விஷ்ணுவர்தன் இயக்கத்தில் அஜீத் நடித்துள்ள ஆரம்பம் படம் குறித்து ஆரம்பத்தில் எந்த செய்தியும் வெளிவராமல் இருந்தது. இப்போது படம் வெளியாக தயாராக இருப்பதால் படம் குறித்தான பல்வேறு செய்திகளும் வெளிவரத் தொடங்கிவிட்டன. படத்திற்கு ஒருவழியாக ஆரம்பம் என்று பெயரிட்டு, புகைப்படங்களும் வெளிவரத் தொடங்கிவிட்டன.

இந்நிலையில் சிறுத்தை சிவா இயக்கத்தில் அஜீத் நடித்துக் கொண்டிருக்கும் பெயரிடப்படாத படம் குறித்த தகவல்கள், ஆரம்பத்திலிருந்தே வரத் துவங்கியுள்ளன. இப்படத்தில் அஜீத் ஓடும் ரெயிலில் சண்டை போடுவது போன்ற காட்சியை படமாக்க இருக்கிறார்களாம்.

இதற்காக ஒடிஷா-ஆந்திரா எல்லையில் உள்ள ரயில் பாதையில் இந்த காட்சியை எடுக்க திட்டமிட்டிருக்கிறார்களாம். இதற்காக தென்கிழக்கு ரெயில்வேயில் முறையான அனுமதியும் பெற்றுள்ளனராம். இந்த காட்சியில் அஜீத் டூப் போடாமல் அவரே நடிக்கவிருப்பதாகவும் கூறப்படுகிறது.

ஏற்கெனவே ஆரம்பம் படத்திற்காக கார் சேசிங் காட்சியில் அஜீத் டூப் போடாமல் நடித்து, விபத்துக்குள்ளானார். இதனால் காலில் பலத்த அடிபட்டு அதற்கு சிகிச்சையும் மேற்கொண்டார். இந்நிலையில், சிவா இயக்கும் இப்படத்தில் ரயில் சண்டை காட்சியில் அஜீத் டூப் போடாமல் நடிப்பதாக வந்துள்ள செய்தி படக்குழுவினரை மட்டுமல்லாது அவரது ரசிகர்களையும் அதிர்ச்சியில் ஆழ்த்தியுள்ளது.

இப்படத்தில் அஜீத்துக்கு ஜோடியாக தமன்னா நடிக்கிறார். தேவி ஸ்ரீபிரசாத் இசையமைக்கிறார்.

ஆர்யாவும் அனுஷ்காவும் காதலிப்பதாக செய்திகள் வெளியானது. இருவரும் இரண்டாம் உலகம் படத்தில் ஜோடியாக நடிக்கின்றனர். அப்போது காதல் வயப்பட்டதாகவும் கூறப்பட்டது. இதற்கு ஆர்யா பதில் அளித்துள்ளார். அவர் பேட்டி வருமாறு..

நானும் அனுஷ்காவும் காதலிப்பதாக வந்த செய்தியை பார்த்து சிரித்தேன். நாங்கள் நல்ல நண்பர்கள். வேறு எதுவும் எங்களுக்குள் இல்லை. சிங்கம் 2 படத்தின் வெற்றி விழா விருந்தில் நாங்கள் ஜோடியாக பங்கேற்றதாகவும் இதற்காக ஐதராபாத்தில் இருந்து ஒன்றாக வந்ததாகவும் கூறுகின்றனர்.

நான் அந்த விருந்துக்கு போய் இருந்தேன். ஐதராபாத்தில் இருந்து அனுஷ்காவுடன் சேர்ந்து வரவில்லை. தனியாகத் தான் போனேன். அனுஷ்கா சிங்கம் 2 படத்தின் நாயகி எனவே அவரும் வந்து இருந்தார்.

நானும் அனுஷ்காவும் இரண்டாம் உலகம் படத்தில் நடித்துள்ளோம். ஒன்றரை வருடம் அந்த படத்தில் நடித்துள்ளோம். எனவே சிங்கம் 2 பட விருந்தில் பேசிக் கொண்டோம். நாங்கள் மட்டும் அந்த விருந்தில் இல்லை. வேறு நிறைய நடிகர், நடிகைகள் இருந்தனர்.

சிங்கம் 2 படப்பிடிப்பு நடந்த போது அனுஷ்காவை பார்க்க அடிக்கடி படப்பிடிப்பு தளத்துக்கு சென்றதாகவும் வதந்தி பரப்பப்பட்டு உள்ளது. சென்னையில் சிங்கம் 2 படப்பிடிப்பு நடந்த போது என்னையும் டைரக்டர் செல்வராகவனையும் அனுஷ்கா அழைத்து இருந்தார்.

நாங்கள் நேரில் போய் பேசிவிட்டு வந்தோம். நயன்தாரா, உதயநிதி நடிக்கும் படத்தின் படிப்பிடிப்பு என் வீட்டின் அருகில் நடந்த போது கூட நான் நேரில் சென்று அவர்களிடம் பேசிவிட்டு வந்தேன். நான் யாரையும் இதுவரை காதலிக்கவில்லை. யாரையேனும் காதலித்தால் அதை வெளிப்படையாக அறிவிப்பேன்.

தமிழில் நேரம் படத்தின் மூலம் அறிமுகமானவர் நஸ்ரியா. படமும் நன்றாக ஓட ஆளும் அழகாக இருக்க அடுத்தடுத்து படங்களில் ஒப்பந்தமானார்.

ஜெய்க்கு ஜோடியாக “திருமணம் என்னும் நிக்கா” படத்தில் நடித்து முடித்து விட்டார். அதைத் தொடர்ந்து இயக்குநர் ஷங்கரிடம் உதவியாளராக இருந்த அட்லீ இயக்கும் ராஜா ராணி படத்தில் இரண்டாவது ஹீரோயினாக நடித்துள்ளார். இந்தப் படத்தில் ஆர்யா – நயன்தாரா ஜோடியாக நடித்துள்ளனர்.

அத்துடன் தனுஷுக்கு ஜோடியாக நய்யாண்டி படத்தில் நடித்து வருகிறார். அதைத் தொடர்ந்து கார்த்தி ஜோடியாக ஒரு படத்தில் நடிக்கிறார். இந்தப் படத்தை அட்டகத்தி ரஞ்சித் இயக்குகிறார்.

தற்போது உதயநிதி ஸ்டாலின் நடிக்க இருக்கும் அடுத்த படத்தில் நடிக்க நஸ்ரியாவிடம் பேச்சுவார்த்தை நடந்து வருகிறது. கதை, சம்பளம் உள்ளிட்ட விஷயங்கள் ஒத்துவந்தால் ஓ.கே. என்கிறார்கள்.

ஒரு நடிகை அழகாக இருந்தால் அவரோடு சேர்ந்து நடிக்க முன்னணி நடிகர்கள் போட்டி போடுவார்கள். அப்படித்தான் ஹன்சிகாவைத் தொடர்ந்து நஸ்ரியாவுக்கும் போட்டி நிலவுகிறதாம்.

தற்போதைய நிலவரப்படி நஸ்ரியாவின் கொடிதான் கோடம்பாக்கத்தில் உயரப் பறக்கிறதாம்.

ஹொலிவுட் பட உலகில் கடந்த ஆண்டில் அதிக சம்பளம் வாங்கிய நடிகைகள் குறித்த விவரத்தை நியூயோர்க்கில் இருந்து வெளிவரும் பத்திரிகை வெளியிட்டது. அதில் நடிகை ஏஞ்சலீனா ஜூலி முதல் இடத்தை பிடித்திருக்கிறார்.

அவருடைய வருமானம் 33 மில்லியன் டொலர்கள் (500 கோடி) ஆகும். 38 வயதாகும் இவர் சமீபத்தில் மார்பக புற்றுநோய்க்கு சிகிச்சை பெற்றார். இவர் நடித்துக் கொண்டிருக்கும் மேல்பிசியன்ட் சினிமாப்படம் அடுத்த கோடைகாலம் வெளிவரும் என எதிர்பார்க்கப்படுகிறது.

அடுத்து 2வது இடத்தில் 26 மில்லியன் டொலர் (375 கோடி) வருமானத்துடன் ஒஸ்கார் விருது பெற்ற நடிகை ஜெனிபர் லோரன்சும், 3வது இடத்தை 22 மில்லியன் டொலர் (300 கோடி) வருமானத்துடன் நடிகை கிறிஸ்டின் ஸ்டுவார்டும் பெற்று இருக்கிறார்கள்.