தமிழ்த் தேசியக் கூட்டமைப்பின் நாடாளுமன்ற உறுப்பினர்கள் சகலரையும் பொதுநலவாய தலைவர்கள் மாநாட்டில் கலந்து கொள்ளுமாறு அரசாங்கம் அழைத்துள்ள போதிலும் கட்சி இது தொடர்பில் இன்னமும் முடிவெடுக்கப்படவில்லை என தெரிவிக்கப்படுகிறது.

தமிழ்த் தேசியக் கூட்டமைப்பின் நாடாளுமன்ற உறுப்பினர்களுக்கு இந்த அழைப்புகள் கிடைத்துள்ளதெனவும், இருப்பினும் தான் போவது பற்றி எதையும் முடிவாக கூற முடியாதெனவும் 15 ம் திகதி இது தொடர்பில் முடிவெடுக்கவுள்ளதாகவும் கூட்டமைப்பின் நாடாளுமன்ற குழுத்தலைவர் இரா.சம்பந்தன் கூறினார்.

பொதுநலவாய தலைவர்கள் மாநாடு நடைபெறும் போது அதற்குப் புறம்பாக சில நாடுகளின் தலைவர்களுடன் தமிழ்த் தேசிய கூட்டமைப்பு பேசவுள்ளது எனவும் தெரிவிக்கப்படுகிறது.

இதேவேளை, பிரித்தானிய பிரதமர் டேவிட் கமரூனை வடமாகாண முதலமைச்சர் சி.வி.விக்னேஸ்வரன் 15ம் திகதி வெள்ளிக்கிழமை யாழ்ப்பாணத்தில் சந்திக்கவுள்ளார்.

பெரும்பாலும் இதன் பின்னரே தமிழ் தேசியக் கூட்டமைப்பு பொதுநலவாய மாநாட்டில் கலந்து கொள்வது தொடர்பில் தீர்மானிக்கும் என எதிர்பார்க்கப்படுகிறது.

சனல் 4 ஊடகவியலாளர் கெலும் மக்ரே மனித உரிமைகள் தொடர்பாக இலங்கை அரசின் தலைவரை மின்சார கதிரையில் அமரச் செய்தேயாகுவேன் என சூளுரைத்தார். மக்ரே இலங்கை வருவதற்கு அனுமதியளித்தமைக்கான பிரதான காரணம் ஊடகச் சுதந்திரமேயாகும் என ஊடகத்துறையமைச்சர் கெஹலிய ரம்புக்வெல்ல நேற்று தெரிவித்தார்.

சனல்-4 தயாரிப்பாளர் கெலும் மக்ரேவுக்கு இலங்கை வருவதற்கான அனுமதியை பெற்றுக் கொடுத்ததன் மூலம் உலக நாடுகள் எங்களை சவாலுக்கு உட்படுத்தியுள்ளது எனவும் அவர் தெரிவித்தார்.

சனல் 4 தொடர்பாக பல்வேறு கருத்து வேறுபாடுகள் மற்றும் பிரச்சினைகள் எழுந்தன.

கெலும் மக்ரே பல்வேறு சந்தர்ப்பங்களில் இலங்கை தொடர்பாக வேண்டுமென்றே அவதூறை ஏற்படுத்தி இலங்கையின் சுதந்திரத்தையும் அதன் அபிவிருத்தி நோக்கிய செயற்பாடுகளையும் மலினப்படுத்தினார்.

குறிப்பாக மனித உரிமைகள் தொடர்பாக இலங்கை அரசின் தலைவரை மின்சார கதிரையில் அமரச் செய்தேயாகுவேன் என சூளுரைத்தார்.

இவ்வாறானதொரு நிலைமையில் அவர் எமது நாட்டுக்கு வருவதற்கான அனுமதியை பெற்றுக் கொடுத்தமைக்காக உலகம் எம்மை சவாலுக்கு உட்படுத்தியிருக்கிறதென்றும் அமைச்சர் கூறினார்.

தகவல் ஊடகத்துறையமைச்சில் நேற்றுக் காலை நடைபெற்ற செய்தியாளர் மாநாட்டிலேயே அமைச்சர் மேற்கண்டவாறு தெரிவித்தார்.

மக்ரே இலங்கை வருவதற்கு அனுமதியளித்தமைக்கான பிரதான காரணம் ஊடகச் சுதந்திரமேயாகும். மூன்றாந் தரப்பொன்றின் ஆலோசனை மற்றும் அவர்கள் கொடுத்த தகவல்களை அடிப்படையாகக் கொண்டும் கற்பனை கலந்துமே மக்ரே இவ்வாறு செயற்பட்டுள்ளார்.

அத்துடன் சனல்- 04 நிறுவனத்துக்கு இலங்கைக்குள் வர அனுமதியளித்து இலங்கையின் தற்போதைய நிலைமையை நேரடியாகக் கண்டு எமது நாட்டின் இறைமையை கருத்திற்கொண்டு அவர்களது மனசாட்சிக்கமைய நியாயத்தை நிலை நாட்டுவார்கள் என்ற எண்ணத்திலேயே அவருக்கு இலங்கைவர அனுமதியளித்தோம்.

மக்ரே தனது மனசாட்சிக்கு அமைய செயற்படுவாரேயானால் அவருக்கு இலங்கை தொடர்பிலான சரியான அபிப்பிராயம் கிடைக்குமென்று எண்ணுகிறேன். இல்லையெனில் அவருக்கு அனுமதியளித்ததனூடாக எதிர்நோக்கும் சவால்களுக்கு நாம் தைரியமாக முகம்கொடுப்போம்.

எமது நாட்டுக்கு வரும் பெரும்பான்மையான பாராளுமன்றக் குழுவினர் நாட்டில் ஏற்பட்டிருக்கும் புரட்சிகரமான வேலைத் திட்டங்களைக் கண்டு வியப்படைவார்கள். எமது ஜனாதிபதி நாட்டிற்காகவே செயற்பட்டு வருகின்றார்

புலிகள் இந்த நாட்டின் ஒரு முக்கியமானவர்கள் அல்ல. புலிகளை 32 நாடுகள் பயங்கரவாதப் பட்டியலில் சேர்த்திருந்தது. ஜனநாயக ரீதியாக ஆட்சிக்கு வந்த அரசுடன் புலிகளை ஒப்பிடுவது பாரிய குற்றச் செயலெனவும் அமைச்சர் தெரிவித்தார்.

கொமன்வெல்த் மாநாட்டுக்கு வந்த கனேடியப் பிரதிநிதி தீபக் ஒபராய், ஆனையிறவில் விடுதலைப் புலிகளுக்கு மலர்வளையம் வைத்து அஞ்சலி செலுத்தியதாக இலங்கை அரசாங்கம் கூறிய குற்றச்சாட்டை கனடா நிராகரித்துள்ளது.

இதுதொடர்பாக, கொழும்பிலுள்ள கனேடியத் தூதரகம் அறிக்கை ஒன்றை வெளியிட்டுள்ளது.

இலங்கையில் நடைபெற்ற போர் வன்முறைகளில் பாதிக்கப்பட்ட அனைத்து அப்பாவி மக்களையும் நினைவுகூரும் வகையிலேயே தீபக் ஒபராய் ஆனையிறவில் மலர் வளையம் வைத்து அஞ்சலி செலுத்தியதாக கனேடியத் தூதரகம் தெரிவித்துள்ளது.

அத்துடன், கனேடிய அரசாங்கம் தமிழீழ விடுதலைப் புலிகளை 2006ம் ஆண்டு தொடக்கம் இன்று வரை தடை செய்துள்ளதாகவும் அதில் சுட்டிக்காட்டப்பட்டுள்ளது.

பொதுநலவாய நாடுகளின் மாநாட்டை கனடாவின் பிரதமர் புறக்கணித்துள்ள நிலையில் கனடாவின் மீது இலங்கை அரசாங்கம் குற்றச்சாட்டை முன்வைத்துள்ளது.

அரசாங்கத்தின் ஆதரவு செய்திதாள் ஒன்று பொதுநலவாய நாடுகளின் அமர்வுக்காக கனடாவின் சார்பில் வந்துள்ள வெளியுறவுத்துறையின் நாடாளுமன்ற செயலாளர் தீபக் ஒபராய், ஆனையிறவில் இறந்த விடுதலைப் புலிகளுக்காக மலரஞ்சலி செலுத்தினார் என்று குற்றம் சுமத்தியுள்ளது.

எனினும் போரில் இறந்துப்போன பொதுமக்களுக்காகவே தாம் மலரஞ்சலி செலுத்தியதாக தீபக் ஒயராய் குறிப்பிட்டுள்ளார்.

ஏற்கனவே ஐக்கிய நாடுகளின் மனித உரிமைகள் ஆணையாளர் நவநீதம்பிள்ளை இலங்கை வந்தபோதும் அவர் போரில் பலியான விடுதலைப் புலிகளுக்கு அவர் மலரஞ்சலி செலுத்த முற்பட்டார் என்று அரசாங்கம் குற்றம் சுமத்தியிருந்தமை குறிப்பிடத்தக்கது.

வவுனியா சென்று கொண்டிருந்த செனல் 4 ஊடகவியலாளர்கள் கொழும்பு திரும்பியுள்ளதாக பொலிஸ் ஊடகப் பேச்சாளர் அஜித் ரோஹன தெரிவித்தார்.

அவர்கள் வாகனம் ஒன்றின் ஊடாக கொழும்பு வந்துக் கொண்டிருப்பதாக பொலிஸ் ஊடகப் பேச்சாளர் தெரிவித்தார்.

வவுனியா சென்று கொண்டிருந்த செனல் 4 ஊடகவியலாளர்களுக்கு அநுராதபுரத்தில் எதிர்ப்பு தெரிவிக்கப்பட்டது.

செனல் 4 ஊடகவியலாளர்கள் பயணித்த ரயிலை வழிமறித்த சிலர் ரயில் போக்குவரத்துக்கு இடையூறு ஏற்படுத்தினர்.

இதனால் அதிக நேரம் ரயிலின் உள்ளேயே இருந்த செனல் 4 ஊடகவியலாளர்கள் பின்னர் கொழும்பு நோக்கி அனுப்பப்பட்டுள்ளதாக தெரிவிக்கப்படுகிறது.

செனல் 4 ஊடகவியலாளர்கள் கொழும்பு வந்தபோது கட்டுநாயக்க விமான நிலையத்தில் வைத்து அவர்களுக்கு எதிர்ப்பு தெரிவிக்கப்பட்டிருந்தது.

இலங்கை ஜனாதிபதி மஹிந்த ராஜபக்ஷவிற்கு அருகில் பிரித்தானிய செனல் 4 ஊடகவியலாளர்கள் சென்றது எப்படி என்பது குறித்து விசாரணைகள் ஆரம்பிக்கப்பட்டுள்ளன.

இது குறித்து விசாரணை நடத்துமாறு ஊடகத்துறை அமைச்சர் கெஹலிய ரம்புக்வெல்ல அதிகாரிகளுக்கு பணித்துள்ளார்.

நேற்றைய தினம் பொதுநலவாய மாநாட்டு வர்த்தக பேரவை கூட்டத்தின் போது ஜனாதிபதி மஹிந்த ராபக்ஷவிற்கு அருகில் சென்ற செனல் 4 ஊடகவியலாளர் தன்னை அவரிடம் அறிமுகம் செய்து போர்க்குற்றச்சாட்டுக்கள் குறித்து கேள்வி எழுப்பினார்.

அதற்கு பதிலளித்த ஜனாதிபதி மஹிந்த ராஜபக்ஷ போர்க்குற்றச்சாட்டுக்கள் குறித்து பொருட்படுத்தவில்லை என கூறினார்.

மேலும் செனல் 4 ஊடகவியலாளரை தேனீர் அருந்து வரும்படியும் ஜனாதிபதி அழைப்பு விடுத்தார்.

மாநாடு அரங்கை விட்டு ஜனாதிபதி வெளியில் வந்தபோதே இச்சம்பவம் இடம்பெற்றது.