காரில் போலி நம்பர் பிளேட் பொருத்திய வழக்கில் சிவகாசி நீதிமன்றத்தில் நடிகர் பவர்ஸ்டார் சீனிவாசன் நேற்று சரண் அடைந்தார்.
2009ம் ஆண்டில் போலி நம்பர் பிளேட் பொருத்திய காரில் பயணித்ததாக பவர் ஸ்டார் மீது வழக்கு பதிவு செய்யப்பட்டது.
இதனைத் தொடர்ந்து சென்னை உயர்நீதிமன்ற மதுரைகிளை உத்தரவுப்படி, சிவகாசி குற்றவியல் நீதித்துறை நடுவர் நீதிமன்றத்தில் பவர் ஸ்டார் சீனிவாசன் நேற்று காலை சரண் அடைந்தார்.
பாலியல் புகாரை வாபஸ் பெற மறுத்த ஆசிரியை தீ வைத்து எரித்துள்ள சம்பவம் பரபரப்பை ஏற்படுத்தியுள்ளது.
ஒடிசா மாநிலம் ராயகடா மாவட்டத்தில் உள்ள பள்ளி ஒன்றில் பணியாற்றும் 27 வயது ஆசிரியை ஒருவருக்கு பள்ளி ஆய்வாளர் சில மாதங்களுக்கு முன்பு பாலியல் தொந்தரவு கொடுத்துள்ளார்.
இதுகுறித்து ஆசிரியை அளித்த புகாருக்கு இதுவரை எந்த நடவடிக்கையும் எடுக்கப்படவில்லை.
இந்நிலையில் கடந்த ஞாயிறன்று ஆசிரியையை புகாரை வாபஸ் பெறச் சொல்லி குற்றவாளிகள் மிரட்டியுள்ளனர். அதற்கு ஆசிரியை மறுப்புத் தெரிவித்ததால் ஆத்திரமடைந்த குற்றவாளிகள் அவரை தீ வைத்து எரித்து விட்டனர்.
இதில் 90 சதவீத தீக்காயம் அடைந்த அவர் மருத்துவமனையில் சிகிச்சை பெற்று வருகிறார். அவரது உடல்நிலை தொடர்ந்து கவலைக்கிடமாக உள்ளதாக மருத்துவர்கள் தெரிவித்துள்ளனர்.
குற்றம் சாட்டப்பட்ட முக்கிய குற்றவாளியான பள்ளி ஆய்வாளர் தலைமறைவாகி விட்டதால் அவரைப் பொலிசார்தீவிரமாகத் தேடி வருகின்றனர். மேலும் புகாரை குறித்து நடவடிக்கை எடுக்காத உதவி கண்காணிப்பாளர் உட்பட பள்ளி ஆய்வாளர், மாவட்டக் கல்வி ஆய்வாளர் ஆகியோர் தற்காலிக பணிநீக்கம் செய்யப்பட்டுள்ளனர்.
அனைத்து நாடுகளிலுமே பெண்களுக்கு போதிய பாதுகாப்பற்ற நிலை உள்ளது. பிரான்சிலும் இந்த நிலை உள்ளது. ஆனால் பிரான்சை விட இந்தியாவில் உள்ள பெண்கள் போதிய பாதுகாப்புடன் உள்ளனர் என பிரான்ஸ் அமைச்சர் நஜாத் வல்லாட் பெக்காம் பேசினார்.
பிரான்ஸ் நாட்டின் பெண்கள் நலத் துறை அமைச்சர் நஜாத் வல்லாட் பெக்காம், நான்கு நாள் பயணமாக இந்தியா சென்றுள்ளார். அவர் பயணத்தின் முடிவில் செய்தியாளர்களிடம் அவர் பேசியதாவது:
இந்தியாவுக்கும் பிரான்சுக்கும் இடையே பல விஷயங்களில் தொடர்பு உள்ளது. பெண்கள் நலனுக்காக பாடுபடும் தன்னார்வ தொண்டு நிறுவனங்கள் இரு நாடுகளிலும் அதிகமாக உள்ளன. இவை ஒன்றுடன் ஒன்று தொடர்புடையதாக உள்ளன.
டெல்லியில் கடந்தாண்டு மருத்துவ மாணவி ஓடும் பஸ்சில் பாலியல் பலாத்காரம் செய்யப்பட்டது குறித்து பத்திரிகைகளில் விரிவான செய்திகள் வெளியாகி இருந்தன. பிரான்சு பத்திரிகைகளும் இந்த செய்தியை பெரிய அளவில் வெளியிட்டிருந்தன.
இந்தியாவில் மட்டுமல்ல பிரான்சிலும் உலகின் மற்ற நாடுகளிலும், பெண்களுக்கு எதிரான இதுபோன்ற கொடுமைகள் நடக்கத் தான் செய்கின்றன. பிரான்சில் ஒரு நாளைக்கு 200 பெண்கள் பாலியல் பலாத்காரம் செய்யப்படுவதாக புகார்கள் வருகின்றன.
பிரான்சில் உள்ள பல பெண்கள் பலாத்காரம் செய்யப்பட்டது தொடர்பாக புகார் அளிக்க மறுக்கின்றனர். இந்தியாவிலும் இதுபோன்ற நிலை காணப்படுகிறது.
இந்தியாவில் பெண்களுக்கு என்னென்ன பிரச்னைகள் உள்ளனவோ அதே பிரச்னைகள் பிரான்சிலும் உள்ளன. இன்னும் கூற வேண்டுமானால் பிரான்சை விட இந்தியாவில் உள்ள பெண்கள் போதிய பாதுகாப்புடன் உள்ளதாக அவர் மேலும் தெரிவித்தார்.
பாசிகர் இந்தி படத்தின் மூலம் பிரபல பொலிவுட் கதாநாயகியாக 1992ல் அறிமுகமாகியவர் நடிகை கஜோல். தில்வாலே துலன்யே லே ஜாயங்கே மற்றும் குச் குச் ஹோத்தா ஹை படங்களின் மூலம் புகழ் ஏணியின் உச்சியை தொட்டு 2011ம் ஆண்டு பத்மஸ்ரீ விருதை பெற்ற கஜோல், 1997ம் ஆண்டு ராஜீவ் மேனன் இயக்கத்தில் வெளியான மின்சார கனவு படத்தில் நடிகர் அரவிந்த் சாமிக்கு ஜோடியாக நடித்திருந்தார்.
சுமார் 40 படங்களில் நடித்துள்ள இவர் பொலிவுட் நடிகர் அஜய் தேவ்க்னை 5 ஆண்டுகளாக காதலித்து 1994ம் ஆண்டு அவரையே திருமணம் செய்து கொண்டார். மும்பையின் புறநகர் பகுதியான ஜுகு-வில் உள்ள ஆடம்பர வீட்டில் இத்தம்பதியர் வாழ்ந்து வருகின்றனர்.
கடந்த 22ம் திகதி சினிமா நிகழ்ச்சி ஒன்றில் பங்கேற்பதற்காக அலங்காரம் செய்து கொண்ட கஜோல் தனது நகை பெட்டியில் இருந்து 17 வளையல்கள் காணாமல் போனதை அறிந்து அதிர்ச்சியடைந்தார்.
இது வீட்டின் உள்ளே சுதந்திரமாக நடமாடும் யாரோ செய்த வேலையாகதான் இருக்க வேண்டும் என்பதை உணர்ந்த அவர் இது தொடர்பாக ஜுகு பொலிஸ் நிலையத்தில் புகார் அளித்தார்.
அவரது வீட்டில் வேலை செய்யும் 10க்கும் மேற்பட்ட பணியாளர்களிடம் விசாரணை நடத்திய போலீசார் காயத்ரி (22) சந்தோஷ் பாண்டே ஆகிய இருவரை கைது செய்தனர். அந்தேரி நீதிமன்றத்தில் ஆஜர்படுத்தப்பட்ட இருவரையும் விசாரணை காவலின்கீழ் சிறையில் அடைக்குமாறு நீதிபதி உத்தரவிட்டார்.
திருடப்பட்ட 17 வளையல்களில் மதிப்பு 5 லட்சத்துக்கும் அதிகம் என பொலிசார் தெரிவித்தனர்.
3, எதிர்நீச்சல், வணக்கம் சென்னை என தொடர்ந்து ஹட்ரிக் வெற்றி கொடுத்த அனிருத் தற்போது தமிழ் சினிமாவின் முன்னணி இசையமைப்பாளர்களில் ஒருவராக ஆகிவிட்டார். இவருக்கு தற்போது வாய்ப்புகள் குவிந்த வண்ணம் இருக்கின்றன. இருந்தாலும் தொடர்ந்து படங்களை ஒப்புக்கொள்ள மறுத்து வருகிறார்.
இவர் தற்போது சிவகார்த்திகேயன் நடிக்கும் மான் கராத்தே, தனுஷின் வேலையில்லா பட்டதாரி, விஜய்-ஏ.ஆர்.முருகதாஸ் இணையும் புதுப்படம் உள்ளிட்ட பல படங்களில் பணிபுரிந்து வருகிறார்.
இந்நிலையில் பாலாஜி மோகன் இயக்கும் வாய் மூடி பேசவா, மம்முட்டி மகன் துல்கர் சல்மான், நஸ்ரியா இணைந்து தமிழில் நடிக்கும் புதிய படம் ஒன்றிலும் நடிக்க ஒப்பந்தமாகியிருந்தார். இந்த இருபடங்களிலிருந்தும் தற்போது அனிருத் விலகிக் கொண்டதாக கூறப்படுகிறது. இதற்காக அவர்களிடமிருந்து வாங்கிய அட்வான்ஸ் தொகையை திருப்பிக் கொடுத்துவிட்டதாகவும் கூறப்படுகிறது.
பெயருக்கு அதிக படங்களில் இசையமைக்கிறேன் என்றில்லாமல், குறிப்பிட்ட படங்களில் இசையமைத்து சிறந்த இசையமைப்பாளர் என பெயரெடுக்க வேண்டும் என்பதனாலேயே இந்த முடிவை அவர் எடுத்ததாக கூறுப்படுகிறது. குறைந்தது 6 தயாரிப்பாளர்களிடம் இவர் வாங்கிய அட்வான்ஸ் தொகையை திருப்பிக் கொடுத்துவிட்டதாக கூறப்படுகிறது.
நடிகர் விஷால் தலைமையிலான நட்சத்திர கிரிக்கெட் போட்டி கடந்த பிப்ரவரி மாதம் துபாய், சென்னை, பெங்களூர், ஐதராபாத், விசாகப்பட்டினம், கொச்சி ஆகிய இடங்களில் நடந்தது. அதில், நடிகர் ஆர்யாவும் கலந்து கொண்டு விளையாடினார்.
அப்போது அவருடைய காலில் பலத்த அடிபட்டது. அதற்காக, அவருக்கு சிகிச்சை அளிக்கப்பட்டது. அவருக்கு சிகிச்சை அளித்த வைத்தியர் அடிபட்ட காலில் சிறிய அளவில் சத்திரசிகிச்சை செய்ய வேண்டும் என்று கூறினார். தொடர்ந்து படப்பிடிப்புகள் இருந்ததால் ஆர்யாவினால் உடனடியாக சத்திரசிகிச்சை செய்து கொள்ள முடியவில்லை.
அவர் நடித்து வந்த ராஜாராணி படம் சமீபத்தில் திரைக்கு வந்தது. தீபாவளிக்கு ஆரம்பம் படம் வெளிவருகிறது அடுத்து அவர் நடித்த இரண்டாம் உலகம் படமும் விரைவில் திரைக்கு வர இருக்கிறது.
இதைத்தொடர்ந்து ஆர்யாவுக்கு தற்போது ஓய்வு கிடைத்ததால், சென்னையில் உள்ள ஒரு தனியார் வைத்தியசாலையில் சத்திரசிகிச்சை செய்து கொண்டார். அவருடைய வலது காலில் சத்திரசிகிச்சை நடந்தது. ஆர்யா இப்போது வீட்டில் ஓய்வு எடுத்து வருகிறார். இதுபற்றி ஆர்யா கூறியதாவது..
கிரிக்கெட் விளையாடியபோது என் காலில் அடிபட்டு தசை நார் கிழிந்து பாதிப்பு ஏற்பட்டது. அதற்கு சத்திரசிகிச்சை செய்து கொள்ளும்படி வைத்தியர்கள் கூறினார்கள். அதன்படி சத்திரசிகிச்சை செய்துகொண்டேன். சத்திரசிகிச்சைக்குப்பின், சில நாட்கள் ஓய்வு எடுத்துக்கொள்ளும்படி கேட்டுக்கொண்டார்கள். படப்பிடிப்புகளை தள்ளிவைத்து விட்டு வீட்டிலேயே ஓய்வு எடுத்து வருகிறேன் என்று ஆர்யா கூறினார்.
ஏமன் நாட்டில் கணவரை குத்திக் கொன்ற மனைவி கைது செய்யப்பட்டுள்ளார். அரபு நாடுகளில் ஒன்றான ஏமனில் சூர் நகரில் கேரளாவை சேர்ந்த ஹென்னி வர்கீஸ் என்பவர் தனது மனைவி நீனாவுடன் வசித்து வந்தார்.
அங்குள்ள இந்திய பள்ளியில் நீனா ஆசிரியையாக பணிபுரிந்து வருகிறார். ஹென்னிக்கு அதிகளவு குடிப்பழக்கம் இருக்கவே, இருவருக்கும் அடிக்கடி தகராறு ஏற்படும்.
இந்நிலையில் சம்பவதினத்தன்று பயங்கர கோபமடைந்த நீனா, ஹென்னியை கத்தியால் குத்தி கொலை செய்தார். இதுதொடர்பாக நீனாவை கைது செய்த பொலிசார் சிறையில் அடைத்தனர்.
இதனையடுத்து ஹென்னியின் சடலத்தையும் இவர்களது இரு குழந்தைகளையும் கேரளாவிற்கு அனுப்பி வைக்க இந்திய தூதரகம் ஏற்பாடுகளை செய்து வருகிறது.
50 போட்டிகளில் 106 கோல் என்ற லயனல் மெஸ்சியின் சாதனையை முறியடித்தார் பிரிட்டனைச் சேர்ந்த 7 வயது சிறுவன் சொனி கில்கென்னி.
அச்சிறுவன், வெர்ன்போர்ட் ரேஞ்சர்ஸ் என்ற ஜுனியர் கிளப் அணிக்காக விளையாடி வருகிறார். பிரிட்டனின் டெய்லி எக்ஸ்பிரஸ் நாளிதழ் இச்சிறுவன் தொடர்பான செய்தியை வெளியிட்டுள்ளது.
ஜுனியர் கிளப் அணிகளுக்கு இடையிலான போட்டியில் சோனி 12 கோப்பைகளை வென்றுள்ளார். மெஸ்சியின் சாதனையை முறியடிப்பதற்காக சோனி கடுமையான பயிற்சி மேற்கொண்டார் என்று அவனது தந்தை கூறியுள்ளார்.
அஜித், ஆர்யா, நயன்தாரா நடிப்பில் உருவாகியுள்ள ஆரம்பம் படம். இன்று ரிலீஸ் ஆகவுள்ளது. இந்நிலையில் ஆரம்பம் படத்திற்கு தடைவிதிக்கக் கோரி சேலம் ரெட்டியூரைச் சேர்ந்த பிளாக் கிங்டம் பிக்சர்ஸ் சார்பில் கே.கண்ணன் என்பவர் நகர சிவில் நீதிமன்றத்தில் மனு ஒன்றை தாக்கல் செய்துள்ளார்.
அந்த மனுவில் இனிதான் ஆரம்பம் என்ற தலைப்பில் நான் ஒரு தமிழ் படத்தை தயாரித்து இயக்கி வருகிறேன். இப்படத்தின் பாடல் பதிவுகள் நடந்துவிட்டது. இந்த பெயரை தென்னிந்திய திரைப்படம் மற்றும் தொலைக்காட்சி தயாரிப்பாளர் கில்டில் கடந்த ஏப்ரல் மாதம் 12ம் திகதி பதிவு செய்துள்ளேன்.
படத்தின் தயாரிப்பு பணிகள் நடந்துவரும் நிலையில் ஸ்ரீசத்ய சாய் மூவிஸ் சார்பில் ரகுராம் என்பவர் ஆரம்பம் என்ற பெயரில் திரைப்படம் தயாரித்து வெளியிடவுள்ளார். ஏற்கெனவே நான் பதிவு செய்த பெயரை விதிகளுக்கு முரணாக தென்னிந்திய திரைப்படம் மற்றும் தொலைக்காட்சி தயாரிப்பாளர்கள் கில்டில் பதிவு செய்துள்ளனர்.
எனவே, இப்படத்தை வெளியிட தடை விதிக்க வேண்டும். தென்னிந்திய திரைப்படம் மற்றும் தொலைக்காட்சி தயாரிப்பாளர்கள் கில்டில் பதிவு செய்த ஆரம்பம் என்ற பெயரை திரும்பப்பெற உத்தரவிட வேண்டும் என்று அந்த மனுவில் குறிப்பிட்டுள்ளார்.
இந்தோனேசியாவில் மலைப்பாம்பை வைத்து மசாஜ் செய்வது அதிகரித்துள்ளது. ஆசிய நாடுகளில் சுற்றுலா தலங்களில் உடலுக்கு உற்சாகம் அளிப்பதற்காக பல வகையான மசாஜ்கள் செய்யப்படுகின்றன.
அருவிகள், கடற்கரைகள் போன்ற இடங்களில் அமைந்திருக்கும் மையங்களில் எண்ணை தடவி மசாஜ் அளிப்பது, மண் குளியல் என பல்வேறு வகையில் சுற்றுலா பயணிகளுக்கு மசாஜ் அளிக்கின்றனர். ஆனால் இந்தோனேசிய தலைநகர் ஜகார்தாவில் உள்ள ஒரு மசாஜ் நிலையம் சற்று வித்தியாசமாக வாடிக்கையாளர்களை கவர்வதற்காக மலைப் பாம்பு மசாஜ் செய்கின்றனர்.
உடலில் மலைப் பாம்புகளை தவழ விட்டு ஒரு பெண் ஒருவர் இதமாக உடலின் பாகங்களை அழுத்துவதன் மூலமாக உடலுக்கு புத்துணர்ச்சி கிடைப்பதாக அந்த நிலையம் கூறுகிறது. தற்போது இந்த மசாஜூக்கு வாடிக்கையாளர்கள் மத்தியில் வரவேற்பும் பெருகியுள்ளது. ஏராளமானோர் மலைப் பாம்பு மசாஜ் செய்வதற்காக இங்கு குவிகின்றனர்.
இதற்காக வாடிக்கையாளர்களிடம் 50 டொலர் கட்டணம் வசூலிக்கின்றனர். இதில் ஒருபடி முன்னேறி இஸ்ரேலில் உள்ள அழகு நிலையம் ஒன்று எலிகளை வைத்து மசாஜ் செய்கிறது என்பது குறிப்பிடத்தக்கது.
துரிதமாக கடிதங்களை கிடைக்கச் செய்வதற்காக அதிவிரைவு தபால் சேவை நாடளபவிய ரீதியில் ஆரம்பித்து வைக்கப்பட்டுள்ளது.
அதனடிப்படையில் வவுனியாவிலும் 29ம் திகதி முதல் உத்தியோக பூர்வமாக அதி விரைவு தபால் சேவை ஆரம்பிக்கப்பட்டது.
இது தொடர்பில் பிரதேச அஞ்சல் அதிபதி நாயகம் என்.ரட்ணசிங்கம் கருத்து தெரிவிக்கையில்..
எமது திணைக்களத்தின் மற்றுமோர் முயற்சியாக தபால்களை உடனடியாக கிடைக்கச் செல்லக் கூடியதாக எமது அமைச்சரின் நடவடிக்கை காரணமாக அதிவிரைவு தபால் சேவை ஆரம்பிக்கப்பட்டுள்ளது.
எமக்கு இரண்டு வாகனங்கள் இந் நடவடிக்கைக்காக வழங்கப்பட்டுள்ளது. அதில் ஒன்று யாழ்பாணம் செல்லும். இது வடமாகாண தபால்களை விநியோகிக்கும். மற்றையது தம்புள்ளைக்கு சென்று தபால்களை ஒப்படைக்கும்.
தென் பகுதிக்குரிய தபால்களை தம்புள்ளை பகுதியில் வைத்து சேகரிப்பதனால் அங்கு சென்று எமது வாகனம் விநியோகிக்கும் என்றார். இதன் மூலம் தபால் விநியோகத்தில் ஏற்படும் தடங்கல்களை குறைக்க முடியும் எனவும் தெரிவித்தார்.
நேற்று முன்தினம் முதல் ஆரம்பிக்கப்பட்ட இந்த சேவையில் பிரதேச அஞ்சல் அதிபதி நாயகம் என்.ரட்ணசிங்கம், பிரதேச அஞ்சல் அத்தியட்சகர் எம.ஜி.அல்ஹா சல்ஹாது, மற்றும் வவுனியா அஞ்சல் திணைக்கள உத்தியோகத்தர்கள் கலந்து கொண்டனர்.
கண்டியில் தனது இரண்டரை வயது மகளுடன் தந்தையொருவர் தற்கொலை செய்துள்ளதாக பொலிஸார் தெரிவித்துள்ளனர்.
கண்டி – பன்வில் நகரில் தபால் நிலையத்திற்கு அருகில் இருக்கும் கிணறு ஒன்றில் இருந்து தந்தை மற்றும் இரண்டரை வயதான மகளின் சடலங்கள் இன்று காலை மீட்கப்பட்டுள்ளதாக பன்வில் பொலிஸார் தெரிவித்தனர்.
உயிரிழந்த தந்தையின் வயது 52 என தெரிவிக்கும் பொலிஸார் இவர்கள் தற்கொலை செய்து கொண்டிருக்கலாம் என கூறினர்.
உயிரிழந்தவரின் மனைவி வெளிநாட்டில் தொழில் புரிந்து வருகிறார். இவர்கள் தற்கொலை செய்து கொண்டமைக்கான காரணம் இதுவரை கண்டறியப்படவில்லை.
பன்வில, உடகொட – குருந்துகொல்ல பிரதேசத்தை சேர்ந்தவர்களே இவ்வாறு தற்கொலை செய்துள்ளனர். உயிரிழந்த நபருக்கு 16 வயதான மகளும் 12 வயதான மகனும் உள்ளதுடன் அவர்கள் சிறுவர் காப்பகம் ஒன்றில் வசித்து வருகின்றனர் என பொலிஸார் கூறினர்.
பாராளுமன்ற எம்.பி. யான பிறகு குட்டை பாவாடையில் மரத்தை சுற்றி டூயட் ஆட முடியுமா என ரம்யா ஆவேசமாக கேள்வி எழுப்பியுள்ளார். ரம்யா தமிழில் குத்து, வாரணம் ஆயிரம், கிரி உள்ளிட்ட படங்களில் நடித்துள்ளார்.
சமீபத்தில் கர்நாடகாவில் மண்டியா தொகுதி பாராளுமன்ற இடைத்தேர்தலில் போட்டியிட்டு எம்.பி.யாக தேர்வானார். இதையடத்து சினிமாவில் நடிப்பதை நிறுத்தி விட்டார். அவர் கடைசியாக நடித்த நீர்டோஸ் என்ற கன்னட படம் பாதியில் நிற்கிறது.
இந்த படத்தின் தயாரிப்பாளரும், கதநாயாகனுமான ஜெகதீஷ் தனக்கு நஷ்டம் ஏற்படுத்தி விட்டதாக ரம்யாவை கண்டித்துள்ளார். இதுகுறித்து அவர் கூறும்போது, எம்.பி.யாகி விட்டதால் ரம்யா நடிப்புக்கு முழுக்கு போட்டு விட்டதாக செய்தி வெளியாகியுள்ளது. அவர் என் படத்தில் நடிக்க மறுப்பது தவறு. அவர் விலகுவதாக இருந்தால் படத்துக்கு இதுவரை செலவிட்ட 4 கோடியை திருப்பி தர வேண்டும் என்றார். இதற்கு ரம்யா பதில் அளித்துள்ளார். அவர் கூறியதாவது..
மக்கள் என்மீது நம்பிக்கை வைத்து எம்.பி.யாக தேர்வு செய்து பாராளுமன்றத்துக்கு அனுப்பிளயுள்ளனர். எனவே சினிமாவில் என்னால் இனிமேல் நடிக்க முடியாது. அது முடிந்து விட்டது. மீண்டும் நடிக்க வேண்டும் என்று சிந்திக்கவில்லை.
அரசியலுக்கு சென்ற வேறு பல நடிகைகள் மீண்டும் நடிக்கவில்லை. எம்.பி.யான பிறகு குட்டை பாவடையும், கையில்லாத ரவிக்கையும் அணிந்து கொண்டு மரத்தை சுற்றி டூயட் பாடி ஆட முடியுமா, என்னால் அப்படி செய்ய முடியாது என்று ரம்யா கூறினார்.
சீனாவில் மக்கள் தொகை பெருக்கத்தை கட்டுப்படுத்த ஒரு குடும்பத்துக்கு ஒரு குழந்தை என்ற திட்டம் கடுமையாக அமல்படுத்தப்படுகிறது. எனவே அனைவரும் ஆண் குழந்தைகளை பெறவே விரும்புகின்றனர்.
இதனால் பெண் குழந்தைகளின் பிறப்பு விகிதம் மிகவும் குறைந்துவிட்டது. ஆகவே, திருமணத்துக்கு பெண் கிடைப்பதில் சிக்கல் ஏற்பட்டுள்ளது. இப்பிரச்சினை ஒருபுறம் இருக்க பல சிரமங்களுக்கு இடையே நடைபெறும் திருமணங்களும் விவாகரத்தில் முடிகிறது.
சமீப காலமாக விவாகரத்துகள் அதிகரித்துள்ளன. இந்த ஆண்டில் கடந்த செப்டம்பர் மாதம் வரை மட்டும் 40 ஆயிரம் தம்பதிகள் தங்கள் திருமண பந்தத்தை முறித்துள்ளனர்.
ஷாங்காய் நகரிலும் இதே நிலைதான் உள்ளது. இதற்கு அங்கு விதிக்கப்பட்டுள்ள அதிக அளவிலான சொத்து வரி தான் காரணம் என கூறப்படுகிறது.
வீடு மற்றும் குடியிருப்புகளை விற்பவர்கள் அரசுக்கு வரி செலுத்த வேண்டும். அதன் மூலம் அரசுக்கு ஆண்டுக்கு 20 சதவீதம் கூடுதல் வருவாய் கிடைக்கிறது. அதே நேரத்தில் விவாகரத்து செய்யும் தம்பதிகளுக்கு இந்த வரி விதிப்பில் இருந்து விலக்கு அளிக்கப்பட்டுள்ளது.
அவர்கள் பெயரில் இருக்கும் சொத்துக்களை விற்கும் போது அரசுக்கு வரி செலுத்த வேண்டியதில்லை. சட்டத்தின் இந்த ஓட்டையை பயன்படுத்தி கொள்ள விவகாரத்து என்ற புதிய உத்தியை சீன தம்பதிகள் பயன்படுத்தி வருகின்றனர்.
இவ்வாறு விவகாரத்து செய்து கொள்பவர்கள் மீண்டும் திருமணம் செய்து கொள்ளலாம். இக்காரணத்தால் தான் சீனாவில் கடந்த 4 ஆண்டுகளை விட தற்போது விவகாரத்து அதிகரித்துள்ளது.
இந்திய கிரிக்கெட் அணி வரும் டிசம்பர் 2ம் திகதி தென் ஆபிரிக்காவுக்கு சுற்றுப்பயணம் மேற்கொள்கிறது.
இதில் 3 ஒரு நாள் போட்டிகள், 2 டெஸ்ட், போட்டிகள் கொண்ட தொடரில் விளையாடுகிறது.
இந்திய அணியின் தென் ஆபிரிக்கா சுற்றுப் பயணம் தொடர்பான அறிவிப்பை இந்திய கிரிக்கெட் கட்டுப்பாட்டு வாரியம் இன்று வெளியிட்டுள்ளது.
அதில் டிசம்பர் 5ம் திகதி முதல் ஒருநாள் போட்டி ஜோஹன்ஸ்பர்க்கில் நடைபெற உள்ளது என்று தெரிவிக்கப்பட்டுள்ளது. டேர்பனில் டிசம்பர் 8ம் திகதி 2வது ஒரு நாள் போட்டியும், செஞ்சூரியனில் வரும் டிசம்பர் 11ம் திகதி 3வது ஒரு நாள் போட்டியும் நடைபெறுகிறது.
தென் ஆப்ரிக்கா லெவன் அணியுடன் டிசம்பர் 14-15இல் பயிற்சி ஆட்டம் ஆடும் இந்தியா அதன்பின் 2 டெஸ்ட் போட்டிகளில் விளையாடுகிறது. முதல் டெஸ்ட் டிசம்பர் 18-22ல் ஜோகன்ஸ்பர்க்கிலும், 2வது டெஸ்ட் டிசம்பர் 26-30-ல் டர்பனிலும் நடைபெற உள்ளது.
முன்னதாக தென் ஆபிரிக்கா தன்னிச்சையாக இந்திய அணியின் சுற்றுப்பயண அறிவிப்பை வெளியிட்டதில் இந்திய கிரிக்கெட் கட்டுப்பாட்டு வாரியம் அதிருப்தியை தெரிவித்திருந்தது.
இதனையடுத்து போட்டிகளின் எண்ணிக்கையை இந்தியா குறைத்துக் கொண்டது. இந்த அறிவிப்பை இரு நாட்டு கிரிக்கெட் வாரியங்களும் இணைந்து வெளியிட்டிருந்தது குறிப்பிடத்தக்கது.
இரண்டு மகள்களை துஸ்பிரயோகம் செய்த தந்தைக்கு 120 ஆண்டு கடூழியச் சிறைத்தண்டனை விதிக்கப்பட்டுள்ளது. இரண்டு மகள்களையும் அடிக்கடி பாலியல் ரீதியான வன்புணர்ந்த தந்தைக்கு அனுராதபுரம் மேல் நீதிமன்றம் இந்தத் தண்டனையை விதித்துள்ளது.
மேல் நீதிமன்ற நீதவான் பேமா ஸ்வர்னாதிபதி இந்தத் தண்டனை விதித்துள்ளார். 41 வயதான மூன்று பிள்ளைகளின் தந்தை ஒருவரே இவ்வாறு தண்டிக்கப்பட்டுள்ளார். ஹொரவப்பொத்தான பகுதியைச் சேர்ந்தவரே இவ்வாறு கைது செய்யப்பட்டுள்ளார்.
அண்மையில் பாலியல் குற்றச் செயலில் ஈடுபட்ட ஒருவருக்கு வழங்கப்பட்ட மிகக் கடுமையான தண்டனை இதுவெனக் கருதப்படுகின்றது.
இரண்டு மகள்களுக்கும் நட்டஈடாக தலா பத்து லட்ச ரூபாவையும், அபராதமாக தலா 25000 ரூபாவையும் செலுத்துமாறு உத்தரவிடப்பட்டுள்ளது. நட்டஈடு மற்றும் அபராதப் பணத்தைச் செலுத்தாத காரணத்தினால் மேலும் ஆறு ஆண்டுகள் கூடுதல் தண்டனை விதிக்கப்பட்டுள்ளது.
இதன்படி மொத்தமாக 126 ஆண்டு சிறைத்தண்டனை விதிக்கப்பட்டுள்ளது. தந்தையை வீட்டுக்கு அழைத்துச் செல்ல விருப்பமா என பிள்ளைகளிடம் நீதவான் கோரியதாகவும் அதன் போது விரும்பவில்லை என பிள்ளைகள் தெரிவித்துள்ளனர்.
