இந்தியாவில்..

இந்தியாவில் பிச்சைக்காரரின் வயிற்றில் இருந்து 187 நாணயங்களை மருத்துவர்கள் அகற்றியுள்ளனர். கர்நாடக மாநிலத்தின் லிங்காசுகரை சேர்ந்த தியாமப்பா ஹரிஜன் (58). இவர் பிச்சை எடுத்து வரும் நிலையில் திடீரென வாந்தி மற்றும் வயிற்று வலியால் அவதிப்பட்டார்.

இதையடுத்து மருத்துவ கல்லூரி மருத்துவர்கள் அவரை பரிசோதனை செய்த போது வயிற்றுக்குள் 187 பண நாணயங்கள் இருந்தது கண்டுபிடிக்கப்பட்டது. பின்னர் அறுவை சிகிச்சைகள் மூலம் நாணயங்கள் அகற்றப்பட்டது.

இது குறித்து மருத்துவர் ஈஷ்வர் கூறுகையில், பிச்சை எடுத்து கிடைக்கும் நாணயங்களை வாய்க்குள் போட்டு விழுங்கும் பழக்கம் தியாமப்பாவுக்கு இருந்திருக்கிறது. அப்படி சாப்பிடுவதால் அது ஜீரணமாகும் என நினைத்திருக்கிறார்.

அவருக்கு schizophrenia எனப்படும் பிளவுபட்ட மனநோய் இருந்திருக்கிறது. நாணயங்களை சாப்பிட்டு தண்ணீர் குடிக்கும் போது ஒரு திருப்தியும் மகிழ்ச்சியும் கிடைத்திருக்கிறது. அனைத்து நாணயங்களை வயிற்றில் இருந்து எடுக்க 2 மணி நேரம் ஆனது என கூறியுள்ளார்.

ஆந்திராவில்..

ஆந்திரா மாநிலம் நெல்லூர் மாவட்டத்தை சேர்ந்த செங்கைய்யா – லக்‌ஷ்மி தம்பதியின் 4 வது மகள் சுப்புலக்‌ஷ்மி. செங்கைய்யா வனத்துறையில் வேலை பார்த்து வருகிறார்.

2011 ஆம் ஆண்டு செங்கையாவின் கண் முன்னே லாரி மோதிய விபத்தில் சுப்புலக்‌ஷ்மி மரணமடைந்துள்ளார். இதனால் மன துயரத்துக்குள்ளான செங்கைய்யா,

தனது மகளின் நினைவாக கோவில் ஒன்றை எழுப்பியுள்ளார். 2011 ஆம் ஆண்டு முதல் இன்று வரை அந்த கோவிலில் தினமும் வழிப்பாடு செய்து வருவதாக அவர் தெரிவித்துள்ளார்.

ஜார்க்கண்டில்..

இந்திய மாநிலம் ஜார்க்கண்டில் வரதட்சணை கேட்டு தகராறு ஏற்பட்டதில், மனைவியின் முகத்தில் கணவன் திராவகத்தை வீசிய சம்பவம் நடந்துள்ளது. ஜார்க்கண்டின் ராஞ்சி மாவட்டம் நம்கும் பகுதியைச் சேர்ந்தவர் அமீர் கான். இவர் தனது மனைவி ஹினா பர்வீனுடன் அதேபகுதியில் உள்ள குடியிருப்பில் வசித்து வந்துள்ளார்.

தனக்கு இருசக்கர வாகனம் தேவை என மனைவியிடம் கூறிய அமீர் கான், அதற்காக 70 ஆயிரம் ரூபாய் பணத்தை மாமனாரிடம் இருந்து வாங்கி வரும்படி கேட்டுள்ளார். ஆனால் ஹினா அதற்கு செவி சாய்க்கவில்லை என தெரிகிறது.

இதனால் தம்பதிக்குள் அடிக்கடி சண்டை ஏற்பட்டுள்ளது. அமீர் கானின் துன்புறுத்தலைத் தொடர்ந்து தனது தந்தை வீட்டிற்கு சென்ற ஹினா, கணவருக்காக பணம் கேட்டுள்ளார். விரைவில் பணத்தை ஏற்பாடு செய்து தருவதாக அவரது தந்தை கூறியுள்ளார்.

இந்த நிலையில் கணவர் வீட்டிற்கு சென்ற ஹினா , தந்தை கூறியதை அமீர் கானிடம் தெரிவித்துள்ளார். ஆனால் பணம் உடனடியாக கிடைக்கவில்லை என்ற கோபத்தில் அவர் மனைவியுடன் தகராறில் ஈடுபட்டுள்ளார்.

இருவருக்கும் வாக்குவாதம் முற்றிய நிலையில், அமீர் கான் ஏற்கனவே வாங்கி வைத்திருந்த திராவகத்தை மனைவியின் முகத்தில் வீசியுள்ளார். திராவக வீச்சினால் ஹினா அலறித் துடித்துள்ளார்.

அவரது அலறல் சத்தம் கேட்டு ஓடி வந்த அக்கம்பக்கத்தினர், ஹினாவை மீட்டு அருகில் உள்ள மருத்துவமனையில் அனுமதித்தனர். இதற்கிடையில் அமீர் வீட்டில் இருந்து தப்பி ஓடிவிட்டார்.

ஹினாவின் முகம் மற்றும் உடலின் பல இடங்களில் திராவகம் பட்டதால் அவருக்கு தீவிர சிகிச்சை அளிக்கப்பட்டு வருகிறது. இந்த நிலையில் அவரது வாய்க்குள் திராவகம் சென்றதால் அவரால் பேச முடியவில்லை என மருத்துவர்கள் தெரிவித்துள்ளனர்.

இந்த சம்பவம் தொடர்பாக வழக்குப்பதிவு செய்த பொலிஸார் அமீர் கானை வலைவீசி தேடி வருகின்றனர். வரதட்சணை கேட்டு மனைவியின் முகத்தில் கணவன் திராவகத்தை வீசிய சம்பவம் அப்பகுதியில் பரபரப்பை ஏற்படுத்தியுள்ளது.

விழுப்புரத்தில்..

காதலித்து கரம் பிடித்த மனைவியின் மீது, பின்னாலிருந்து மண்ணெண்ணெய் ஊற்றி, தீ வைத்து கொளுத்திய கணவனை, உயிருக்கு ஆபத்தான நிலையில், மருத்துவமனையில் அனுமதிக்கப்பட்ட நேரத்திலும் நீதிபதியிடம் மரண வாக்குமூலத்திலும் காட்டிக் கொடுக்காமல், தானே கொளுத்திக் கொண்டதாக கூறியிருக்கிறார் சங்கீதா.

அதன் பின்னர், உறவினர்கள் அழுது, கெஞ்சி கேட்டுக் கொண்ட பின்னர், வீடியோவில் தனது சாவுக்கான காரணத்தைக் கூறியுள்ளதால் கணவர் சிக்கினார். விழுப்புரம், வழுதாவூர் பகுதியைச் சேர்ந்தவர் முத்துக்குமரன் (30). ஓட்டுநரான இவர் சங்கீதா (24) என்பவரை காதலித்து திருமணம் செய்து கொண்டார்.

முத்துக்குமரனுக்கு ஆரம்பத்தில் இருந்தே குடிப்பழக்கம் இருந்து வந்துள்ளது. தினமும் குடித்து விட்டு வீட்டுக்கு வருவதால், சங்கீதா தட்டிக் கேட்டுள்ளார். இதனால் கணவன் மனைவிக்கு இடையே அடிக்கடி தகராறு ஏற்பட்டு உள்ளது. ஆனால், தன் மீதான தவறை மறைக்க, முத்துக்குமார், வரதட்சணை சங்கீதாவிடம் வரதட்சணை அதிகம் வாங்கி வரும்படி தொந்தரவு செய்து உள்ளார்.

இதற்கு அவரது அக்கா கலையரசியும் உடந்தையாக இருந்து உள்ளார். வரதட்சணைப் பணம் வாங்கி வருவதற்கு சங்கீதா மறுத்துள்ளார். கடந்த 5ம் தேதியும் இது குறித்து இருவருக்குமிடையே சண்டை நடந்துள்ளது.

அப்போது சங்கீதாவுக்கு பின்பக்கமாக வந்து, முத்துக்குமாரும், அவரது அக்காவும் திடீரென சங்கீதா மீது மண்ணெண்ணெய்யை ஊற்றி தீ வைத்து கொளுத்தி உள்ளனர். நடந்த சம்பவத்தை வெளியே சொன்னால் பிள்ளைகளை கொன்று விடுவதாக மிரட்டவும், சங்கீதா அது குறித்து யாரிடமும் சொல்லாமல் இருந்துள்ளார்.

சங்கீதாவின் அலறல் சப்தம் கேட்டு, அக்கம்பக்கத்தில் இருந்தவர்கள் உடனடியாக புதுச்சேரி ஜிப்மர் மருத்துவமனைக்கு ஆம்புலன்ஸில் கொண்டு சென்றனர். மருத்துவர்கள் எவ்வளவோ போராடியும் சிகிச்சைப் பலனின்றி சங்கீதா உயிரிழந்தார்.

முன்னதாக, நீதிபதி மருத்துவமனைக்கே வந்து சங்கீதாவிடம் வாக்குமூலம் கேட்ட போதும், தானே பற்ற வைத்துக் கொண்டதாக பொய் சொன்னார். ஆனால், சங்கீதா சொல்வது பொய் என்றும், கணவன் மனைவிக்குள் அடிக்கடி சண்டை நிகழும் என்றும் அவரது குடும்பத்தினருக்கு தெரியும் என்பதால், சங்கீதாவின் காலில் விழுந்து அழுதப்படியே கெஞ்சியுள்ளனர். உண்மையை நீதிபதியிடம் சொல்லுமாறு மன்றாடி உள்ளனர்.

அதற்கு பிறகு தான் சங்கீதா உண்மையை சொல்லி வாக்குமூலம் அளித்துள்ளார். அந்த வீடியோ வாக்குமூலம் தற்போது இணையத்தில் வைரலாகி வருகின்றன. முதல் வாக்குமூலத்தில், நீதிபதி சங்கீதாவிடம் பெயர் கேட்கிறார், வயது கேட்கிறார், கணவர் பெயர், அவரது வேலை என்ன என்று கேட்கிறார். எத்தனை பிள்ளைகள், அவர்களுக்கு வயது என்ன என்று கேட்கிறார், பிறகு எப்படி இந்த தீவிபத்து நடந்தது? கணவர் தான் காரணமா? என்று கேட்கிறார்.

இது அனைத்திற்கும் சங்கீதா சொன்ன பொய்யான வாக்குமூலத்தில், “என் பேர் சங்கீதா. 24 வயசாகிறது.. எனக்கு 3 பசங்க இருக்காங்க. ஒருத்தனுக்கு வயசு5, இன்னொருத்தனுக்கு 4 வயசு, இன்னொருத்தனுக்கு ஒன்றரை வயசாகுது. என் கணவர் பெயர் முத்துக்குமார். கல்யாணம் ஆகி 6 வருஷம் ஆகுது.

2017ல் கல்யாணம் நடந்தது. அன்னைக்கு சிலிண்டர் வீட்டில் காலி ஆயிடுச்சு சார். அதனால் ஸ்டவ் பற்ற வைக்க மண்ணெண்ணெய் எடுத்தேன். ஸ்டவ் எனக்கு அவ்வளவாக பத்த வைக்க தெரியாது. இருந்தாலும் மண்ணெண்ணைய் எடுத்து, ஸ்டவ்வில் ஊற்றி விட்டு, மீதி கொஞ்சம் தனியா எடுத்து வெச்சேன்.

அது கீழே கொட்டி விட்டது. அது என் சேலையில் பட்டு விட்டது ஆனால், அதை நான் கவனிக்கவில்லை.. ஸ்டவ் பற்ற வைத்ததுமே என் துணியில் நெருப்பு பற்றிக் கொண்டது. என் வீட்டுக்காரர் அப்போது தூங்கிட்டு இருந்தார். நான் கத்தி அலறியதும் அவர் ஓடி வந்து என்னை காப்பாற்றினார். என் வீட்டுக்காரருக்கும் எனக்கும் எந்த பிரச்சனையும் இல்லை.

ஆரம்பத்தில் எங்களுக்குள் சண்டை இருந்தது.. ஆனால், அதுக்கப்புறம் வேலைக்கு போக ஆரம்பிச்சிட்டார். டிரைவராக இருக்கிறார். இப்போ ஒழுங்கா இருக்கார். அவர் மீது எந்த தப்பும் இல்லை. நான் தான் மண்ணெண்ணெயை தெரியாமல் ஊற்றிக் கொண்டேன்” என்கிறார்.

பிள்ளைகளுக்கு எதுவும் ஆகாது. தயவு செய்து உண்மையைச் சொல்லுமா என்று உறவினர்கள் சங்கீதாவின் காலில் விழுந்து அழுதபடியே கேட்டதும், சங்கீதா அழுதபடியே இரண்டாவதாக தந்த மற்றொரு மரண வாக்குமூலத்தில், “நான் சங்கீதா பேசறேன்.

என் வீட்டுக்காரர் வரதட்சணை கேட்டு என் அப்பாவை டார்ச்சர் செய்துட்டு வந்தார். என்னையும் இழுத்து போட்டு அடிப்பார். தீபாவளி முடிந்ததில் இருந்தே நிறைய குடிச்சிட்டு வந்தார். அதனால், மண்ணெண்ணையை ஊற்றி கொளுத்தி கொள்ள போவதாக அவரிடம் சொன்னேன்.

உடனே மண்ணெண்ணையை நிஜமாகவே எடுத்து வந்து, பின்பக்கமாக வந்து என் மீது ஊற்றி என்னை கொளுத்திட்டார். அதுக்கப்புறமா என்னை தண்ணியில் தூக்கி கடாசி விட்டார். தோல் எல்லாம் எனக்கு கழண்டு வந்தது. உடம்பெல்லாம் பற்றிக் கொண்டது. நான் கத்தினேன். எல்லாரும் ஓடி வந்து தூக்கினாங்க. ஆம்புலன்ஸ் வந்தது.

என்னை அதில் ஏற்றினாங்க. உடனே இவர் என் கூட ஆம்புலன்ஸில் வரமுடியாதுன்னு சொன்னார். எல்லாரும் திட்டின பிறகு, என்கூட வந்தார். வர்ற வழியெல்லாம் என்னை திட்டிகிட்டே வந்தார். நீ மட்டும் உண்மையை சொன்னால், உன்னை கொளுத்தின மாதிரி, பசங்களையும் கொளுத்திடுவேன்னு சொன்னார்.

அதனால் தான், நான் பயந்துட்டு, பசங்களுக்காக, யார்கிட்டயும் உண்மையை சொல்லல. ஜட்ஜ் கிட்ட, டாக்டர் கிட்ட, போலீஸ் கிட்ட, என் வீட்டுல, எல்லார்கிட்டயும் பொய் தான் சொன்னேன். இப்ப உண்மையை சொல்றேன். என்னை என் வீட்டில் எல்லாரும் உண்மை சொல்ல சொன்னாங்க. இது தான் நடந்த உண்மை. தயவு செஞ்சு என் பிள்ளைகளையாவது காப்பாற்றுங்க” என்று கூறுகிறார்.

ஊட்டியில்..

2 வயது குழந்தை விளையாடிக்கொண்டிருக்கும் வாளிக்குள் தலை குப்புற கவிழ்ந்து நீரில் மூச்சு திணறி இறந்துள்ளது நீலகிரியில் பெரும் சோகத்தை ஏற்படுத்தியுள்ளது. நீலகிரி மாவட்டம் ஊட்டி பிங்கர்போஸ்ட் பகுதியை சேர்ந்தவர் ராஜா என்ற சலீம் – பிரிஜோத் பானு தம்பதியினர்.

செல்போன் கடை நடத்தி வரும் இவர்களுக்கு 2 வயதில் பெண் குழந்தை ஒன்று உள்ளது. இந்த நிலையில் நேற்றைய முன்தினம், ராஜா வழக்கம்போல் வெளியில் சென்றுள்ளார். மேலும் பானு சமயலறையில் வேலை செய்து வந்துள்ளார்.

இதனால் குழந்தை தனியே விளையாடி கொண்டிருந்தது. பின்னர் சிறிது நேரம் கழித்து வெளியில் வந்து பார்த்த பானு, தனது குழந்தையை காணவில்லை என்பதை அறிந்தார்.

பின்னர் படுக்கையறை, கட்டில் கீழ், வீட்டின் வெளியே என்று சுற்றிலும் தேடியுள்ளார். ஆனால் குழந்தை எங்கு தேடியும் கிடைக்கைவில்லை. எனவே அக்கம்பக்கத்தினரிடம் தனது குழந்தையை காணவில்லை’; யாரேனும் கடத்தி சென்றாரோ என்று கூறி பயந்து அழுதுள்ளார்.

பின்னர் மறுபடியும் வீட்டிற்கு வந்து பார்க்கையில் குளியலறை கதவு திறந்திருப்பது தெரியவந்தது. பின்னர் அங்கே சென்று பார்த்த பானு, தனது குழந்தை வாளிக்குள் தலை குப்புற இருப்பதை கண்டு அதிர்ச்சியடைந்தார்.

பின்னர் பதற்றத்தில் குழந்தையை தூக்கி பார்க்கையில் வாளிக்குள் இருந்த நீரில் அவர் மூச்சி திணறி இறந்துள்ளது தெரியவந்தது. குழந்தை இறப்பை தாங்க முடியாமல் பானு கதறி அழுதுள்ளார்.

பின்னர் இது குறித்து காவல்துறைக்கு தகவல் தெரிவிக்கப்பட்டது. அதன்பேரில் சம்பவ இடத்திற்கு வந்த அவர்கள் சிறுமியின் உடலை உடற்கூறாய்வுக்கு அனுப்பி வைத்து, விசாரணை மேற்கொண்டு வருகின்றனர்.

இதே போல் கடந்த சில நாட்களுக்கு முன்பு விளையாட்டு பொருள் மீன் தொட்டியில் விழுந்ததால் அதை எடுக்கும் போது தவறி விழுந்து ஒன்றரை வயது பெண் குழந்தை உயிரிழந்துள்ள சம்பவம் சென்னையில் நிகழ்ந்துள்ளது என்பது குறிப்பிடத்தக்கது.

உத்தர பிரதேசத்தில்..

உத்தர பிரதேச மாநிலம் கான்பூரை சேர்ந்த மஞ்சுஷர்மா என்னும் பெண் தனது குடும்பத்துடன் அங்குள்ள விலங்குகள் சரணாலயத்திற்கு சென்றுள்ளார். அப்போது குழந்தைகள் ஏறும் பொம்மை ரயிலில் அவர் ஏறியுள்ளார்.

அப்போது எதிர்பாராதவிமாக அதில் சிக்கி திணறி உள்ளார். அங்கு கூடியிருந்தவர்கள் அதை கண்டு ஊழியர்களிடம் கூற அவர்கள் ரயிலை நிறுத்தி உள்ளனர்.

ஆனால், மஞ்சுவிற்கு கடும் காயங்கள் ஏற்பட்ட நிலையில் அவர் உயிரிழந்தார். இதுகுறித்து தற்போது போலீசார் வழக்குப்பதிவு செய்து விசாரணை மேற்கொண்டு வருகின்றனர்.

ஆந்திராவில்..

23 வயதான ஹர்ஷா சாய் என்பவர் ஆந்திர மாநிலம் விஜயநகரத்தை சேர்ந்தவர். கல்லூரி முடித்த பின்னர் தனியே YOUTUBE -இல் சேனல் தொடங்கி உடற்பயிற்சி வீடியோக்களை அதில் பதிவிட்டு வந்தார். இதன் காரணமாக அவரின் வீடியோகளுக்கு SUBSCRIBERS வரத்தொடங்கினர்.

அதன் பின்னர் 4 லட்ச ரூபாய் காரை முழுக்க முழுக்க 5 ரூபாய் நாணயம் கொடுத்து வாங்கி அதை தனது சேனலில் வெளியிட்டார். இந்த சம்பவத்தில் பெரும் புகழ் பெற்ற அவருக்கு மீடியா வெளிச்சமும் கிடைத்தது. இதைத் தொடர்ந்து பேய் வீட்டில் தங்குவது போன்ற வீடியோக்களை அவர் வெளியிட அவரை பின்தொடருபவர்கள் எண்ணிக்கை அதிகரித்தவண்ணம் சென்றது.

இதன் பின்னர் YOUTUBE மூலம் தான் சம்பாதிக்கும் காசினை மக்களுக்கு செலவிட நினைத்த அவர், சிறுவனுக்கு சைக்கிள் ஒன்றை வாங்கி கொடுத்தார். அந்த வீடியோவும் இணையத்தில் பெரும் ஹிட் கொடுக்க அதன்பின்னர் பலருக்கு உதவ தொடங்கினார்.

ஏழை குடும்பம் ஒன்றுக்கு வீடு கட்டி கொடுப்பது, பல ஆயிரம் பேருக்கு டேங்க் புல் என்னும் அளவுக்கு பெட்ரோல் போட்டு கொடுப்பது என தற்போது ஒரு வள்ளல் என்ற அளவில் பேசப்படுகிறார்.

இந்த நிலையில் அவர் செய்துள்ள மற்றொரு சம்பவம் தற்போது இணையத்தில் வைரலாகியுள்ளது. சாலையில் செல்லும்போது சிறுவன் ஒருவன் ஒரு கடையின் முன் நின்று சைக்கிள் ஒன்றை பார்த்துக்கொண்டிருந்துள்ளார். அதனை ஹர்ஷா சாய் பார்த்து அந்த சிறுவனிடம் பேசியுள்ளார்.

அப்போது தன்னிடம் இறந்த சைக்கிள் உடைந்துவிட்டதால் புது சைக்கிளை வாங்கித்தர வீட்டில் வசதியில்லை என்று அந்த சிறுவன் கூறியுள்ளார். உடனடியாக சிறுவனை அழைத்து அந்த கடைக்கு சென்ற ஹர்ஷா சாய் சிறுவனுக்கு புதிய சைக்கிள் வாங்கி தந்ததோடு அந்த கடையில் சிறுவன் கேட்ட விளையாட்டு பொருள்களையும் வாங்கிக்கொடுத்துள்ளார்.

பின்னர் சிறுவனை அழைத்துக்கொண்டு அவரின் வீட்டுக்கு சென்றுள்ளார். அப்போதுதான் சிறுவனின் தாய்க்கு வாய் பேச முடியாது என்பது தெரியவந்துள்ளது.

ஹர்ஷா சாயின் செயலை அறிந்த அந்த தாய் அவரை கையெடுத்து கும்பிட்டுள்ளார். இந்த வீடியோ தற்போது இணையத்தில் வைரலாகி வருகிறது. சிறுவனுக்கு உதவியதாக பலரும் ஹர்ஷா சாயை பாராட்டி வருகின்றனர்.

வடசென்னையில்..

வடசென்னை தண்டையார்பேட்டை தமிழர் நகரைச் சேர்ந்தவர் பிரகாஷ் இவரது மனைவி கௌரி மகள் ரேகா (35) இவர் ராஜீவ் காந்தி அரசு மருத்துவமனையில் லேப் டெக்னீசியன் வேலை செய்து வந்தார் இவருக்கும் சென்னை.

டி நகர் கிரியப்பா தெருவை சேர்ந்த ராஜசேகரன் என்பவருக்கும் பெரியோர்களால் நிச்சயம் செய்து கடந்த 14ஆம் தேதி வடபழனி முருகன் கோயிலில் திருமணம் நடைபெற்றது.

இந்த நிலையில் ரேகா கணவர் வீட்டில் தங்கியிருந்தார் பின்னர் 19ஆம் தேதி தனது தாய் வீட்டிற்கு வந்து இங்கிருந்து வேலைக்கு போய் வந்து கொண்டு இருந்தார் ஞாயிற்றுக்கிழமை விடுமுறை என்பதால் மருமகன் ராஜசேகர் தனது மனைவியான ரேகாவை அழைத்துச் செல்வதாக மாமனாருக்கு தொலைபேசி மூலம் தகவல் தெரிவித்து இருந்தார்

இதனால் மருமகன் வருகிறார் என்று தெரிந்ததும் இவர்கள் காலை மார்க்கெட்டுக்கு சென்று சமையல் செய்வதற்காக கறி மற்றும் மற்ற காய்கறிகள் வாங்கிக் கொண்டு வீட்டிற்கு வந்து பார்த்தபோது வீட்டின் கதவு திறந்த நிலையில் இருந்தது.

உள்ளே சென்று பார்த்தபோது படுக்கை அறையில் தனது மகள் ரேகா மின்விசிறியில் தூக்கு மாட்டிக் கொண்டு தொங்கிய நிலையில் இருப்பதை கண்டு அதிர்ச்சி அடைந்து வயதான தம்பதியர்கள் சத்தம் போட்டுள்ளனர்

அவர்களின் சத்தம் கேட்டு அக்கம் பக்கத்தினர் ஓடி வந்து பார்த்து ரேகாவின் உடலை கீழே இறக்கி பார்த்தபோது இறந்து போனது தெரிய வந்தது உடனே போலீஸ் கட்டுப்பாட்டு அறைக்கு தகவல் தெரிவித்தனர் ஆர். கே. நகர் போலீசார் சம்பவ இடத்திற்கு வந்து சடலத்தை கைப்பற்றி பிரோத பரிசோதனைக்காக சென்னை ஸ்டான்லி மருத்துவமனைக்கு அனுப்பி வைத்துள்ளனர்.

இது குறித்து வழக்கு பதிவு செய்து விசாரணை நடத்தி வருகின்றனர் கணவர் வருகிறார் என தெரிந்தவுடன் தனக்குத்தானே தூக்கு போட்டு தற்கொலை செய்து கொண்ட சம்பவம் போலீசாருக்கு சந்தேகத்தை எழுப்பி உள்ளது திருமணம் ஆகி 13 நாட்கள் ஆனதால் ஆர்டிஓ விசாரணைக்கு பரிந்துரை செய்யப்படும் என போலீசார் தெரிவித்தனர்

கர்நாடகாவில்..

கர்நாடகத்தை சேர்ந்த 58 வயது நபரின் வயிற்றில் இருந்து ஒன்றரை கிலோ எடைகொண்ட 187 நாணயங்களை அறுவை சிகிச்சை மூலம் மருத்துவர்கள் அகற்றியுள்ளனர்.

சில மாதங்களுக்கு முன்னர் உத்தர பிரதேசத்தை சேர்ந்த ஒருவரின் வயிற்றிலிருந்து 62 ஸ்பூன்களை மருத்துவர்கள் 2 மணி நேர அறுவை சிகிச்சைக்குப் பிறகு முழுமையாக வெளியே எடுத்த செயல் பெரும் அதிர்ச்சியை ஏற்படுத்தியது.

இந்த நிலையில், அதே போன்ற ஒரு சம்பவம் கர்நாடக மாநிலத்தில் நடைபெற்றுள்ளது. கர்நாடகாவை சேர்ந்த ரெய்ச்சூர் மாவட்டத்தில் உள்ள லிங்சுகூரைச் சேர்ந்த 58 வயதான தியாமப்பா ஹரிஜன் என்பவர் வயிற்று வழியில் அவதிப்பட்டுள்ளார்.

இதனால் அவரின் உறவினர்கள் அவரை ஹங்கல் ஸ்ரீ குமரேஷ்வர் என்ற மருத்துவமனையில் அனுமதித்துள்ளனர். அங்கு அவருக்கு எக்ஸ்ரே மற்றும் எண்டோஸ்கோபி மூலம் சோதனை செய்ததில் அவரின் வயிற்றில் ஏராளமான நாணயங்கள் இருப்பது கண்டறியப்பட்டது.

அதனைத் தொடர்ந்து அவருக்கு அறுவை சிகிச்சை மூலம் நாணயங்களை அகற்ற மருத்துவர்கள் முடிவு செய்தனர். அதன்படி அறுவை சிகிச்சையில் அவரின் வயிற்றில் இருந்து 1, 2 மற்றும் 5 மதிப்புள்ள ஏராளமான நாணயங்களை மருத்துவர்கள் அகற்றியுள்ளனர். அத்னபின்னர் அந்த நபர் தற்போது நலமாக இருப்பதாக தெரிவிக்கப்பட்டுள்ளது.

இது தொடர்பாக பேசிய மருத்துவர்கள், அவர் பல மாதங்களாக நாணயங்களை விழுங்கி வந்திருக்கலாம் என்றும், அவர் வயிற்றில் இருந்து 1.5 கிலோ எடைகொண்ட 187 நாணயங்கள் வெளியேற்றப்பட்டது என்றும் கூறியுள்ளனர். இந்த சம்பவம் மருத்துவமனையில் பரபரப்பை ஏற்படுத்தியுள்ளது.