நடிகை நமீதா அரசியலில் ஈடுபட தயாராகி வருகிறார். ஏற்கனவே சமூக சேவை பணிகளில் தீவிரமாக ஈடுபட்டார். இரத்த தானம், கண் தானத்தை ஊக்குவித்தார். தொண்டு நிறுவனங்கள் நிகழ்ச்சிகளில் இலவசமாக பங்கேற்று வருகிறார். சென்னையில் பெண்களுக்கு தனி கழிப்பிடங்கள் கட்டும் முயற்சியிலும் தீவிரமாக ஈடுபட்டு உள்ளார்.

அடுத்த கட்டமாக அரசியலுக்கு வருகிறார். நமீதா குஜராத்தை சேர்ந்தவர். எனவே அங்கு நரேந்திர மோடியை சந்தித்து பாரதீய ஜனதாவில் சேர்வார் என கூறப்பட்டது. குஜராத் மாநில பாரதீய ஜனதா கட்சியில் பதவி பெற்று அரசியலில் தீவிரமாக ஈடுபடப்போவதாகவும் செய்திகள் பரவின. இதற்கு நமீதா பதில் அளித்துள்ளார். அவர் கூறியதாவது..

நான் அரசியலில் ஈடுபட முடிவு செய்து உள்ளேன். இந்த ஆர்வம் எனக்கு ஒரு வருடத்துக்கு முன்பே ஏற்பட்டது. எந்த கட்சியில் சேரலாம் என்று யோசித்து வருகிறேன். நான் பாரதீய ஜனதா கட்சியில் சேரப்போவதாக செய்திகள் வந்துள்ளன. அதில் உண்மை இல்லை. சென்னையில்தான் நான் தங்கி இருக்கிறேன். இங்கு குடியேறி பத்து வருடங்கள் ஆகிவிட்டது. என் பாஸ்போர்ட்டில் சென்னை முகவரிதான் இருக்கிறது.

எனவே இங்கிருந்து வேறு எங்கும் போகமாட்டேன். தமிழக அரசியல் கட்சியொன்றில் விரைவில் சேர்ந்து அரசியல் பணிகளில் ஈடுபடப்போகிறேன். தென் இந்தியாவை சேர்ந்த ஒருவரை திருமணம் செய்து கொள்ள திட்டமிட்டு உள்ளேன் என்று நமீதா கூறினார்.

16 வயதினிலே பட டிரெய்லர் வெளியீட்டு விழாவில் ரஜினி பேசியதாவது..

தயாரிப்பாளர் ராஜ்கண்ணு என்னை சந்தித்து 16 வயதினிலே படத்தை டிஜிட்டலில் மீண்டும் ரிலீஸ் செய்யப்போவதாக சொல்லி டிரெய்லர் வெளியீட்டு விழாவுக்கு அழைத்தார். அவரிடம் நான் இந்த படத்தில் கிடைக்கும் லாபம் உங்களுக்கு நேரடியாக வரும் என்றால் நான் நிச்சயம் கலந்து கொள்வேன் என்றேன்.

ராஜ்கண்ணு சினிமாவில் மரியாதைக்குரியவர். சுயமரியாதை உள்ளவர். கர்வம் கிடையாது. 16 வயதினிலே படம் எடுத்தபோது நன்றாக ஓடாது என்றனர். ஆனால் பெரிய வெற்றி பெற்றது. கமல் அப்போது பெரிய நடிகராக இருந்தார். படம் நன்றாக ஓடியது சந்தோஷமாக இருந்தது.

மனிதர்களுக்கு கஷ்டகாலம் வரும். கெட்ட காலம் வரும். ஆனால் அது நிரந்தரம் இல்லை. தன்மானம் உள்ளவன் சினிமாவில் இருக்க முடியாது.

தற்போது 16 வயதினிலே மீண்டும் ரிலீசாக உள்ளது. பழைய படங்கள் மீண்டும் ரிலீசுக்கு வருவது வரவேற்கத்தக்கது. இந்த படத்தையும் ஜெயிக்க வைக்க வேண்டும். இந்த படம் நன்றாக ஓட வேண்டும் என்று வேண்டுகிறேன் என்று ரஜினி பேசினார்.

சந்தானம் நடிக்கும் படங்களில் வசனங்களுக்கிடையே அவ்வப்போது சில இடங்களில் அவர் பாடவும் செய்திருப்பார். இப்போது முதன்முறையாக ஒரு முழு பாடலை பாடியுள்ளார். ஸ்ரீகாந்த் நடிப்பில் உருவாகி வரும் நம்பியார் படத்திற்காகத்தான் இந்த பாடகர் அவதாரம் எடுத்துள்ளார்.

விஜய் அண்டனி இசையில் விவேகா எழுதியுள்ள வரிகளுக்கு பாடியிருக்கும் சந்தானம் குறித்து இப்படத்தின் இயக்குனர் கணேஷா கூறும்போது..

நம்பியார் படத்தில் ஸ்ரீகாந்துடன் இன்னொரு ஹீரோவாக சந்தானம் நடித்துள்ளார். அவரை ஏன் இன்னொரு ஹீரோ என்று சொல்கிறேன் என்பதை படம் வெளிவரும்போது நீங்களே தெரிந்துகொள்வீர்கள். காமெடிக்கு பஞ்சமில்லாத படமாக உருவாகியிருந்தாலும் முழுக்க முழுக்க காமெடியை மட்டுமே நம்பி பயணப்படும் படம் அல்ல.

இப்படத்தில் ஒரு முக்கியமான கட்டத்தில் வரும் பாடலை யாரை பாடவைத்தால் சரியாக இருக்கும் என்று யோசித்துக் கொண்டிருந்த வேளையில் விஜய் அண்டனி சந்தானம் பாடினால் நன்றாக இருக்கும் என்றார்.

ஆனால் இதை சந்தானத்திடம் கூறினால் அவர் மறுத்துவிடுவார் என நினைத்தோம். ஆனால் அவர் மறுப்பு ஏதும் சொல்லாமல் சந்தோஷமாக பாட வந்துவிட்டார். பதினைந்து நிமிடங்களிலேயே இந்த பாடலை பாடி முடித்து கொடுத்துவிட்டார்.

ஆற அமர உக்காந்து சரக்கடி நண்பா நீ சரக்கடி என்று ஆரம்பிக்கும் இந்த பாடல் இடம்பெறும் காட்சியை மனதுக்கும் நிஜத்துக்கும் நடக்கும் ஒரு போர் என்று சொல்லலாம். இந்த காட்சியில் சந்தானம் இருக்கமாட்டார். ஆனால் சந்தானம் குரல் ஸ்ரீகாந்துக்கு கச்சிதமாக பொருந்தி வந்திருக்கிறது என்றார்.

ஸ்ரீகாந்த் கூறும்போது சினிமாவில் எனக்கு கிடைத்திருக்கும் மரியாதைக்குரிய நண்பர் சந்தானம். எனக்காக நடித்துக்கொடுப்பதோடு பாடியும் உதவியிருக்கிறார். நீங்க ஜெயிக்கணும் என்ற அவரோட நம்பிக்கையை நம்பியார் நிறைவேற்றும் என்று நம்புகிறேன். சந்தானத்துக்கு நிறைய நன்றிக்கடன் பட்டிருக்கிறேன் என்றார்.

காஜல் அகர்வால் தமிழ், தெலுங்கில் முன்னணி நடிகையாக உள்ளார். 2008ல் சரோஜா படத்தில் ஒரு பாடலுக்கு மட்டும் தலைகாட்டி விட்டு போனார். அப்போது அவ்வளவு அறிமுகம் இல்லை. அதன்பிறகு சிரஞ்சீவி மகன் ராம்சரண் ஜோடியாக மகதீரா என்ற தெலுங்கு படத்தில் நடித்தார்.

அந்த ஒரே படம் ஆந்திராவில் முன்னணி நடிகை அந்தஸ்துக்கு உயர்த்தியது. தொடர்ந்து நிறைய ஹிட் படங்களில் நடித்தார். தமிழிலும் நான் மகான் அல்ல, மாற்றான், துப்பாக்கி என நடித்து உயர்ந்துள்ளார். இரு மாநிலங்களிலும் ரசிகர்கள் வட்டாரம் பெருகி உள்ளது.

ஐதராபாத்தில் வணிக வளாக திறப்பு நிகழ்ச்சியொன்றுக்கு காஜல் அகர்வாலை அழைத்து இருந்தனர். போஸ்டர்கள் மூலம் அவர் வருகையை விளம்பரபடுத்தி இருந்ததால் வணிக வளாகத்தை சூற்றி ஆயிரக்கணக்கான ரசிகர்கள் திரண்டு நின்றனர்.

காஜல் அகர்வால் வந்ததும் அவரை பார்க்க முண்டியடித்தார்கள். கூட்டத்தை பார்த்து காஜல் அகர்வாலுக்கும் வியப்பு ஏற்பட்டது. கையசைத்து மகிழ்ச்சியை வெளிப்படுத்தினார். கூட்டம் கட்டுக்கடங்காமல் இருந்ததால் தள்ளுமுள்ளு ஏற்பட்டது. அந்த பகுதியில் போக்குவரத்தும் பாதிக்கப்பட்டது. இதையடுத்து பொலிசார் லேசான தடியடி நடத்தி கூட்டத்தினரை கலைத்தனர்.

நடிகை அஞ்சலி மீதான அவதூறு வழக்கில் அவர் நீதிமன்றத்தில் கண்டிப்பாக ஆஜராக வேண்டுமென்று நீதிமன்றம் உத்தரவிட்டுள்ளது.

எங்கேயும் எப்போதும், சேட்டை உள்பட பல தமிழ், தெலுங்கு படங்களில் கதாநாயகியாக நடித்தவர் நடிகை அஞ்சலி.
இவர் தனது சித்தி பாரதிதேவியும், இயக்குனர் களஞ்சியமும் தன்னை கொடுமைப்படுத்தி சொத்துக்களை அபகரிக்க முயல்வதாக கூறியிருந்தார்.

இந்த புகார் தன் மீது கூறப்பட்ட அவதூறு என்றும் பொய்யான புகாரை கூறிய நடிகை அஞ்சலி மீது கிரிமினல் வழக்கு தொடர்ந்து தண்டிக்க வேண்டும் என கூறி இயக்குனர் களஞ்சியம் சார்பில் சைதாப்பேட்டை பெருநகர 17வது நீதிமன்றத்தில் மனு தாக்கல் செய்துள்ளர்.

இந்த வழக்கு மீதான விசாரணை நீதிபதி ராஜலட்சுமி முன் வந்தது. அப்போது நடிகை அஞ்சலி தரப்பு வக்கீல் முகுந்தன் ஒரு மனு தாக்கல் செய்தார். அதில், நடிகை அஞ்சலி இந்த வழக்கில் நீதிமன்றத்தில் ஆஜராகாமல் இருக்க உத்தரவிட வேண்டும் என்று கோரி இருந்தார்.

அதற்கு இயக்குனர் களஞ்சியம் தரப்பு வக்கீல்கள் எதிர்ப்பு தெரிவித்தனர். இதனைத் தொடர்ந்து வழக்கு நகலை பெற நடிகை அஞ்சலி ஆஜராக வேண்டும் என்று உத்தரவிட்ட மாஜிஸ்திரேட்டு, வழக்கு விசாரணையை 29ம் திகதிக்கு ஒத்தி வைத்துள்ளனர்.