அமெரிக்காவின் பாட்லிமோர் நகரை சேர்ந்த ஒரு பெண் சூதாட்ட மோகத்தால் தனது 4 வயது குழந்தையை 8 மணி நேரத்துக்கு மேல் பூட்டிய காருக்குள் தன்னந்தனியாக தவிக்க விட்டு போன சம்பவம் பெரும் பரபரப்பை ஏற்படுத்தியுள்ளது.

அமெரிக்காவின் மேரிலேண்ட் பகுதியில் மிகவும் பிரபலமான சூதாட்ட விடுதி ஒன்று உள்ளது. புத்தாண்டு தினத்தன்று மாலை சுமார் 7 மணியளவில் அந்த வளாகத்தில் நிறுத்தி வைக்கப்பட்டுள்ள கார்கள் எல்லாம் பாதுகாப்பாக உள்ளனவா, என இந்த விடுதியின் காவல்காரர் பரிசோதித்துக் கொண்டு வந்தார்.

அப்போது நான்காவது தளத்தில் நின்றிருந்த ஒரு காருக்குள் இருந்து குழந்தையின் அழுகுரல் கேட்டது. இதனையடுத்து சூதாட்ட விடுதியின் முகாமையாளருக்கு அவர் தகவல் அளித்தார். விரைந்து வந்த ஊழியர்கள், மாற்றுச்சாவியின் மூலம் காரின் கதவை திறந்து குழந்தையை வெளியே எடுத்தனர்.

கொட்டும் உறை பனியின் குளிர் மற்றும் பசி ஆகியவற்றை தாக்கு பிடிக்க முடியாமல் காற்றோட்டம் இல்லாத பூட்டிய காருக்குள், இருட்டில் கிடந்த குழந்தை பல மணி நேரமாக அழுதழுது சோர்வடைந்து களைப்புடன் காணப்பட்டதால் உடனடியாக அம்புலன்சுக்கு தகவல் அளிக்கப்பட்டது.

குழந்தையை ஏற்றிக்கொண்டு அம்புலன்ஸ் புறப்பட்ட போது சூதாட கொண்டு சென்ற பணத்தை எல்லாம் தோற்று, பறிகொடுத்து விட்டு பார்க்கிங் பகுதிக்கு வந்த ஒரு பெண் தனது காருக்குள் விட்டு சென்ற குழந்தையை காணாமல் திடுக்கிட்டார்.

அங்கிருந்த காவலாளியிடம் விசாரித்த போது நடந்த சம்பவத்தை அவர் விளக்கி கூறினார். இதற்கிடையில், அங்கு வந்து சேர்ந்த பொலிசார், குழந்தை விடுவிக்கப்படுவதற்கு 8 மணி நேரத்திற்கு முன்னதாக குறிப்பிட்ட அந்த காரை ஓட்டி வந்த ஒரு பெண், நான்காவது தளத்தில் காரை நிறுத்தி பூட்டிவிட்டு, கைப்பையுடன் சூதாட்ட விடுதிக்குள் சென்றதை சி.சி.டி.வி. பதிவுகளின் மூலம் கண்டு பிடித்தனர்.

குழந்தையை தேடிவந்த அந்த பெண், பொலிசாரிடம் ஒப்படைக்கப்பட்டார். அவரை கைது செய்த பொலிசார், அஜாக்கிரத்தையால் குழந்தையின் உயிருக்கு ஆபத்து விளைவிக்க முயன்ற குற்றத்திற்காக அலிசியா டெனிஸ் பிரவுன் (24) என்ற அந்த பெண்ணின் மீது வழக்குப் பதிவு செய்து சிறையில் அடைத்தனர்.

வைத்தியசாலையில் முதலுதவி சிகிச்சை மற்றும் உணவு அளிக்கப்பட்ட அந்த குழந்தை தற்போது மேரிலேண்ட்டில் உள்ள அரசு குழந்தைகள் காப்பகத்தில் ஒப்படைக்கப்பட்டுள்ளது.

அந்த பெண்ணின் மீதான வழக்கை விசாரித்த நீதிபதி 50 ஆயிரம் டொலர் சொந்த பிணையில் அவரை விடுதலை செய்துள்ளதாக நீதிமன்ற வட்டாரங்கள் தெரிவித்துள்ளன.

தெற்கு பசிபிக் கடல் பகுதியில் நியூசிலாந்து, ஓசியானா, வனாத்து சாலமன் தீவுகள் உள்ளன. இதில் வனாத்து தீவுப் பகுதியை அண்மித்துள்ள தெற்கு பசிபிக்கடலில் இன்று அதிகாலை சக்தி வாய்ந்த நில நடுக்கம் ஏற்பட்டது.

கடலுக்கு அடியில் 37 கிலோ மீட்டர் ஆழத்தில் மையம் கொண்டு தாக்கியது. இது ரிக்டர் அளவில் 6.6 அளவில் இருந்ததாக அமெரிக்க புவியியல் ஆய்வு மையம் தெரிவித்துள்ளது.

96 கிலோ மீட்டர் சுற்றளவுக்கு நில நடுக்கத்தின் தாக்கம் இருந்தது. ஆனால் சுனாமி எச்சரிக்கை எதுவும் விடுக்கப்படவில்லை. சேத விவரம் பற்றிய தகவல் வெளியாகவில்லை.

செக் குடியரசுக்கான பாலஸ்தீன தூதரின் வீட்டில் குண்டு வெடித்ததில் அவர் பலியானார். செக் குடியரசுக்கான பாலஸ்தீனி தூதராக கடந்த அக்டோபர் மாதம் நியமிக்கப்பட்டவர் ஜமால் அல் ஜமால்(56). அவரது வீடு பிராக்கில் உள்ள சச்டோலில் உள்ளது.

அவரும், அவரது 52 வயது மனைவியும் கடந்த இரண்டு நாட்களுக்கு முன்பு தான் இந்த புதிய வீட்டிற்கு வந்துள்ளனர். இந்நிலையில் பழைய தூதரக கட்டிடத்தில் இருந்து கொண்டு வரப்பட்ட ஒரு பெட்டியை ஜமால் நேற்று திறக்க முயன்றுள்ளார்.

அந்த பெட்டி கடந்த 20 ஆண்டுகளுக்கும் மேலாக திறக்காமல் இருந்துள்ளது. ஜமால் அந்தப் பெட்டியை திறந்தபோது குண்டு வெடித்து அவரது வயிறு, தலை, மார்பு பகுதியில் படுகாயம் ஏற்பட்டது.

நேற்று விடுமுறை என்பதால் அவரது வீட்டில் அவரும், அவரது மனைவியும் மட்டுமே இருந்தனர். அவரது மனைவி குண்டு வெடித்த உடன் தூதரக ஊழியர்களை அணுகி தகவல் தெரிவித்தார். உடனே ஜமால் பிராக்கில் உள்ள மருத்துவமனையில் அனுமதிக்கப்பட்டார். அங்கு அவர் சிகிச்சை பலனின்றி பலியானார்.

ஜமால் திறக்க முயன்ற பெட்டி 1980களில் பாலஸ்தீன விடுதலை இயக்கம் செயல்பட்ட கட்டிடத்தில் இருந்து கொண்டு வரப்பட்டது. இத்தனை ஆண்டுகளாக திறக்கப்படாமல் இருந்த அந்த பெட்டியில் அப்படி என்னதான் உள்ளது என்பதை அறியவே ஜமால் அதை திறந்துள்ளார் என்பது குறிப்பிடத்தக்கது.

சவுதி அரேபியாவில் உள்ள ஒருவருக்கு சென்ற மாதம்தான் திருமணம் ஆகியது. ஆனால் சந்தேகப்புத்தி கொண்ட கணவர் முதலிரவுக்கு முன்பு தனது மனைவியின் கன்னித்தன்மை குறித்து சந்தேகம் அடைந்தார்.

மனைவியின் தந்தை, மற்றும் உறவினர்களிடம் சென்று இதுகுறித்து சண்டை போட்டுள்ளார். இதனால் ஆத்திரமடைந்த மனைவி நீதிமன்றத்தில் வழக்கு தொடுத்தார்.

தனது கன்னித்தன்மை குறித்து பரிசோதனையின் முடிவை நீதிமன்றத்தில் சமர்ப்பித்த மனைவி, தனது கணவன் தன்மீது வீண்பழி போடுவதாக குற்றம் சாட்டினார்.

மனைவியின் ஆதாரத்தை பார்த்த நீதிபதி எவ்வித ஆதாரமும் இல்லாமல் மனைவியை சந்தேகம் கொண்ட கணவனுக்கு பொதுமக்கள் முன்னிலையில் 20 சவுக்கடி கொடுக்கும்படி தீர்ப்பளித்தார்.

மேலும் அவருடைய மனைவி விரும்பினால் வேறு திருமணம் செய்துகொள்ளவும் அனுமதியளித்தார். சவுதி அரேபிய சட்டப்படி ஒரு பெண் கன்னித்தன்மையுடன் இருந்தால் திருமணத்திற்கு தகுதியானவர் என்று கூறப்படுகிறது.

அமெரிக்காவின் புளோரிடா மாகாணம் மனாட்டி என்ற பகுதியில் உள்ள ஒரு குடியிருப்பில் ஷாவோனா ரம்ப் என்ற பெண் தனது காதலனுடன் வசித்து வருகிறார்.

இருவரும் தங்கள் குடியிருக்கும் வீட்டிலேயே அடிக்கடி மது அருந்துவது வழக்கம். அந்த வகையில் கடந்த வாரம் இருவரும் தூங்குவதற்கு முன் ஒன்றாக மது அருந்தியுள்ளனர். பின்னர் போதையுடன் இருவரும் தூங்க சென்றனர்.

அப்போது, காதல் மயக்கத்தில் இருந்த ஷவோனா தன்னை கட்டித் தழுவும்படி காதலனிடம் கூறியுள்ளார். காதலன் மறுத்ததால் இருவருக்குமிடையே வாக்குவாதம் ஏற்பட்டுள்ளது.

வாக்குவாதம் முற்றிய நிலையில் இருவரும் கைகலப்பில் ஈடுபட்டனர். ஷவோனா தனது காதலனின் சட்டையைப் பிடித்து இழுத்து அடித்துள்ளார். இதனால் காதலன் வீட்டை விட்டு வெளியேற முயன்றார்.

ஒரு கட்டத்தில் ஷவோனா சமையல் அறையில் உள்ள கத்தியை எடுத்து குத்துவதற்கு முயன்றுள்ளார். ஒருவழியாக அவரிடம் இருந்து விடுபட்ட காதலன் பொலிசில் புகார் அளித்துள்ளார்.

அதன்பேரில் பொலிசார் வழக்குப்பதிவு செய்து ஷவோனாவை கைது செய்து சிறையில் அடைத்தனர். பின்னர் அவர் 250 டொலர் பிணையில் விடுதலை செய்யப்பட்டார்.