அமெரிக்காவில் 2006ம் ஆண்டு ஆயுதக் கொள்வனவில் ஈடுபட்டதாக குற்றஞ்சாட்டப்பட்ட இலங்கைத் தமிழரான சுரேஸ் சிறீஸ்கந்தராசாவுக்கு 2வருட சிறைத்தண்டனை விதித்து நேற்று அமெரிக்க நீதிமன்றம் தீர்ப்பளித்துள்ளது.

இதன்படி குற்றம் சுமத்தப்பட்டுள்ள வோட்டர்லூ சுரேஸ் என்று அழைக்கப்படும் 33 வயதான சுரேஸ் ஸ்ரீஸ்கந்தராஜாவுக்கு 2 ஆண்டுகள் சிறைத்தண்டனையை அமெரிக்க நீதிமன்றம் வழங்கியுள்ளது.

வோட்டர்லூ பல்கலைக்கழகத்தின் பொறியியல்துறை மாணவரான சுரேஸ் ஸ்ரீஸ்கந்தராஜா 2006ம் ஆண்டு கனடாவில் வைத்து கைதுசெய்யப்பட்டார்.

சுரேஸ் ஸ்ரீஸ்கந்தராசாவும் மேலும் மூவரும் விடுதலைப்புலிகளுக்கு நிதி சேகரித்தனர் மற்றும் தொழில்நுட்ப ரீதியாக உதவினர் என்ற குற்றச்சாட்டுக்களுக்கு உள்ளாகியிருந்தனர்.

இந்தநிலையில் கனடாவில் இருந்து நாடு கடத்தப்பட்ட சுரேஸ் அமெரிக்கா நீதிமன்றத்தில் தாக்கல் செய்த மேன்முறையீடு 2012ம் ஆண்டு நிராகரிக்கப்பட்டது.

இதன்போது தாம் விடுதலைப் புலிகளுக்காக வானூதி உபகரணகள், நீர்மூழ்கி கப்பல்கள், இரவு நேர வெளிச்சம் பாய்ச்சி மற்றும் தொலைத்தொடர்புகள் குறித்த ஆராய்ச்சிகளில் உதவியதாக சுரேஸ் நீதிமன்றத்தில் குற்றத்தை ஏற்றுக்கொண்டார்.

தன்னுடைய மனைவி மீது மண்ணெண்ணெய் ஊற்றி எரித்து கொலை செய்த கணவருக்கு நுவரெலிய மாவட்ட மேல் நீதிமன்றம் மரண தண்டனை விதித்து தீர்ப்பளித்துள்ளது.

கொலை குற்றம் நிரூபிக்கப்பட்டதை அடுத்து மேல் நீதிமன்றம் நேற்று இந்த மரண தண்டனையை வழங்கியுள்ளது.

ஹட்டன் காமினிபுர பிரதேசத்தை சேர்ந்த 66 வயதான ஆப்தீன் என அழைக்கப்படும் பொன்னையா அந்தோனிதாஸ் என்பவருக்கே இந்த தண்டனை விதிக்கப்பட்டது.

2000ம் ஆண்டு ஏப்ரல் 17ம் திகதி மனைவியுடன் ஏற்பட்ட தகராறு முற்றியதால் குற்றவாளியான இந்த நபர் மனைவி மீது மண்ணெண்ணையை ஊற்றி எரியூட்டியுள்ளார். அப்போது இவருக்கு 53 வயது.

5 பிள்ளைகளின் தாயான 53 வயதான ரஹிமா உம்மா என்ற பெண்ணே சம்பவத்தில் உயிரிழந்துள்ளார். இவர்கள் இருவரும் மதுபானத்திற்கு அடிமையாகி இருந்ததாகவும் சம்பவம் நடந்த தினத்தில் இருவரும் மதுபானம் அருந்தி இருந்தனர் எனவும் மருத்துவ பரிசோதனைகளில் தெரியவந்துள்ளது.

இவர்களுக்கு இரண்டு ஆண் பிள்ளைகளும் மூன்று பெண் பிள்ளைகளும் உள்ளனர். தாய் மீது தமது தந்தை எண்ணெய் ஊற்றி எரியூட்டுவதை தாம் கண்டதாக மகன்மார் நீதிமன்றத்தில் சாட்சியமளித்துள்ளனர்.

அதேவேளை தீக்காயங்களுக்கு உள்ளான ரஹிமா மூன்று நாள் வைத்தியசாலையில் அனுமதிக்கப்பட்டிருந்த போது தனது கணவரே தனக்கு எரியூட்டியதாக மருத்துவரிடம் கூறியிருந்தார்.

இந்த வழக்கில் முறைப்பாட்டாளர் சார்பில் அரச சட்டத்தரணி தாரக தர்மசிறியும் குற்றம் சுமத்தப்பட்ட தரப்பில் சட்டத்தரணி டி.பி. ஹேரத்தும் ஆஜராகியிருந்தனர்.

குற்றச்சாட்டு நேரில் கண்ட சாட்சியங்களுடன் சந்தேகத்திற்கு இடமின்றி நிரூபிக்கப்பட்டுள்ளதால் குற்றவாளிக்கு மரண தண்டனை விதித்து தீர்ப்பளிப்பதாக நீதிபதி லலித் ஏக்கநாயக்க அறிவித்தார்.

இலங்கையில் இருந்து லண்டன் சென்று பல்கலைக்கழகம் ஒன்றில் கல்வி கற்றுக் கொண்டிருந்த சிங்கள இளைஞர் ஒருவர் கொல்லப்பட்டார்.

கடந்த ஞாயிற்றுக்கிழமை இரவு இந்த சம்பவம் இடம்பெற்றுள்ளது. கடந்த இரண்டு வருடங்களுக்கு முன்னர் பிரித்தானிய சென்ற 25 வயதான தவசித்த பீரிஸ் என்ற இந்த இளைஞர் தென் யோக்சயர் என்ற இடத்தில் தொழில் செய்துகொண்டிருந்த நிலையில் கொல்லப்பட்டார்.

இந்த சம்பவம் தொடர்பில் மூன்று பேர் கைதுசெய்யப்பட்டுள்ளனர். 2011ம் ஆண்டு பிரித்தானியாவுக்கு சென்ற தவசித்த, செபீல்ட் ஹலாம் பல்கலைக்கழகத்தில் கணணி மென்பொருள் துறையில் கல்வி கற்றுவந்தார்.

இதேவேளை தமது படிப்புக்கும் இலங்கையில் உள்ள தமது குடும்பத்துக்கும் தேவையான பணத்தை உழைப்பதற்காக பீசா உணவகம் ஒன்றில் விநியோகப் பையனாகவும் அவர் தொழில் செய்து வந்தார் என்று யோக்சயர் பொலிஸார் தெரிவித்துள்ளனர்.

மாலபே பிரதேசத்தில் மேற்கொண்ட தேடுதலின் போது சுமார் 70 லட்சம் ரூபா பெறுமதியான இரண்டாயிரம் ரூபா நாணயத்தாள்களை பொலிஸார் கைப்பற்றியுள்ளதாக பொலிஸ் ஊடகப் பிரிவு தெரிவித்துள்ளது.

இந்த இரண்டாயிரம் ரூபா நாணயத்தாள்கள் பி.677999159 என்ற ஒரே இலக்கங்கள் தொடரில் அச்சாகியுள்ளதாக பொலிஸார் கூறினர்.

இந்த இலக்கங்களை கொண்ட இரண்டாயிரம் ரூபா நாணயத்தாள்கள் தமது கைகளுக்கு கிடைத்தால் அதனை அருகில் உள்ள பொலிஸ் நிலையத்தில் ஒப்படைக்குமாறு பொலிஸ் திணைக்களம் பொதுமக்களிடம் கேட்டுள்ளது.