யாழில் நடைபெற்ற பல வாள்வெட்டு சம்பவங்களுடன் தொடர்புடைய மற்றுமொரு குழுவான டில்லு குழுவை சேர்ந்த 9 பேர் கைது செய்யப்பட்டுள்ளதுடன் அவர்களிடம் இருந்து இராணுவ சீருடை உட்பட வாள்களும் மீட்கப்பட்டுள்ளன.

கொக்குவில் தலையாளி பகுதியில் இக் குழு மறைந்திருந்த போது பொலிசாருக்கு கிடைத்த இரகசிய தகவலின் அடிப்படையில் நேற்றுமுன்தினம் இரவு இவர்கள் கைது செய்யப்பட்டுள்ளனர்.

கடந்த புதன்கிழமை வட்டுக்கோட்டை மூளாய் பகுதியில் வீடொன்றினுள் அத்துமீறி நுழைந்த குழுவினர் அங்கிருந்த பொருட்களை அடித்து நொருக்கியதுடன் 60 ஆயிரம் ரூபா பணத்தையும் கொள்ளையடித்து சென்றிருந்தனர்.

அச் சம்பவம் தொடர்பாக புலன்விசாரணைகளை மேற்கொண்டு வந்த பொலிசாருக்கு அக் குழு தலையாளி பகுதியில் மறைந்திருப்பதாக கிடைத்த ரகசிய தகவலின் அடிப்படையிலையே அக் குழுவை சுற்றி வளைத்து கைது செய்தனர்.

இவர்கள் கைது செய்யப்பட்ட போது இவர்களிடம் இருந்து இராணுவ அதிகாரிகள் பயன்படுத்தும் 2 சீருடை உட்பட 3 வாள்கள், கத்திகள், 3 மோட்டார் சைக்கிள்கள் என்பன கைப்பற்றப்பட்டுள்ளன.

இவர்கள் அனைவரையும் நேற்று மல்லாகம் நீதவானின் முன் முற்படுத்தப்பட்ட போது நால்வர் சரீர பிணையில் விடுவிக்கப்படதுடன் ஏனைய ஐவரையும் 18ம் திகதி வரை விளக்கமறியலில் வைக்குமாறு உத்தரவு இடப்பட்டுள்ளது.

இதேவேளை கடந்த மாதம் 6ம் திகதி ஆவா என்னும் குழுவை சேர்ந்த 13 பேர் கைது செய்ப்பட்டு இருந்தனர். அது தொடர்பான வழக்கு விசாரணை யாழ். நீதிமன்றத்தில் நடைபெற்று வருகின்றது

அதில் அக் குழுவை சேர்ந்த 10 பேருக்கு பிணை வழங்கப்பட்டுள்ளதுடன் ஆவா உட்பட ஏனைய மூவரும் எதிர்வரும் 13 ம் திகதி வரை விளக்கமறியலில் வைக்கப்பட்டுள்ளனர்.

ஏற்கனவே திருமணம் முடித்து ஒரு குழந்தைக்குத் தந்தையான நபர் அதை மறைத்து இரண்டாவது தடவையாகத் திருமணம் செய்ய முற்பட்ட சமயம் தாலி கட்டுவதற்குச் சில நிமிடங்களுக்கு முன்னர் மாட்டிக்கொண்ட அதிர்ச்சியூட்டும் உண்மைச் சம்பவம் நேற்று யாழ்ப்பாணத்தில் இடம்பெற்றது.

கடைசி நேரத்தில் உண்மை தெரிய வந்ததனால் திருமணம் இடையில் நிறுத்தப்பட்டது. மணமகனை பொலிஸாரிடம் ஒப்படைத்தனர் பெண் வீட்டுக்காரர்கள்.

இந்தச் சம்பவம் யாழ். நகரை அண்மித்து கே.கே.எஸ் வீதியில் சிவலிங்கப்புளியடியில் நேற்று ஞாயிற்றுக்கிழமை இடம்பெற்றது.

தான் ஏற்கனவே திருமணம் செய்த விடயத்தை மறைத்ததுடன் மட்டுமல்லாது 5 லட்சம் ரூபா பணத்தைச் சீதனமாகப் பெற்றுக்கொண்டே இரண்டாவது தடவையாக திருமணம் செய்ய முற்பட்டுள்ளார் கைது செய்யப்பட்ட நபர். இது தொடர்பில் மேலும் தெரியவருவதாவது..

சிவலிங்கப்புளியடியைச் சேர்ந்த பெண் வீட்டார் தமது மகளுக்குத் திருமணம் செய்து வைக்கும் நோக்கில் மணமகனைத் தேடியுள்ளனர். கிளிநொச்சியில் இருந்து அவர்களுக்கு ஒரு சாதகக் குறிப்பு கிடைத்தது.

சாதகங்கள் பொருத்தமாக இருந்ததால் இருவருக்கும் திருமணம் செய்வதற்கு பெண் வீட்டார் தீர்மானித்தனர். பெண்வீட்டார் திருமண ஏற்பாடுகளில் தீவிரமாக ஈடுபட்டனர். திருமணத்துக்கு நாள் குறிக்கப்பட்டு உறவினர்கள், நண்பர்களுக்கு எல்லாம் அறிவிக்கப்பட்டது. நேற்று ஞாயிற்றுக்கிழமை திருமணத்தை நடத்த நாள் குறிக்கப்பட்டது.

மணமகன் மணவறையில் வந்து அமர்ந்தார். தாலிகட்டுவதற்குச் சில நிமிடங்களே உள்ளன. பெண்ணை அழைத்து வரவேண்டியதுதான் மிச்சம். அதற்கிடையில் எல்லாம் தலைகீழாக மாறியது.

திருமணத்துக்காக வந்திருந்திருந்த பெண் தரப்பு உறவினர் ஒருவர் அப்போதுதான் மாப்பிள்ளையை உற்றுப் பார்த்தார். மணமகனை அவருக்கு முன்னரே தெரிந்திருந்தது. அவருக்கு ஏற்கனவே திருமணமும் முடிந்து ஒரு குழந்தையும் உள்ளது என்ற உண்மையை அவர் சபையில் போட்டுடைத்தார்.

உண்மையைக் கேட்டுக் கொதித்துப்போன பெண் வீட்டார் உடனடியாகப் பொலிஸாருக்கு அறிவித்தனர். மணமகன் கோலத்திலிருந்த குடும்ஸ்தரை தமது வாகனத்தில் பொலிஸ் நிலையத்துக்குக் கொண்டு சென்றனர்.

அவரிடம் விசாரணை மேற்கொண்ட பொலிஸார் அவர் ஏற்கனவே திருமணமானவர் என்பதை உறுதிப்படுத்தினர். விவரங்களை கிளிநொச்சியில் இருந்த அவரது மனைவிக்கு அறிவித்தனர்.

தனது குழந்தையுடன் அவரும் யாழ். பொலிஸ் நிலையத்துக்கு வந்தார். அவர்களிடம் இருந்தும் சந்தேக நபருக்கு எதிராகப் பொலிஸார் முறைப்பாட்டைப் பதிவு செய்து கொண்டனர்.

தான் முன்னர் பதிவுத் திருமணம் செய்துகொள்ளவில்லை என்றும் தெரிவித்த அவர், ஒரு குழந்தைக்குத் தந்தை என்பதையும் ஒப்புக் கொண்டார் என்கின்றனர் பொலிஸார்.

இதற்கிடையே இதேபோன்றதொரு சம்பவம் அச்சுவேலியில் நேற்றுமுன்தினம் இடம்பெற்றது என்றும் தெரிய வருகிறது.

இந்த நாட்டை சிறியதாக்கி விட்டேனோ என்று தோன்றுகின்றது என ஜனாதிபதி மஹிந்த ராபஜக்ச தெரிவித்துள்ளார்.

நான் பேரூந்தில் பயணம் செய்தேன். சொற்ப நேரத்தில் தங்காலைக்கு சென்றேன். அதிவேக பாதையில் வேகமாக செல்ல முடிகின்றது. நாடு சிறியதாகி விட்டதாக தோன்றுகின்றது,

நான் ஆட்சிக்கு வந்த பிறகு இந்த நாடு சிறியதாகியுள்ளது என அவர் குறிப்பிட்டுள்ளார்.

அம்பாந்தேட்டையில் ஶ்ரீலங்கா சுதந்திரக் கட்சி காரியாலயமொன்றை அங்குரார்ப்பம் செய்து வைத்து உரையாற்றிய போது அவர் இதனைத் தெரிவித்துள்ளார்.

கொழும்பிலிருந்து அதிவேக நெடுங்சாலையில் பேரூந்து மூலம் ஜனாதிபதி பயணித்திருந்தமை குறிப்பிடத்தக்கது.

மாணவி ஒருவரை பாடசாலை விடுதிக்குள் வைத்து பாலியல் வல்லுறவு புரிந்த குற்றச்சாட்டில் மாணவர் ஒருவர் கைது செய்யப்பட்டுள்ளதாக ஆனமடுவ பொலிஸார் தெரிவித்தனர்.

ஆனமடுவ – தோனிகல பகுதியைச் சேர்ந்த 15 வயது பாடசாலை மாணவியே வல்லுறவுக்கு உட்படுத்தப்பட்டுள்ளார்.

மாணவி 10ம் தரத்தில் கல்வி பயின்று வருவதுடன் கைது செய்யப்பட்ட 18 வயதுடைய சந்தேகநபர் அதே பாடசாலையில் 12ம் தரத்தில் கல்வி பயில்வதாக பொலிஸார் குறிப்பிட்டனர்.

சில வாரங்களுக்கு முன்னரே இவ்விருவரிடையே காதல் மலர்ந்துள்ளதாக தெரியவருகிறது. தனியார் வகுப்புக்குச் செல்லும் வேளை இவ்விருவரும் பாடசாலை விடுதிக்குள் சென்றுள்ள போது இந்த வல்லுறவு சம்பவம் இடம்பெற்றுள்ளது.

சம்பவத்தின் பின் மாணவி தனது மாமாவிற்கு குறுந்தகவல் அனுப்பியுள்ளார். இதனையடுத்து பொலிஸாருக்கு அறிவிக்கப்பட்டு பின் சம்பவ இடத்திற்குச் சென்று மாணவி மீட்கப்பட்டுள்ளார்.

கைது செய்யப்பட்டுள்ள சந்தேகநபர் புத்தளம் மாவட்ட நீதிமன்றில் ஆஜர் செய்யப்படவுள்ளார். மாணவி வைத்திய பரிசோதனைக்கென ஆனமடுவ வைத்தியசாலையில் அனுமதிக்கப்பட்டுள்ளார்.

இலங்கையில் தொழு நோயாளிகளின் எண்ணிக்கை அதிகரித்து வருகின்றமை பல தரப்பிலும் கவலைகளை ஏற்படுத்தியுள்ளது. ஆண்டுக்கு 2000 புதிய நோயாளிகள் என்ற அளவில் தொழு நோயாளிகளின் எண்ணிக்கை அதிகரித்து வருவதாக இலங்கை சுகாதார அமைச்சு தெரிவிக்கிறது.

இந்த எண்ணிக்கையை கட்டுப்படுத்த கடந்த பத்தாண்டுகளுக்கும் மேலாக சுகாதார அமைச்சு பல்வேறு நடவடிக்கைகளை எடுத்துவந்துள்ளது.

எனினும் ஏற்கனவே நோயாளிகளின் எண்ணிக்கை அதிகமாக இருந்துவந்த இடங்களிலேயே தற்போதும் இந்த அதிகரிப்பு காணப்படுவதாக சுகாதார அமைச்சின் தொழு நோய் ஒழிப்பு நிகழ்ச்சித் திட்டம் பிபிசி தமிழோசையிடம் கூறியது.

குறிப்பாக 2013ம் ஆண்டில் மேல்மாகாணத்திலேயே 44 வீதமான தொழு நோயாளர்கள் பதிவாகியுள்ளனர். அதிலும் குறிப்பாக கொழும்பு மாவட்டத்தில் நோயாளர்களின் எண்ணிக்கை அதிகளவில் காணப்படுகிறது. அடுத்தபடியாக, 14 வீதமான நோயாளர்கள் கிழக்கு மாகாணத்தில் பதிவாகியுள்ளனர்.

கடந்த ஆண்டு நாடெங்கிலும் பதிவான தொழு நோயாளர்களில் 177 பேர் சிறார்கள் என்று தொழு நோய் தடுப்பு நிகழ்ச்சித் திட்டத்தின் இயக்குநர் டாக்டர் நிலந்தி பெர்ணான்டோ தமிழோசையிடம் கூறினார்.

2020இல் ஆண்டுக்கு 1000 நோயாளிகளாக குறைப்பது அரசின் இலக்கு இந்த சிறார் நோயாளிகளில் கூடுதலானோர் வடக்கு மாகாணத்திலேயே பதிவாகியுள்ளனர். அங்கு 40 சிறார்கள் கடந்த ஆண்டு தொழு நோயாளிகளாக இனங்காணப்பட்டுள்ளனர்.

1000க்கும் மேற்பட்ட புதிய நோயாளிகள் ஆண்டுதோறும் பதிவாகும் 16 நாடுகளில் இலங்கையும் ஒன்று உலக சுகாதார ஸ்தாபனம் தெரிவிக்கிறது.

இலங்கையில் தொழு நோய் ஒழிக்கப்பட்டதாக 1995ம் ஆண்டில் அறிவிக்கப்பட்டது.

ஆனால் தொழு நோய் இலங்கையில் பெரும் சுகாதாரப் பிரச்சனையாக இனிமேலும் இருக்கமுடியாது என்ற அர்த்தத்திலேயே 1995ம் ஆண்டு அறிவிப்பு வந்தது என்றும் தொழு நோயை முழுமையாக ஒழிப்பதில் சிரமங்கள் இருப்பதாகவும் டாக்டர் நிலந்தி பெர்ணான்டோ கூறினார்.

2020ம் ஆண்டில் இலங்கையில் தொழு நோயை ஒழிப்பதற்கு அரசு இலக்கு வைத்துள்ள போதிலும், தொழு நோயை முற்றாக ஒழிப்பது என்பது சந்தேகத்துக்குரியதே.

இலங்கையில் புதிதாக பதிவாகும் தொழு நோயாளிகளின் எண்ணிக்கையை 2020ல் ஆண்டுக்கு 1000 என்ற அளவுக்குள் குறைத்துக்கொள்ளும் நோக்கத்துடனேயே தமது நிகழ்ச்சித்திட்டம் செயற்படுவதாகவும் சுகாதார அமைச்சின் தொழு நோய் ஒழிப்பு நிகழ்ச்சித் திட்டத்தின் இயக்குநர் கூறினார்.

மைகோபக்டீரியம் லெப்ரே (Mycobacterium leprae) என்ற பக்டீரியா மூலம் தொற்றும் தொழு நோயின் அறிகுறிகளை கண்டுபிடிக்க பல ஆண்டுகள் எடுக்கலாம் என்பதே இந்த நோயை ஒழிப்பதில் உள்ள பெரிய சவால் என்று மருத்துவ நிபுணர்கள் கூறுகின்றனர்.

உலக சுகாதார ஸ்தாபனத்தின் புள்ளிவிபரங்களின்படி, ஆண்டுக்கு 1000க்கும் அதிகமான தொழு நோயாளர்கள் பதிவாகும் 16 நாடுகளில் இலங்கையும் உள்ளமை குறிப்பிடத்தக்கது.

-BBC தமிழ்-

மன்னார் நகரிலிருந்து வெளி மாவட்டங்களுக்கான போக்குவரத்து துறையில் அரச மற்றும் தனியார் பஸ்கள் சேவையில் ஈடுபட்டு வருகின்றன. இந்நிலையில் இரு தரப்பினர்களுக்குமிடையில் திடீர்,திடீர் என முறுகல் நிலை ஏற்படுகின்றது.

அவ்வப்போது இவர்களுக்கிடையில் முறுகல் நிலை, கைகலப்பு, பொலிஸ் முறைப்பாடு, விசாரணை என்று விரிவடைந்து பின் போக்குவரத்து அமைச்சு வரை நீடித்து செல்கின்றது.

அண்மைக்காலமாக வடமாகாணத்தில் போக்குவரத்து சேவைகளில் ஈடுபட்டு வரும் தனியார் பஸ்கள் தமக்குள்ளும் இலங்கை போக்குவரத்து சபையுடனும் மோதிக் கொள்ளுகின்ற சம்பவங்கள் இடம்பெற்று வருகின்றன.

இந்நிலையில் யாழ். மாவட்டத்தில் அரச மற்றும் தனியார் பஸ்கள் ஒன்றிணைந்த நேர சூசி அடிப்படையில் சேவையில் ஈடுபடுவதற்கு இணக்கம் தெரிவித்திருக்கின்றன.

இதனால் பயணிகள் பல்வேறு இடர்களுக்கும், தாமதமான பயணங்களுக்கும் முகம் கொடுப்பதாக விசனம் தெரிவித்துள்ளனர்.

கொழும்பில் சட்டவிரோத நடவடிக்கைகளில் ஈடுபட்டுவந்த 93 பிச்சைக்காரர்களை பொலிஸார் கைது செய்துள்ளனர்.

பொலிஸாரின் விசேட நடவடிக்கையின்போது, கோட்டை, கொம்பனித் தெரு, விஹாரமாதெவி பூங்கா மற்றும் அதனை அண்டிய பகுதிகளில் இவர்கள் கைது செய்யப்பட்டதாக தெரிவிக்கப்படுகிறது.

கைது செய்யப்பட்ட பிச்சைக்காரர்கள் ஹெரோயின் வர்த்தகத்தில் ஈடுபட்டதாக பொலிஸ் ஊடகப்பேச்சாளர் அஜித் ரோகண தெரிவித்தார்.

கைது செய்யப்பட்டவர்களில் 9 பேர் பெண்கள் என தெரிவிக்கப்படுகிறது. இவர்களிடம் மேலதிக விசாரணைகள் மேற்கொள்ளப்பட்டுள்ளதாக பொலிஸ் ஊடகப்பேச்சாளர் குறிப்பிட்டார்.