யாழ்.திருநெல்வேலியில் அமைந்துள்ள வடமாகாண விவசாய அமைச்சர் பொ.ஐங்கரநேசனின் வீட்டின் மீது இன்று அதிகாலை 3 மணியளவில் கல் வீச்சுத் தாக்குதல் நடத்தப்பட்டுள்ளதாக தெரிவிக்கப்படுகிறது. இச்சம்பவம் தொடர்பாக கருத்து தெரிவித்த ஐங்கரநேசன்,

அதிகாலை 3 மணியளவில் இரண்டு மோட்டார் சைக்கிள் வந்தவர்கள் வீட்டின் வாசல் பகுதியில் நின்று வீட்டின் மீது கல் வீச்சு தாக்குதலை மேற்கொண்டனர். இதில் வீட்டின் யன்னல் கண்ணாடிகள் சில சேதமடைந்துள்ளன.

மாவீரர் நாளை நினைவு கூரும் முகமாக நேற்றைய தினம் மர நடுகை நிகழ்வை மேற்கொண்டதன் பின்னணியில் தான் இத்தாக்குதல் சம்பவம் இடம் பெற்று இருக்கலாம். இது ஒரு சகிக்க முடியாத காட்டுமிராண்டித்தனமான நாகரிகமற்ற செயலாகும்.

மக்கள் பிரதிநிதிகளின் வீடுகளின் மீது தொடர்ந்தும் அரசு தாக்குதலை நடாத்தினால் அது பாரதூரமான விளைவுகளை ஏற்படுத்தும் பாதையை தோற்றுவிக்கும்.

இதேவேளை கரவெட்டி பிரதேச தவிசாளர் வீடு, வல்வெட்டித்துறை உபதவிசாளர் வீடு, வலி.மேற்கு தவிசாளர் வீடு, மற்றும் சாவகச்சேரி பிரதேச சபை உறுப்பினர் வீடு என கடந்த இரு தினங்களில் யாழில் மக்கள் பிரதிநிதிகள் நால்வரின் வீடுகளின் மீது தாக்குதல் சம்பவங்கள் நடைபெற்றுள்ளமை குறிப்பிடத்தக்கது.

சிலாபம், மாரவில பிரதேசத்தில் பறக்கும் தட்டு ஒன்று நேற்றிரவு தென்பட்டதாகத் தெரிவிக்கப்படுகிறது.

நேற்றிரவு மாரவில கடற்பரப்பில் பறக்கும் தட்டொன்று வீழ்ந்த்தாக வெளியான தகவல் பிரதேசத்தில் பெரும் பரபரப்பை ஏற்படுத்தியது.
இரவு 7.30 அளவில் கடற் பரப்பில் ஒளியொன்று தென்படுவதனை பிரதேசத்தைச் சேர்ந்த ஒருவர் கண்டுள்ளார்.

இந்த சம்பவம் தொடர்பில் மாரவில பொலிஸாருக்கு அறிவிக்கப்பட்டது. கடலுக்கு 100 மீற்றர் தொலைவில் நீண்ட நேரத்திற்கு இந்த ஒளி தென்பட்டதாகத் தெரிவிக்கப்படுகிறது,

நீல நிறத்திலான ஒளியொன்று தென்பட்டதாக பிரதேச மக்கள் தெரிவித்துள்ளனர். எதிலிருந்து இந்த ஒளி தோன்றியது என்பதனை பொலிஸாரினாலும் கண்டறிய முடியவில்லை.

இந்த ஒளியை பார்வையிட பிரதேசத்தைச் சேர்ந்த பலர் ஒன்று கூடியிருந்தனர் எனத் தெரிவிக்கப்படுகிறது.

காணாமல் போனவர்கள் குறித்து இதுவரை 8000 முறைப்பாடுகள் கிடைக்கப்பெற்றுள்ளதென காணாமல் போனவர்கள் தொடர்பான முறைப்பாடுகளை விசாரிக்கும் ஆணைக்குழு தலைவர் முன்னாள் மேல் நீதிமன்ற நீதிபதி பராக்கிரம பரணகம தெரிவித்தார்.

முறைப்பாடுகளின் சரியான எண்ணிக்கையை குறிப்பிட முடியாது எனவும் ஒரு காணாமல் போதல் சம்பவம் குறித்து பல முறைப்பாடு கிடைக்கப்பெற்றிருக்கக் கூடும் எனவும் அவர் தெரிவித்தார்.

கொழும்பில் இடம்பெற்ற ஊடகவியலாளர் சந்திப்பில் உரையாற்றிய அவர் மேலும் கூறுகையில்..

கற்றுக் கொண்ட பாடங்கள் மற்றும் நல்லிணக்க ஆணைக்குழு பரிந்துரைக்கு அமைய 2013 ஒகஸ்ட் 15ம் திகதி வர்த்தமானி அறிவித்தல் மூலம் காணாமல் போனவர்கள் தொடர்பான முறைப்பாடுகளை விசாரிக்கும் ஆணைக்குழுவை ஜனாதிபதி நியமித்தார்.

1998 ஜூன் 10 தொடக்கம் 2009 மே 19ம் திகதி வரை காணாமல் போனவர்களது விபரம் திரட்டல், மீண்டும் அவ்வாறு நடக்காதிருக்க பொறுப்புக்கூற பரிந்துரை முன்வைத்தல், காணாமல் போனவர்களது குடும்பத்தினருக்கு செய்ய வேண்டிய தேவைகள் குறித்து ஆராய்தல் போன்ற பணிகள் எமது ஆணைக்குழுவிடம் ஒப்படைக்கப்பட்டுள்ளன.

ஒக்டோபர் 30ம் திகதிவரை முறைப்பாடுகளை பதிவு செய்யுமாறு பிரபல பத்திரிகைகள் மூலம் விளம்பரம் செய்திருந்தோம். பின்னர் பலரது வேண்டுகோளுக்கும் இணங்க நவம்பர் 30ம் திகதிவரை முறைப்பாடு செய்வதற்கான காலம் நீடிக்கப்பட்டுள்ளது.

தேசிய மற்றும் உள்நாட்டு ரீதியில் ஆணைக்குழு அறிக்கையை விரைவில் வெளியிடுமாறு கோரினால் அது நடைமுறை சாத்தியமற்றதாகும்.

தமிழ் மொழியில் கிடைக்கும் முறைப்பாடுகளை மொழிப்பெயர்த்தல், அந்தந்த பகுதிகளுக்குச் சென்று உண்மை தகவல்களைப் பெறல், முறைப்பாடுகள் அதிகம் போன்ற காரணங்களால் அறிக்கையை விரைவில் வெளியிட முடியாது.

வடக்கு கிழக்கு இளைஞர் யுவதிகள் தொடர்பில் மாத்திரமன்றி இராணுவ சேவையில் இருந்து காணாமல் போனவர்கள் தொடர்பிலும் முறைப்பாடு கிடைத்துள்ளது. அனைத்து முறைப்பாடுகள் குறித்தும் செயற்பட வேண்டியுள்ளது.

நாங்கள் சுயாதீன ஆணைக்குழு. ஏதேனும் குற்றம் இழைக்கப்பட்டிருக்குமாயின் அது குறித்து சட்ட மா அதிபருக்கு அறிவிக்க நடவடிக்கை எடுக்கப்படும். இம்மாதம் 30ம் திகதியில் இருந்து வடக்கு-கிழக்கு பகுதிக்கு விஜயம் செய்யவுள்ளோம் என காணாமல் போனவர்கள் தொடர்பான முறைப்பாடுகளை விசாரிக்கும் ஆணைக்குழு தலைவர், முன்னாள் மேல் நீதிமன்ற நீதிபதி பராக்கிரம பரணகம தெரிவித்தார்.

மன்னார், முருங்கன் பிரதேசத்தில் மாவீரர் தினம் அனுஸ்டித்த மூவர் இன்று கைது செய்யப்பட்டுள்ளனர்.

பொலிஸ் மற்றும் இராணுவ அறிவுறுத்தலுக்கு எதிராக சட்டவிரோதமான முறையில் மாவீரர் தினம் அனுஸ்டித்தமையின் காரணமாக இவர்கள் கைது செய்யப்பட்டுள்ளதாக பொலிஸ் ஊடகப்பேச்சாளர் அஜித் ரோஹண தெரிவித்தார்.

மாவீரர் தினத்தை அனுஸ்டிக்கும் வகையில் வடக்கில் ஆர்ப்பாட்டம் அல்லது பேரணி மேற்கொள்வது சட்டவிரோத செயல் என பொலிஸார் அறிவித்தல் விடுத்தனர். இந்நிலையிலும் வடக்கு மற்றும் கிழக்கில் மாவீரர் தினம் அனுஸ்டிக்கப்பட்டுள்ளது.

யாழ். பல்கலைக்கழக வளாகத்தில் காலையும் மாலையும் பல்கலைக்கழக வளாகத்தில் உள்ள மாவீரர் நினைவுத்தூபிக்கு சுடர் ஏற்றப்பட்டு அஞ்சலி செலுத்தப்பட்டுள்ளது.

யாழ். பல்கலைக்கழக சூழலில் இராணுவம், பொலிஸார் மற்றும் புலனாய்வாளர்களும் குவிக்கப்பட்டு பலத்த பாதுகாப்பு வழங்கப்பட்டுள்ளமை குறிப்பிடத்தக்கது.

இத்துடன் யாழ். போதனா வைத்தியசாலைக்கு முன்பாகவும் வைத்தியசாலையின் புதிய கட்டடத்திலும் சுடர் ஏற்றப்பட்டள்ளதாக தெரிவிக்கப்படுகிறது.

இந்த சம்பவத்தை அறிந்த இராணுவத்தினர் உடனடியாக அவ்விடத்திற்கு சென்று தீபங்களை அணைத்து அவற்றை அப்புறப்பட்டுத்தியுள்ளனர்.

இதேவேளை மட்டக்களப்பில் நேற்று இரவு மாவீரர் தின சுவரொட்டிகள் பல ஓட்டப்பட்டிருந்ததாக தெரிவிக்கப்படுகிறது.
எனினும் இவ் சுவரொட்டிகள் உடனடியாக பாதுகாப்பு பிரிவினரால் அகற்றப்பட்டுள்ளன.