியுள்ளார்.

15 வயது மாணவி சுகயீனமுற்றிருந்தபோது பெற்றோர் அவரை வைத்தியசாலைக்கு அழைத்துச் சென்ற வேளை மாணவி கர்ப்பமாகியுள்ள விடயம் தெரியவந்தது.

2012 ஏபரல் மாதம் இரவில் பெற்றோருக்குத் தெரியாமல் மாணவியின் வீட்டுக்குள் நுழைந்த இளைஞன் முதற்தடவையாக மாணவியுடன் உறவு கொண்டுள்ளார்.

அதன்பின்னர் சந்தர்ப்பம் கிடைக்கும் போதெல்லாம் பெற்றோருக்குத் தெரியாமல் மாணவியின் வீட்டுக்குச் சென்ற இளைஞன் உறவில் ஈடுபட்டதாக குறித்த மாணவி தெரிவித்துள்ளார்.

மாணவி தற்போது மாரவில வைத்தியசாலையில் சிகிச்சைப் பெற்று வருகிறார். மாரவில பொலிஸார் மேலதிக விசாரணைகளை மேற்கொண்டு வருகின்றனர்.

சம்பள முரண்பாடுகளை உட்பட சில கோரிக்கைகளை அடிப்படையாக கொண்டு ரயில்வே தொழிற்சங்கங்கள் இணைந்து நேற்று நள்ளிரவு முதல் ஆரம்பித்துள்ள பணிப்புறக்கணிப்பு போராட்டம் காரணமாக நாட்டின் சகல ரயில் நிலையங்களும் வெறிச்சோடி காணப்படுகின்றன.

கொழும்பு கோட்டை, மருதானை, கண்டி, காலி, ஹற்றன் உட்பட நாடு முழுவதிலும் உள்ள ரயில் நிலையங்களில் எந்த பணிகளும் மேற்கொள்ளப்படவில்லை.

எனினும் சில ரயில்கள் சேவையில் ஈடுபடுத்தப்பட்டுள்ளதாகவும், அது பொதுமக்களின் தேவைக்கு போதுமானதாக இல்லை எனவும் ரயில்வே கட்டுப்பாட்டு நிலையம் குறிப்பிட்டுள்ளது.

அலுவலக ரயில் இன்று காலை சேவையில் ஈடுபடுத்தப்பட்டது. இடநெரிசல் காரணமாக பயணிகள் அவதிக்கு உள்ளாகினர். ரயில்வே ஊழியர்களின் பணிப்புறக்கணிப்பு போராட்டம் காரணமாக கொழும்புக்கு வரும் பிரதான வீதிகளில் பெரும் போக்குவரத்து நெரிசல் ஏற்பட்டுள்ளது.

நாடளாவிய ரீதியில் மேற்கொள்ளப்பட்டு வருகின்ற ரயில்வே பணிப்பகிஷ்கரிப்பு காரணமாக அனைத்து ரயில் நிலையங்களில் சன நடமாட்டமற்று வெறிச்சோடிக் காணப்படுகின்றது.

இந்தியாவின் திருச்சி விமான நிலையத்தில் இருந்து புறப்பட்ட ஸ்ரீலங்கன் விமான சேவைக்கு சொந்தமான விமானம் அவசரமாக அதே விமான நிலையத்தில் தரையிறக்கப்பட்டுள்ளது.

விமானத்தில் ஏற்பட்ட இயந்திர கோளாறு காரணமாக இவ்வாறு அவசரமாக தரையிறக்கப்பட்டுள்ளது. எயார் பஸ் ரகத்தை சேர்ந்த ஏ 320 என்ற இந்த விமானம் நேற்று மாலை 4.15 அளவில் திருச்சி விமானநிலையத்தில் இருந்து 142 பேர் பயணிகளுடன் புறப்பட்டுள்ளது.

விமானம் புறப்பட்டு சுமார் 70 மைல் தூரம் வரை பயணித்த பின்னர் விமானத்தில் இயந்திர கோளாறு ஏற்பட்டுள்ளதை விமானி அறிந்துள்ளார். இதனையடுத்து திருச்சி விமானநிலைய கட்டுப்பாட்டு அறைக்கு இது குறித்து அறிவித்த விமானி அவசரமாக விமானத்தை தரையிறக்கியுள்ளார்.

யாழ் – கொழும்பு பயணிகள் சேவையில் ஈடுபடும் இலங்கை போக்குவரத்து சபைக்கு சொந்தமான பேருந்தின் மீது கல் வீசி தாக்குதல் நடாத்தப்பட்டுள்ளது.

யாழில் இருந்து பயணிகளை ஏற்றிக்கொண்டு கண்டி நெடுஞ்சாலை வழியாக கொழும்பு நோக்கி சென்று கொண்டிருந்த குறித்த பேருந்தின் மீது யாழ். மீசாலை பகுதியில் நேற்று செவ்வாய்க்கிழமை இரவு கல்வீசி தாக்குதல் நடாத்தப்பட்டுள்ளது.

பற்றைக்குள் மறைந்திருந்த இனம் தெரியாத நபர்களே பேருந்தின் மீது கற்களை வீசியுள்ளதாக தெரிவிக்கப்படுகின்றது.

தாக்குதலில் பேருந்தின் முன் பக்க கண்ணாடி சேதமடைந்துள்ளதுடன், பேருந்து தொடர்ந்து பயணத்தை மேற்கொள்ள முடியாததால் பயணிகள் இறக்கப்பட்டு வேறு பேருந்தில் ஏற்றி அனுப்பப்பட்டனர்.

சேதமடைந்த பேருந்து சாவகச்சேரி பொலிஸ் நிலையத்திற்கு கொண்டு செல்லப்பட்டதுடன் பொலிசார் மேலதிக விசாரணைகளை மேற்கொண்டு வருகின்றனர்.

50 வருடங்களுக்கு முன்னர் திருமணம் செய்து வெற்றிகரமான குடும்ப வாழ்க்கையை முன்னெடுத்த கணவனும் மனைவியும் மீண்டும் இன்று திருமணம் செய்து கொண்ட சம்பவம் ஒன்று அனுராதபுரம் நகரில் நடைபெற்றது.

அனுராதபுரம் புனித ஜோசப் தேவாலயத்தில் இவர்கள் சம்பிரதாயபூர்வமாக இன்று திருமணம் செய்து கொண்டனர்.

இலக்கம் 05 பிரிமன் வீதி அனுராதபுரம் என்ற முகவரியில் வசித்து முன்னாள் நகர உருவாக்கல் கலைஞரான 82 வயதான டப்ளியூ.பி. பெர்ணான்டோ, 71வயதான அவரது மனைவி ரீட்டா மாலினி ஆகியோர் 50 வருடங்களுக்கு பின்னர் மீண்டும் இவ்வாறு திருமணம் செய்து கொண்டனர்.

அனுராதபுரம் ஆயர் வணக்கத்திற்குரிய நோபட் அந்ராதி புனித ஜோசப் தேவாலயத்தின் பங்கு தந்தை ஜோய் பெர்ணான்டோ ஆகியோரின் ஆசிர்வாதங்களுக்கு மத்தியில் இந்த திருமணம் நடைபெற்றது.

4 பிள்ளைகளின் பெற்றோரான இவர்களுக்கு பேரன், பேத்திகள் 7 பேரும் கொள்ளு பேரன்களும் கொள்ளு பேத்திகளும் உள்ளனர்.

முல்லைத்தீவு – புதுக்குடியிருப்பு மற்றும் உடையார்க்கட்டு பிரதேசங்களில் உள்ள வர்த்தக நிலையங்களை உடைத்து பணம், பொருட்களை கொள்ளையிட்ட 4 பெண்கள் கைது செய்யப்பட்டுள்ளனர்.

புதுக்குடியிருப்பு பொலிஸார் மேற்கொண்ட தேடுதலில் இவர்கள் கைது செய்யப்பட்டுள்ளனர். இந்த பெண்கள் கொள்ளையிட்ட பொருட் தொகை ஒன்று புதுக்குடியிருப்பு பிரசேதத்தில் புதைத்து வைக்கப்பட்டிருந்த நிலையில் மீட்கப்பட்டுள்ளன.

மின்சார தளபாட விற்பனை நிலையங்கள், ஆடை விற்பனை நிலையங்கள், மருந்தகங்கள் போன்றவற்றை உடைத்து, இந்த பெண்கள் பணம் மற்றும் பொருட்களை கொள்ளையிட்டு வந்துள்ளதாக விசாரணைகளில் தெரியவந்துள்ளது.

கைது செய்யப்பட்ட பெண்கள் முல்லைத்தீவு நீதவான் நீதிமன்றத்தில் ஆஜர்ப்படுத்தப்பட உள்ளனர்.