சுகாதார பரிசோதகர்கள் எச்சரிக்கை..

தற்போதுள்ள நிலையில் நாட்டை மூடுமாறு பொது சுகாதார பரிசோதகர்கள் சங்கம் தெரிவித்துள்ளது. நாட்டு மக்களுக்கு பயண கட்டுப்பாடு விதிக்கப்படவில்லை என்றால் கோவிட் தொற்றினால் ஏற்படும் கடுமையான பாதிப்புகளுக்கு நாடு முகம் கொடுக்க நேரிடும் ஆபத்துக்கள் உள்ளதாக சங்கத்தின் தலைவர் உப்புல் ரோஹன எச்சரிக்கை விடுத்துள்ளார்.

பிரித்தானியாவில் கண்டுபிடிக்கப்பட்ட கோவிட் வைரஸின் புதிய மாறுபாட்டினால் பாதிக்கப்பட்ட நோயாளிகள் இலங்கையில் அடையாளம் காணப்பட்டுள்ளனர்.

இதனால் நாடு கடுமையான ஆபத்தான நிலைமைக்கு முகம் கொடுத்துள்ளதாக அவர் குறிப்பிட்டுள்ளார். அரச மற்றும் தனியார் நிறுவனங்களில் அதிகமான நோயாளிகள் அடையாளம் காணப்பட்டு வருகின்றனர்.

தற்போதைய நிலைமையில் உடனடியாக நடவடிக்கை எடுக்கவில்லை என்றால் எங்களால் எதிர்பார்க்க முடியாதளவு நாட்டை மூடி விட நேரிடும்.

வெளியிடப்படும் கோவிட் தொற்றாளர்களின் தரவுகளில் உண்மையான தகவல் உள்ளடக்கப்பட்டுள்ளதா என்பதில் சந்தேகம் உள்ளது. PCR முடிவுகள் தாமதமாகவே கிடைக்கின்றது.

உரிய நேரத்தில் PCR முடிவுகள் கிடைத்தால் அடையாளம் காணப்படும் நோயாளிகளின் எண்ணிக்கையில் பாரிய அதிகரிப்பு ஏற்படும் என அவர் எச்சரிக்கை விடுத்துள்ளார்.

-தமிழ்வின்-

கோவிட்-19 வைரஸ்..

இலங்கையில் கோவிட்-19 வைரஸ் தொற்றுக்கு உள்ளானோரின் எண்ணிக்கை 75 ஆயிரத்தைக் கடந்துள்ளது. நேற்றும் 801 பேருக்குக் கோவிட்-19 தொற்று உறுதி செய்யப்பட்டுள்ளது என அரச தகவல் திணைக்களம் அறிவித்துள்ளது.

இதன்படி நாட்டில் கோவிட்-19 தொற்றுக்கு உள்ளானோரின் மொத்த எண்ணிக்கை75 ஆயிரத்து 654 ஆக அதிகரித்துள்ளது. கடந்த கடந்த நான்கு மாத காலப்பகுதியில் மாத்திரம் 71 ஆயிரத்துக்கும் மேற்பட்டோர் கோவிட்-19 தொற்றுக்கு உள்ளாகியுள்ளனர்.

2020ஆம் ஆண்டு மார்ச் மாதம் முதல் ஒக்டோபர் மாதம் வரையில் நாட்டில் மூவாயிரம் வரையிலான தொற்றாளர்களே அடையாளம் காணப்பட்டிருந்ததுடன் 13 பேரே தொற்றால் உயிரிழந்திருந்தனர்.

இந்தநிலையில், மினுவாங்கொடை ஆடைத்தொழிற்சாலை மற்றும் பேலியாகொட மீன் சந்தைக் கொத்தணிகளைத் தொடர்ந்து நாளாந்தம் தொற்றுக்கு உள்ளான 500 இற்கும் மேற்பட்டோர் அடையாளம் காணப்பட்டு வருவதுடன், நாளாந்தம் மரணங்களும் பதிவாகி வருகின்றன.

இதேவேளை, கோவிட்-19 தொற்றுக்கு உள்ளாகியிருந்தவர்களில் 865 பேர் இன்று குணமடைந்துள்ளனர் எனவும் அரச தகவல் திணைக்களம் மேலும் தெரிவித்துள்ளது.

இதற்கமைய நாட்டில் கோவிட்-19 தொற்றிலிருந்து இதுவரை 68 ஆயிரத்து 696 பேர் குணமடைந்துள்ளதுடன், 6 ஆயிரத்து 568 பேர் வைத்தியசாலைகளில் சிகிச்சை பெற்றுவருகின்றனர்.

கோவிட் வைரஸ்..

கோவிட் வைரஸ் பரவல் குறைந்தாலும், எந்த ஒரு நாடும் கட்டுப்பாடுகளை தளர்த்தக்கூடாது, அதற்கான தருணம் வரவில்லை என்று உலக சுகாதார நிறுவனம் எச்சரித்துள்ளது. இது தொடர்பில் உலக சுகாதார நிறுவனத்தின் தலைவர் டெட்ரோஸ் அதனோம் மேலும் தெரிவிக்கையில்,

தொடர்ந்து நான்காவது வாரமாக கோவிட் வைரஸ் பெருந்தொற்று பரவல், உலக அளவில் குறைந்து இருக்கிறது. அதுமட்டுமின்றி தொடர்ந்து 2-வது வாரமாக கொரோனா உயிர்ப்பலி எண்ணிக்கையும் சரிந்துள்ளது.

பல நாடுகளிலும் பொதுச் சுகாதார நடவடிக்கைகளை மிக தீவிரமாக நடைமுறைப்படுத்தி வருவதனாலேயே இது குறைகின்றது என்று தோன்றுகிறது. இதற்காக நாம் ஊக்கம் அடையலாம். ஆனால் இதில் மன நிறைவு கொள்வது என்பது அந்த வைரசைப் போலவே ஆபத்தானது.

தற்போது கட்டுப்பாடுகளை எந்த நாடுகளும் தளர்த்தும் தருணம் எந்த நாட்டுக்கும் வரவில்லை. எனவே கட்டுப்பாடுகளை தளர்த்தக்கூடாது. அதே போன்று எந்த தனிநபரும் கோவிட் கால பாதுகாப்பு அம்சங்களை குறைப்பதற்கான தருணமும் இது அல்ல.

தடுப்பூசிகள் தயாரிப்பு தொடங்கி உள்ள நிலையில் நேர்ந்துள்ள ஒவ்வொரு உயிரிழப்பும் மிகுந்த சோகத்துக்குரியதுதான்.

கொரோனா வைரஸ் தொற்றின் தோற்றம் பற்றி ஆராய வுஹான் நகருக்கு சமீபத்தில் உலக சுகாதார நிறுவன நிபுணர் குழு சென்றது. அவர்கள் கண்டறிந்துள்ளவை குறித்து அடுத்த வாரம் அறிக்கை வெளியிடுவார்கள் என அவர் மேலும் தெரிவித்துள்ளார்.

கொரோனா..

இரத்தினபுரியில் வீடொன்றில் சுகாதார பரிசோதகர்களுக்கு அறிவிக்காமல் நடந்த விருந்து காரணமாக எட்டுப் பேருக்கு கோவிட் வைரஸ் தொற்று ஏற்பட்டுள்ளது.

பெல்மடுல்ல, பாதகட, தேவாலேகம பிரதேசத்திலுள்ள வீடு ஒன்றில் நடந்த விருந்தில் கலந்து கொண்ட பாரிய அளவிலானோர் தனிமைப்படுத்தப்பட்டுள்ளனர்.

நேற்று முன்தினம் மேற்கொள்ளப்பட்ட பீசீஆர் பரிசோதனைக்கு அமைய இந்த தொற்றாளர்கள் அடையாளம் காணப்பட்டுள்ளனர். பிரதேச சுகாதார பரிசோதகர்களுக்கு அறிவிக்காமல் கடந்த பெப்ரவரி மாதம் 4ஆம் திகதி பூப்புனித நீராட்டு விழா நடத்தப்பட்டுள்ளது.

இந்த நிகழ்வில் கலந்து கொண்ட பலர் தனிமைப்படுத்தப்பட்டுள்ளதாக பிரதேச சுகாதார பரிசோதகர்கள் தெரிவித்துள்ளனர். தற்போதைய நெருக்கடியான நிலையில் பொறுப்புடன் செயற்படுமாறு பெல்மடுல்ல பிரதேச மக்களிடம் கேட்டுள்ளதாக சுகாதார பரிசோதகர்கள் தெரிவித்துள்ளனர்.

கடந்த இரண்டு நாட்களில் பெல்மடுல்ல பிரிவில் 18 கோவிட்19 தொற்றாளர்கள் அடையாளம் காணப்பட்டுள்ளமை குறிப்பிடத்தக்கது.

இராணுவத்தளபதி..

புதிய கோவிட் வைரஸ் பரவலை அடுத்து நாட்டில் உரிய நடவடிக்கைகள் மேற்கொள்ளப்படவுள்ளதாக இராணுவத் தளபதி சவேந்திர சில்வா தெரிவித்துள்ளார் புதிய கோவிட் வைரஸ் பரவல், இலங்கையின் பல இடங்களில் கண்டறியப்பட்டுள்ளது.

இந்த நிலையில் நாடளாவிய ரீதியில் முடக்கலை மேற்கொள்ள தீர்மானம் எதுவும் எடுக்கப்படவில்லை என்று இராணுவத் தளபதி சவேந்திர சில்வா குறிப்பிட்டுள்ளார். இந்த புதிய கோவிட் வைரஸ் பரவல் கொழும்பு, அவிசாவளை, பியகம மற்றும் வவுனியா ஆகிய இடங்களில் கண்டறியப்பட்டுள்ளது.

பிரித்தானியாவில் பரவிய இந்த புதிய கோவிட் வைரஸ் தொற்று முதன்முதலாக இந்த ஆண்டிலேயே இலங்கைக்குள் கண்டறியப்பட்டுள்ளது. இந்த புதிய கோவிட் வைரஸ் தொற்று சுவீடன், ஜெர்மனி, டென்மார்க் ஆகிய இடங்களிலும் ஏற்கனவே கண்டறியப்பட்டுள்ளன.

பி.1.258 என்ற வர்க்கத்தைச் சேர்ந்த இந்த புதிய கோவிட் வைரஸ் அதிகப்பரவல் தன்மையை கொண்டுள்ளமை கண்டறியப்பட்டுள்ளமை சுட்டிக்காட்டத்தக்கது.

-தமிழ்வின்-

ஒன்றுக்கூடல்..

பிரித்தானியாவில் பரவியுள்ள கொரோனா வைரஸ் இலங்கையில் கண்டறியப்பட்டமையை அடுத்து ஒன்றுக்கூடல் மற்றும் நிகழ்வுகளுக்கு அனுமதியளிக்கப்படமாட்டாது என்று பொது சுகாதார அதிகாரிகள் சம்மேளனம் அறிவித்துள்ளது.

எனினும் திருமணம் மற்றும் மரண வீடுகளை தவிர்ந்த நிகழ்வுகளுக்கு அனுமதி வழங்கப்படாது என்று சம்மேளனம் குறிப்பிட்டுள்ளது. எனவே திருமணம் மற்றும் மரண வீடுகளை தவிர்ந்த ஏனைய நிகழ்வுகளுக்கு அனுமதிக்கோரி பொதுமக்கள் பொது சுகாதார அதிகாரிகள் அலுவலகத்துக்கு வரவேண்டாம் என்று சம்மேளனத்தின் தலைவர் உப்புல் ரோஹன தெரிவித்துள்ளார்.

அதேநேரம் திருமணம் மற்றும் மரண வீடுகளில் உரிய சுகாதார நடைமுறைகள் பின்பற்றப்பட வேண்டும் என்றும் ரோஹன வலியுறுத்தியுள்ளார்.

இதேவேளை, முகக்கவசங்களை அணியாதவர்களுக்கு எதிராக சட்ட நடவடிக்கைகள் எடுக்கப்படும் என்றும் பொது சுகாதார அதிகாரிகள் சம்மேளனத் தலைவர் எச்சரித்துள்ளார்.

புதிய கொரோனா..

புதிய மாறுபாடு காரணமாக கோவிட் நோயாளிகள் அதிகரித்து வரும் நிலையில் நாடு முழுவதையும் முடக்குவதற்கு எந்த ஒரு தீர்மானமும் எடுக்கவில்லை என அதிகாரிகள் தெரிவித்துள்ளனர்.

ஆனால் கொரோனா தொற்றினை தடுக்கும் தேசிய செயற்பாட்டு மையம் நாளை கூடும் போது இந்த பிரச்சினை தொடர்பில் விவாதிக்கப்படும் என்று அதிகாரிகள் தெரிவித்துள்ளனர்.

இதுவரையில் முழு நாட்டையும் முடக்குவது தொடர்பில் எந்த தீர்மானமும் எடுக்ககப்படவில்லை. எனினும் தேசிய செயற்பாட்டு மையத்தினால் நாளை இந்த விடயம் தொடர்பில் கலந்துரையாடல் மேற்கொள்ள தீர்மானிக்கப்பட்டுள்ளதாக பிரதி பொலிஸ் மா அதிபர் அஜித் ரோஹன தெரிவித்துள்ளார்.

வார இறுதி ஆங்கில ஊடகமொன்றுக்கு கருத்து வெளியிடும் போதே அவர் இந்த விடயத்தை குறிப்பிட்டுள்ளார். இதேவேளை, தொற்று நோய் பிரிவு நிலைமை தொடர்பில் ஆராய்ந்து வருவதாகவும்,

எடுக்கப்படவுள்ள நடவடிக்கைகள் தொடர்பில் தீர்மானங்கள் முன்னெடுக்கப்பட்டு வருவதாகவும் பொது சுகாதார பிரதி பணிப்பாளர் வைத்தியர் ஹேமந்த தெரிவித்துள்ளார்.

-தமிழ்வின்-

இளைஞர், யுவதிகளுக்கு..

இன்றைய தினம் கொண்டாடப்படும் காதலர் தினத்தை முன்னிட்டு இணையத்தளம் ஊடாக பல்வேறு மோசடி சம்பவங்கள் இடம்பெறுவது தொடர்பில் அவதானத்துடன் இருக்குமாறு பொலிஸ் ஊடகப் பேச்சாளர் அஜித் ரோஹன எச்சரிக்கை விடுத்துள்ளார்.

குறுந்தகவல் ஊடாகவும் இவ்வாறான மோசடி நடவடிக்கைகள் முன்னெடுக்கப்படலாம் என அவர் குறிப்பிட்டுள்ளார். இன்னும் சற்று நேரத்தில் உங்கள் கையடக்க தொலைபேசி, வட்ஸ்அப், வைபர் பேஸ்புக் ஊடாக ஒரு தகவல் கிடைக்ககூடும்.

உங்களுக்கு உங்கள் காதலன் அல்லது காதலி பரிசு ஒன்றை அனுப்பி வைத்துள்ளதாகவும், அதனை பெற்றுக்கொள்ளுமாறும் குறிப்பிட்டு அந்த குறுந்தகவல் கிடைப்பதற்கு வாய்ப்புகள் உள்ளது. அதற்கான பரிசு புகைப்படம் ஒன்று அனுப்பி வைக்கப்பட்டிக்கலாம். அதில் காதலன் அல்லது காதலிக்கு தொடர்புடைய புகைப்படங்களும் இருக்கலாம்.

அதற்காக ஒரு தொகை பணத்தை வைப்பிடுமாறு குறிப்பிடப்பட்டிருக்கும். அதனை நம்பி பணம் வைப்பிட வேண்டாம் என இலங்கை இளைஞர் யுவதிகளிடம் நான் கேட்டுக்கொள்கிறேன் என அவர் மேலும் தெரிவித்துள்ளார்.

கொரோனா தொற்றாளர்..

கோவிட்- 19 தொற்றாளர்கள் காரணமாக வைத்தியசாலைகளில் ஏற்படும் இட நெருக்கடியை தவிர்ப்பதற்காக தொற்றாளர்களை வீடுகளில் தனிமைப்படுத்தும் வேலைத்திட்டத்தை செயற்படுத்துவது குறித்து கவனம் செலுத்தப்பட்டுள்ளது.

எவ்வித நோய் அறிகுறிகளும் தென்படாத கோவிட்- 19 தொற்றாளர்களை இவ்வாறு வீடுகளில் தனிமைப்படுத்துவது தொடர்பில் கவனம் செலுத்தப்பட்டுள்ளதாக சுகாதார துறையின் தகவல்கள் தெரிவிக்கின்றன.

எவ்வாறாயினும் பரவும் நோய்களினால் பாதிக்கப்பட்டவர்களை வீடுகளில் தங்க வைத்து சிகிச்சையளிக்கக் கூடாது என அரச வைத்திய அதிகாரிகள் சங்கம் கூறியுள்ளது.

கோவிட்- 19 நோயாளிகளை வீடுகளில் வைத்து சிகிச்சையளிக்க முடியாது என்பதால், சம்பந்தப்பட்ட சட்டத்தில் திருத்தங்களை செய்ய வேண்டியது அவசியம் எனவும் வைத்திய அதிகாரிகள் சங்கம் சுட்டிக்காட்டியுள்ளது.

அமெரிக்காவில் கோவிட்- 19 தொற்றாளர்கள் வீடுகளில் தங்க வைப்பட்டே சிகிச்சைக்கு உட்படுத்தப்பட்டு வருகின்றனர் என்பது குறிப்பிடத்தக்கது.

-தமிழ்வின்-

கொரோனா..

சுகாதார சட்டங்களை சரியான முறையில் பின்பற்றி கோவிட் – 19 வைரஸ் பரவலை ஒழிக்க உதவுமாறு நாட்டு மக்களிடம் கோரிக்கை விடுக்கப்பட்டுள்ளது.

கோவிட் – 19 ஒழிப்பு மற்றும் ஆரம்ப சுகாதார ராஜாங்க அமைச்சர் மருத்துவர் சுதர்ஷினி பெர்னாண்டோபுள்ளே இந்த கோரிக்கையை விடுத்துள்ளார்.

முககவசம் அணிதல் மற்றும் பயணங்கள் மேற்கொள்ளப்படுவதை வெகுவாக குறைக்க வேண்டும் எனவும் அவர் கூறியுள்ளார். கோவிட் – 19 தொற்றாளர்கள் தினமும் அடையாளம் காணப்படுவது நாட்டில் அதிகரித்துள்ளது. இதனால் மக்கள் சுகாதார சட்டங்களை சரியான முறையில் பின்பற்ற வேண்டும் எனவும் அவர் கோரிக்கை விடுத்துள்ளார்.