நடிகை அஞ்சலி கடந்த ஏப்ரல் மாதம் திடீரென்று சென்னையில் உள்ள வீட்டில் இருந்து வெளியேறினார். சித்தி பாரதிதேவியும், சினிமா இயக்குனர் களஞ்சியமும் தன்னை கொடுமை படுத்தியதாக அப்போது பரபரப்பு பேட்டி அளித்தார்.

ஐதராபாத் பொலிசில் ஆஜராகி வாக்குமூலமும் அளித்தார். தற்போது ஆந்திராவிலேயே தங்கி தெலுங்கு படங்களில் நடித்து வருகிறார். அஞ்சலியை கொடுமை படுத்தவில்லை என்றும், தன்னை இழிவு படுத்தி பொய்யான குற்றச்சாட்டுகளை சுமத்தி உள்ளார் என்றும் இயக்குனர் களஞ்சியம் சைதாப்பேட்டை நீதிமன்றத்தில் அவதூறு வழக்கு தொடர்ந்தார்.

இந்த வழக்கு பல தடவை விசாரணைக்கு வந்தும் அஞ்சலி ஆஜராகவில்லை. கடந்த 12ம் திகதி அஞ்சலிக்கு நேரில் ஆஜராகும்படி மீண்டும் நோட்டீஸ் அனுப்ப நீதிபதி உத்தரவிட்டார். நேற்று (29ம் திகதி) ஆஜராக வேண்டும் என்று நோட்டீசில் குறிப்பிடப்பட்டு இருந்தது. இதையடுத்து இன்று அஞ்சலி சைதாப்பேட்டை நீதிமன்றில் ஆஜராவார் என்று பரபரப்பு தகவல் வெளியானது.

பத்திரிகை போட்டோ கிராபர்களும், டி.வி.கமராமேன்களும் அங்கு திரண்டு நின்றனர். சைதாப்பேட்டை 17வது குற்றவியல் நீதிமன்றத்தில் நீதிபதி ராஜலட்சுமி முன்னிலையில் அஞ்சலி வழக்கு விசாரணைக்கு வந்தது. இயக்குனர் களஞ்சியம் நீதிமன்றில் ஆஜரானார். ஆனால் அஞ்சலி வரவில்லை. அஞ்சலி தரப்பில் வக்கீல் மேகநாதன் ஆஜராகி உடல் நலக்குறைவு ஏற்பட்டுள்ளதால் அஞ்சலியால் வர இயலவில்லை என்றார்.

இதையடுத்து அஞ்சலிக்கு ஜாமீனில் வரமுடியாத பிடிவாரண்டு பிறப்பித்து நீதிபதி உத்தரவிட்டார். வழக்கு விசாரணையை அடுத்த மாதம் 22ம் திகதிக்கு ஒத்தி வைத்தார். களஞ்சியம் தரப்பில் வக்கீல்கள் ஜெயப்பிரகாஷ், சுரேஷ்பாபு ஆகியோர் ஆஜரானார்கள்.

அஞ்சலியை கைது செய்து ஆஜர்படுத்த நீதிமன்றம் உத்தரவிட்டுள்ளதால் திரைப்பட உலகினர் மத்தியில் பரபரப்பு ஏற்பட்டு உள்ளது. அஞ்சலி விரைவில் சரண் அடைந்து பிடிவாரண்டை ரத்து செய்ய கோருவார் என எதிர்பார்க்கப்படுகிறது.

நடிகை பிரியாமணிக்கு மாப்பிள்ளை பார்க்கிறார்கள். விரைவில் திருமணம் செய்து கொண்டு செட்டில் ஆக முடிவு செய்துள்ளாராம்.

பிரியாமணிக்கு தமிழில் படங்கள் இல்லை. கன்னட படமொன்றில் நடிக்கிறார். மலையாள படத்துக்கும் வாய்ப்பு வந்துள்ளது. அவருக்கு தற்போது 29 வயது ஆகிறது. எனவே இளம் ஹீரோக்கள் ஓரம் கட்டுகிறார்கள். பழைய மாதிரி பெரிய படங்கள் அமையவில்லை. எனவேதான் திருமணம் செய்து கொண்டு சினிமாவை விட்டு விலக முடிவு செய்துள்ளார்.

டாக்டர், என்ஜினீயர், தொழில் அதிபர் போன்றவரின் ஜாதகங்களை வாங்கி வைத்து பெற்றோர் பொருத்தம் பார்த்து வருகிறார்கள். மாப்பிள்ளை முடிவானதும் உடனடியாக திருமணம் நடக்கும் என எதிர்பார்க்கப்படுகிறது.

அஜித் நல்ல மனம் கொண்ட நடிகர் என்று புகழ்ந்துள்ளார் நயன்தாரா. இருவரும் ஏற்கனவே பில்லா, ஏகன் படங்களில் ஜோடியாக நடித்தனர். தற்போது ஆரம்பம் படத்திலும் சேர்ந்துள்ளார்கள். முன்னணி கதாநாயகர்கள் பலர் இளம் நாயகிகளுடனேயே ஜோடி சேர விரும்புகின்றனர்.

திரிஷா, நயன்தாரா மாதிரியானவர்களை மூத்த நடிகைகளாக பாவித்து இணைந்து நடிக்க யோசிக்கிறார்கள். ஆனால் ஆரம்பம் படத்தில் நயன்தாராவை கதாநாயகியாக தேர்வு செய்து இருப்பதாக அப்படத்தின் இயக்குனர் விஷ்ணுவர்த்தன் கூறியதும், அஜித் ஆட்சேபிக்கவில்லையாம். உடனேயே சம்மதம் தெரிவித்துள்ளார்.

காதல் சர்ச்சைகளால் மார்க்கெட் சரியும் என்று நினைத்த நயன்தாராவுக்கு அஜித் ஜோடியானது மகிழ்ச்சியை ஏற்படுத்தி உள்ளது. தீபாவளிக்கு இப்படம் ரிலீசான பிறகு தன்னை இன்னும் உயரத்துக்கு கொண்டு போகும் என எதிர்பார்க்கிறார்.

அஜித் குறித்து நயன்தாரா மனம் திறந்து சொல்கிறார். அஜித் நல்லமனம் கொண்டவர். அவரைப்போல் ஒரு நடிகரை என் திரையுலக அனுபவத்தில் நான் பார்த்தது இல்லை. சக நடிகர்களை மதிப்பார். படப்பிடிப்பில் முன்னணி ஹீரோ இருந்தால் அவர் சம்பந்தப்பட்ட காட்சிகளைத்தான் இயக்குனர் படமாக்குவார். கதாநாயகரும் தனது சீன்களைத்தான் முதலில் எடுக்க வேண்டும் என்று நினைப்பார்.

ஆனால் அஜித் அப்படி இல்லை. மற்ற நடிகர்கள் சம்பந்தப்பட்ட காட்சிகளை படமாக்கி முடிக்கும்வரை அங்கேயே பொறுமையாக காத்துக் கொண்டு இருப்பார். நடிப்பில் குறை தெரிந்தால் அதை சரிசெய்யவும் ஆலோசனை சொல்லுவார் என்றார்.

நடிகை நஸ்ரியா புதுப்படங்களில் கவர்ச்சி உடை அணியமாட்டேன், கதாநாயகர்களுடன் நெருக்கமாக நடிக்கமாட்டேன் என்றெல்லாம் சொல்லி நிறைய நிபந்தனைகள் விதிப்பதாக செய்திகள் பரவி உள்ளன.

ஏற்கனவே நய்யாண்டி படத்தில் தனக்கு பதில் டூப் நடிகையை வைத்து ஆபாச காட்சிகளை அப்படத்தின் இயக்குனர் சற்குணம் படமாக்கியுள்ளதாகவும் அதை நீக்க வேண்டும் என்றும் போர்க்கொடி உயர்த்தினார். பொலிஸ் கமிஷனரிடமும் புகார் அளித்தார். பிறகு சர்ச்சை காட்சியை நீக்கியபிறகு சமரசமானார்.

இதுபோல் அவர் அடுத்து பாலாஜி மோகன் இயக்க உள்ள படத்திலும் அடாவடிகள் செய்வதாக கிசுகிசுக்கள் பரவி உள்ளன. இப்படம் தமிழ், மலையாளத்தில் தயாராகிறது. கதாநாயகனாக மம்முட்டி மகன் துல்கர்சல்மான் நடிக்கிறார்.

இயக்குனர் கொடுத்த கவர்ச்சி ஆடையை அணிய நஸ்ரியா மறுத்ததாகவும், இதனால் இருவருக்கும் மோதல் ஏற்பட்டுள்ளதாகவும் கூறப்பட்டது. இதற்கு இயக்குனர் பாலாஜிமோகன் பதில் அளித்துள்ளார். அவர் கூறியதாவது..

நஸ்ரியாவுக்கும் எனக்கும் எந்த பிரச்சினையும் இல்லை. இன்றுவரை எனக்கு ஒத்துழைப்பு கொடுத்து நடித்து வருகிறார். இரண்டு நாட்கள் நஸ்ரியாவை வைத்து போட்டோ ஷுட் நடத்தினோம். தொழில் ரீதியான ஈடுபாட்டை அவரிடம் பார்க்க முடிந்தது. அவருடன் பணியாற்றுவது மகிழ்ச்சியாக இருந்தது. ஆடைகள் விஷயத்தில் எந்த நிபந்தனையும் விதிக்கவில்லை என்று அவர் கூறினார்.