நேரம் படத்தின் மூலம் தமிழ் படவுலகில் அறிமுகமான நஸ்ரியாவுக்கும், பிரபல மலையாள இயக்குனர் பாசிலின் மகனும், இளம் நடிகரான பகத்பாசிலுக்கும் திருமணம் செய்ய பெற்றோரால் முடிவு செய்யப்பட்டு இருந்தது.

இந்த நிலையில் அவர்கள் திருமண நிச்சயதார்த்தம் நேற்று பகல் 12.30 மணிக்கு திருவனந்தபுரம் தாஜ் ஹோட்டலில் நடைபெற்றது. இந்த நிகழ்ச்சியில் நஸ்ரியா–பகத் பாசிலின் நெருங்கிய உறவினர்கள் மட்டும் அனுமதிக்கப்பட்டனர்.

நிச்சயதார்த்திற்கு பிறகு நஸ்ரியாவும், பகத்பாசிலும் நிருபர்களுக்கு பேட்டி அளித்தனர். நஸ்ரியா கூறும்போது, எங்கள் திருமணம் பெற்றோரால் நிச்சயிக்கப்பட்டு இன்று நிச்சயதார்த்தம் நடைபெற்று உள்ளது. வருகிற ஓகஸ்டு மாதம் 21ம் திகதி திருவனந்தபுரம் கழக்கூட்டம் அல்தாஜ் அரங்கில் திருமணம் நடைபெற உள்ளது.

அதை தொடர்ந்து 24ம் திகதி திருமண வரவேற்பு நிகழ்ச்சியை நடத்த முடிவு செய்துள்ளோம். எந்த இடத்தில் வரவேற்பு நிகழ்ச்சி நடத்துவது என்று முடிவு செய்யவில்லை. திருமணத்திற்கு பிறகு என் கணவர் வீட்டாரும் எனது பெற்றோரும் சம்மதித்ததால் தொடர்ந்து சினிமாவில் நடிப்பேன்.

எனக்கு தொடர்ந்து சினிமாவில் நடிக்க ஆசை உள்ளது. ஆனால் அனைவரும் சம்மதித்ததால் மட்டும் தொடர்ந்து நடிப்பேன். அதே சமயம் சிறந்த முறையில் எனது குடும்பத்தை நான் பார்த்துக் கொள்வேன் என்றார்.

நடிகர் பகத்பாசில் கூறும்போது, பெங்களூர் டேஸ் என்ற படத்தில் நாங்கள் இருவரும் முதல் முறையாக இணைந்து நடித்தோம். முதல் பார்வையிலேயே நஸ்ரியா மீது எனக்கு காதல் வந்து விட்டது. அதன் பிறகு நாங்கள் போனில் பேசி எங்கள் காதலை வளர்த்துக் கொண்டோம். தற்போது இரு வீட்டார் சம்மதத்துடன் எங்களது திருமண நிச்சயதார்த்தம் நடந்துள்ளது என்றார்.

கற்றது தமிழ், தங்கமீன்கள் என்ற படத்தை இயக்கி வெற்றி பெற்றவர் இயக்குனர் ராம். இவருடைய அடுத்தப்படைப்பாக தரமணி என்னும் படத்தை இயக்கி வருகிறார். இப்படத்தில் புதுமுகம் வசந்த் ரவி நாயகனாகவும், ஆண்ட்ரியா நாயகியாகவும் நடிக்கின்றனர். யுவன் சங்கர் ராஜா இசையமைக்கிறார்.

இப்படத்தில் ஆண்ட்ரியா, தி சோல் ஆப் தரமணி என்னும் பாடலை எழுதி இசையமைத்து அவரே இந்தப்பாடலை பாடியுள்ளார். இப்பாடலின் இசைத்தட்டை உலக நாயகன் கமல் ஹாசன் வெளியிட இயக்குனர் இமயம் பாரதிராஜா பெற்றுக்கொண்டார்.

பாரதிராஜா பேசும்போது, கமல் ஒரு நடிகராகவும், இயக்குனராகவும் இருந்தாலும் எனக்கு அவர் நெருங்கிய நண்பர், நான் அவருடன் நட்பாக இருப்பது மிகவும் மகிழ்ச்சியடைகிறேன். எனக்கு மிகவும் பிடித்தமானவர். ஆண்ட்ரியா பாடலை கேட்டேன் மிகவும் நன்றாக இருந்தது. இயக்குனர் ராம் மிகவும் திறமையானவர். அவர் சாதிக்க வேண்டியது நிறைய இருக்கிறது. சாதிப்பார் என நம்புகிறேன். இவ்வாறு அவர் கூறினார்.

கமல ஹாசன் பேசும்போது நான் எல்லாதையும் வைத்து படம் எடுப்பதாக இயக்குனர் ராம் என்னைப் பற்றி கூறினார். ஏனென்றால் நான் எதையும் கொண்டு வரவில்லை, போகும் போது எதையும் கொண்டு போவதில்லை. நான் சினிமாவில் சம்பாதித்ததை திரும்பவும் சினிமாவுக்கே தருகிறேன்.

என்னைப் பொருத்தவரை என்னுடைய முதலீடு நான்தான் என்றார். ஆண்ட்ரியா பாடிய பாடலை கேட்டேன், நன்றாக இருந்தது. மேலும் இப்படம் வெற்றியடைய படக்குழுவினருக்கு வாழ்த்து தெரிவிக்கிறேன் என்று அவர் கூறினார்.

இளையராஜா மகனும், இசையமைப்பாளருமான யுவன் ஷங்கர் ராஜா முஸ்லிம் மதத்துக்கு மாறியுள்ளார். இதுகுறித்து அவர் அளித்த பேட்டி வருமாறு..

முஸ்லிம் ஆக மாறுவது என்பது திடீர் என எடுத்த முடிவு அல்ல. ஒன்றரை வருடமாக இஸ்லாம் பற்றிய புத்தகங்கள் படித்தேன். நிறைய ஆன்மீக அனுபவங்கள் கிடைத்தது. புனித குரானை படித்த பிறகு நிறைய கேள்விகளுக்கும் சந்தேகங்களுக்கும் எனக்கு விடை கிடைத்தது.

என் தந்தை இளையராஜாவிடம் முஸ்லிம் மதத்துக்கு மாறப்போகும் முடிவு பற்றி சொன்னேன். இதை கேட்டதும் ஆரம்பத்தில் அவர் அதிர்ச்சியானார். அதன் பிறகு என்னை அவர் புரிந்து கொண்டு எனது முடிவை ஏற்றுக் கொண்டார்.

முஸ்லிமாக மாறியதால் எனக்கும் இளையராஜாவுக்கும் தகராறு ஏற்பட்டதாக வெளியான செய்திகளில் உண்மை இல்லை. எங்களுக்குள் எந்த கருத்து வேறுபாடும் ஏற்படவில்லை.
முஸ்லிம் பெண்னை மணப்பதற்காக நான் முஸ்லிமாக மாறியதாக சொல்லப்படுவதிலும் உண்மை இல்லை என்று கூறினார்.

ஒரு காலத்தில் ரொம்ப இளமையாக கல்லூரி மாணவன் போல் இருந்த அஜித் திடீரென்று வெயிட் போட்டு குண்டானார். ஆக்ஷன் காட்சிகளில் நடித்தபோது ஏற்பட்ட காயங்கள் மற்றும் உடல் சம்பந்தமான பிரச்சினைகள் காரணமாக அவரது உடலில் 24 இடங்களில் சத்திர சிகிச்சை செய்யப்பட்டது.

அதற்காக சாப்பிட்ட மாத்திரை மருந்துகளால் உடல் குண்டானது. அதன் பிறகு உடம்மை குறைத்தே தீருவது என்று கருதி ஒரு வருடம் கடுமையான உடற்பயிற்சி, டயட்டில் இருந்து உடம்மை குறைத்தார். திருப்பதி படத்தில் அவர் நடித்தபோது ஆளே அடையாளம் தெரியாத அளவிற்கு மெலிந்திருந்தார். அஜித்தின் இந்த புதிய தோற்றம் ரசிகர்களுக்கு பிடிக்கவில்லை. எனவே சாதாரண தோற்றத்துக்கு மீண்டும் வந்தார்.

அதன்பிறகு எந்த இமேஜும் பார்க்காமல் தனது நடுத்தர வயது தோற்றத்தை வெளிப்படுத்தினார். ரஜினிக்கு அடுத்து தோற்றத்தின் இமேஜ் பற்றி கவலைப்படடாத நட்சத்திரமாக அஜித் கருதப்படுகிறார். ஆங்காங்கே நரைத்த முடியுடன் சால்ட் அண்ட் பெப்பர் லுக்கில் பொது நிகழ்ச்சிகளில் கலந்து கொள்ளத் தொடங்கினார். அதுவே ஒரு அழகாக இருந்தது.

அதனால் இயக்குனர் வெங்கட் பிரபு அவரை அதே சால்ட் அண்ட் பெப்பர் லுக்கில் மங்காத்தா படத்தில் நடிக்க வைத்தார். அதுவும் நெகட்டிவ் கரக்டரில். அடுத்து ஆரம்பம் படத்திலும் அதே சால்ட் அண்ட் பெப்பர் லுக்கை பயன்படுத்திக் கொண்டார் விஷ்ணுவர்த்தன். இரண்டுமே ஹிட் என்பதால் அடுத்து வீரம் படத்திலும் அதே லுக்கில் வில்லேஜ் கெட்-அப்பாக மாற்றினார் சிவா.

அடுத்து அஜித் நடிக்கப்போவது கௌதம் மேனன் படத்தில். கௌதம் மேனனுக்கு ஏற்பட்டுள்ள பொருளாதார பிரச்சினையை தீர்க்க அஜித்தே வழிய வந்து அவர் படத்தில் நடிக்க இருக்கிறார். “எனக்காக பிரஷ்சா ஒரு கதை ரெடிபண்ணுங்க எல்லா பிரச்சினையையும் தீர்த்துவிடலாம்” என்று கௌதமுக்கு அஜித் நம்பிக்கையூட்ட பக்காவான ஒரு ஸ்கிரிப்ட் ரெடி பண்ணி அஜித்திடம் காட்டி அதற்கு ஓகேவும் வாங்கி விட்டார்.

பொதுவாக கௌதம் மேனன் ஹீரோக்களை அழகாகவே காட்டுவார். அவர் அஜித்தை இதுவரை இல்லாத அளவிற்கு அழகான புதிய தோற்றத்தில் காட்ட இருக்கிறார். முதல் கட்டமாக சால்ட் அண்ட் பெப்பர் லுக் அகற்றப்பட்டு விட்டது.

இணையதளத்திலிருந்தும், பிரபல ஓவியர்களை கொண்டும் பல வித தோற்றங்களை பிரதியெடுத்து அதில் இருந்து சிலவற்றை தேர்வு செய்து அஜித்திடம் கொடுத்துள்ளார். அதில் ஒன்றை தேர்வு செய்திருக்கிறார் அஜித். இப்போது அந்த தோற்றத்திற்கு மாறி வருகிறார்.

அதனால் நண்பர்களை சந்திப்பது பொது இடத்தில் தோன்றுதை தவிர்த்து வருகிறார். அனேகமாக கௌதம் மேன்ன படம் முடியும் வரை வெளியில் வரமாட்டார் என்கிறார்கள். படப்பிடிப்பு முழுமையாக முடியும் வரை அஜித்தின் தோற்றம் பற்றியும், கதை பற்றியும் ரகசியம் காக்க முடிவு செய்திருக்கிறார்கள்.

தமிழ் சினிமா ரசிகர்கள் அஞ்சான் படத்தில் இதுவரை பார்த்திராத அதிரடியான சமந்தாவை பார்க்கப் போகிறார்கள். முந்தைய தமிழ்ப்படங்களில் பச்சபுள்ளையாட்டம் பவ்யமாக வந்து சென்ற சமந்தா, இனி கோடம்பாக்கத்திலும் தனது கொடியை பரபரப்பாக பறக்க விட வேண்டும் என்ற வெறியுடன் களமிறங்கியிருப்பதால் தெலுங்கு படங்களுககு எவ்விதமும் குறையில்லாத வகையில் அதிரடியாக பிரவேசிக்கப்போகிறாராம்.

இதுபற்றி சமந்தா விடுத்துள்ள செய்தியில், தமிழில் நான் நடித்த பாணா காத்தாடியிலேயே ஓரளவு கிளாமர் கதவுகளை திறந்தேன். ஆனால், அதையடுத்து என்னை ஆந்திர சினிமாவே வாரி அணைத்துக்கொண்டதால், எனது மொத்த கவர்ச்சி சேவையும் தெலுங்கு ரசிகர்களுக்கே போய் விட்டது.

அதனால் இனி தமிழ் ரசிகர்களையும் கவர்ச்சியால் கட்டிப்போடப் போகிறேன். அந்த வகையில் அஞ்சான் படத்தில் பெரிய அட்டாக் கொடுக்கப்போகிறேன். தற்போது புனேவுக்கு அருகே ஒரு பாடல் காட்சி படமாக்கப்பட்டது. அந்த பாடலில் அதிரடியான நடனமாடியிருக்கிறேன்.

தமிழ் ரசிகர்களைப்பொறுத்தவரை இந்த பாடலை பெரிய அளவில் ரசிப்பார்கள். அந்த அளவுக்கு அற்புதமான நடன அசைவுகளை கொடுத்திருக்கிறேன்.

அதேபோல் போதும் என்கிற அளவுக்கு அளவான கிளாமரும் அந்த பாடலில் இடம்பெற்றிருக்கிறது என்று குறிப்பிட்டுள்ள சமந்தா, சூர்யாவுடன் நடித்து வரும் அஞ்சானும், விஜய்யுடன் நடிக்கும் புதிய படமும் தமிழில் தன்னை ரொம்ப உயரத்தில் உட்கார வைத்து விடும் என்ற பெரிய நம்பிக்கையும் வைத்துள்ளாராம்.