செய்தியாளர் சந்திப்பு என்ற பெயரில் பிரியாணித் திருவிழா நடத்தி வந்த விஜய்யிடம் சச்சின் படத்திலிருந்து ஒரு புதிய பழக்கம். செய்தியாளர்களில் குறிப்பிட்ட சிலரை மட்டும் தேர்வு செய்து தன் நீலாங்கரை வீட்டுக்கோ, கோடம்பாக்க அலுவலகத்துக்கோ ரகசியமாக வரவழைத்து அவர்களிடம் மனம்விட்டுப் பேசி அனுப்புவார்.

இந்த சந்திப்பைப் போலவே சந்திப்பு குறித்த செய்திகளும் ரகசியமாகவே இருந்துவிடும். நேற்றும் அப்படித்தான் குறிப்பிட்ட சில நாளிதழ் மற்றும் வார இதழ் நிருபர்களை மட்டும் தனியாக அழைத்த விஜய்யின் மனேஜர் சார் உங்க கிட்ட பர்சனலா கொஞ்சம் பேசனுமாம் நீங்க மட்டும் வந்துடுங்க என ஒவ்வொருவரிடமும் தனியாகச் சொல்லி வைக்க முத்து படத்தில் தீபாவளிப் பரிசுக்காக வருவார்களே அப்படி ரகசியமாகப் போய் ஒருவரை ஒருவர் பார்த்துக் கொண்டு விழித்திருக்கிறார்கள் செய்தியாளர்கள்.

ஆனாலும் தனித்தனியாகவே சந்தித்திருக்கிறார் விஜய். சந்திப்பின்போது அவர் பேசியது இரண்டே வரிகள்தான், ண்ணா இந்தப் படம் நல்லபடியா ரிலீசாகணும் தயவு செய்து எதுவும் எதிர்மறையா எழுதி காலி பண்ணிடாதீங்க இதற்கு மேல் ஒரு வார்த்தை கூட பேச மறுத்துவிட்டாராம் விஜய்.

விஜய் பேட்டி என எதுவும் கொடுக்காததில் கூட வருத்தமில்லையாம் சிலருக்கு. பேஸ்புக்ல போடும் அளவுக்கு படமெடுத்துக்கக் கூட அனுமதிக்கலயே என்றுதான் ரொம்ப அங்கலாய்த்துக் கொண்டிருந்தார்கள்.

14 புதுப்படங்கள் இம்மாதம் ரிலீசாகின்றன. இந்த வருடத்தில் கடைசி மாதம் என்பதால் பெரிய மற்றும் சிறு பட்ஜெட் படங்கள் நிறைய வருகின்றன.

வருகிற 6ம் திகதி ஈகோ, கல்யாண சமையல் சாதம், தகராறு, வெள்ளை தேசத்தின் இதயம் ஆகிய 4 படங்கள் ரிலீசாகின்றன. கல்யாண சமையல் சாதம் படத்தில் பிரசன்னாவும், தகராறு படத்தில் அருள்நிதியும் நாயகனாக நடித்துள்ளனர்.

வருகிற 13ம் திகதி இவன்வேற மாதிரி, மாலினி 22 பாளையங்கோட்டை, மதயானை கூட்டம் ஆகிய 3 படங்கள் ரிலீசாகின்றன. மாலினி 22 பாளையங்கோட்டை படத்தை ஸ்ரீப்ரியா இயக்கி உள்ளார். நித்யாமேனன் நாயகியாக வருகிறார். இவன் வேற மாதிரி படத்தில் பிரபுமகன் விக்ரம்பிரபு நாயகனாக நடித்துள்ளார்.

வருகிற 20ம் திகதி கார்த்தி, ஹன்சிகா ஜோடியாக நடிக்கும் பிரியாணி, ஜீவா, திரிஷா நடிக்கும் என்றென்றும் புன்னகை படங்கள் வருகின்றன. இதேநாளில் சேரன் இயக்கும் ஜே.கே.எனும் நண்பனின் வாழ்க்கை, தலைமுறைகள், விழா படங்கள் வருகின்றன.

வருகிற 27ம் திகதி விஜய் சேதுபதி நடிக்கும் ரம்மி, கஞ்சா கருப்பு தயாரித்து நடிக்கும் வேல்முருகன் போர்வெல்ஸ் படங்கள் ரிலீசாகின்றன.

வடிவேலுவும், சிங்கமுத்துவும் இணைந்து நடித்த காமெடி காட்சிகள் வயிறு குலுங்க சிரிக்க வைப்பவை. நிறைய படங்களில் இருவரும் சேர்ந்து நடித்தார்கள். இவர்கள் நடித்த பல காமெடி காட்சிகள் பட்டையை கிளப்பின.

அதன்பிறகு இருவரும் கருத்து வேறுபாடு ஏற்பட்டு பிரிந்தனர். சிங்கமுத்து மோசடி செய்து விட்டதாக வடிவேலு பரபரப்பு புகார் கூறினார். இதனால் பல வருடங்கள் அவர்கள் சேர்ந்து நடிக்கவில்லை. வடிவேலுவும் சினிமாவை விட்டு ஒதுங்கி இருந்தார்.

நீண்ட இடைவெளிக்கு பிறகு ஜெகஜாலபுஜபல தெனாலிராமன் என்ற படத்தில் வடிவேலு கதாநாயகனாக நடிக்கிறார். தன்னுடன் சேர்ந்து நடிக்க வரும்படி தனக்கு வடிவேலு தூது அனுப்பியதாக சிங்கமுத்து தெரிவித்தார்.

வாழப்பாடியில் நடந்த அ.தி.மு.க. பொதுக்கூட்டத்தில் சிங்கமுத்து பங்கேற்று பேசும்போது இதனை தெரிவித்தார். அவர் கூறும்போது, என் மீது மோசடி புகார் தெரிவித்த நடிகர் வடிவேலு கடந்த 2011 சட்டசபை தேர்தலில் தி.மு.க.விற்கு பிரச்சாரம் செய்தார். சினிமாவில் இருந்த அவர் ஓரங்கப்பட்டு விட்டார். மீண்டும் சினிமாவில் என்னுடன் மீண்டும் இணைந்து நடிப்பதற்கு தூது விட்டார். அவருடன் சேர்ந்து நடிப்பதற்கு நான் மறுத்து விட்டேன் என்றார்.

நேரம் படம் மூலம் தமிழில் அறிமுகமானவர் நஸ்ரியா. இவருக்கு தமிழில் நல்ல வரவேற்பு கிடைத்தது. தொடர்ந்து நய்யாண்டி, ராஜா ராணி, திருமணம் எனும் நிக்காஹ், நீ நல்லா வருவடா, வாய் மூடி பேசவும் என வரிசையாக படங்களில் நடிக்க ஒப்பந்தம் ஆனார்.

நய்யாண்டி படத்தில் தன்னைப் போலவே டூப் நடிகையை வைத்து சில கவர்ச்சிக் காட்சிகளை இயக்குனர் சற்குணம் படமாக்கிவிட்டார் என்று நஸ்ரியா குற்றம் சாட்டியதுடன் போலீஸ் கமிஷனரிடம் புகார் அளித்தார்.

இதையடுத்து பரபரப்பு ஏற்பட்டது.பேச்சுவார்த்தைக்குப் பிறகு அக்காட்சிகள் நீக்கப்பட்டன. இந்த சமயத்தை சாதகமாக பயன்படுத்திக்கொள்ள நினைத்த சிலர் நஸ்ரியாவின் போக்கு குறித்து விமர்சித்தனர்.

இயக்குனர் சொல்வதுபோல் நடிக்காதது தவறு என்று பகிரங்கமாகவே நயன்தாரா குற்றம் சுமத்தினார். அதற்கு நஸ்ரியா கண்டனம் தெரிவித்தார்.

இதற்கிடையில் திருமணம் எனும் நிக்காஹ் படத்தில் நடித்து வந்த நஸ்ரியாவுக்கு அப்பட ஹீரோ ஜெய்யுடன் காதல் என்று கிசுகிசு பரவியது. இதை ஜெய் மறுத்தார்.

இதற்கிடையில் ஜீவாவுடன் நடிப்பதாக இருந்த படத்திலிருந்து நஸ்ரியா நீக்கபட்டார் என்று தகவல் பரவியது. ஆனால் ஜீவா அதை மறுத்ததுடன் நஸ்ரியா தனது படத்தில் நடிப்பதாக தெரிவித்தார்
பிரச்னை ஓய்ந்தது என்று நஸ்ரியா நிம்மதிப் பெருமூச்சுவிட்டார். ஆனால் அதற்குள் அடுத்த பிரச்னையில் சிக்கி இருக்கிறார்.

மம்முட்டி மகன் துல்கர் சல்மான் ஜோடியாக வாய் மூடி பேசவும் படத்தில் நஸ்ரியா நடிக்கிறார். இப்படத்தில் துல்கர் மற்றும் நஸ்ரியாவுக்கு கெமிஸ்ட்ரி நன்றாக ஆகி காட்சிகளில் ஒன்றி நடிப்பதாகவும் நடிப்பையும் மீறி இருவருக்கும் காதல் மலர்ந்திருப்பதாகவும் சொல்லப்பட்டது.

இதைக் கேட்டு நொந்துபோய் இருக்கும் நஸ்ரியா யார்தான் இப்படிக் கிளப்பிவிடுறாங்களோ என விரக்தியில் புலம்புகிறார்.

நவீன சரஸ்வதி சபதம் திரைப்படத்தில் இந்து மதம் குறித்து அவதூறான காட்சிகள் இடம் பெற்றிருப்பதால் அதை நீக்கக் கோரியும், அந்தப் படக்குழு மீது நடவடிக்கை எடுக்கக் கோரியும் பாரத் மக்கள் கட்சி என்ற அமைப்பினர் சென்னை பெருநகர காவல் ஆணையர் அலுவலகத்தில் முறைப்பாட்டு மனு அளித்தனர். அந்த புகார் மனுவில் கூறப்பட்டிருப்பதாவது..

நவீன சரஸ்வதி சபதம் என்ற திரைப்படம் அண்மையில் வெளியானது. இந்த திரைப்படத்தில் சிவபெருமான், பார்வதி, விநாயகர் ஆகிய இந்து கடவுள்களை கேலி, கிண்டல் செய்யும் வகையில் பல காட்சிகள் இடம் பெற்றுள்ளன. மேலும் இந்து கடவுள்களை இழிவுபடுத்தும் வகையிலும் பல காட்சிகள் உள்ளன.

இந்தக் காட்சியைப் பார்க்கும் இந்துக்களின் மனது புண்படுகிறது. இதுபோன்ற காட்சிகளுக்கு திரைப்பட தணிக்கை துறை அனுமதியளித்தது கண்டிக்கதக்கதாகும். எனவே அந்தப் படத்தில் இருக்கும் இந்து மதம் குறித்து அவதூறான காட்சிகளை நீக்க வேண்டும்.

இதற்குக் காரணமான திரைப்படத்தின் இயக்குநர், நடிகர், நடிகைகள், தயாரிப்பாளர் ஆகியோர் மீது சட்டப்படி நடவடிக்கை எடுக்க வேண்டும் என்று அந்த மனுவில் குறிப்பிடப்பட்டிருந்தது. இந்த மனுவை பாரத் மக்கள் கட்சியினர் கூடுதல் ஆணையர் ஆர்.எஸ்.நல்லசிவத்திடம் அளித்தனர்.