சுற்றுலா விடுதியில்..

சுற்றுலா விடுதியில் தனிமைப்படுத்தல் சட்டத்தை மீறி களியாட்ட நிகழ்வில் ஈடுபட்ட 25 பேருக்கு தலா 4000 ரூபா அபராதம் விதிக்கப்பட்டுள்ளதுடன், 14 பேருக்கு பிடியாணை உத்தரவும் பிறப்பிக்கப்பட்டுள்ளது.

கடந்த ஆண்டு டிசம்பர் மாதம் 15ஆம் திகதி மட்டக்களப்பு – கல்லடியிலுள்ள சுற்றுலா விடுதியொன்றில் கோவிட் தனிமைப்படுத்தல் சட்டத்தை மீறி 39 பேர் களியாட்ட நிகழ்வில் கலந்து கொண்டுள்ளனர்.

இந்த நிலையில் களியாட்ட நிகழ்வை நடத்தியவர்கள் மீது நீதிமன்ற அனுமதியின் பேரில் பொது சுகாதார பரிசோதகர்களால் வழக்குத் தாக்கல் செய்யப்பட்டுள்ளது. குறித்த வழக்கு மீதான விசாரணை நேற்று மட்டக்களப்பு நீதவான் நீதிமன்ற நீதிபதி ஏ.சீ.றிஸ்வான் முன்னிலையில் எடுத்துக் கொள்ளப்பட்டிருந்தது.

இதன்போதே 25 பேருக்கு தலா 4000 ரூபாய் அபராதம் விதிக்கப்பட்டுள்ளதுடன், மன்றில் ஆஜராகத் தவறிய 14 பேருக்கும் பிடியாணை உத்தரவு பிறப்பிக்கப்பட்டுள்ளது.

யாழில்..

இலங்கையில் முதல் முறையாக யாழ் போதனா வைத்தியசாலையில் ஆண் ஒருவர் பெண்ணாக மாறிய அறுவை சிகிச்சை வெற்றி பெற்றுள்ளது. மட்டக்களப்பு பகுதியைச் சேர்ந்த 22 இளைஞன் பெண்ணாக அறுவைச் சிகிச்சை மூலம் மாறியுள்ளார்.

சத்திரசிகிச்சை நிபுணர் இளஞ்செழிய பல்லவன் 12 மணி நேர சத்திரசிகிச்சையின் பின்னர் ஆண் ஒருவரை பெண்ணாக மாறி வெற்றிகரமாக இந்த சத்திர சிகிச்சையை மேற் கொண்டுள்ளார்.

சத்திர சிகிச்சைக்குள்ளான குறித்த நபர் தனது கணவருடன் சந்தோசமாக வாழ்ந்து வருவதாக கூறப்பட்டுள்ளது.

இலங்கையர்..

இந்திய அரசாங்கம் நடைமுறைப்படுத்தியுள்ள விவசாய சட்டத்திற்கு எதிராக முன்னெடுக்கப்பட்டுள்ள தொடர் போராட்டத்திற்கு ஆதரவாக இலங்கையர் ஒருவரும் கலந்துகொண்டுள்ளார்.

குறித்த இலங்கையரின் நடவடிக்கை இந்திய ஊடகங்களின் கவனத்தை பெற்றுள்ளன. இந்த போராட்டத்தில் இணைந்துள்ள இலங்கையர் தெரணியாகல பகுதியில் வசிக்கும் நாலக நாரமல்ல ஆகும்.

கடந்த ஆண்டு இந்தியாவுக்குச் சென்ற நாலக, கோவிட் – 19 தொற்றுநோய் பரவலால் விமானம் இரத்து செய்யப்பட்டதால் சுமார் ஒரு வருடம் இந்தியாவில் செலவிட வேண்டியிருந்தது.

இந்நிலையிலேயே, விவசாயிகளின் போராட்டத்தை ஆதரிக்க அவர் இலங்கைக் கொடியுடன் இணைந்துகொண்டுள்ளதாக தெரிவிக்கப்படுகின்றது.

விவசாயிகளின் போராட்டத்திற்கு அவர் அளித்த ஆதரவை இந்திய ஊடகங்களும் செய்தியாக வெளியிட்டுள்ளன.

விவசாயிகளின் போராட்டம் பற்றிய தகவல்களை இலங்கையர்களிடம் சமூக ஊடகங்களில் தெரிவிக்க நாலக மேற்கொண்ட முயற்சி பலரின் கவனத்தை ஈர்த்துள்ளது.

அதானி உட்பட பல தனியார் நிறுவனங்களுக்கு பயனளிக்கும் வகையில் இந்திய அரசு நிறைவேற்றிய விவசாய சட்டங்களுக்கு எதிராக 2020 செப்டம்பரில் தொடங்கிய இந்திய விவசாயிகள் போராட்டம் இன்றுவரை தொடர்கிறது.

பாடசாலை..

நாட்டில் உள்ள அனைத்து பாடசாலைகளையும் எதிர்வரும் மார்ச் மாதம் 15ஆம் திகதி முதல் முழுமையாக திறக்க தீர்மானிக்கப்பட்டுள்ளதாக கல்வி அமைச்சர் ஜீ.எல்.பீரிஸ் தெரிவித்துள்ளார்.

மேல் மாகாணம் மற்றும் தனிமைப்படுத்தப்பட்டுள்ள பகுதிகளை தவிர ஏனைய பாடசாலைகள் தற்போது திறக்கப்பட்டுள்ளன. மேல் மாகாணணத்தின் கம்பஹா மற்றும் களுத்துறை மாவட்டத்தில் பாடசாலைகள் ஆரம்பிப்பது தொடர்பில் மாவட்ட அபிவிருத்தி குழுவின் பரிந்துரைகள் பெறுவதற்கு கல்வி அமைச்சினால் நடவடிக்கை எடுக்கப்பட்டுள்ளது.

இந்த விடயம் தொடர்பில் சுகாதார அதிகாரிகளிடம் தகவல் முன்வைக்கப்பட்டுள்ள நிலையில் சுகாதார அதிகாரிகளின் அனுமதி கிடைத்தவுடன் மார்ச் மாதம் 15ஆம் திகதி மேல் மாகாணத்தின் பல பாடசாலைகள் ஆரம்பிக்க முடியும்.

அதற்கமைய கொழும்பு மாவட்டத்தில் 80 பாடசாலைகள் பெப்ரவரி மாதம் 15ஆம் திகதி திறக்க முடியாத நிலை ஏற்பட்டுள்ளது. ஏனைய பாடசாலைகள் திறப்பதற்கு எவ்வித தடைகளும் இல்லை.

எதிர்வரும் மார்ச் மாதம் முதலாம் திகதி முதல் 11ஆம் திகதி வரையில் சாதாரண தர பரீட்சைகள் இடம்பெறவுள்ளன. அதற்கான அனைத்து நடவடிக்கைகளும் தயார் செய்யப்பட்டுள்ளன.

பரீட்சைகள் நிறைவடைந்த பின்னர் மார்ச் மாதம் 15ஆம் திகதி முதல் நாட்டில் உள்ள சகல பாடசாலைகளும் சுகதார அதிகாரகளின் அனுமதியின் கீழ் திறப்பதற்கு நடவடிக்கை எடுக்கப்படும் என கல்வி அமைச்சர் மேலும் தெரிவித்துள்ளார்.

மத்திய வங்கியின் புள்ளிவிபரம்..

கடந்த 2020 ஆம் ஆண்டு ஒக்டோபர் மாத இறுதியில் இலங்கை அரசாங்கம் செலுத்த வேண்டி இருந்த மொத்தமான கடன் தொகை 14 ஆயிரத்து 605 பில்லியன் ரூபாய் என இலங்கை மத்திய வங்கி வெளியிட்டுள்ள புதிய புள்ளிவிபர அறிக்கையில் தெரிவித்துள்ளது.

இந்த கடன் தொகையில் 8 ஆயிரத்து 258.9 பில்லியன் ரூபாய் தேசிய ரீதியில் செலுத்த வேண்டியது எனவும் 6 ஆயிரத்து 346.7 பில்லியன் ரூபாய் வெளிநாட்டு கடன் எனவும் மத்திய வங்கி கூறியுள்ளது.

இதனடிப்படையில் 2020 ஆம் ஆண்டு ஒக்டோபர் மாத இறுதியில் செலுத்த வேண்டிய இருந்த கடன் தொகையின் அடிப்படையில், இலங்கையில் தனிநபர் கடன் 6 லட்சத்து 69 ஆயிரத்து 981 ரூபாய். இதில் 2 லட்சத்து 91 ஆயிரத்து 133 ரூபாய் உள்நாட்டு கடன்.

இலங்கையை சேர்ந்த அனைத்து பிரஜைகளும் இரண்டு லட்சத்து 91 ஆயிரம் ரூபாய் வெளிநாட்டுக்கு கடன்காரர்கள். தனி நபர் கடன் சுமை என்பது நாடு என்ற வகையில் பெற்றுக்கொள்ளும் முழு கடன் தொகை நாட்டில் வாழும் மொத்த சனத்தொகையின் அடிப்படையில் பிரிக்கும் போது தனி நபர் கடன் தொகை கணக்கிடப்படுகிறது. இலங்கை மத்திய வங்கியின் புள்ளவிபரத்திற்கு அமைய இலங்கையின் சனத் தொகை 21.8 மில்லியனாகும்.

காதலர்களுக்கு..

காதலர் தினத்தை கொண்டாடும் நபர்களுக்கு எதிராக கடுமையான நடவடிக்கை எடுக்கப்படும் என பொலிஸார் எச்சரிக்கை விடுத்துள்ளனர்.

தனிமைப்படுத்தல் சட்டத்தை மீறி எதிர்வரும் பெப்ரவரி மாதம் 14ஆம் திகதி காதலர் தினம் கொண்டாடுவதற்கு அனுமதியில்லை என பிரதி பொலிஸ் மா அதிபர் அஜித் ரோஹன தெரிவித்துள்ளார். சமூக வலைத்தளம் ஊடாக அவ்வாறான நிகழ்வுகள் ஏற்பாடு செய்வது தொடர்பில் தகவல் கிடைத்துள்ளதாக அவர் குறிப்பிட்டுள்ளார்.

இவ்வாறான விடயங்களுக்காக ஹோட்டல்கள் மற்றும் நிகழ்வு மண்டபங்களை வழங்கும் நபர்களுக்கு எதிராக கடுமையான நடவடிக்கை எடுக்கப்படும் பிரதி பொலிஸ் மா அதிபர் மேலும் தெரிவித்துள்ளார்.

காத்தான்குடி..

சந்தேகத்திற்கிடமான முறையில் அடக்கம் செய்யப்பட்ட பிறந்த சிசுவின் சடலம் நீதிமன்ற உத்தரவின் பேரில் நேற்று மாலை தோண்டி எடுக்கப்பட்டது. கடந்த 2ம் திகதி காத்தான்குடி பொலிஸ் பிரிவிற்குட்பட்ட பூநொச்சிமுனை மையவாடியில் குறித்த சிசுவின் சடலம் அடக்கம் செய்யப்பட்டுள்ளது.

சிசுவின் தாய் வைத்திய பரிசோதனைக்காக சென்றபோது அவரது நடத்தையில் சந்தேகம் ஏற்படவே மட்டக்களப்பு சுகாதார வைத்திய அதிகாரி சிசுவின் தாயை மேலதிக சிகிச்சைக்காக மட்டக்களப்பு போதனா வைத்தியசாலையில் அனுமதித்ததுடன் பொலிஸார் வி.சாரணைகளை மேற்கொண்டனர்.

அதன்படி மட்டக்களப்பு நீதவான் நீதிமன்ற நீதிபதி ஏ.சீ.றிஸ்வான் குறித்த ச.டலத்தை தோ.ண்டி எடுத்து வி.சாரணைக்குட்படுத்துமாறு உத்தரவிடவே நேற்று மாலை நீதிபதி முன்னிலையில் ச.டலம் தோண்டி எடுக்கப்பட்டது.

மட்டக்களப்பு போதனா வைத்தியசாலை சட்ட வைத்திய அதிகாரிகள், உயர் பொலிஸ் அதிகாரிகள், காத்தான்குடி பொலிஸ் நிலைய பொறுப்பதிகாரி உள்ளிட்ட பலர் அங்கு பிரசன்னமாகியிருந்தனர். காத்தான்குடி பொலிஸார் மேலதிக வி.சாரணைகளை மேற்கொண்டுண்டுள்ளனர்.

சத்திர சிகிச்சை..

பிறப்பிலேயே காது கேட்காத பிரச்சினையுடைய இரண்டு வயதுடைய குழந்தைக்கு கோக்லியர் உள்வைப்பு சத்திரசிகிச்சை ஒன்று ஸ்ரீஜயவர்தனபுர வைத்தியசாலையில் மேற்கொள்ளப்பட்டுள்ளது. இலங்கை அரச வைத்தியசாலை ஒன்றில் இரண்டு காதுகளுக்கும் இவ்வாறான சத்திரசிகிச்சை செய்யப்பட்ட முதல் சந்தர்ப்பம் இதுவாகும்.

ஸ்ரீஜயவர்தனபுர வைத்தியசாலையில் தொண்டை காது மூக்கு தொடர்பான விசேட நிபுணர் சன்ஜீவனி ரூபசிங்கவின் தலைமையில் விசேட வைத்தியர்கள் 10 பேர் இணைந்து இதனை செய்துள்ளனர்.

10 மணித்தியாலத்திற்கு அதிக நேரம் இந்த சத்திரசிகிச்சை நடத்தப்பட்டுள்ளது. இந்த சத்திரசிகிச்சைகாக பயன்படுத்தப்படும் ஒரு உபகரணத்திற்கு 25 லட்சம் ரூபாய் வரையில் செலவிடப்படுகின்றது.

தனியார் வைத்தியசாலையில் இந்த சத்திரசிகிச்சை செய்வதற்கு 75 லட்சம் ரூபாய் செலவிடப்படுகின்றது. சத்திர சிகிச்சைக்கு அவசியமான உபகரணங்கள் குழந்தையின் பெற்றோர்கள் பெற்றுக்கொடுத்துள்ளனர்.

இதுவரை இலங்கையில் இது போன்ற சத்திரசிகிச்சைகள் ஒரு காதிற்கு மாத்திரமே மேற்கொள்ளப்பட்டுள்ளது. எனினும் இரண்டு காதுகளுக்கு ஒரே நேர்த்தில் மேற்கொள்ளப்பட்ட முதல் சந்தர்ப்பம் இதுவாகும்.
இதன் மூலம் அந்த குழந்தை கேட்கும் திறனை பெறும் என குறிப்பிடப்படுகின்றது.

கொரோனா..

குருணாகல் அம்பான்பொல பிரதேசத்தில் நடைபெற்ற திருமண வைபவத்தில் கலந்துக்கொண்ட மணமக்கள் உட்பட 136 பேருக்கு கோவிட் – 19 வைரஸ் தொற்றியுள்ளமை உறுதியாகியுள்ளது.

இந்த கோவிட் – 19 கொத்தணியின் வைரஸ் துரிதமாக பரவும் என்பதுடன் அதிகளவிலான நோய் அறிகுறிகளை காண்பிப்பதால், வைரசின் புதிய திரிபாக இருக்கலாம் என சுகாதார துறையினர் சந்தேகம் வெளியிட்டுள்ளனர்.

கடந்த ஜனவரி 21 ஆம் திகதி அம்பன்பொல பிரதேசத்தில் இந்த திருமண வைபவம் நடைபெற்றுள்ளது. இந்த திருமணத்தின் வரவேற்பு வைபவம் கடந்த ஜனவரி 24 ஆம் திகதி கம்பஹா அத்தனகல்லையில் நடைபெற்றுள்ளதுடன் அதில் 260 பேர் கலந்துகொண்டுள்ளமை தெரியவந்துள்ளது.

கோவிட் – 19 தொற்றாளர்களாக அடையாளம் காணப்பட்டுள்ள 136 பேரில் 96 பேர் மினுவங்கொடை உடுகம்பளை பிரதேசத்தை சேர்ந்தவர்கள் என்பதுடன் ஏனைய 40 பேர் அம்பான்பொல பிரதேசத்தை சேர்ந்தவர்கள்.