கொரோனா..

வவுனியாவில் மேலும் 5 பேருக்கு கொரோனா தொற்று உறுதி செய்யப்பட்டுள்ளது. வவுனியாவில் கொரோனா தொற்றாளர்களுடன் தொடர்பை பேணிய மற்றும் எழுமாறாக மேற்கொள்ளப்பட்ட பிசீஆர் பரிசோதனை முடிவுகள் சில இன்று (05.05) இரவு வெளியாகின.

அதில், வவுனியா நகரசபை சுகாதார பரிசோதகர், தவசிகுளம் பகுதியைச் சேர்ந்த ஒருவர், வவுனியா நகரைச் சேர்ந்த இருவர், வேப்பங்குளம் பகுதியைச் சேர்ந்த ஒருவர் என 5 பேர் கொரோனா தொற்றாளர்களாக இனங்காணப்பட்டுள்ளனர்.

தொற்றுக்குள்ளான 5 பேரையும் கொரோனா வைத்தியசாலைக்கு அனுப்புவதற்கான நடவடிக்கைகளை முன்னெடுத்துள்ள சுகாதார பிரிவினர், அவர்களுடன் தொடர்புடையவர்களை தனிமைப்படுத்த நடவடிக்கை எடுத்து வருகின்றனர்.

உயர்தரப் பரீட்சை..

நேற்று வெளிவந்துள்ள உயர்தரப் பரீட்சை முடிவுகளின் அடிப்படையில் வவுனியா மாவட்டத்தில் வர்த்தகப் பிரிவில் முதலிடத்தில் வவுனியா சைவப்பிரகாசா மகளீர் கல்லூரி பெற்றுள்ளது.

அந்தவகையில் மாவட்ட மட்டத்தில் முதலிடத்தை 3A சித்திகளைப் பெற்று சரண்யா என்ற மாணவி பெற்றுக்கொண்டுள்ளார்.

அத்துடன் கலைப் பிரிவில் மாவட்ட மட்டத்தில் ஓமந்தை மத்திய கல்லூரி மாணவி தனுசா 3A சித்திகளுடன் மூன்றாம் இடத்தைப் பெற்றுக்கொண்டுள்ளார்.

தரண்யா சூரியகுமார்..

மருத்துவராகி எனது பின்தங்கிய கிராமமான தச்சங்குளம் மக்களுக்கு இலவசமாக சேவையினை வழங்குவதே எனது இலச்சியமாகும் என வவுனியாவில் உயிரியல் பிரிவில் முதலிடம் பெற்ற மாணவி தரண்யா சூரியகுமார் தெரிவித்தார்.

வெளியான கல்விப் பொதுத் தராதர உயர்தரப் பரீட்சை முடிவுகளின் படி உயிரியல் பிரிவில் வவுனியா இறம்பைக்குளம் மகளீர் மகாவித்தியாலய மாணவி தரண்யா சூரியகுமார் 3A சித்திகளைப் பெற்று மாவட்ட ரீதியில் முதலிடத்தையும் தேசிய ரீதியில் 148வது இடத்தையும் பிடித்து வவுனியா மண்ணுக்கும் பாடசாலைக்கும் பெருமை சேர்த்துள்ளார்.

அவர் ஊடகங்களுக்கு கருத்து தெரிவிக்கையில், எதிர்காலத்தில் ஒர் வைத்தியராக வரவேண்டும் என்பதே எனது இலட்சியமாகும் . நான் வசிக்கும் பின்தங்கிய கிராமமான தச்சங்குளம் கிராம மக்களுக்கு இலவசமாக சேவையினை வழங்க வேண்டும் என்ற குறிக்கோளுடன் மேலும் எனது கற்றல் நடவடிக்கையினை முன்னெடுத்துச் செல்கின்றேன்.

கோவிட் -19 காரணமாக பாடசாலை, பிரத்தியோக வகுப்புக்கள் , கற்றல் நடவடிக்கைகள் இடையில் நிறுத்தப்பட்டன. இருந்த போதிலும் இணைய வசதியூடாகவும், முன்னர் கற்றவற்றினை மீள கற்றதும் தான் நான் இந்த பெறுபேற்றினை அடைய காரணம்.

எனவே எதிர்வரும் பரீட்சைகளில் தோற்றவுள்ள மாணவர்களும் கோவிட்-19 காரணத்தினை முன்னுறுத்தி கற்றல் நடவடிக்கையினை முடிவுறுத்தாது மேலும் இணையம், கற்றவற்றினை மீட்டல் போன்ற செயற்பாடுகளை முன்னெடுத்து சிறந்த பேறுபேற்றினை அடைவீர்கள் என எதிர்பார்க்கின்றேன்.

குறித்த திறமைச் சித்திகளை பெறுவதற்கு காரணமாகவிருந்த குடும்பத்தினர், அதிபர், ஆசிரியர்கள், உறவினர்கள், சக நண்பர்களுக்கும் நன்றிகளை தெரிவித்து கொள்கின்றேன் என தெரிவித்தார்.

தர்மலிங்கம் யோகராஜா..

வவுனியா தெற்கு தமிழ் பிரதேச சபையின் புதிய தவிசாளராக கூட்டமைப்பின் பங்காளிக் கட்சியான தமிழீழ மக்கள் விடுதலைக் கழகத்தைச் சேர்ந்த தர்மலிங்கம் யோகராஜா தெரிவு செய்யப்பட்டுள்ளார்.

கடந்த முறை இடம்பெற்ற உள்ளூராட்சி சபை தேர்தலில் வவுனியா தெற்கு தமிழ் பிரதேச சபை மற்றும் முல்லைத்தீவு கரைத்துறைப்பற்று பிரதேச சபையின் ஆட்சியினை தமிழ் தேசியக் கூட்டமைப்பு கைப்பற்றியிருந்தது.

அதற்கமைய சபையின் தவிசாளர் பதவியினை ஆட்சிகாலப்பகுதியில் இரண்டரை வருடங்கள் என பங்கிட்டு வகிப்பதற்கு கூட்டமைப்பில் அங்கம் வகிக்கும் தமிழீழ மக்கள் விடுதலைக் கழகம் மற்றும் தமிழீழ விடுதலை இயக்க கட்சிகளிற்கிடையில் புரிந்துணர்வு ஒன்று கைச்சாத்திடப்பட்டிருந்தது.

அதற்கமைய வவுனியா தெற்கு தமிழ் பிரதேச சபையின் தவிசாளர் து.நடராஜசிங்கம் மற்றும் கரைத்துறைப்பற்று பிரதேச சபையின் தவிசாளர்கள் தமது பதவியினை ராஜினாமா செய்திருந்தனர்.

அந்தவகையில் கரைத்துறைப்பற்று பிரதேச சபையின் புதிய தவிசாளர் ஏற்கனவே தெரிவுசெய்யப்பட்டுள்ள நிலையில், வவுனியா தெற்கு பிரதேச சபையின் புதிய தவிசாளருக்கான தேர்தல் மாகாண உள்ளூராட்சி ஆணையாளர் பற்றிக் டிறஞ்சன் தலைமையில் இன்று இடம்பெற்றது.

குறித்த தேர்தலில் தமிழ்த் தேசியக் கூட்டமைப்பு சார்பில் தமிழீழ மக்கள் விடுதலைக் கழகத்தில் த.யோகராஜாவின் பெயர் பரிந்துரைக்கப்பட்டது. வேறு கட்சிகளை சார்ந்தவர்களின் பெயர்கள் பரிந்துரைக்கப்படவில்லை இந்நிலையில் யோகராஜா போட்டியின்றி தெரிவு செய்யப்பட்டார்.

வவுனியா தெற்கு தமிழ்பிரதேச சபையில் மொத்தமாக 30 உறுப்பினர்கள் அங்கம் வகிப்பதுடன் அதிகபட்சமாக, தமிழ்த் தேசியக் கூட்டமைப்பு 11 உறுப்பினர்களை கொண்டுள்ளமை குறிப்பிடத்தக்கது.

அசோக்குமார் அபிதன்..

கற்றல் நேரத்தில் கல்வியை செவிமடுத்து கற்றால் சிறந்த பெறுபேற்றினை பெறலாம் எனவும் வவுனியாவில் கணிதப் பிரிவில் முதலிடம் பெற்ற அசோக்குமார் அபிதன் என்ற மாணவன், ஓட்டோமொபைல் துறையில் சாதனை படைப்பதே தனது இலச்சியம் என தெரிவித்துள்ளார்.

வெளியான கல்விப் பொதுத் தராதர உயர்தரப் பரீட்சை முடிவுகளின் படி கணிதப் பிரிவில் வவுனியா தமிழ் மகாவித்தியாலய மாணவன் அசோக்குமார் அபிதன் 3ஏ சித்திகளைப் பெற்று மாவட்ட ரீதியில் முதலிடத்தையும் தேசிய ரீதியில் 326வது இடத்தையும் பிடித்து வவுனியா மண்ணுக்கும் பாடசாலைக்கும் பெருமை சேர்த்துள்ளார்.

அவர் ஊடகங்களுக்கு கருத்து தெரிவிக்கையில், எனது இலட்சியம் சிறுவயது தொடக்கம் மாறிக்கொண்டே சென்று கொண்டிருந்தது. கல்விப் பொதுத் தராதர உயர்தரத்தின் போதே எனது இலட்சியம் ஆட்டோமொபைல் துறையின் மீது மாற்றம் அடைந்தது. இலட்சியத்தினை அடைய வேண்டுமென கற்றேன் தற்போது சாதனை படைத்துள்ளேன்.

கடந்த இரண்டு வருடங்களாக நான் கற்றல் நடவடிக்கையில் ஈடுபடவில்லை. அதன் பின் கோவிட் -19 தொற்று காரணமாக எனது தனியார் கல்வி நடவடிக்கைகளையும் தொடர முடியாத நிலமை ஏற்பட்டிருந்தது. பொழுது போக்கில் எனக்கிருந்த நாட்டம் சலித்துப் போனதன் காரணமாக கல்வியில் சற்று ஆர்வம் காட்ட முயற்சித்தேன்.

உண்மையில் கல்வி எனக்கு உறுதுணையாக அமைந்தது மகிழ்ச்சியான விடயம். அத்துடன் கற்றல் நேரத்தில் கல்வியை செவிமடுத்து கற்றால் சிறந்த பெறுபேற்றினை பெறமுடியும். குறித்த திறமைச் சித்திகளை பெறுவதற்கு காரணமாகவிருந்த குடும்பத்தினர், அதிபர், ஆசிரியர்கள், உறவினர்கள், சக நண்பர்களுக்கும் நன்றிகளை தெரிவித்து கொள்கின்றேன் என தெரிவித்தார்.

பரமசிவம் சுபிலக்ஷி..

வறுமையை காரணம் காட்டி கல்வியை விடாது கல்வியினை தொடந்து சாதனை நிலைநாட்டுங்கள் என தெரிவித்துள்ள வவுனியாவில் கலைப் பிரிவில் முதலிடம் பெற்ற பரமசிவம் சுபிலக்ஷி என்ற மாணவி, சட்டத்தரணியாகி தனது கிராமத்திற்கும் பாடசாலைக்கும் பெருமை சேர்ப்பதே தனது இலட்சியம் என தெரிவித்துள்ளார்.

வெளியான கல்விப் பொதுத் தராதர உயர்தரப் பரீட்சை முடிவுகளின் படி கலைப்பிரிவில் வவுனியா இறம்பைக்குளம் மகளீர் மகாவித்தியாலய மாணவி பரமசிவம் சுபிலக்ஷி 3A சித்திகளைப் பெற்று மாவட்ட ரீதியில் முதலிடத்தையும் தேசிய ரீதியில் 351வது இடத்தையும் பிடித்து வவுனியா மண்ணுக்கும் பாடசாலைக்கும் பெருமை சேர்த்துள்ளார்.

அவர் ஊடகங்களுக்கு கருத்து தெரிவிக்கையில், 2019ம் ஆண்டு பரிட்சையில் தொற்றவிருந்த நான் உடன் நிலமை சுகயீனம் காரணமாக 2020ம் ஆண்டு பரிட்சைற்கு தொற்ற வேண்டிய நிலமை ஏற்பட்டது.

எனினும் விடமுயற்சியினால் தற்போது கலைப்பிரிவில் 3A சித்திகளை பெற்றுள்ளேன். எனது எதிர்கால இலட்சியம் சட்டத்தரணியாக வேண்டும் என்பது. அதன் முதற்கட்டத்தினை தற்போது தாண்டியுள்ளேன் என்பதை நினைக்கும் சமயத்தில் மகிழ்ச்சியாகவுள்ளது.

பரீட்சை எழுதவுள்ள மாணவர்களும் இலட்சியத்தினை முன்னிறுத்தி கல்வியினை தொடர்ந்தால் சிறந்த பெறுபேற்றினை அடைய முடியும் . குறித்த திறமைச் சித்திகளை பெறுவதற்கு காரணமாகவிருந்த இறைவனுக்கு முதற்கண் நன்றிகளை தெரிவித்து கொள்வதுடன் குடும்பத்தினர், அதிபர், ஆசிரியர்கள், உறவினர்கள், சக நண்பர்களுக்கும் நன்றிகளை தெரிவித்துக் கொள்கின்றேன்.

எனது குடும்ப வறுமையின் மத்தியிலும் இந்த சாதனை நிலைநாட்டிய என்னை போல் எதிர்காலத்தில் பரிட்சையில் தோற்றவிருக்கும் மாணவர்களும் வறுமையினை கருத்தில் கொள்ளாது வாழ்க்கையில் முன்னேற வேண்டுமென தெரிவித்தார்.

குருக்கள் புதுக்குளம்..

வவுனியா, பூவரசன்குளம் பொலிஸ் பிரிவுக்குட்பட்ட குருக்கள் புதுக்குளம் கிராமம் இன்று காலை 10 மணி வரை முடக்கப்படவில்லை. கிராம மக்களின் வழமையான செயற்பாடுகள் இடம்பெற்று வருகின்றன.

வவுனியா, பூவரசன்குளம் சந்தியில் இருந்து 2 கிலோமீற்றர் தொலைவில் அமைந்துள்ள குருக்கள் புதுக்குளம் கிராமத்தைச் சேர்ந்த ஒருவருக்கு கடந்த 27 ஆம் திகதி கொரோனா தொற்று உறுதி செய்யப்பட்டது.

அதனைத் தொடர்ந்து அவர்களுடன் தொடர்புடையவர்கள் சுய தனிமைப்படுத்தப்பட்டு மேற்கொள்ளப்பட்ட பிசீஆர் பரிசோதனையில் மேலும் இருவருக்கு கொரோனா தொற்று உறுதி செய்யப்பட்டுள்ளது.

இதனையடுத்து அக் கிராமத்தில் தொற்றாளர்களுடன் தொடர்பில் இருந்த 10 குடும்பங்கள் சுய தனிமைப்படுத்தப்பட்டதுடன், 100 பேருக்கு கடந்த திங்கள் கிழமை பிசீஆர் பரிசோதனைகள் மேற்கொள்ளப்பட்டன.

இந்நிலையில் வவுனியாவின் குருக்கள் புதுக்குளம் கிராமம் இன்று (05.05) அதிகாலை முதல் முடக்கப்படுவதாக கொவிட் செயலணியின் தலைவரும், இராணுவ தளபதியுமான சவேந்திர சில்வா தெரிவித்திருந்தார்.

எனினும், குறித்த கிராமத்தில் மூன்று பேர் மாத்திரமே தொற்றாளராக இனங்காணப்பட்டுள்ள நிலையில், அங்கு 100 பேரிடம் மேற்கொள்ளப்பட்ட பிசீஆர் முடிவுகள் கிடைக்கப்பட்ட பின்னரே அடுத்த கட்ட நடவடிக்கை குறித்து தீர்மானிக்கப்படவுள்ளதாகவும், தற்போது கிராமம் முடக்கப்படவில்லை எனவும் அதிகாரிகள் தெரிவித்துள்ளனர்.

குறித்த கிராமத்தின் உள்ள பலர் வவுனியாவின் பல்வேறு பகுதிகளிலும் வர்த்தக நிலையங்களில் வேலை செய்வதுடன், கூலி வேலைகளுக்கும் செல்பவர்களாகவும் உள்ளனர்.

அவர்கள் வழமை போன்று தமது செயற்பாடுகளை முன்னெடுத்துள்ளதுடன், சிலர் தமது கிராமம் முடக்கப்பட்டுள்ளதா, இல்லையா என்பது தெரியாது வீடுகளுக்குள்ளேயே முடங்கி இருப்பதையும் அவதானிக்க முடிகிறது.

இருப்பினும், பிசீஆர் முவுகளைப் பொறுத்தே முடக்படுவதா இல்லையா என தெரிவிக்கப்படும் என பூவரசன்குளம் பொலிஸ் நிலைய பொறுப்பதிகாரி தெரிவித்துள்ளார்.