சம்பியன்ஸ் லீக் டT20 தொடரில் மைக்கல் ஹசி, ஷேன் வட்சன் உள்ளிட்ட வெளிநாட்டு வீரர்கள், தங்கள் உள்ளூர் அணிக்காக விளையாடாமல் இந்திய அணிகளுக்காக விளையாட உள்ளனர்.

இந்தியாவில் சர்வதேச உள்ளூர் சம்பியன் அணிகள் பங்கேற்கும் ஐந்தாவது சம்பியன்ஸ் லீக் T20 கிரிக்கெட் தொடர் செப்டம்பர் 17ம் திகதி முதல் ஒக்டோபர் 6ம் திகதி வரை நடக்கிறது.

இதில், 6வது ஐ.பி.எல் கிரிக்கெட் தொடரில் முதல் மூன்று இடங்களை பிடித்த மும்பை, சென்னை, ராஜஸ்தான் அணிகளுடன் அவுஸ்திரேலியாவின் பிரிஸ்பேன் ஹீட், பெர்த் ஸ்கார்சர்ஸ், தென் ஆப்ரிக்காவின் லயன்ஸ், டைட்டன்ஸ், மேற்கிந்திய தீவுகளின் டிரினிடாட் அண்டு டுபாகோ உள்ளிட்ட 10 அணிகள் பங்கேற்கின்றன.

இந்தியா (3), அவுஸ்திரேலியா (2), தென் ஆப்ரிக்கா (2), மேற்கிந்திய தீவுகளைச் (1) சேர்ந்த 8 அணிகள் நேரடியாக பிரதான சுற்றில் விளையாடுகின்றன.

மீதமுள்ள இரண்டு இடங்களுக்கு நியூசிலாந்து, பாகிஸ்தான், இலங்கை மற்றும் இந்தியாவை சேர்ந்த 4 உள்ளூர் அணிகள் தகுதிச் சுற்றில் பங்கேற்கின்றன.

ஐதராபாத்தில் செப்டம்பர் 17-20ம் திகதிகளில் நடக்கும் தகுதிச் சுற்றில் ஒவ்வொரு அணியும் மற்ற அணிகளுடன் தலா ஒருமுறை மோதும். புள்ளிப்பட்டியலில் முதலிரண்டு இடங்களை பிடிக்கும் அணிகள் பிரதான சுற்றுக்கு தகுதி பெறும்.

பிரதான சுற்றில் 10 அணிகள் இரண்டு பிரிவுகளாக பிரிக்கப்பட்டு போட்டிகள் நடத்தப்படும். ஏ பிரிவில் ராஜஸ்தான், மும்பை, லயன்ஸ், பெர்த் மற்றும் தகுதிச் சுற்றில் முதலிடம் பிடிக்கும் அணிகள் இடம் பெற்றுள்ளன.

பி பிரிவில் சென்னை, டைட்டன்ஸ், பிரிஸ்பேன், டிரினிடாட் அண்டு டுபாகோ மற்றும் தகுதிச் சுற்றில் 2வது இடம் பிடிக்கும் அணிகள் இடம் பெற்றுள்ளன. செப்டம்பர் 21ம் திகதி நடக்கவுள்ள ஏ பிரிவுக்கான லீக் போட்டியில் ராஜஸ்தான், மும்பை அணிகள் மோதுகின்றன.

இத்தொடரில் பங்கேற்கும் 12 அணிகளும் உத்தேச அணியை அறிவித்தன. ஐ.பி.எல் கிரிக்கெட் தொடருக்கான இந்திய அணிகளில் இடம் பெற்றுள்ள வெளிநாட்டு வீரர்கள் தங்கள் நாட்டை சேர்ந்த உள்ளூர் அணிகளிலும் இடம் பெற்றுள்ளனர்.

இரண்டு அணிகளில் இடம் பெற்றுள்ள 15 வெளிநாட்டு வீரர்களில் 11 பேர் இந்திய அணிக்காக விளையாட உள்ளனர்.

இலங்கையின் சங்கக்கார (கந்துரடமரோன்ஸ்), நுவன் குலசேகரா (கந்துரட மரோன்ஸ்), அவுஸ்திரேலியாவின் பிராட் ஹக் (பெர்த்), தென் ஆப்ரிக்காவின் குயின்டன் டி காக் (லயன்ஸ்) ஆகியோர் மட்டும் உள்ளூர் அணிக்கு விளையாட முடிவு செய்துள்ளார்.

இரண்டு அணிகளில் இடம் பெற்றுள்ள வெளிநாட்டு வீரர்களை தங்களது அணிக்காக விளையாட தெரிவு செய்யும் இந்திய அணிகள் சம்பியன்ஸ் லீக் விதிமுறைப்படி, வெளிநாட்டு வீரர்கள் இடம் பெற்றுள்ள உள்ளூர் அணிகளுக்கு நஷ்ட ஈடாக ஒரு வீரருக்கு தலா ஒரு கோடி வரை கொடுக்க வேண்டும்.

இந்திய அணிக்காக விளையாடும் வெளிநாட்டு வீரர்கள்:

மேற்கிந்திய தீவுகள்: டுவைன் பிராவோ (சென்னை), கெவன் கூப்பர் (ராஜஸ்தான்), பொலாட் (மும்பை).

தென் ஆப்ரிக்கா: டுபிளசி (சென்னை), ஆல்பி மோர்கல் (சென்னை), கிறிஸ் மோரிஸ் (சென்னை).

அவுஸ்திரேலியா: நதன் கவுல்டர்-நைல் (மும்பை), மைக்கல் ஹசி (சென்னை), மிட்சல் ஜோன்சன் (மும்பை), ஷேன் வட்சன் (ராஜஸ்தான்).

இலங்கை: திசார பெரேரா (ஐதராபாத்).

ஐ.பி.எல் கிரிக்கெட் தொடரில் இருந்து ஓய்வை அறிவித்த மும்பை அணியின் மாஸ்டர் பேட்ஸ்மேன் சச்சின் சம்பியன்ஸ் லீக் தொடரில் விளையாடுகிறார்.

கடந்த தொடரில் மும்பை அணியின் அணித்தலைவராக இருந்த அவுஸ்திரேலியாவின் ரிக்கி பொண்டிங் பங்கேற்கவில்லை. இவர், சமீபத்தில் முடிந்த கரீபியன் பிறீமியர் லீக் தொடரில் 7 போட்டியில் 41 ஓட்டங்கள் மட்டும் எடுத்தார்.

மும்பை அணிக்காக மட்டும் விளையாடும் இலங்கை வேகப்பந்துவீச்சாளர் லசித் மலிங்க, தனது மனைவியின் பிரசவத்துக்காக இத்தொடரில் பங்கேற்கவில்லை. இதேபோல ராஜஸ்தான் அணியின் அணித்தலைவர் ராகுல் டிராவிட்டுக்கு, இது கடைசி தொடர்.

இந்திய அணியில் இடம் கிடைக்காமல் தவிக்கும் டெல்லியை சேர்ந்த தொடக்க வீரர் கவுதம் கம்பீர் இங்கிலாந்தில் நடக்கும் உள்ளூர் கவுன்டி போட்டியில் எசக்ஸ் அணிக்காக விளையாடுகிறார்.

இதுவரை விளையாடிய நான்கு போட்டிகளில் (இரண்டு முதல் தர போட்டி + இரண்டு ஏ பிரிவு போட்டி) ஒருமுறை கூட அரைசதம் அடிக்கவில்லை.

அதிகபட்சமாக நார்தாம்ப்டன்ஷயர் அணிக்கெதிரான முதல் தர போட்டியில் 31 ஓட்டங்களும், டெர்பிஷயர் அணிக்கெதிரான ஏ பிரிவு போட்டியில் 21 ஓட்டங்களும் எடுத்தார்.

சமீபத்தில் முடிந்த லன்காஷயர் அணிக்கெதிரான ஏ பிரிவு போட்டியில் வெறும் 2 ஓட்டங்களில் ஆட்டமிழந்த இவர், பிரிஸ்டோல் நகரில் நடக்கும் கிளவ்சஸ்டர்ஷயர் அணிக்கெதிரான முதல் தர போட்டியில் ஓட்டங்களின்றி ஆட்டமிழந்தார்.

இந்நிலையில் சமர்சட் அணிக்காக ஒப்பந்தம் செய்யப்பட்ட இளம் இந்திய சுழற்பந்துவீச்சாளர் பியுஸ் சாவ்லா, பேட்டிங்கில் அசத்தி வருகிறார். மிடில்சக்ஸ் அணிக்கெதிராக லண்டனில் உள்ள லார்ட்ஸ் மைதானத்தில் நடக்கும் முதல் தர போட்டியில் துடுப்பாட்டத்தில் அசத்தி வரும் பியுஸ் சாவ்லா சதம் அடித்தார்.

ஒருகட்டத்தில் சாமர்சட் அணி, 211 ஓட்டங்களுக்கு 7 விக்கெட்டுகளை இழந்து திணறியது. எட்டாவது வீரராக களமிறங்கிய பியுஸ் சாவ்லா (112 ஓட்டங்கள்), சதம் அடித்ததன் மூலம் 400 ஓட்டங்களை தாண்டியது.

பியுஸ் சாவ்லா கூறுகையில், கடந்த முறை கவுன்டி போட்டியில் சிறப்பாக விளையாடியதன் மூலம் இந்தியாவுக்காக விளையாடும் வாய்ப்பு கிடைத்தது. இதேபோல இம்முறையும் நடக்கும் என்று நம்புகிறேன்.

இத்தொடரில் சிறப்பான ஆட்டத்தை வெளிப்படுத்தி இந்திய அணி தெரிவாளர்களை என் மீது திசைதிருப்ப விரும்புகிறேன். விரைவில், இந்தியாவுக்காக மீண்டும் விளையாடுவேன் என்ற நம்பிக்கை உள்ளது என்றார்.

இங்கிலாந்து கிரிக்கெட் வீரர்கள் பிட்ச்சில் சிறுநீர் கழித்த விவகாரத்தை படித்து விட்டு சிரித்தேன் என முன்னாள் அணித்தலைவர் கங்குலி தெரிவித்துள்ளார்.

அவுஸ்திரேலியாவுக்கு எதிரான ஆஷஸ் தொடரை வெற்றிபெற்ற இங்கிலாந்து வீரர்கள் லண்டன் ஓவல் மைதானத்தில் வைத்து கொண்டாடினர். அப்போது ஜொலியாக இருந்ததுடன் பிட்ச் மேலேயே சிறுநீர் கழித்தும் அசிங்கப்படுத்தினர் இது பெரும் சர்ச்சையை ஏற்படுத்தியது.

இதுகுறித்து கங்குலி கூறுகையில், இங்கிலாந்து வீரர்களின் செயலை படித்து பார்க்கும் போது சிரிப்பு தான் வந்தது. ஆனால் இதற்காக தண்டனையெல்லாம் கொடுக்க வேண்டிய அவசியம் இல்லை என்பதே எனது கருத்து.

எச்சரித்தோ அல்லது அபராதம் விதித்தோ விட்டு விட வேண்டியதுதான் வேறு என்ன செய்ய முடியும். அவர்கள் முதிர்ச்சியானவர்கள் பள்ளிப் பிள்ளைகள் கிடையாது. எனவே இதற்கு தண்டனை தேவை என்று நான் கருதவில்லை. ஏதோ ஜொலியில் சில்மிஷமாக நடந்து கொண்டு விட்டனர்.

நான் கூட மைதானத்தில் ஒருமுறை சட்டையைக் கழற்றி வெற்றியைக் கொண்டாடினேன். அப்போது எல்லாமே கட்டுக்குள்தான் இருந்தது.
அதேபோல தென் ஆப்பிரிக்க அணியை தென் ஆப்பிரிக்காவில் வீழ்த்தியபோதும் டிரஸ்ஸிங் ரூமில் எங்களது வீரர்கள் அதகளப்படுத்தினர். ஆனால் உள்ளேதான் அது நடந்தது.

நமது வீரர்களில் சிலர் மது அருந்தினர். சிலர் பெப்சி மட்டும் குடித்தனர். சிலர் குடிக்கவே இல்லை. கொண்டாட்டம் ,உற்சாகம், ஜொலி இருந்தது.

ஆனால் தப்பாக எதுவும் நடக்கவில்லை. காரணம், அப்போது அணித்தலைவராக இருந்தவர் டிராவிட். அளவோடு இருந்தால் பிரச்சினை வராது என்று தெரிவித்துள்ளார்.