மரணம்…

பேலியகொட பிரதேசத்தில் இருந்து கஹவத்தை சென்ற நபர் வீட்டு வாசலில் விழுந்து உயிரிழந்துள்ளார். கொரோனா வைரஸ் பரவல் வலயத்திலிருந்து வந்தமையினால் கொரோனா தொற்றியள்ளதா என பரிசோதிப்பதற்காக சடலம் இரத்தினபுரி வைத்தியசாலைக்கு கொண்டு செல்லப்பட்டுள்ளது.

அந்த நபர் சென்ற வந்த இடங்கள் மற்றும் சந்தித்த நபர்கள் சிலரும் தனிமைப்படுத்தப்பட்டுள்ளனர். கொரோனா பரிசோதனை நடவடிக்கைகள் முன்னெடுக்கப்பட்டுள்ளதாக பெல்மடுல்ல சுகாதார வைத்திய அதிகாரி அலுவலகம் தெரிவித்துள்ளது.

முடிவுகள் கிடைத்த பின்னர் தேவையான நடவடிக்கைகள் முன்னெடுக்கப்படும் என அறிவிக்கப்பட்டுள்ளது.

திலிப் வெதாராச்சி..

முன்னாள் மீன்பிடி ராஜாங்க அமைச்சர் திலிப் வெதாராச்சி பச்சை மீனை சாப்பிட்டு காட்டி மீன்களை உண்ணுமாறு மக்களிடம் கோரிக்கை விடுத்துள்ளார்.

எதிர்க்கட்சித் தலைவரின் அலுவலகத்தில் இன்று நடைபெற்ற செய்தியாளர் சந்திப்பில் அவர் இந்த கோரிக்கை விடுத்துள்ளார். மக்கள் மீன்களை கொள்வனவு செய்வதே மீனவர்களுக்காக செய்யக் கூடிய பெரிய சேவையாக இருக்கும் எனவும் அவர் கூறியுள்ளார்.

இரண்டு மீன்களை பையில் எடுத்து வந்த அவர் பையில் இருந்து ஒரு மீனை எடுத்து பச்சையாக சாப்பிட்டு காட்டியுள்ளார். இவை புதிய மீன்கள் எனவும் அவர் குறிப்பிட்டுள்ளார்.

உயர்தரப் பரீட்சை பெறுபேறுகள்..

க.பொ.த உயர்தரப் பரீட்சை பெறுபேறுகள் விரைவில் வெளியிடப்படும் என கல்வி அமைச்சர் ஜீ.எல்.பீரிஸ் தெரிவித்துள்ளார். ஸ்ரீலங்கா பொதுஜன முன்னணியின் தலைமைக் காரியாலயத்தில் நேற்று நடைபெற்ற செய்தியாளர் சந்திப்பில் வைத்து அவர் இதனைக் குறிப்பிட்டுள்ளார். மேலும் தெரிவிக்கையில்,

தரம் ஐந்து புலமைப் பரிசில் பரீட்சை பெறுபேறுகளை பரீட்சை நடைபெற்று 33 நாட்களில் வெளியிட முடிந்துள்ளது. பரீட்சைகள் ஆணையாளர் நாயகம், அதிகாரிகள், விடைத்தாள் மதிப்பீடு செய்தவர்கள் உள்ளிட்ட அனைவருக்கும் நன்றிகள். இம்முறை புலமைப் பரிசில் பரீட்சையில் பத்து மாண மாணவியர் 200 புள்ளிகளை பெற்று சாதனை படைத்துள்ளமை மகிழ்ச்சி அளிக்கின்றது.

இதேவேளை, உயர்தரப் பரீட்சைக்கு தோற்றும் மாணவ மாணவியர் பல்கலைக்கழக கற்கைகளை தொடர்வதற்கு ஒன்று முதல் ஒன்றரை ஆண்டுகள் காத்திருக்க வேண்டிய நிலைமை காணப்படுகிறது.

பிள்ளைகளின் பெறுமதியான காலம் இவ்வாறு வீணாவதனை ஏற்றுக்கொள்ள முடியாது. பெறுபேறுகள் வெளியிடப்படுவதில் ஏற்படும் கால தாமதத்தை குறைப்பதற்கு நடவடிக்கை எடுக்கப்பட வேண்டும்.

கிரமமாக பெறுபேறுகளை துரித கதியில் வெளியிட்டு பல்கலைக்கழகங்களுக்கு மாணவர்களை இணைத்துக் கொள்வதற்கு நடவடிக்கை எடுக்கப்படும் என அவர் தெரிவித்துள்ளார்.

பாடசாலைகள் எப்போது ஆரம்பம்?

பாடசாலைகளை எதிர்வரும் 23ஆம் திகதி மீண்டும் திறப்பது குறித்து இன்னமும் இறுதி முடிவை எடுக்கவில்லை என்று அரசு அறிவித்துள்ளது.

கொழும்பில் இன்று நடைபெற்ற ஊடக சந்திப்பில் கருத்து வெளியிட்ட கல்வி அமைச்சர் பேராசிரியர் ஜி.எல்.பீரிஸ் மேற்கண்டவாறு கூறினார். அவர் மேலும் தெரிவித்ததாவது, “கடந்த 9ஆம் திகதி அரச பாடசாலை மாணவர்களின் மூன்றாம் தவணை கற்றல் நடவடிக்கைகள் ஆரம்பிக்கவிருந்தன.

எனினும், நாட்டில் தற்போதுள்ள நிலைமைகளுக்கு அமைய எதிர்வரும் 23ஆம் திகதி பாடசாலைகளைத் திறக்க உத்தேசிக்கப்பட்டிருந்தது.

இருந்த போதிலும் தற்போதுள்ள சூழ்நிலைகளை ஆராய்ந்து இறுதித் தீர்மானம் எடுப்பதற்காகக் கல்விமான்கள், மருத்துவத்துறையினருடன் பேச்சு நடத்தப்பட்டு வருகின்றது. இதன் பின்னரே இறுதித் தீர்மானம் எடுக்கப்படும்” – என்றார்.

பெண் விமானிகள்..

இலங்கை விமானப்படையில் முதல் தடவையாக இரண்டு பெண்கள் விமானி பயிற்சிகளை பூர்த்தி செய்து விமானிகளாக படையில் இணைந்து கொண்டுள்ளனர்.

இந்த இரண்டு பெண் விமானிகளுக்கும் ஜனாதிபதி கோட்டாபய ராஜபக்ச வாழ்த்து தெரிவித்துள்ளார். தனது அதிகாரபூர்வ டுவிட்டர் பக்கத்தில் டுவிட் பதிவொன்றை இட்டதன் மூலம் அவர் இவ்வாறு வாழ்த்து தெரிவித்துள்ளார்.

ஏ.டி.பி.எல் குணரட்ன மற்றும் ஆர்.ரீ. வீரவர்தன ஆகிய பெண்களே இவ்வாறு இலங்கை விமானப்படையில் முதல் பெண் விமானிகளாக தெரிவாகியுள்ளனர்.

குறித்த இரண்டு பெண் விமானிகளினதும் இந்த அடைவு ஏனைய பல பெண்கள் தங்களது கனவுகளை மெய்ப்பித்துக் கொள்வதற்கு உந்து சக்தியாக அமையும் என தாம் கருதுவதாக ஜனாதிபதி தெரிவித்துள்ளார்.

வடக்கில்..

வடமாகாணத்தில் இருந்து 18 ஆயிரத்து 158 மாணவர்கள் தரம் 5 புலமைப் பரிசில் பரீட்சைக்கு தோற்றிய நிலையில் 3 ஆயிரத்து 167 மாணவர்கள் வெட்டுப் புள்ளியைத் தாண்டி சித்தி பெற்றுள்ளார்கள் என வடமாகாண கல்வி அமைச்சின் செயலாளர் இ.இளங்கோவன் தெரிவித்துள்ளார்.

2020 ஆம் ஆண்டுக்கான புலமைப் பரிசில் பரீட்சைகள் கடந்த ஒக்டோபர் மாதம் நடைபெற்று அதன் பெறுபேறுகள் வெளியாகியுள்ளன. இது தொடர்பில் கேட்ட போதே அவர் இவ்வாறு தெரிவித்தார். அவர் மேலும் தெரிவிக்கையில்,

2019 ஆம் ஆண்டு புலமைப் பரிசில் பரீட்சையில் தோற்றிய மாணவர்களில் 16.3 வீத மாணவர்கள் வெட்டுப் புள்ளியைத் தாண்டிய போதும், இந்த ஆண்டு 17.4 வீதமான மாணவர்கள் வெட்டுப் புள்ளியைத் தாண்டியுள்ளனர்.

வடமாகாணத்தில் இருந்து 18 ஆயிரத்து 158 மாணவர்கள் தரம் 5 புலமைப் பரிசில் பரீட்சைக்கு தோற்றிய நிலையில் 3 ஆயிரத்து 167 மாணவர்கள் வெட்டுப் புள்ளியைத் தாண்டி சித்தி பெற்றுள்ளார்கள்.

அத்துடன், 100 புள்ளிகளுக்கு மேல் பெற்ற மாணவர்களின் எண்ணிக்கையும், 70 புள்ளிகளுக்கு மேல் பெற்ற மாணவர்களின் எண்ணிக்கையும் முன்னரை விட அதிகரித்தே காணப்படுகின்றது. இதன் மூலம் மாகாணத்தில் கல்வித் தரத்தில் வளர்ச்சி ஏற்பட்டுள்ளமையை அவதானிக்க முடிகிறது எனத் தெரிவித்தார்

2020 நவம்பர் 15ஆம் திகதி நேற்று வெளியிடப்பட்ட, ஐந்தாம் வகுப்பு புலமைப்பரிசில் தேர்வில் மொத்தம் பத்து மாணவர்கள் 200 மதிப்பெண்களை பெற்று சாதனை படைத்துள்ளதாக பரீட்சைகள் ஆணையாளர் பி. சனத் பூஜித தெரிவித்துள்ளார்.

இதேவேளை,பரீட்சைகளில் வெற்றி பெற்று சாதனை படைத்துள்ள மாணவர்களின் விபரம் பின்வருமாறு,

எம். எஃப். முகமது அமர் – ஸாஹிரா கல்லூரி, மருதானை

ஏ.எச். சிஹாத் சண்தினு – தர்மபால வித்தியாலயம், அரவ்வல.

தெவுலி யசஸாஸ்;மி திலகரத்ன – ஸ்ரீ சுமனஜோதி ஆரம்பக் கல்லூரி, இங்கிரிய.

சஸ்மிதா குணதிலக – பண்டாரகம மத்திய கல்லூரி, களுத்துறை.

எஸ்.டி. சியதி வித்தும்ஸா – சங்கமித்த மகளிர் வித்யாலயாலயம், காலி

டபிள்யூ.ஏ தாசிந்து அவிஷான் – தங்கல்ல சிறுவர் பள்ளி, கதுருபொத.

பி.கே. டோவிந்து சிரஞ்ச் – ஜனாதிபதி கல்லூரி, எம்பிலிப்பிட்டி.

எச்.எம்.செனுடி தம்சரா – எஹெலியகோடா ஆரம்பக் கல்லூரி

எச்.எம். தேனுஜா மனுமிதா பண்டார – சிரிபுரா ஆரம்பக் கல்லூரி, பொலன்னறுவ.

யெஹாரா யெத்மினி எபா – பெண்கள் உயர்நிலைப் பாடசாலை, கண்டி

பயணிகள் சிரமம்…

யாழ்ப்பாணத்திலிருந்து கொழும்பு நோக்கி பயணிக்கும் குளிரூட்டப்பட்ட அதிசொகுசு பேரூந்தில் பயணிகளின் ஆசனங்களில் மரக்கறி உட்பட பல பொருட்களை ஏற்றுவதினால் தாம் பல்வேறு இன்னல்களுக்கு முகங்கொடுப்பதாக பயணிகள் விசனம் தெரிவித்துள்ளனர்.

நேற்றிரவு 7 மணியளவில் யாழ்ப்பாணத்திலிருந்து கொழும்பு நோக்கி பயணித்த அதி சொகுசு பேரூந்து தொடர்பில் மேலும் தெரியவருகையில்,

யாழ்ப்பாணத்திலிருந்து கொழும்பு நோக்கி பயணிப்பதற்கு ஆயிரத்திஇருநூறு ரூபாய் அறவிடப்படுகின்று. இருந்த போதிலும் தற்போது கொரோனா தொற்று காரணமாக தற்போது பொதுப் போக்குவரத்தினை உபயோகிக்கும் பயணிகளின் எண்ணிக்கையும் குறைந்துள்ளது.

பேரூந்தின் கீழ்ப்பகுதியில் பொருட்கள் ஏற்றப்படுகின்ற போதிலும் தற்போது பயணிகளின் எண்ணிக்கை குறைந்துள்ளமையினால் பேரூந்தின் உள்பகுதிகள் , பயணிகள் ஆசனம் போன்றவற்றில் மரக்கறிகள் உட்பட பொருட்கள் ஏற்றப்படுகின்றன.

குளிரூட்டப்பட்ட அதிசொகுசு பேரூந்து என்பதினால் மரக்கறிகளின் துர்நாற்றம் வீசுவதுடன் பயணிகள் பேரூந்தில் ஏறி இறங்குவதற்கும் பல்வேறு இன்னல்களுக்கு முகங்கொடுத்திருந்தனர்.

பயணிகள் பேரூந்தினை இரட்டை நோக்கு பேரூந்தாக மாற்றிய குறித்த பேரூந்து நடத்துனர்கள் மீது அதிகாரிகள் உரிய நடவடிக்கை எடுக்க வேண்டும் பயணிகள் வேண்டுகோள் விடுத்துள்ளனர்.