அம்புலன்ஸ் வண்டி மோதியதில் ஒருவர் பலியான சம்பவம் வவுனியாவில் இடம்பெற்றுள்ளது.

வவுனியா, ஓமந்தை பகுதியிலேயே இந்த சம்பவம் நேற்று செவ்வாய்க்கிழமை மாலை இடம்பெற்றுள்ளதாக தெரிவித்த ஓமந்தை பொலிஸார் சம்பவத்தில் ஓமந்தை பரசன்குளத்தை சேர்ந்த 72 வயதான எஸ்.சொர்ணலிங்கம் என்பவர் பலியாகியுள்ளார் என்றும் தெரிவித்தனர்.

ஓமந்தை பகுதியிலிருந்து வந்த மல்லாவி வைத்தியசாலையை சேர்ந்த அம்புலன்ஸ் வண்டியே துவிச்சக்கரவண்டியில் வந்தவரை மோதியுள்ளது.

சம்பவத்தில் படுகாயமடைந்தவர் வைத்தியசாலைக்கு கொண்டுசெல்லும் போதே மரணமடைந்துள்ளார். இவ் விபத்து தொடர்பில் ஓமந்தை பொலிஸார் விசாரணைகளை மேற்கொண்டு வருகின்றனர்.

வவுனியா வடக்கு கல்வி வலயத்தில் உள்ள இரண்டு கோட்டப் பாடசாலைகள் பெரும்பாலானவற்றில் ஆசிரியர்களுக்கு பற்றாக்குறை நிலவுகின்றது.

இதனால் தமது பிள்ளைகளின் கல்வித் தரம் வீழ்ச்சியடைவதாகவும், எதிர்காலத்தில் வலயத்தின் கல்வி நிலை விழ்ச்சி அடையும் அபாயம் ஏற்பட்டுள்ளதாகவும் பெற்றோர் கவலை வெளியிட்டுள்ளனர்.

இந்தக் கல்வி வலயத்தில் புலமைப் பரிசில் பரீட்சை, சாதாரண தரம், உயர்தரம் ஆகிய பரீட்சைகளின் பெறுபேறுகள் குறைந்து செல்வதாகவும் இதற்கு ஆசிரியர்கள் பற்றாக் குறையே காரணம் எனவும் பெற்றோர் தெரிவிக்கின்றனர்.

சில பாடசாலைகளில் தேவைக்கு அதிகமாக ஆசிரியர்கள் இருப்பதாகவும், சில பாடசாலைகளில் ஆசிரியர்கள் பற்றாக்குறை நிலவுவதாகவும் தெரிவிக்கின்றனர்.

குறிப்பாக விஞ்ஞானகுளம் நவரட்ணம் வித்தியாலயத்தில் 24 பிள்ளைகள் கற்கும் நிலையில் அங்கு இரண்டு ஆசிரியர்கள் மட்டும் உள்ளனர். இதேவேளை சின்னடம்பன் பாரதி வித்தியாலயத்தில் 21 பிள்ளைகளுக்கு 4 ஆசிரியர்கள் உள்ளனர் எனவும் தெரி விக்கப்படுகிறது.

அத்துடன் கோவில் குஞ்சுக்குளம் அ.த.க. பாடசாலைக்கு 5 மாதங்களாக அதிபர் இல்லாது இயங்குவதாகவும் பெற்றோர் தெரிவிக்கின்றனர். இவ்வாறு எழுந்துள்ள குற்றச் சாட்டுக் குறித்து வவுனியா வடக்கு வலய கல்விப் பணிப்பாளர் தெரிவிக்கும் போது..

ஆசிரியர் பற்றாக்குறை நிலவுவது உண்மை. குறிப்பாக கணிதம், விஞ்ஞானம், ஆங்கிலம் ஆகிய பாடங்களுக்கு பொதுவாக நெருக்கடியுள்ளது. உயர்தர கலைப் பிரிவில் தமிழ், புவியியல் போன்ற பாடங்களுக்கு ஆசிரியர் பற்றாக்குறை நிலவுகிறது.
அதிபர் பதவிக்கு விண்ணப்பம் கோரப்பட்டது. எனினும் குறித்த பாடசாலைக்கு எவரும் விண்ணப்பிக்கவில்லை. இது குறித்து விரைவில் நடவடிக்கை எடுக்கப்படும் என்றார்.

வவுனியா பேராறு நிர்மாணப்பணியில் ஈடுபடும் நீர்வழங்கல் சேவை ஊழியரொருவரின் மோட்டார் வண்டி இனம்தெரியாத நபரொருவரால் திருடும் முயற்சி இளைஞர்களால் முறியடிக்கப்பட்டது.

சம்பவம் தொடர்பாக மேலும் தெரியவருவதாவது..

பேராறு வேலைத்திட்ட ஊழியர்கள் பிரத்தியோகமாக வவுனியா புதுக்குளம் பகுதியில் தமது அலுவலகத்தில் இரவு நேரங்களில் தங்குவது வழக்கம்.

இதேபோன்று நேற்று தமது நிர்மாண வேலை முடிந்து ஊழியரொருவர் தனது மோட்டார் வண்டியை வெளியில் நிறுத்தி வைத்துவிட்டு தங்குமிடத்திற்குள் சென்று திரும்பும் ஒரு சில நொடிப்பொழுதில் இனம் தெரியாத நபரொருவர் மோட்டார் வண்டியை திருடிக்கொண்டு வேகமாக சென்றார்.

இதனை அவதானித்த இளைஞர்கள் மோட்டார் வண்டிகளுடன் துரத்தி சென்றவேளை ஓயார்சின்னக்குளம், மரக்காரம்பளை வீதியில் திருடிய மோட்டார் வண்டியை விட்டுவிட்டு திருடன் தலைமறைவாகியுள்ளார்.

வவுனியா பொலிஸார் சம்பவஇடத்திற்கு வருகைதந்து மேலதிக விசாரணைகளை மேற்கொண்டு வருகின்றனர்.