உளவுத்துறை, ஜனனம் போன்ற படங்களை இயக்கியிருப்பவர் ரமேஷ் செல்வன். தற்போது சத்யராஜ் நடிப்பில் கலவரம் என்ற படத்தை இயக்கி வருகிறார். இந்நிலையில், இவர் சென்னை கமிஷனர் அலுவலகத்தில் தலைவா திரைப்பட தயாரிப்பாளர் மீது புகார் மனு ஒன்றினை அளித்துள்ளார்.

அந்த மனுவில் தற்போது சத்யராஜை கதாநாயகனாக வைத்து கலவரம் என்ற படத்தை இயக்கி முடித்துள்ளேன். இந்த படத்தை எனது நண்பர் ரவிச்சந்திரன் தயாரித்துள்ளார். எங்கள் படத்தின் விளம்பரங்களை பார்த்து தலைவா படத்தின் தயாரிப்பாளர் சந்திரபிரகாஷ் ஜெயின் எங்களை இரண்டு வாரங்களுக்கு முன் நேரில் அழைத்து பேசினார்.

அப்போது எங்களுடைய தலைவா படத்தின் பிரச்னையில் நாளை முடிவு தெரிந்து விடும். தெரிந்ததும் தலைவா படத்தை உடனே வெளியிடுகிறோம். உங்களுடைய கலவரம் படம் வெளியிட்டால் எனது தலைவா படத்திற்கு போதுமான திரையரங்குகள் கிடைக்காது.

எனவே நானே உங்களுடைய படத்தினை 2.25 கோடி ரூபாய்க்கு வாங்கிக் கொள்கிறேன். ஒப்பந்தம் தயார் செய்து கொண்டு வந்து விடுங்கள் என்று கூறினார்.

அதன்படி நேற்று ஒப்பந்தத்தோடு சந்திரபிரகாஷ் ஜெயினை சந்திக்க சென்றோம். அதற்கு அவர் எங்களை சந்திக்க மறுத்ததுடன், எங்களை தாழ்த்தியும் அவமானப்படுத்தியது மட்டுமில்லாது உங்களை கொன்றுவிடுவேன் என்று மிரட்டி படத்தை வாங்க மறுத்து விட்டார்.

படத்தை வெளியிடாததால் எங்களுக்கு பெரும் நஷ்டம் ஏற்பட்டுள்ளது. இதனால் நானும் எனது தயாரிப்பாளர் ரவிச்சந்திரனும் தற்கொலை செய்து கொள்வதை தவிர வேறு வழியில்லை.

எனவே இந்த பிரச்சினையில் போலீசார் தலையிட்டு எங்களுக்கு பாதுகாப்பு வழங்க வேண்டும் என்றும் சந்திரபிரகாஷ் ஜெயின் மீது நடவடிக்கை எடுக்க வேண்டும் எனவும் கூறியுள்ளார்.

தனுஷ் சமீபகாலமாக சென்டிமென்ட் நிறைய பார்க்கும் மனிதராக மாறி உள்ளார். அவர் இப்போதெல்லாம் சினிமா விழாக்களுக்கு வேஷ்டி, சட்டை அணிந்துதான் வருகிறார்.

அவரிடம் ஏன் வேஷ்டி, சட்டையுடன் கலந்து கொள்கிறீர்கள் என்று கேட்டதற்கு நான் ஒரு தமிழன். தமிழரின் பாரம்பரிய உடையான வேஷ்டி சட்டையை அணிவதில் பெருமைப்படுகிறேன் என்று கூறி அனைவரின் வாயையும் அடைத்து விடுகிறார்.

சினிமா விழாக்கள் தவிர்த்து இனிமேல் தான் நடிக்கும் படங்களிலும் ஒரு காட்சியிலாவது வேஷ்டி, சட்டை அணிந்து நடிக்கவேண்டும் என தனுஷ் முடிவு செய்துள்ளார். வேஷ்டி, சட்டையை தவிர தான் நடிக்கும் படங்களில் ஒரு பாட்டுக்காவது லுங்கி கட்டி ஆடுவது எனவும் தீர்மானித்துள்ளார்.

இதுகுறித்து தனுஷ் கூறும்போது, என்னுடைய பல படங்களில் லுங்கி கட்டி நடித்துள்ளேன். அதிலும் குறிப்பாக ஆடுகளத்தில் ஒரு பாட்டு முழுவதும் லுங்கி கட்டித்தான் ஆடினேன்.

அது பெரும்பாலானவர்களுக்கு பிடித்திருந்தது. அந்த டான்ஸை கிராமத்து மக்கள் பார்த்துவிட்டு என்னை தங்களில் ஒருவராகவே நினைத்தார்கள் என்று கூறினார்.

அதனால் சென்டிமென்டாக இனிவரும் படங்களில் ஒரு பாடலுக்காவது லுங்கி கட்டி ஆடுவது என தனுஷ் முடிவு செய்துள்ளார்.

விஷ்ணுவர்தன் இயக்கத்தில் வெளிவரவிருக்கும் ஆரம்பம் படத்தின் ஒவ்வொரு சண்டைக் காட்சிகளிலும் ரொம்பவே ரிஸ்க் எடுத்து நடித்துள்ளார் அஜீத். இதனால் பலமுறை விபத்துகளில் சிக்கியும், கடைசிவரை டூப் போடாமலேயே துணிச்சலாக நடித்துள்ளார்.

இப்படத்தில் ஸ்டண்ட் மாஸ்டராக பணியாற்றிய ஹாலிவுட்டை சேர்ந்த லீ விட்டேக்கர் கூறும்போது,

அஜீத் ஒரு சாகசக்காரர். கமலுக்கு அடுத்தபடியாக கடினமாக உழைக்கக்கூடிய நடிகர். ஆரம்பம் படத்தில் நடித்தபோது, அவரது உடம்பில் பல இடங்களில் காயம் ஏற்பட்டபோதும் அவர் மனம் தளரவில்லை. மீண்டும், மீண்டும் கடினமான ஆக்ஷன் காட்சிகளில் தில்லாக நடித்தார். அப்போதெல்லாம் என் கண்களுக்கு ஹாலிவுட்டின் டொம் க்ரூஸ் போன்று தெரிந்தார் என்று கூறியுள்ளார்.

ரஜினிகாந்த், தீபிகா படுகோனே நடித்துள்ள படம் கோச்சடையான். இந்த படத்தை ரஜினியின் இளைய மகள் சௌந்தர்யா இயக்குகிறார். முதன்முறையாக மோஷன் கேப்சர் என்ற அதிநவீன தொழில்நுட்பத்தில் தயாராகி வருகிறது.

படத்தின் இறுதிக்கட்ட வேலைகள் தற்போது விறுவிறுப்பாக நடைபெற்று வருகின்றன. இப்படத்தின் டிரைலரை தயார் செய்துவிட்டதாக கூறப்படுகிறது. இப்படத்தின் கிராபிக்ஸ் காட்சிகளுக்காக ரொம்பவும் கஷ்டப்பட்டு வருகிறார்கள். ஹாலிவுட்டில் தயாரான அவதார் படத்தைப் போல இந்த படத்திலும் விஷுவல் எபக்ட்ஸ் பயங்கரமாக இருக்கும் என்கிறார்கள்.

இப்படத்தின் பின்னணி இசையை லண்டனில் உள்ள ஸ்டுடியோவில் முடித்துவிட்டார் ஏ.ஆர்.ரகுமான. தமிழ், ஆங்கிலம் உள்பட பல்வேறு மொழிகளிலும் படத்தை வெளியிட முடிவு செய்துள்ளனர்.

இந்நிலையில் இந்த படம் தெலுங்கில் விக்ரமசிம்ஹா என்ற பெயரில் வெளிவர உள்ளதாம். அதற்கான டப்பிங் பணிகளில் தற்போது இந்த படக்குழு களமிறங்கியுள்ளதாம். விரைவில் படத்தை வெளியிடவும் முடிவு செய்துள்ளனர். இப்படம் ரஜினி ரசிகர்களிடையே பெரும் எதிர்பார்ப்பை ஏற்படுத்தியுள்ளது.

மும்பையில் ஆங்கிலப் பத்திரிகை ஒன்றிற்கு புகைப்பட நிருபராக பணிபுரிந்த 23 வயதுப் பெண் ஒருவரை ஐந்து பேர் கொண்ட கும்பல் கடந்த 22ம் திகதி கற்பழித்தது. இந்த சம்பவம் நாடு முழுவதும் அதிர்ச்சி அலைகளை ஏற்படுத்தியது.

இது போன்ற தொடர் நிகழ்வுகள் பொதுமக்களிடையே கோபத்தையும், வேதனையையும் ஏற்படுத்தியுள்ளது. மும்பையில் நடந்த நிகழ்ச்சி குறித்து, பல ஹிந்தித் திரையுலக நட்சத்திரங்கள் தங்களின் கோபத்தை இணையதளத்தின் மூலம் வெளிப்படுத்தியுள்ளனர்.அவர்களில் சோனம் கபூரும் ஒருவராவார்.

இவர் நடிகர் அனில் கபூரின் மகளாவார். முன்னாள் மொடல் அழகியான இவர் பிரான்ஸ் நாட்டு அழகுப் பொருட்கள் விற்பனை நிறுவனமான லோ ரியலின் செய்தித் தொடர்பாளராக இருப்பதன் மூலம் சர்வதேச அங்கீகாரம் பெற்றுள்ளார்.

மும்பையில் நடந்த அதிர்ச்சிகரமான சம்பவத்திற்காக தான் மிகவும் வெட்கக்கேடாக உணருவதாகவும், இது ஒரு கோழைத்தனமான செயல் என்றும் சோனம் கபூர் இணையதளத்தில் குறிப்பிட்டுள்ளார்.

இந்த சம்பவத்தை எதிர்த்து மும்பையில் ஞாயிற்றுக்கிழமை அன்று இவரது தலைமையில் ஹிந்தித் திரையுலக நட்சத்திரங்கள் உட்பட பலர் ஒரு ஊர்வலம் நடத்தினர்.

ஜோகர்ஸ் பூங்காவிலிருந்து கார்ட்டர்ஸ் சாலையில் இருந்த திரை அரங்கு வரை நடந்து சென்ற இவர்கள் கற்பழிப்புக்கு எதிரான இந்தியா என்ற வாசகங்கள் எழுதப்பட்ட அட்டைகளையும் தாங்கிச் சென்றனர்.

பாடகி சோனா மகோபத்ரா,கன்னட நடிகை ரேஷ்மா டிசோஸா,டிவி நடிகர் கரன்வீர் போரா, டீஜே சிது, குஷால் பஞ்சாபி, தலிப் தஹில்,பாபா சித்திக் போன்றோர் இவருடன் இணைந்து ஊர்வலத்தில் பங்கேற்றனர்.