மாலபே பிரதேசத்திலுள்ள தனியார் வங்கி ஒன்றிலிருந்து 14 இலட்சத்து 85 ஆயிரம் ரூபா பணம் ஆயுத முனையில் கொள்ளையிடப்பட்டுள்ளது. மோட்டார் சைக்கிளில் வந்த ஆயுதம் தாங்கிய இருவரே பணத்தை கொள்ளையிட்டு தப்பிச் சென்றுள்ளதாக தெரியவந்துள்ளது.

இந்தக் கொள்ளைச் சம்பவம் நேற்று முற்பகல் 11.27 மணியளவில் இடம்பெற்றுள்ளதாக பொலிஸ் ஊடகப் பேச்சாளர், சிரேஷ்ட பொலிஸ் அத்தியட்சகர் அஜித் ரோஹன தெரிவித்தார்.

கொள்ளையிட்ட இருவரும் முழுமையாக முகத்தை மறைக்கும் வகையிலான ஹெல்மட் அணிந்திருந்துள்ளமை ஆரம்பக் கட்ட விசாரணைகளிலிருந்து தெரியவந்துள்ளதாக அவர் சுட்டிக்காட்டினார். இந்தச் சம்பவம் தொடர்பாக மேலும் தெரிய வருவதாவது..

முகத்தை மறைத்த நிலையில் ஆயுதங்களுடன் மோட்டார் சைக்கிளில் வந்த இருவர் நேற்று வியாழக்கிழமை முற்பகல் 11.27 மணியளவில் தனியார் வங்கிக்குள் புகுந்து அதன் பாதுகாப்பு அதிகாரியை ஆயுதத்தை காண்பித்து முழங்காலிடச் செய்துள்ளதுடன் உள்ளே புகுந்த மற்றவர் மூன்று காசாளர் கூடத்திலிருந்த மூவருக்கும் ஆயுதத்தை காண்பித்து மூவரிடமிருந்த 14 இலட்சத்து 85 ஆயிரம் ரூபாவை ஆயுத முனையில் கொள்ளையிட்டுச் சென் றுள்ளனர்.

மோட்டார் சைக்கிளில் வருகை தந்த இருவரும் சினிமா பாணியில் பணத்தைச் சுருட்டிக்கொண்டு அங்கிருந்து தப்பிச் சென்றுள்ளனர்.

இந்தச் சம்பவம் அந்தப் பிரதேசத்தில் பெரும் பரபரப்பை ஏற்படுத்தியுள்ளது. அதிரடியாக ஆயுதமுனையில் மேற்கொள்ளப்பட்ட கொள்ளைச் சம்பவம் தொடர்பில் வங்கி முகாமையாளர் அத்துருகிரிய பொலிஸாரிடம் முறைப்பாடு செய்துள்ளார்.

இந்தமுறைப்பாட்டை அடுத்து உடனடியாக ஸ்தலத்திற்கு விரைந்த பொலிஸார் விசாரணைகளை ஆரம்பித்துள்ளதுடன் சந்தேக நபரை மடக்கிப் பிடிக்கும் நோக்கில் அந்தப் பிரதேசத்திற்கு பொலிஸாரை அனுப்பி திடீர் வீதிச் சோதனைகளை மேற்கொண்டுள்ளனர்.

வங்கி ஊழியர்களின் வாக்கு மூலங்களை பொலிஸார் பெற்றுக்கொண்டுள்ளதுடன் சி. சி. ரி. வி. கமராக்களை வைத்து விசாரணைகளை முடுக்கிவிட்டுள்ளனர்.

மதுபோதையில் வாகனம் செலுத்தும் சாரதிகளை கைது செய்யும் விசேட பொலிஸ் சுற்றிவளைப்புகளின் போது கடந்த 48 மணித்தியாலங்களில் 517 பேர் கைது செய்யப்பட்டுள்ளனர்.

மேல் மாகாணத்திலேயே அதிகளவானர்கள் கைது செய்யப்பட்டதாக பொலிஸ் தலைமையகம் தெரிவித்துள்ளது.
மேல் மாகாணத்தில் இதன்போது 234 பேர் கைதாகியுள்ளனர்.

இது தவிர விபத்துக்கள் காரணமாக 546 பேர் கொழும்பு தேசிய மருத்துவமனையில் அனுமதிக்கப்பட்டுள்ளனர். அவர்களில் 201 பேர் தொடர்ந்தும் தங்கியிருந்து சிகிச்சை பெற்று வருவதாக தேசிய மருத்துவமனையின் பேச்சாளர் தெரிவித்தார்.

வீதி விபத்துக்களில் சிக்கிய நிலையில் 114 பேர் கொழும்பு தேசிய மருத்துவமனையில் அனுமதிக்கப்பட்டுள்ளனர்.

இதுதவிர கேளிக்கை மற்றும் வாண வேடிக்கை விபத்துக்கள் காரணமாக காயமடைந்த இரண்டு சிறார்களும் இதன்போது சிகிச்சை பெற்று வருவதாக பேச்சாளர் குறிப்பிட்டார்.

காதலை புறக்கணித்ததால் ஆத்திரமடைந்த காதலன் அதிகாலை 4 மணியளவில் காதலியின் கழுத்தை அறுத்து விட்டு கிணற்றில் குதித்து தற்கொலை செய்ய முயற்சித்த காதலனை பிரதேச மக்கள் பிடித்து புஸல்லாவ பொலிஸாரிடம் ஒப்படைத்துள்ளனர்.

கைது செய்யப்பட்ட நபர் நாவலப்பிட்டி நீதவான் எல்.கே.மகிந்த முன்னிலையில் ஆஜர்ப்படுத்தப்பட்டு இன்றைய தினம் வரை விளக்கமறியலில் வைக்கப்பட்டுள்ளார்.

தணமல்வில பிரதேசத்தை சேர்ந்த இந்த நபர் இராணுவத்தில் பணியாற்றி விலகியவர் எனவும் கடந்த ஒரு வருடமாக கம்பளை புஸல்லாவ டெல்டா கெமுனுபுர பிரதேசத்தை சேர்ந்த 20 வயதான பெண்ணை காதலித்து வந்துள்ளார்.

இருவருக்கும் இடையில் பொருத்தம் இல்லை என கருதி பெண் காதலை புறக்கணித்துள்ளார். இதனால் காதல் தொடர்பை துண்டித்து கொள்வோம் என அந்த பெண் காதலனிடம் கூறியுள்ளார்.

இந்த நிலையில் இது குறித்து பேச காதலன் தணமல்வில பிரதேசத்தில் இருந்து புஸல்லாவ பகுதிக்கு வந்துள்ளார். நேரம் பிந்தியதால் இந்த நபரை அன்றிரவு வீட்டில் தங்கி விட்டு காலையில் தணமல்வில திரும்ப பெண் வீட்டார் இடமளித்துள்ளனர்.

இந்த நிலையில் அதிகாலை 4 மணிக்கு பெண்ணை அழைத்து மீண்டும் காதல் பற்றி பேசியுள்ளார். பெண் காதலுக்கு எதிர்ப்பை வெளியிட்டதால் ஆத்திரமடைந்த காதலன் கத்தி ஒன்றை எடுத்து பெண்ணின் கழுத்தை அறுத்துள்ளார்.

இதனையடுத்து வீட்டுக்கு அருகில் இருந்த கிணற்றில் குதித்துள்ளார். வீட்டில் உள்ளவர்களும் கிராமவாசிகளும் இணைந்து கழுத்து அறுக்கப்பட்ட பெண்ணை வைத்தியசாலையில் அனுமதித்துள்ளதுடன் கிணற்றில் விழுந்த நபரை மீட்டு பொலிஸாரிடம் ஒப்படைத்துள்ளனர்.

ஆபத்தான நிலையில் இருக்கும் பெண் புஸ்ஸலாவ வைத்தியசாலையில் சிகிச்சை பெற்று வருகிறார்.

யுத்த காலத்தில் கொல்லப்பட்டவர்கள், காயமடைந்தவர்கள் மற்றும் சேதமடைந்த சொத்துக்கள் தொடர்பில் தனிப்பட்ட கணிப்பீடு ஒன்றை மேற்கொள்ள தமிழ் தேசிய கூட்டமைப்பு தீர்மானித்துள்ளது.

விரைவில் வடமாகாண சபையின் ஊடாக இந்த நடவடிக்கை மேற்கொள்ளப்படும் என்று தெரிவிக்கப்பட்டுள்ளது. தமிழ்த் தேசிய கூட்டமைப்பின் வடமாகாண சபை உறுப்பினர் எம்.கே.சிவாஜிலிங்கம் இது தொடர்பாக தெரிவித்தார்.

யுத்த காலத்தில் காணாமல் போனவர்கள், பாதிக்கப்பட்டவர்கள் மற்றும் கொல்லப்பட்டவர்கள் தொடர்பிலும் சேதமடைந்த சொத்துக்கள் தொடர்பிலும் அதற்காக நியமிக்கப்பட்டுள்ள ஆணைக்குழு கணிப்பீடுகளை மேற்கொண்டு வருகிறது.

எனினும் இந்த கணிப்பீட்டில் நம்பிக்கை இல்லை என்றும், போலியான தகவல்களை மேற்கொண்டு சர்வதேசத்திடம் சமர்ப்பிக்க அரசாங்கம் முயற்சிக்கிறது. இந்த நிலையில் உண்மையான தகவல்களை அறிந்துக் கொள்வதற்காக தமிழ் தேசிய கூட்டமைப்பு குறித்த ஆய்வினை மேற்கொள்ளவிருப்பதாக அவர் குறிப்பிட்டுள்ளார்.

போரின் இழப்புக்கள் குறித்த கணக்கெடுப்பை தனித்து மேற்கொள்ள வடமாகாண சபை முடிவு..

இலங்கையில் போரின் போது காணாமல் போனவர்கள் தொடர்பில் புள்ளிவிபர தொகை மதிப்பீட்டு திணைக்களம் நடத்தி வரும் கணக்கெடுப்பில் நம்பிக்கையில்லை என்பதால் தனித்து தாம் ஒரு கணக்கெடுப்பை நடத்தவுள்ளதாக வடக்கு மாகாணசபை அறிவித்துள்ளது.

இலங்கை ஜனாதிபதியினால் இந்த கணக்கெடுப்புக்கு உத்தரவிடப்பட்டது. எனினும் இது போரினால் ஏற்பட்ட பாதிப்புக்களை குறைத்து காட்டும் முயற்சியாகவே இருக்கும் என்று வடமாகாண சபை உறுப்பினர் தர்மலிங்கம் சித்தார்த்தன் தெரிவித்துள்ளார்.

அரசாங்கத்தின் கணக்கெடுப்பை ஏற்றுக்கொள்ள முடியாது. எனவே அதற்கு மாற்று நடவடிக்கை அவசியம் என்ற அடிப்படையில் வடமாகாணசபை தனித்து இந்த உயிர் மற்றும் சொத்தழிவு கணக்கெடுப்பை நடத்தவுள்ளதாக சித்தார்த்தன் குறிப்பிட்டுள்ளார்.

ஐக்கிய நாடுகளின் கணக்கெடுப்பின்படி 37வருட போரில் 100.000 பேர் கொல்லப்பட்டனர்.

2009 இறுதிப்போரின் போது 40 ஆயிரம் பேர் கொல்லப்பட்டனர். எனினும் இதனை குறைத்துக்காட்டவும் விடுதலைப்புலிகளால் மனித கேடயங்களாக பொதுமக்கள் வைக்கப்பட்டிருந்தனர் என்பதை காட்டுவதற்குமே அரசாங்கம் முயற்சிக்கிறது.

எனவே இறுதிபோரில் கொல்லப்பட்டனர், கணவர்மாரை இழந்தவர்கள், சொத்தழிவுகள், காணாமல் போனவர்களின் சரியான தகவல்களை வடமாகாண சபை திரட்டப்போவதாக நாடாளுமன்ற உறுப்பினர் சுரேஸ் பிரேமசந்திரன் குறிப்பிட்டுள்ளார்.

இலங்கையில் கடந்த 30 வருட காலப்பகுதியில் காணாமல் போனோர் தொடர்பில் மேற்கொள்ளப்படும் கணக்கெடுப்பு உரிய முறையில் செயற்படுத்தப்படவில்லை என்று தமிழ் தேசியக்கூட்டமைப்பு குற்றம் சுமத்தியுள்ளது.

இந்திய செய்தி சேவை ஒன்றுக்கு தகவல் வெளியிடும் போது, கூட்டமைப்பின் நாடாளுமன்ற உறுப்பினர் எம்.ஏ.சுமந்திரன் இந்தக்குற்றச்சாட்டை சுமத்தியுள்ளார்.

இதன்போது கிராம மற்றும் போரால் பாதிக்கப்பட்ட மக்களின் கருத்துப்படி இந்த கணக்கெடுப்பு உரிய முறையில் நடத்தப்படவில்லை என்று சுமந்திரன் குறிப்பிட்டுள்ளார்.

1983 ஆம் ஆண்டிலிருந்து 2009 ஆம் ஆண்டு மே மாதம் வரையில் நாடளாவிய 14 ஆயிரம் கிராமங்களை மையப்படுத்தி இந்த கணக்கெடுப்பு நடத்தப்படுவதாக அரசாங்கம் கூறுகிறது.

ஏற்கனவே கடந்த சில மாதங்களுக்கு முன்னர் அரசாங்கத்தினால் நடத்தப்பட்ட கணக்கெடுப்பின்படி வடக்கு, கிழக்கில் 8000 பேர் கொல்லப்பட்டும் ஆறாயிரம் பேர் காணாமல் போனதாகவும் தெரிவிக்கப்பட்டிருந்தமை குறிப்பிடத்தக்கது.

அம்பலாந்தொட்ட வலேவத்தை பிரதேசத்தில் பெண்ணொருவர் நடத்தி வரும் சில்லறை விற்பனை கடையில் கஞ்சா விற்பனை செய்யப்படுவதாக கிடைத்த தகவல் ஒன்றை அடுத்து பொலிஸார் அந்த கடையை சோதனையிட சென்றிருந்தனர்.

பொலிஸார் கடையை சோதனையிட சென்ற பொழுது கடை உரிமையாளரான 57 வயதான பெண் தனது ஆடைகளை முழுமையாக அவிழ்த்து முடிந்தால் தன்னை கைது செய்யுமாறு கூறி கூச்சலிட்டு பொலிஸாருக்கு தடையேற்படுத்தியுள்ளார்.

இதன் பின்னர் பெண்ணின் மகள் அந்த இடத்திற்கு வந்து மேலாடையை கழற்றி விட்டு, பொலிஸார் தனது தாய்க்கு தொந்தரவு கொடுப்பதாக கூச்சலிட்டுள்ளார். இதனால் அதிர்ச்சியடைந்த பொலிஸார் சம்பவம் குறித்து பொலிஸ் நிலையத்திற்கு அறிவித்துள்ளனர்.

இதனையடுத்து அம்பலாந்தொட்ட பொலிஸ் நிலையத்தின் போக்குவரத்து பிரிவின் பொறுப்பதிகாரி சமன்ஜித்தின் ஆலோசனையின் பேரில் சில பெண் பொலிஸார் சம்பவ இடத்திற்கு அனுப்பி வைக்கப்பட்டு ஆடைகள் இன்றி இருந்த பெண் மீது துணியை போர்த்தி பின்னர் அந்த பெண்ணை கைது செய்துள்ளனர்.

இதன் பின்னர் கடையை சோதனையிட்ட பொலிஸார் கடையில் இருந்து 500 மில்லி கிராம் கஞ்சாவை கைப்பற்றியுள்ளனர். கைது செய்யப்பட்ட பெண் அம்பாந்தோட்டை நீதவான் நீதிமன்றத்தில் ஆஜர்ப்படுத்தப்பட்டு விளக்கமறியலில் வைக்கப்பட்டுள்ளார்.