நாமக்கல்லில்..

நாமக்கல் மாவட்டம் வெண்ணந்தூர் பகுதியைச் சேர்ந்த கௌசல்யா (20) என்ற இளம்பெண் தனது பெற்றோருடன் வசித்து வந்தார். ப்ளஸ் டூ வரைபடித்துள்ள இவர் கடந்த இரண்டு மாதங்களாக மல்ல சமுத்திரம் பகுதியில் உள்ள தனியார் நிறுவனத்தில் பணிபுரிந்து வந்தார் .

நாள்தோறும் பேருந்துகளில் பணிக்கு சென்றுவிட்டு வீடு திரும்புவது வழக்கம். இந்த நிலையில் நேற்று அவரின் தங்கையை அழைத்துக் கொண்டு பணிக்கு சென்று விட்டு, மாலையில் பேருந்து மூலம் வீடு திரும்பினார். அதற்காக ஈரோட்டில் இருந்து சேலம் செல்லும் தனியார் பேருந்தில் ஏறி பயணித்தார்.

பேருந்தில் அதிக கூட்டம் இருந்ததால் இருக்கையில் அமர்ந்திருந்த பயணி ஒருவரிடம் தங்கையே பார்த்துக் கொள்ளும்படி கூறிவிட்டு அவர் நின்றபடி பயணித்தார். அப்போது பேருந்து படிக்கட்டின் அருகே அவர் நின்றதாக தெரிகிறது.

சேலம் மாவட்டம் ஆட்டையாம்பட்டி பேருந்து நிலையம் அருகே சந்திர திரையரங்கு வளைவில் பேருந்து திரும்பிய போது, படியின் ஓரம் நின்றிருந்த கௌசல்யா, பேருந்தில் இருந்து பிடிமானம் நழுவி தவறி கீழே விழுந்தார்.

பேருந்து வேகமாக சென்றபோது அவர் கீழே விழுந்ததால் அதே வேகத்தில் சாலையோரம் இருந்த கல்லில் கவுசல்யாவின் தலை மோதியது. இதில் படுகாயம் அடைந்து அவர் சம்பவ இடத்திலே உயிரிழந்தார்.

இந்த சம்பவம் குறித்து ஆட்டையாம்பட்டி போலீசார் வழக்கு பதிவு செய்து விசாரணை மேற்கொண்டு வருகின்றனர். இந்த நிலையில் பேருந்தில் இருந்து பிடிமானம் நழுவி தரையில் விழுந்த கவுசல்யாவின் இறுதி நிமிடங்களின் சிசிடிவி காட்சிகள் தற்போது வெளியாகி அதிர்ச்சியை ஏற்படுத்தியுள்ளது.

#WATCH | சேலம்: ஆட்டையாம்பட்டி அருகே தனியார் பேருந்தின் படிக்கட்டில் பயணம் செய்த கௌசல்யா (20) என்பவர் தவறி விழுந்து உயிரிழப்பு; பதைபதைக்கும் சிசிவிடி காட்சி வெளியானது!#SunNews | #Salem | #Bus pic.twitter.com/8IwcpoiLbb

— Sun News (@sunnewstamil) May 4, 2023

இந்தியாவில்..

இந்தியாவின் மூன்று பக்கமும் கடல் போல தமிழகத்தின் நான்கு பக்கமும் சாராய ஆறு ஓடும் அளவிற்கு டாஸ்மாக் வியாபாரம் செழித்து வளர்ந்து கொண்டிருக்கிறது. ஒவ்வொரு மாதமும் மது விற்பனை சாதனைப் படைக்கும் அளவுக்கு டார்க்கெட் நிர்ணயம் செய்து திட்டமிட்டு வருகிறது அரசு.

இது ஏதோ தமிழகத்தில் மட்டும் நிகழ்கிற சம்பவமாக இல்லாமல் இந்தியாவின் பல மாநிலங்களும் இப்படி ‘குடி’யின் பிடியில் சிக்கி தவிக்கின்றன. இந்நிலையில், சரக்கு வாங்கி தர சொல்லி தகராறு செய்து வந்ததால், ஆத்திரத்தில் இளம்பெண்ணை கணவன் அடித்து கொன்ற சம்பவம் கும்மிடிப்பூண்டி அருகே நிகழ்ந்துள்ளது.

ஆந்திர மாநிலம் திருப்பதி அருகே உள்ள புட்டிரெட்டிகண்டிகை கிராமத்தைச் சேர்ந்தவர் தர்மய்யா (25). இவரது மனைவி லட்சுமி (22). இந்த தம்பதிக்கு 3 வயதில் ஒரு மகன் உள்ளான்.

இவர்கள் திருவள்ளூர் மாவட்டம் கும்மிடிப்பூண்டி அடுத்த பாதிரிவேடு அருகே கரடிபுத்தூர் கிராமத்தில் உள்ள தனியார் மாந்தோப்பில் குடும்பத்தோடு தங்கி வேலை செய்து வந்தனர்.

கடந்த சில நாட்களுக்கு முன்பு ஆந்திராவில் உள்ள புட்டிரெட்டிகண்டிகை கிராமத்தில் உள்ள சகோதரி வீட்டுக்கு தர்மய்யா தனது குழந்தையோடு சென்றார். அப்போது மனைவி லட்சுமி குறித்து தர்மய்யாவிடம் அவரது சகோதரி கேட்ட போது கடந்த 23- தேதி கோபத்தில் மனைவியை அடித்து கொன்று விட்டு, வேலைச் செய்து வந்த மாந்தோப்பிலேயே புதைத்து விட்டதாக தெரிவித்தார்.

இந்த தகவலை கரடிபுத்தூரில் உள்ள மற்றொரு மாந்தோப்பு காவலாளியான சுதா என்பவரிடம் தர்மய்யாவின் சகோதரி தெரிவித்தார். இதையடுத்து, இந்த சம்பவம் குறித்து பாதிரிவேடு போலீசாருக்கு தகவல் தெரிவித்துள்ளார்.

தகவலின் பேரில், கடந்த 27ம் தேதி பாதிரிவேடு போலீசார் சம்பவ இடத்திற்கு சென்று கும்மிடிப்பூண்டி தாசில்தார் பிரீத்தி முன்னிலையில் லட்சுமியின் உடலை மாந்தோப்பில் இருந்து தோண்டி எடுத்தனர். பின்னர், பிரேத பரிசோதனைக்காக சென்னை ஸ்டான்லி அரசு மருத்துவக்கு அனுப்பி வைத்தனர்.

இது குறித்து கும்மிடிப்பூண்டி போலீசார் வழக்குப் பதிவு செய்து தலைமறைவான தர்மய்யாவை தனிப்படை அமைத்து தேடி வந்தனர். இந்நிலையில் தனிப்படை போலீசார் ஆந்திராவில் தர்மய்யாவை கைது செய்தனர். அவரிடம் போலீசார் விசாரணை நடத்தினர்.

விசாரணையில், கணவன்-மனைவி இருவருக்கும் குடி பழக்கம் இருந்ததாகவும், கடந்த 22ம் தேதி மனைவி லட்சுமிக்கு மது வாங்கி கொடுக்காததால் அவர் கோபத்தில் மறுநாள் சமைக்காமல் இருந்ததால் இருவருக்கும் இடையே சண்டை ஏற்பட்டதாகவும் தெரிவித்தார்.

தகராறில் ஆத்திரமடைந்த தர்மய்யா மண்வெட்டியால் மனைவி லட்சுமியை தாக்கினார். இதில் லட்சுமி சம்பவ இடத்திலேயே உயிரிழந்தார். இதையடுத்து மனைவியை குழி தோண்டி புதைத்ததாக தர்மய்யா தெரிவித்தார். போலீசார் அவரை பொன்னேரி நீதிமன்றத்தில் ஆஜர்படுத்தி சென்னை புழல் சிறையில் அடைந்தனர்.

தமிழகத்தில்..

காதல் திருமணம் என்பது இன்றைய காலத்தில் சர்வ சாதாரணமாகி வருகிறது. ஆனால் பெற்றோர்களுக்கு தெரியாமல் திருமணம் செய்வதால் பெற்றவர்களின் மனம் எத்தனை பாதிக்கப்படும் என்பதை பிள்ளைகள் யோசிப்பதே இல்லை.

இத்தனை நாள் வளர்த்த தாய், தந்தையை விட்டு ஒரு வருடம் கூட பழகிப் பார்க்காத ஒருத்தரை நம்பி வீட்டை விட்டு வெளியேறுவது எத்தனை பெரிய முட்டாள்தனம் என்பது வயது காலத்தில் இன்றைய இளைய சமூதாயம் அறிவதே இல்லை.

சரியான புரிதலும், திட்டமிடலும் இல்லாத திருமணம் நாளடைவில் சண்டையும், சச்சரவுமாகிப் போகும். பின்னர் கண்ணீர் வடித்து பிரயோசனமில்லை என்பதை பிள்ளைகள் புரிந்து கொள்வதில்லை.

தமிழகத்தில் கடலூர் மாவட்டம் திட்டக்குடி பென்னாகரம் பகுதியில் வசித்து வருபவர் சுந்தர்ராஜன். இவரது மகள் ஸ்ரீபவானி. இவர் அதே ஊரில் வசித்து வரும் கார்த்திக் என்பவரை காதலித்து திருமணம் செய்து கொண்டார். வீட்டில் எதிர்ப்பு கிளம்பும் என்பதால் பெற்றோருக்கு தெரியாமல் திருமணம் செய்து கொண்டனர்.

இருவரும் மாயமான நிலையில், பெண்ணின் பெற்றோர் மகளை காணவில்லை என காவல் நிலையத்தில் புகார் அளித்தனர். அத்துடன் நில்லாமல் நீதிமன்றத்தில் ஆட்கொணர்வு வழக்கு தொடர்ந்தனர்.

அதன் பிறகு காவல்துறையினரின் தீவிர விசாரணையில் இவர்களின் மகள் ஸ்ரீபவானி, கார்த்திக்குடன் திருச்சி மாவட்டம் துறையூர் வடக்கு தெருவில் வாடகைக்கு வீடு எடுத்து குடும்பம் நடத்தி வந்தது தெரிய வந்தது.

இதில் கார்த்திக் திருமண வயதை எட்டாததால் பெண்ணின் பெற்றோர் இருவரையும் பிடித்து துறையூர் போலீஸ் நிலையத்தில் ஒப்படைத்தனர். கார்த்திக் திருமண வயதை எட்டாத நிலையில் அது குறித்தும் வழக்கு தொடரப்பட்டுள்ளது.

இந்நிலையில் ஸ்ரீபவானியின் பெற்றோர் தங்கள் மகளைத் தங்களுடன் அனுப்பி வைக்கும்படி கதறி அழுதனர். அப்போது கார்த்திக் பெண்ணின் தாய் சுமதியின் கையை பலமாக தாக்கினார். இதனால் பெண்ணின் தாயாரின் கையில் இருந்து ரத்தம் வழிந்தோடியது.

அதிகப்படியான ரத்தம் வெளியேறியதால் காவல் நிலையத்திலேயே மயக்கம் அடைந்து சுமதி கீழே விழுந்தார். சுமதியின் கணவர் அதாவது பெண்ணின் தந்தை சுந்தர்ராஜன் காவல் நிலையத்தில் கார்த்திக் மீது புகார் கொடுத்தார். பின்னர் சுமதி 108 ஆம்புலன்ஸ் மூலம் துறையூர் அரசு மருத்துவமனையில் சிகிச்சைக்காக சேர்க்கப்பட்டார்.

காதல் திருமணம் செய்த மகள் மீது மண்ணை அள்ளி வீசி தாய் சாபமிட்ட சம்பவம் அப்பகுதியில் பெரும் பரபரப்பையும், சோகத்தையும் ஏற்படுத்தியுள்ளது. இது குறித்த வீடியோ சமூக ஊடங்களில் வைரலாகி வருகிறது.

தாய் சோகத்தில் அரற்றிக் கொண்டிருந்த போது, அவரது மகள் ஸ்ரீபவானி, தனது காதல் கணவன் கார்த்திக்குடன் சிரித்தப்படியே பேசுகிற காட்சி, சினிமாவில் மட்டுமல்ல… நிஜத்திலும் அரங்கேறியது அங்கே கூடியிருந்தவர்களை அதிர்ச்சியில் ஆழ்த்தியது. காதலுக்கு கண்கள் இல்லை தான் போல!

புதுக்கோட்டையில்..

புதுக்கோட்டை மாவட்டம் அன்னவாசல் அருகே உள்ள விளாப்பட்டி மேட்டுக்களம் பகுதியை சேர்ந்த அரவிந்த் (26) என்பவருக்கும், அதேபகுதியை சேர்ந்த நாகேஸ்வரி (22)என்ற பெண்ணுக்கும் 9 மாதங்களுக்கு முன்பு திருமணம் நடைபெற்றது.

அரவிந்த் சென்னையில் கூலித்தொழிலாளியாக பணியாற்றி வந்ததால் நாகேஷ்வரி தனது கணவர் வீட்டில் வசித்து வந்துள்ளார்.இந்த நிலையில் நாகேஸ்வரி 7மாத கர்ப்பிணியாக இருந்தார்.

இவருக்கு ஓரிரு நாட்களில் வளைகாப்பு நடத்த அவரது பெற்றோர் முடிவு செய்து இருந்தனர். இதற்காக அரவிந்த் கடந்த சில நாட்களுக்கு முன்பு சென்னையில் இருந்து சொந்த ஊருக்கு சென்றுள்ளார்.

திருமணம் ஆனதிலிருந்து நாகேஸ்வரியிடம் அரவிந்த் மற்றும் பெற்றோர் வரதட்சணை கேட்டு கொடுமைப்படுத்தியதாகக் கூறப்படுகிறது. இதற்கிடையே இவர்களுக்குள் ஏற்பட்ட பிரச்சனை காரணமாக அடிக்கடி நாகேஸ்வரி தாயார் வீட்டுக்கு சென்றிருந்தார்.

மீண்டும் சமாதானம் பேசி கணவருடன் சேர்த்து வைத்திருந்தனர். தொடர்ச்சியாக அரவிந்த் மற்றும் அவரது தாய், தந்தை வரதட்சணை கேட்டு கொடுமைப்படுத்தியுள்ளனர்.

இதனிடையே, கர்ப்பிணி நாகேஷ்வரிக்கும் அவரது கணவர் குடும்பத்தாருக்கும் இடையே தகராறு ஏற்பட்டதாக கூறப்படுகிறது. இதில் மனவேதனை அடைந்த நாகேஷ்வரி, தனது கணவர் வீட்டில் நேற்று முன்தினம் விஷம் குடித்து தற்கொலை செய்து கொண்டார்.

இந்த சம்பவம் பெரும் பரபரப்பை ஏற்படுத்தியது. நாகேஸ்வரி விஷ மருந்து தற்கொலை செய்து கொண்டுள்ளதாக அரவிந்த் பெண்ணின் உறவினர்களுக்கு தகவல் தெரிவித்துள்ளார்.

போலீசார் வழக்குப்ப திவு செய்து விசாரணை நடத்தி வருகின்றனர். அதே நேரம் நாகேஸ்வரிக்கு திருமணமாகி 9 மாதங்களே ஆவதால் இலுப்பூர் ஆர்.டி.ஓ. குழந்தைசாமி விசாரணையும் நடைபெற்று வருகிறது.

ஆனால் கர்ப்பிணியின் பெற்றோர், உறவினர்கள் கடும் ஆத்திரம் அடைந்தனர். இது தற்கொலை அல்ல, அப்பெண்ணின் கணவர் வீட்டார் கொலைச் செய்து விட்டதாக குற்றம் சாட்டினர்.

இந்நிலையில் நேற்று மாலை நாகேஸ்வரியின் உடல் பிரேத பரிசோதனை முடிந்து அவரது பெற்றோரிடம் ஒப்படைக்கப்பட்டது. உடலை பெற்றோர், நேராக அன்னவாசல் அருகே உள்ள கணவர் அரவிந்த் வீட்டு வாசலில் அடக்கம் செய்தனர். இந்த சம்பவம் காரணமாக அப்பகுதியில் பரபரப்பு ஏற்பட்டது.

இதற்கிடையே நாகேஸ்வரியின் தற்கொலைக்கு காரணமான அரவிந்த் மற்றும் அவரது பெற்றோரை கைது செய்ய வலியுறுத்தி திருச்சி-புதுக்கோட்டை புறவழிச்சாலையில் கீரனூர் அருகே குளத்தூரில் சாலை மறியலில் ஈடுபட்டனர்.

இதனால் அப்பகுதியில் வாகனங்கள் செல்ல முடியாத நிலை ஏற்பட்டது. மேலும் உரிய விசாரணை நடத்தி கர்ப்பிணி தற்கொலைக்கு காரணமானவர்கள் மீது கடும் நடவடிக்கை எடுக்க கோரிக்கை விடுத்தனர்.

திருவள்ளூரில்..

குடும்ப வறுமை காரணமாக கல்லூரி படித்துக்கொண்டு பகுதி நேர வேலைக்கு சென்ற மாணவர் பரிதாபமாக உயிரிழந்துள்ளது சோகத்தினை ஏற்படுத்தியுள்ளது. திருவள்ளூர் மாவட்டம் மீஞ்சூரை அடுத்த அத்திப்பட்டு புதுநகர் பகுதியை சேர்ந்தவர் வேலு (50). இவரது மகன் சதீஷ் (20).

இவர் கல்லூரியில் பி.சி.ஏ மூன்றாம் ஆண்டு படித்துவந்த நிலையில், குடும்ப வறுமை காரணமாகவும், தனது செலவிற்காகவும் நண்பர்களுடன் சேர்ந்து பரிமாறும் வேலைக்கு சென்றுள்ளார்.

இந்நிலையில் கடந்த 23ம் தேதி திருமண நிகழ்வு ஒன்றில், சமையல் பணி செய்து கொண்டிருந்த சதீஷ் எதிர்பாராத விதமாக கொதித்துக் கொண்டிருந்த ரசத்தில் விழுந்துள்ளார்.

உடல் முழுவதும் வெந்த நிலையில் உயிருக்கு போராடிய அவரை மீட்டு மருத்துவமனையில் அனுமதிக்கப்பட்டிருந்த நிலையில், சிகிச்சை பலனின்றி உயிரிழந்துள்ளார்.