நடிகர்கள் சிவாஜிகணேசன், ரஜினிகாந்த் நடித்து பெரும் வெற்றி பெற்ற படையப்பா உள்ளிட்ட தமிழ் படங்களிலும், கன்னடம், தெலுங்கு படங்களிலும் நடித்து புகழ்பெற்றவர் நடிகை சவுந்தர்யா. தென்னக திரையுலகில் முன்னணி நடிகையாக விளங்கி புகழின் உச்சியில் இருந்தபோது சவுந்தர்யா பா.ஜனதா கட்சியில் சேர்ந்தார்.

2004ம் ஆண்டு அந்த கட்சிக்கு தேர்தல் பிரசாரம் செய்வதற்காக சென்றபோது அவர் ஹெலிகப்டர் விபத்தில் பலியானார். இதே விபத்தில் அவரது அண்ணன் அமர்நாத்தும் உயிரிழந்தார். நடிகை சவுந்தர்யாவுக்கும், அவரது அண்ணன் அமர்நாத்துக்கும் பெங்களூர் மற்றும் ஆந்திர மாநிலத்தில் சில சொத்துகள் உள்ளன.

அந்த சொத்துகளை பகிர்ந்து கொள்வது தொடர்பாக சவுந்தர்யாவின் தாயார் மஞ்சுளா, கணவர் ரகு, அண்ணி நிர்மலா, அண்ணன் மகன் சாத்வீக் ஆகியோர் இடையே தகராறு ஏற்பட்டது. இதைத்தொடர்ந்து சாத்வீக், நிர்மலா ஆகியோர் சார்பில் கடந்த 2009ம், ஆண்டு கோர்ட்டில் வழக்கு தொடரப்பட்டது.

இருவரும் தாக்கல் செய்த மனுவில், சொத்துகளில் தங்களுக்கும் பங்கு வேண்டும் என்று குறிப்பிடப்பட்டு இருந்தது. இதற்கு மஞ்சுளா, ரகு சார்பில் எதிர்மனு தாக்கல் செய்யப்பட்டது. அந்த மனுவில் சவுந்தர்யாவும், அமர்நாத்தும் தங்கள் சொத்துகள் தொடர்பாக எந்த உயிலையும் எழுதி வைக்கவில்லை.

ஆனால் அதுபோன்ற போலி உயில் தயாரிக்கப்பட்டு இருக்கிறது என்று குற்றம் சாட்டி இருந்தனர். இப்போது இந்த விவகாரத்தில் புதிய திருப்பம் ஏற்பட்டது. அதன்படி வழக்கு தொடர்ந்த இரு தரப்பினரும் (மஞ்சுளா-ரகு, சாத்வீக்-நிர்மலா) தங்களுக்குள் புரிந்துணர்வு ஒப்பந்தத்துக்கு வந்திருப்பதாகவும், இந்த பிரச்சினையில் சமரசமாக செல்ல விரும்புவதாகவும் கூறி பெங்களூர் 4வது மெட்ரோபாலிட்டன் மாஜிஸ்திரேட்டு கோர்ட்டில் ஒரு மனுவை தாக்கல் செய்தனர்.

சொத்துகளை தங்களுக்குள் சுமூகமான முறையில் பிரித்துக்கொள்ள முடிவு செய்திருப்பதாக மனுவில் குறிப்பிடப்பட்டு இருந்தது. இதன்படி பெங்களூர் அனுமந்தநகரில் உள்ள 2 வீடுகள், 3 கடைகள் ஆகியவை சாத்வீக்குக்கு வெகுமதியாக கொடுக்கப்படுவதாகவும் அவர் பெயரில் வங்கியில் 25 லட்சத்தை நிரந்தர வைப்பு தொகையாக டெபாசிட் செய்வதாகவும் அவரது தாயார் நிர்மலாவுக்கு 1.25 கோடியை வழங்குவதாகவும் தெரிவிக்கப்பட்டது.

இதேபோல அமர்நாத்துக்கு சொந்தமான விவசாய நிலங்களை விற்று அதன் மூலம் கிடைக்கும் பணத்தை மஞ்சுளா, நிர்மலா, சாத்வீக் ஆகியோருக்கு சரிசமமாக பிரித்து கொடுக்க வேண்டும் என்றும் தீர்மானிக்கப்பட்டு உள்ளது. இது தவிர நிர்மலாவை இணை உரிமையாளராக கொண்ட இதர சொத்துகள் மஞ்சுளாவுக்கு வழங்கப்படும்.

இதேபோல நிர்மலாவும், சாத்வீக்கும் தாங்கள் கோர்ட்டில் தொடர்ந்த அனைத்து வழக்குகளையும் வாபஸ் பெற்றுக்கொள்வதாகவும், மேற்கொண்டு உயில் தொடர்பாக எந்த உரிமையும் கொண்டாட மாட்டோம் என்றும் தெரிவித்தனர்.

அதன்படி கடந்த வாரம் நிர்மலாவும், சாத்வீக்கும் தாங்கள் ஏற்கனவே கோர்ட்டில் தொடர்ந்த அனைத்து வழக்குகளையும் முறைப்படி வாபஸ் பெற்றுக்கொண்டனர். இதைத்தொடர்ந்து இந்த பிரச்சினை முடிவுக்கு வந்தது.

தமன்னாவுக்கும் ஸ்ருதிஹாசனுக்கும் பனிப்போர் நடப்பதாக தெலுங்கு பட உலகில் செய்திகள் வந்தன. ஒருவர் படவாய்ப்பை இன்னொருவர் தட்டிப்பறிப்பதாகவும் கூறப்பட்டது.

ஸ்ருதிஹாசன் நடித்த சில தெலுங்கு படங்கள் வெற்றிகரமாக ஓடியதால் அவருக்கு படங்கள் குவிந்தன. இதனால் தமன்னா பின்னுக்கு தள்ளப்பட்டார். இதுவே ஸ்ருதிஹாசன் மேல் ஆத்திரம் ஏற்படுத்தியதாக கூறப்பட்டது.

தமன்னா தற்போது தமிழில் அஜித் ஜோடியாக வீரம் படத்தில் நடிக்கிறார். தெலுங்கிலும் ஒரு படம் கைவசம் உள்ளது. இந்தியிலும் நடிக்கிறார். ஸ்ருதிஹாசன் சமீபத்தில் நடித்து வெளிவந்த ராமையா வஸ்தாவையா என்ற படம் தோல்வி அடைந்தது. இதனால் தமன்னா சந்தோஷப்பட்டதாகவும் ஸ்ருதி தோல்வியை தோழிகளுக்கு விருந்து கொடுத்து கொண்டாடியதாகவும் செய்திகள் பரவின.

இது தமன்னாவுக்கு சங்கடத்தை ஏற்படுத்தியுள்ளது. தனக்கு எதிராக தப்பான வதந்திகள் பரப்பப்படுகின்றன என்றும் ஸ்ருதிஹாசனுடன் மோதல் எதுவும் இல்லை என்றும் தெளிவுபடுத்தியுள்ளார்.

ஹன்சிகா உயிரே உயிரே என்ற தமிழ் படத்தில் நடித்து வருகிறார். இதன் படப்பிடிப்பு கோவாவில் நடந்து வருகிறது. அங்கு ஹன்சிகா பங்கேற்ற பாடல் காட்சியொன்றை படமாக்கினர். அப்போது படப்பிடிப்பை காண அங்கு பெரும் கூட்டம் கூடியது.

கடற்கரையில் ஹன்சிகா ஆடிக்கொண்டு இருந்தபோது ரசிகர்கள் அவரை சூழ்ந்தனர். ஹன்சிகாவோடு சேர்ந்து நின்று போட்டோ எடுக்க முண்டியடித்தார்கள். சிலர் அத்துமீறி ஹன்சிகா கையை பிடித்து இழுத்து ரகளையில் ஈடுபட்டனர்.

ரசிகர்கள் பிடியில் சிக்கி ஹன்சிகா தவித்தார். போலீசாரும் பாதுகாவலர்களும் விரைந்து சென்று ரசிகர்களை விரட்டியடித்து ஹன்சிகாவை மீட்டனர். பத்திரமாக காரில் ஏற்றி அனுப்பி வைத்தார்கள். ரசிகர்கள் கலாட்டாவினால் படப்பிடிப்பும் ரத்து செய்யப்பட்டது.

இதுகுறித்து ஹன்சிகா கூறும்போது உயிரே உயிரே படத்தின் பாடல் காட்சியொன்றை கோவா கடற்கரையில் மாலை 4 மணிக்கு படமாக்கினார். நான் அதில் நடித்துக் கொண்டு இருந்தபோது கூட்டத்தினர் கட்டுப்பாட்டை மீறி என்னை சூழ்ந்தனர். கோவாவில் யாருக்கும் என்னை அடையாளம் தெரியாது என்று நினைத்து நடித்து கொண்டு இருந்தேன்.

தென் இந்திய படங்களில்தான் நிறைய நடித்து இருக்கிறேன். ஆனால் குழந்தை நட்சத்திரமாக டி.வி தொடர்களில் நிறைய நடித்து இருந்ததால் அவர்கள் என்னை அடையாளம் கண்டுகொண்டு என் பெயரை சொல்லி கூச்சல் போட்டனர்.

பாதுகாவலர்கள், போலீசார் இருந்தும் கட்டுப்படுத்த முடியவில்லை. எல்லை மீறினார்கள். இதனால் படப்பிடிப்பை ரத்து செய்துவிட்டு என்னை ஹோட்டல் அறைக்கு அனுப்பி வைத்தனர். அதன் பிறகு படப்பிடிப்பு வேறு இடத்துக்கு மாற்றப்பட்டது என்றார்.

தொழில் அதிபர் பைசூல் திருமணம் செய்வதாக தன்னை ஏமாற்றிவிட்டதாகவும் 50 லட்சம் பணம், நகைகளை அபகரித்து கொண்டதாகவும் நடிகை ராதா பரபரப்பு குற்றச்சாட்டு கூறினார். போலீசிலும் புகார் அளித்தார்.

இதையடுத்து பைசூல் கைதாகும் சூழ்நிலை ஏற்பட்டது. ஆனால் அவர் தலைமறைவாகி கோர்ட்டில் முன் ஜாமீன் மனுதாக்கல் செய்துள்ளார். ராதா குற்றச்சாட்டுகளை பைசூல் மறுத்துள்ளார். அவர் கூறியதாவது..

நடிகை ராதா என்மேல் பொய் புகார்களை கூறி வருகிறார். ஆனால் என்னை குற்றவாளியாக்கும் எந்த ஆதாரமும் அவரிடம் இல்லை. ராதா வாழ்க்கையில் பல ரகசியங்கள் உள்ளது. அவற்றை நான் வெளியிடுவேன். பண மோசடி செய்ததாக ராதா கூறியுள்ளார்.

அதில் உண்மை இல்லை. நிஜத்தில் நான்தான் அவரிடம் ஏமாந்தேன். 80 லட்சத்துக்கும் மேல் ஏமாந்து இருக்கிறேன். ராதாவுக்கு எதிராக போட்டோ ஆதரங்கள் என்னிடம் உள்ளன. முன் ஜாமீன் கிடைத்ததும் உண்மைகளை வெளிச்சப்படுத்துவேன். இவ்வாறு அவர் கூறினார்.

ராதாவுக்கு ஒரு குழந்தை இருப்பதாகவும் செய்திகள் வெளியாகியுள்ளது. இது குறித்து கேட்ட போது அவர் மறுத்தார். ராதா கூறியதாவது..

பைசூல் அடிக்கடி என்னை சந்தித்து ஆசை வார்த்தைகள் கூறி நட்பானார். உங்களின் பைத்தியக்கார ரசிகன் என்றார். உங்களை வைத்து படம் எடுக்கப் போகிறேன் என்றார். திருமணம் செய்து கொள்வதாகவும் உறுதி அளித்தார். நான் நம்பினேன்.

2008 முதல் 2013 வரை என்னுடன் வாழ்ந்தார். என் இளமையை ஐந்தாண்டுகள் பாழடித்தார். செக்ஸ் டார்ச்சர் செய்தார். குடித்து வந்து அடித்து உதைத்தார். கொலை மிரட்டல் விடுத்தார். குழந்தை இருப்பதாக அவதூறு பேசுகிறார்கள். இதை சட்டப்படி சந்திப்பேன். என் சாபம் பைசூலை நிம்மதியாக வாழவிடாது. பைசூலை பற்றிய ரகசியங்களை விரைவில் வெளியிடுவேன். இவ்வாறு அவர் கூறினார்.