மைக்ரோசொப்ட் ஒபீஸ் பயனர்களுக்கு அவசர எச்சரிக்கை!!

அவசர எச்சரிக்கை

மைக்ரோசொப்ட் ஒபீஸ் பயனர்கள் மீது சைபர் தாக்குதல் நடத்தப்படக்கூடிய அபாயம் காணப்படுவதாக கணனி அவசர பதிலளிப்பு பிரிவு எச்சரிக்கை விடுத்துள்ளது.

கொரோனா வைரஸ் தொற்று பதற்றம் நிலவி வரும் இந்தக் காலப் பகுதியில் சைபர் தாக்குதல் நடத்தும் குழுக்கள் இணைய வழியாக சைபர் தாக்குதல்களை நடத்தி வருவதாக எச்சரிக்கை விடுக்கப்பட்டுள்ளது.

அமெரிக்க இரகசிய சேவையினால் இந்த விடயம் குறித்த எச்சரிக்கையை விடுத்துள்ளதாகத் தெரிவிக்கப்படுகிறது. உலகின் மிக அதிகளவில் பயன்படுத்தப்பட்டு வரும் மென்பொருட்களில் ஒன்றான மைக்ரோசொப்ட் ஒபீஸ் மென்பொருளின் ஊடாக இந்த தாக்குதல் நடத்தப்படுவதாகத் தெரிவிக்கப்பட்டுள்ளது.

மருத்துவமனையிலிருந்து அனுப்பி வைப்பது போன்று ஓர் பிஸ்ஸிங் மெயில் (போலி மின்னஞ்சல்) ஒன்று அனுப்பி வைக்கப்படும் என எச்சரிக்கை விடுக்கப்பட்டுள்ளது.

மைக்ரோசொப்ட் வேர்ட், மைக்ரோசொப்ட் எக்ஸல் உள்ளிட்ட மைக்ரோசொப்ட் ஒபீஸ் மென்பொருள் கோவைகளாக இந்த மின்னஞ்சல் அனுப்பி வைக்கப்படுவதாகவும் இதனை திறந்து பார்ப்பதன் மூலம் கணனியில் வைரஸ் பரவும் அபாயம் காணப்படுவதாகவும் தெரிவிக்கப்பட்டுள்ளது.

இந்த மின்னஞ்சல் வைரஸின் ஊடாக கணனிப் பயனரின் தனிப்பட்ட தகவல்கள் மற்றும் விபரங்கள் களவாடப்படக்கூடிய அபாயம் காணப்படுவதாக எச்சரிக்கை விடுக்கப்பட்டுள்ளது.

பிறக்கவுள்ளது சர்வரி புதுவருடம் : தமிழர்களிடம் விடுக்கப்பட்டுள்ள கோரிக்கை!!

சித்திரைப் புதுவருடத்தினை அமைதியாக வரவேற்போம் என இந்து இளைஞர் பேரவையின் தலைவர் சிவஸ்ரீ ஜெ.மயூர குருக்கள் தெரிவித்துள்ளார்.

புதுவருடப்பிறப்பு தொடர்பில் இன்றைய தினம் வெளியிட்டுள்ள அறிக்கையில் அவர் இந்த விடயத்தை குறிப்பிட்டுள்ளார். அந்த அறிக்கையில் மேலும்,

தமிழ் சித்திரை புத்தாண்டான சர்வரி புது வருடப்பிறப்பானது எதிர்வருகின்ற திங்கட்கிழமை 13.04.2020 மாலை 07 மணி 26 நிமிடமளவில் இடம்பெறவுள்ளது.

எனவே அடுத்த நாள் 14.04.2020 ஊரடங்கு தளர்த்தப்படுகின்ற காரணத்தினால் மக்கள் அதிகளவாக கூடுவதற்கான வாய்ப்புகள் உண்டு. எனவே அதனை தவிர்க்க வேண்டியது அனைவரது கடமையுமாகும்.

அதிகளவாக மக்கள் ஒரே நேரத்தில் ஆலயத்தில் கூடுவதனைத் தவிர்க்கவும். தற்கால சூழ் நிலைகளை அனைவரும் அனுசரித்து போக வேண்டிய தேவைகள் உள்ளன.

எனவே முடிந்த வரை உங்கள் குல தெய்வங்களை வணங்கி அமைதியாக கொண்டாடுங்கள். ஆலயங்கள் எந்த குறைவுமின்றி பூஜைகள் நடைபெற ஒழுங்குகள் செய்யப்பட்டுள்ளது.

எமது செயற்பாடுகள் அதனை குழப்புவதாக அமைந்து விடக்கூடாது. எனவே கால தேச வர்தமானங்களை கவனத்தில் கொள்ளுங்கள். எனவே அமைதியான முறையில் இப்புதிய வருடத்தினை வரவேற்றுக் கொள்ளுங்கள் என கோரியுள்ளார்.

மின் வெளிச்சத்தில் அலங்கரிக்கப்படும் தாமரைக் கோபுரம்!!

தாமரைக் கோபுரம்

கொழும்பில் உள்ள தாமரை கோபுரம் இன்று மாலை 6.45 மணியளவில் மின் வெளிச்சத்தில் அலங்கரிக்கப்பட உள்ளது.

உலக தொற்று நோயாக மாறியுள்ள கொரோனா வைரஸில் இருந்து இலங்கையை மீட்பதற்காக பாடுப்படும் சுகாதாரத்துறையினர், முப்படையினர், பொலிஸார் உள்ளிட்ட அனைவரையும் ஊக்கப்படுத்தும் வகையில்

தாமரை கோபுரம் மின் வெளிச்சத்தில் அலங்கரிக்கப்பட உள்ளது என தொலைத் தொடர்புகளை ஒழுங்குப்படுத்தும் ஆணைக்குழு தெரிவித்துள்ளது. விசேட தொனிப் பொருளின் கீழ் இந்த மின் வெளிச்ச அலங்காரம் செய்யப்பட உள்ளது.

கொரோனா நோயிலிருந்து மக்களை பாதுகாக்க புதிய நீர்குழாய் கண்டுபிடிப்பு!!

நீர்குழாய் கண்டுபிடிப்பு..

கொரோனா நோயிலிருந்து மக்களை பாதுகாக்க புதிய கால் அழுத்ததுடன் இயங்கும் கைகழுவும் நீர் குழாயொன்று கண்டுபிடிக்கப்பட்டுள்ளது.

கொரோனா வைரஸ் கிருமிகளிடமிருந்து கைகளினை பாதுகாக்கவும்,சுகாதாரத்திற்கு ஏற்ற விதமாக கைகளை சுத்தம் செய்ய விஷேட தொழினுட்பங்களை பயன்படுத்தி குறித்த சாதனம் கண்டுபிடிக்கப்பட்டுள்ளது.

சாய்ந்தமருதை சேர்ந்த மாத்தறை பல்கலை கல்லூரியில் பயின்று வரும் ஏ.எம்.எப் செளபாத் என்ற மாணவரினால் இந்த சாதனம் உருவாக்கப்பட்டுள்ளது.

இதன் மூலம் கைகளினால் பரவும் கிருமிகளை தடுக்க கால்களின் அழுத்த உதவியுடன் இயங்க கூடிய கை கழுவும் உபகரணம் குறைந்த உற்பத்தி செலவில் உருவாக்கப்பட்டுள்ளது.

குறித்த கண்டுபிடிப்பு காலின் சிறிய அழுத்தம் மூலம் நீர் மேலே அனுப்பப்படுகிறது.கைகளை பயன்படுத்தி குழாயை (Tap) திறக்க தேவையில்லை, உற்பத்தி செலவு குறைவு, கைகளினால் பரவும் கிருமிகளில் இருந்து பாதுகாப்பு கிடைக்கிறது,இலகுவாக வேண்டிய இடத்திற்கு எடுத்து செல்ல முடியும்.

சூரிய சக்தியின் மூலம் இதற்கு மின் வழங்கப்படுகிறது.நீர் இல்லாத போது நீரை இதில் சேமித்து வைக்க முடியுமெனவும் தெரிவிக்கப்படுகின்றது.

மேலும் இது இவரின் மூன்றாவது கண்டுபிடிப்பு எனவும்,இவர் 2019 ஆண்டு ஜீனியஸ்7 விருதுப் பிரிவின் ஊடாக எடின்பார்க் சர்வதேச விருதினைபெற்ற வருமாவார். இவர் கல்முனை, ஸாஹிறா கல்லூரி பழைய மாணவரென்பதும் குறிப்பிடத்தக்கது.

இணையம் மூலம் 1.4 மில்லியன் ரூபா மோசடி : ஆறு பேர் கைது!!

1.4 மில்லியன் ரூபா மோசடி..

அமெரிக்காவில் வசிக்கும் செல்வந்தர் ஒருவரின் 1.4 மில்லியன் ரூபாவை இணையம் மூலம் களவாடி அதனை உள்ளூர் வங்கி ஒன்றுக்கு மாற்றம் செய்தமை தொடர்பில் 6 பேர் கைதுசெய்யப்பட்டுள்ளனர்.

இந்த இணைய களவு தொடர்பில் அமெரிக்க அதிகாரிகள் எச்சரிக்கை விடுத்தமையை அடுத்து குற்றப்புலனாய்வுத் துறையினர் விசாரணைகளை ஆரம்பித்தனர். இதன்போது களவாடப்பட்ட பணத்தின் கணிசமான தொகை கைப்பற்றப்பட்டது.

இதுவரையில், இலங்கைக்குள் இணையம் மூலமாக மேற்கொள்ளப்பட்ட அதிக தொகையடங்கிய களவு இது என்று நம்பப்படுகின்றது. இந்நிலையில், குறித்த சம்பவம் தொடர்பில் விசாரணைகள் தொடர்வதாக குற்றப்புலனாய்வுத்துறையினர் மேலும் தெரிவித்துள்ளனர்.

கொரோனா நோயாளிகளுக்கு சிகிச்சையளிக்க ரோபோ கண்டுபிடித்த இலங்கை மாணவன்!!

இலங்கை மாணவன்..

கொரோனா தொற்றுக்குள்ளானவர்களின் அருகில் சென்று சிகிச்சை அளிக்கக்கூடிய ரோபோ ஒன்றை எல்பிட்டிய ஜனாதிபதி வித்தியாலயத்தின் எஸ்.ஆர்.தெஜன தெவ்மின என்ற மாணவன் உருவாக்கியுள்ளான்.

நோயாளிக்கு மருந்தளித்தல், நோயாளரின் இரத்தத்தை பரிசோதித்தல் ஆகிய செயற்பாடுகளை தூரத்தில் இருந்தவாறே வைத்தியர் ஒருவரால் மேற்கொள்ள முடியும்.

அத்துடன் ரோபோவில் உள்ள ஒலிவாங்கியின் மூலம் நோயாளியுடன் உரையாடவும் முடியும் எனவும் தெரிவிக்கப்பட்டுள்ளது.

இதேபோன்று வெல்லவாய பகுதியை சேர்ந்த இளைஞன் ஒருவன் கொரோனா நோயாளி ஒருவருக்கு செயற்கை சுவாசமளிக்க கூடிய கருவி ஒன்றை உருவாக்கியுள்ளார்.

வீட்டில் பயன்படுத்தப்பட்ட பொருட்களை உபயோகித்து இந்த கருவியை உருவாக்கியதாகவும் அது வெற்றிகரமாக செயற்படுவதாகவும் குறித்த இளைஞன் தெரிவித்துள்ளார்.

இந்த கருவியை வெளிநாடுகளில் இருந்து இறக்குமதி செய்தால் 20 லட்சத்துக்கும் அதிகமான பணம் செலவாகும் எனவும் ஆனால் 15000 ரூபாவுக்குள் உள்நாட்டில் இறக்குமதி செய்ய முடியும் எனவும் அவர் கூறியுள்ளார்.

பாடசாலைகளில் இரண்டாம் தவணைக்கான கல்வி நடவடிக்கைள் மேலும் தாமதமடையலாம்?

கல்வி நடவடிக்கைள்..

பாடசாலைகளில் இரண்டாம் தவணை கல்வி நடவடிக்கைள் எதிர்வரும் 20ஆம் திகதி ஆரம்பிக்கப்படும் என அறிவிக்கப்பட்டிருந்த நிலையில், மேலும் தாமதமடையலாம் என கல்வி அமைச்சின் செயலாளர் N.H.சித்ரானந்த தெரிவித்துள்ளார்.

இதேவேளை,சுகாதார அதிகாரிகளின் ஆலோசனைகளுக்கு அமையவே பாடசாலைகளின் கல்வி நடவடிக்கைகள் ஆரம்பிக்கப்படும் எனவும் அறிவிக்கப்பட்டுள்ளது.

சுகாதார அதிகாரிகளின் ஆலோசனைக்கமையவே இது தொடர்பிலான இறுதி தீர்மானத்தை எட்ட முடியும் எனவும், இதேவேளை, பாடசாலைகளின் கல்வி நடவடிக்கைகளை ஆரம்பிப்பதற்கு முன்னர், அடையாளங்காணப்பட்ட பாடசாலைகளில் கிருமி ஒழிப்பு நடவடிக்கைகள் முன்னெடுக்கப்படும் எனவும் அவர் அறிவித்துள்ளார்.

கொரோனா வைரஸ் பரவல் தொடர்பான முன்னெச்சரிக்கை நடவடிக்கையாக, அனைத்து பாடசாலைகளுக்கும் மார்ச் 13 முதல் ஏப்ரல் 20ஆம் திகதி வரை விடுமுறை வழங்கப்பட்டுள்ளமை குறிப்பிடத்தக்கது.

இன்று முதல் கட்டாயமாக்கப்படும் முகக் கவசம் : பொலிஸார் அறிவிப்பு!!

கட்டாயமாக்கப்படும் முகக் கவசம்..

வீதிகளில் பயணிக்கும் போது முகக் கவசம் அணிவது இன்று முதல் கட்டாயமாக்கப்பட்டுள்ளதாக பொலிஸார் அறிவித்துள்ளனர்.

முகக் கவசம் அணியாமல் வீதிகளில் பயணிப்பவர்களை திருப்பி அனுப்ப நடவடிக்கை மேற்கொள்ளுமாறு பதில் பொலிஸ் மா அதிபர் அஜித் ரோஹன, அனைத்து சிரேஷ்ட பொலிஸ் அதிகாரிகள், பொலிஸ் அதிகாரிகள் மற்றும் பொலிஸ் நிலையங்களுக்கு உத்தரவிட்டுள்ளார்.

ஊரடங்கு சட்ட அனுமதி பத்திரம் பெற்று கொண்டிருத்தல் அல்லது வீதிகளில் பயணிப்பதற்கு வேறு அனுமதி பெற்றிருந்தாலும் அவற்றினை கருத்திற்கொள்ளாமல் முகக் கவச உத்தரவை செயற்படுத்துமாறு பதில் பொலிஸ் மா அதிபர் ஆலோசனை வழங்கியுள்ளார்.

கொரோனா வைரஸ் பரவலை தடுப்பதற்காக பொலிஸ் ஊரடங்கு சட்டம் நாடு முழுவதும் தொடர்ந்து செயற்படுத்தப்பட்டுள்ளது. கொரோனா வைரஸ் தொற்றின் அபாய வலையங்களாக கருதப்படும் பிரதேசங்களை தொடர்ந்து தனிமைப்படுத்த நடவடிக்கை மேற்கொள்ளப்பட்டுள்ளது.

இலங்கையில் கொரோனா நோயாளிகளின் எண்ணிக்கையில் திடீர் அதிகரிப்பு!!

கொரொனா வைரஸ்..

இலங்கையில் புதிதாக மேலும் 7 பேர் கொரொனா வைரஸ் தொற்றுக்குள்ளாகியுள்ள நிலையில் அடையாளம் காணப்பட்டுள்ளதாக சுகாதார அமைச்சு தெரிவித்துள்ளது.

இவர்களில் ஆறு பேர் ஜா-எலயிலும் ஒருவர் தெஹிவளையிலும் அடையாளம் காணப்பட்டுள்ளனர். அதற்கமைய தொற்றுக்குள்ளானோரின் மொத்த எண்ணிக்கை 197 ஆக உயர்வடைந்துள்ளது.

கொரோனா தொற்றினால் நாட்டில் இதுவரை 7 பேர் உயிரிழந்துள்ளதுடன் 54 பேர் பூரண குணமடைந்து வைத்தியசாலையில் இருந்து வெளியேறியுள்ளனர்.

அத்துடன் 270க்கும் அதிகமானோர் வைத்தியகண்காணிப்பில் உள்ளதாகவும் சுகாதார அமைச்சு தெரிவித்துள்ளது.

இதேவேளை நேற்றிரவு அடையாளம் காணப்பட்ட 7 நோயாளிகளும் ஒலுவில் தனிமைப்படுத்தல் நிலையத்தில் தனிமைப்படுத்தப்பட்டிருந்தவர்கள் என இராணுவ தளபதி சவேந்திர சில்வா தெரிவித்துள்ளார்.

நேற்றையதினம் இலங்கையில் எந்தவொரு கொரோனா நோயாளர்களும் இனங்காணப்படவில்லை என்பது குறிப்பிடத்தக்கது.

கொழும்பில் பஸ்ஸூடன் அம்பியுலன்ஸ் மோதி விபத்து : எழுவர் காயம்!!

விபத்து..

பொரளை – டி.எஸ்.சந்தி பகுதியில் இலங்கை போக்குவரத்து சபைக்கு சொந்தமான பஸ்ஸொன்றும் அம்பியுலன்ஸ் வாகனமொன்றும் மோதி விபத்திற்குள்ளானதில் 7 பேர் காயமடைந்துள்ளனர்.

இரத்தினபுரியிலிருந்து கொழும்பு தேசிய வைத்தியசாலைக்கு நோயாளிகளை ஏற்றிச்சென்ற அம்பியுலன்ஸூம் தேசிய வைத்தியசாலையிலிருந்து மாத்தறை நோக்கி தாதியர்களை ஏற்றிச்சென்ற பஸ்ஸூம் மோதியுள்ளதாக பொலிஸார் தெரிவித்தனர்.

விபத்தில் அம்பியுலன்ஸிலிருந்த சிறு குழந்தையொன்று உள்ளிட்ட 7 பேர் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

அவர்களின் நிலை கவலைக்கிடமாக இல்லை என பொலிஸார் குறிப்பிட்டனர். விபத்து தொடர்பிலான விசாரணைகள் ஆரம்பிக்கப்பட்டுள்ளன.

மன்னாரில் விபத்தில் உயிரிழந்த சகோதரிகள் இருவரின் உடல் நல்லடக்கம்!!

உடல் நல்லடக்கம்..

மன்னாரில் நேற்று முன்தினம் இடம்பெற்ற விபத்தில் உயிரிழந்த சகோதரிகள் இருவரினதும் உடல் நேற்று மாலை நல்லடக்கம் செய்யப்பட்டுள்ளது.

மன்னார்-மதவாச்சி பிரதான வீதி, பரப்பாங்கண்டன் பகுதியில் நேற்று முன்தினம் மதியம் 2.30 மணியளவில் இடம்பெற்ற விபத்தில் சகோதரிகளான இரு பெண்கள் சம்பவ இடத்திலேயே உயிரிழந்தனர்.

மன்னாரில் இருந்து சென்ற மோட்டார் சைக்கிளும், மன்னார் நோக்கி வந்த கெப் ரக வாகனமும் மோதியதில் மோட்டார் சைக்கிளில் பயணித்த குறித்த இரு பெண்களும் உயிரிழந்தனர்.

40 வயதான சந்தியோகு லிண்டா மற்றும் 25 வயதான சந்தியோகு டெரன்சி ஆகியோரே இவ்வாறு உயிரிழந்தனர்.

குறித்த இருவரும் மன்னாரில் இருந்து கட்டையடம்பன் பகுதியில் உள்ள அவர்களுடைய வீட்டிற்கு மோட்டார் சைக்கிளில் பயணித்த போதே இந்த விபத்து இடம் பெற்றுள்ளது.

இந்நிலையில், குறித்த இருவரினதும் சடலங்கள் நேற்று முன்தினம் இரவு உறவினர்களிடம் கையளிக்கப்பட்ட நிலையில், நேற்று மாலை நல்லடக்கம் செய்யப்பட்டுள்ளதாக தெரிவிக்கப்படுகின்றது.

ஒரே குடும்பத்தில் 23 பேருக்கு கொரோனா பாதிப்பு : வெளிநாட்டில் இருந்த திரும்பிய நபரால் நேர்ந்த சோகம்!!

ஒரே குடும்பத்தில்..

இந்திய மாநிலம் பீகாரில் கொரோனா பாதிப்புக்கு உள்ளான 60 பேரில், 23 பேர் ஒரு குடும்பத்தைச் சேர்ந்தவர்கள் என்பது கண்டுபிடிக்கப்பட்டுள்ளது.

பாட்னாவில் இருந்து 130 கி.மீ தொலைவில் உள்ள சிவான் மாவட்டத்தில் கிட்டதட்ட ஒரே குடும்பத்தை சேர்ந்த 23 பேருக்கு கொரோனா வைரஸ் பாதிப்பு உறுதி செய்யப்பட்டுள்ளது.

இந்த சங்கிலி தொடரானது, கடந்த மாதம் ஓமனில் இருந்து திரும்பிய நபரால் ஏற்பட்டுள்ளது. கடந்த மார்ச்.16 ஆம் திகதி சிவான் மாவட்டத்தில் உள்ள பன்ஜ்வார் கிரமத்திற்கு திரும்பிய அந்த நபருக்கு கொரோனா பாதிப்பு இருப்பது ஏப்ரல் 4 ஆம் திகதியே தெரிவந்தது.

கொரோனா பாதிப்பு உறுதி செய்யப்படும் முன்பு, சிவான் மாவட்டத்திலுள்ள உறவினர்களின் வீடு உள்ளிட்ட பகுதிகளுக்கு அவர் சென்று வந்துள்ளார்.

இதனால் உறவினர்கள் 22 பேருக்கும், அவரது சொந்த கிராமமான பன்ஜ்வாரை சேர்ந்த 2 பேருக்கும் கொரோனா பரவியிருப்பது கண்டுபிடிக்கப்பட்டது.

இவர்களையும் சேர்த்து, சிவான் மாவட்டத்தில் மட்டும் 31 பேருக்கு கொரோனா உறுதியாகியுள்ளது. 23 பேரில் 4 பேர் கொரோனா பாதிப்பில் இருந்து குணமடைந்துள்ளனர் என அதிகாரிகள் தெரிவித்துள்ளனர்.

இருப்பினும் அவர்கள் மேலும், 2 வாரங்களுக்கு தனிமைப்படுத்திக்கொள்ளும்படி அறிவுறுத்தப்பட்டுள்ளனர். இதைத் தொடர்ந்து, சிவான் மாவட்ட எல்லை பகுதிகள் அதிகாரிகளால் மூடக்கப்பட்டுள்ளன.

கொரோனாவால் இத்தாலியில் 100 மருத்துவர்கள் உயிரிழப்பு!!

இத்தாலியில்..

கொரோனா வைரஸ் தொற்று காரணமாக இத்தாலியில் உயிரிழந்த மருத்துவர்களின் எண்ணிக்கை 100 ஆக அதிகரித்துள்ளதாக அல் ஜெசீரா தொலைக்காட்சி தெரிவித்துள்ளது.

கொரோனா வைரஸ் கடந்த பெப்ரவரி மாதம் இத்தாலியில் பரவ ஆரம்பித்தது. அன்று முதல் இதுவரை கொரோனா வைரஸ் தொற்றுக்கு இலக்காகி 100 மருத்துவர்கள் உயிரிழந்துள்ளனர் என அந்நாட்டு மருத்துவர்களின் சங்கம் நேற்று வெளியிட்டுள்ள அறிக்கையில் தெரிவித்துள்ளது.

“கொவிட் 19 காரணமாக உயிரிழந்த மருத்துவர்களின் எண்ணிக்கை 100, துரதிஷ்டவசமாக அந்த எண்ணிக்கை 101 ஆகவும் அதிகரிக்கலாம்” என இத்தாலி மருத்துவர்கள் சங்கத்தின் பேச்சாளர் ஒருவர் கூறியுள்ளார்.

கொரோனா வைரஸ் காரணமாக இத்தாலியில் 94 மருத்துவர்கள் உயிரிழந்துள்ளதாக அந்நாட்டு மருத்துவர்கள் சங்கம் கடந்த 7 ஆம் திகதி அறிவித்திருந்தது. அந்த அறிவிப்பு வெளியிடப்பட்டுள்ள மூன்று தினங்களுக்குள் 6 மருத்துவர்கள் உயிரிழந்துள்ளனர்.

அதேவேளை கொரோனா வைரஸ் தொற்று காரணமாக இத்தாலியில் 26 தாதியர்கள் உயிரிந்துள்ளதாக அந்நாட்டு தாதியர் சம்மேளனத்தின் ஊடகப் பேச்சாளர் கூறியுள்ளார்.

அத்துடன் 6 ஆயிரத்து 549 தாதியருக்கு கொரோனா தொற்றியுள்ளது. கடந்த 6 ஆம் திகதி வரை இத்தாலியில் சுகாதார சேவையில் ஈடுபடடுள்ள 12 ஆயிரத்து 681 ஊழியர்களுக்கு கொரோனா வைரஸ் தொற்றியுள்ளமை உறுதிப்படுத்தப்பட்டிருந்தது.

முக கவனம், கை கவனம், தனிப்பட்ட பாதுகாப்பு உபகரணங்கள், பாதுகாப்பு உடைகள் போன்ற மருத்துவப் பொருட்களுக்கு தட்டுப்பாடு நிலவுவது மருத்துவர்கள், தாதியர், சுகாதார ஊழியர்களுக்கு கொரோனா வைரஸ் தொற்ற பிரதான காரணமாக அமைந்துள்ளதாக இத்தாலிய சுகாதார அதிகாரிகள் தெரிவித்துள்ளனர்.

புத்தாண்டின் பின்னர் யாழ்ப்பாணத்தில் பகுதியளவில் ஊரடங்கு சட்டத்தை தளர்த்த தீர்மானம்!!

புத்தாண்டின் பின்னர்..

தமிழ் – சிங்களப் புத்தாண்டுக்கு முன்னர் யாழ்ப்பாணத்தில் ஊடரங்குச் சட்டம் நீக்கப்படுவதற்கு வாய்ப்பில்லை என்று தெரிவிக்கப்பட்டுள்ளது. அத்துடன் புத்தாண்டுக்குப் பின்னரும், யாழ்ப்பாணக் குடாநாட்டின் சில பகுதிகளில் மாத்திரமே ஊரடங்குச் சட்டம் நீக்கப்படுவதை பாதுகாப்புத் தரப்பினர் விரும்புவதாகவும் தெரியவருகின்றது.

வடக்கு மாகாணத்தின் தற்போதைய நிலைமை தொடர்பில் வடக்கு மாகாண ஆளுநர் அலுவலகத்தில் நேற்று முக்கிய கலந்துரையாடல் இடம்பெற்றது.

தற்போது நீடிக்கப்பட்டு வரும் ஊரடங்குச் சட்டம் தொடர்பில் பாதுகாப்புத் தரப்பினரும், அதிகாரிகளும் கருத்துக்களை வெளியிட்டனர். யாழ்ப்பாண மாவட்டத்தில் தொடர் ஊடரங்கு காரணமாக ஏற்பட்டுள்ள நிலைமைகள் ஆராயப்பட்டன.

தமிழ் – சிங்களப் புத்தாண்டுக்கு முன்னர் யாழ்ப்பாணக் குடாநாட்டில் ஊரடங்கைத் தளர்த்த வேண்டாம் என்று சுகாதாரப் பகுதியினரும், பாதுகாப்புத் தரப்பினரும் கோரிக்கைகளை முன்வைத்தனர்.

புத்தாண்டின் பின்னரும் ஊரடங்கு தளர்த்தப்படும்போது ஒவ்வொரு பொலிஸ் பிரிவாக ஊரடங்கைத் தளர்த்தலாம் என்றும், 4 மணிநேரம் ஊரடங்கை நீக்கலாம் என்ற யோசனையும் பாதுகாப்புத் தரப்பினரால் முன்வைக்கப்பட்டது. 4 மணி நேரம் ஊரடங்கு நீக்கம் என்ற விடயம் அதிகாரிகளால் ஏற்றுக்கொள்ளப்படவில்லை.

மேலும், யாழ்ப்பாணக் குடநாட்டில் வடமராட்சி கிழக்கு, தென்மராட்சி, தீவகம் ஆகியவற்றில் மாத்திரம் புத்தாண்டின் பின்னர் ஊரடங்கைத் தளர்த்துவதற்கு சுகாதார அதிகாரிகள், பாதுகாப்புத் தரப்பினர் ஒருமித்து இணக்கம் தெரிவித்தனர். ஊரடங்கு தளர்த்தப்பட்டாலும் அந்தப் பிரதேசத்துக்குள் மாத்திரமே நடமாட அனுமதி வழங்கப்படும் எனவும் இதன்போது குறிப்பிடப்பட்டுள்ளது.

தாவடி, அரியாலை, மானிப்பாயில் தனிமைப்படுத்தல் பிரதேசங்களின் நிலைமையைப் பொறுத்தே குடாநாட்டின் ஏனைய பகுதிகளில் ஊரடங்கைத் தளர்த்துவது தொடர்பான இறுதி முடிவை எடுக்க முடியும் என்று கூறப்பட்டுள்ளது.

இதேபோன்று மன்னார் தாராபுரத்தின் நிலைமையைப் பொறுத்தே அங்கு ஊடரங்கை நீக்குவது தொடர்பான முடிவை எடுக்கக் கூடியதாக இருக்கும் என்று தெரிவிக்கப்பட்டுள்ளது.

கிளிநொச்சி மாவட்டத்தின் பூநகரி, முல்லைத்தீவு மாவட்டத்தின் துணுக்காய், பாண்டியன்குளம், ஒட்டுசுட்டானின் ஒரு பகுதி, வவுனியா மாவட்டத்தின் நெடுங்கேணி, செட்டிக்குளம் ஆகிய பிரதேசங்களில் புத்தாண்டுடன் ஊரடங்கை நீக்க முடியும் என்றும் இதன்போது கூறப்பட்டுள்ளது.

-தமிழ்வின்-

சாவகச்சேரியில் வீடு புகுந்து காெள்ளை : தம்பதியினர் படுகாயம்!!

சாவகச்சேரியில் வீடு புகுந்து காெ ள்ளை..

நாடாளவிய ரீதியில் ஊரடங்கு சட்டம் அமுலில் உள்ள நிலையில் யாழ்ப்பாணத்தில் வீடு புகுந்து கொ ள்ளையர்கள் கைவரிசையை காட்டியுள்ளனர்.

இந்த சம்பவம் மண்டுவில் பிரதேசத்தில் இன்று அதிகாலை 2 மணியளவில் இடம்பெற்றுள்ளதாக சாவகச்சேரி பொலிஸார் தெரிவித்துள்ளனர்.

வீ ட்டை உ டைத்து உள்ளே புகுந்த கொ ள்ளையர்கள் வயோதிபர்களான கணவன், மனைவியை அ டித்து அவர்கள் அணிந்திருந்த 5 பவுண் நகைகள் மற்றும் வீட்டிலிருந்த 16000 ரூபா பணம் ஆகியவற்றைக் கொ ள்ளையிடப்பட்டுச் சென்றுள்ளனர்.

படுகாயமடைந்த தம்பதியினர் யாழ். போதனா வைத்தியசாலையில் அனுமதிக்கப்பட்டுள்ளனர். சம்பவம் தொடர்பான மேலதிக விசாரணைகளை சாவகச்சேரி பாெலிஸார் மேற்கொண்டு வருகின்றனர்.

வவுனியாவில் மோசடி நடவடிக்கையில் ஈடுபடும் வர்த்தகர்கள் தண்டிக்கப்படுவர்!!

மோசடி நடவடிக்கையில்..

நியாயமற்ற வர்த்தக நடவடிக்கககளில் ஈடுபடும் வர்த்தகர்கள் பாரபட்சமின்றி சட்டத்தின் முன் நிறுத்தப்படுவார்கள் என்று பாவனையாளர் அலுவல்கள் அதிகார சபையின் வவுனியா மாவட்ட பொறுப்பதிகாரி ச.நிலாந்தன் தெரிவித்துள்ளார்.

மோசடியான முறையில் வர்த்தகத்தில் ஈடுபடும் வர்த்தகர் துறை தொடர்பாக அவர் இன்று அனுப்பியுள்ள ஊடக அறிக்கையில் மேலும் தெரிவிக்கப்பட்டுள்ளதாவது, நியாயமற்ற முறையில் மோசடியாக ஈடுபடும் வர்த்தக துறையினரை சுற்றிவளைக்கும் நடவடிக்கைகள் வவுனியா மாவட்ட பாவனையாளர் அலுவல்கள் அதிகார சபை உத்தியோகத்தர்களால் முன்னெடுக்கப்பட்டு வருகிறது.

பெரும்பாலான மக்களின் வாழ்வாதாரம் பாதிக்கப்பட்டுள்ள இன்றைய சூழலில் அன்றாட பிழைப்பிற்கு அல்லலுறும் மக்களிடம் நியாயமற்ற விலையில் அத்தியாவசிய பொருட்களை அதிக விலையில் விற்பனை செய்யும் வியாபாரிகள் தொடர்பில் பல முறைப்பாடுகள் எமக்கு கிடைக்கப்பெற்றுள்ளன.

சந்தையில் பொருட்களுக்கு தட்டுப்பாடு நிலவுவதாக போலியான தட்டுப்பாட்டினை உருவாக்கி நிர்ணய விலையிலும் பார்க்க அதிக விலையில் அத்தியாவசிய பொருட்களை விற்பனை செய்யும் ஒருவகை தந்திரோபாயத்தை ஒரு சில வியாபாரிகள் முன்னெடுத்து வருகின்றனர்.

அத்தகைய வியாபாரிகள் பொருட்களை பதுக்கும் நடவடிக்கைகளிலும் ஈடுபட்டுள்ளமை எமது புலனாய்வுகள் மூலம் உறுதி செய்யப்பட்டுள்ளது. அதேபோல் வவுனியா மாவட்டத்தில் உள்ள அரிசி ஆலைகளில் தாராளமாக அரிசி கையிருப்பில் உள்ள அதேவேளை அரிசியாக்கக்கூடிய நிலையில் நெல்லும் தாராளமாக உள்ளது.

அத்துடன் கட்டுப்பாட்டு விலையான 98.00 ரூபாவுக்கு நாட்டரிசி மற்றும் சம்பா அரிசியினை விற்பனை செய்ய முடியும். இங்கும் சில அரிசி ஆலை உரிமையாளர்கள் அரசாங்கத்தால் அனுமதிக்கப்பட்ட விலையிலும் பார்க்க அதிக விலையில் பிற மாவட்டங்களுக்கு அரிசியினை சூட்சுமமாக விற்பனை செய்வது தொடர்பிலும் கடுமையான நடவடிக்கைகள் முன்னெடுக்கப்படும்.

இவை தவிர உள்ளூர் கடைகளில் ஊரடங்கு உத்தரவு அமுலில் உள்ள நேரத்தில் அவசர தேவைக்காக பொருட்களை வாங்க வருபவர்களிடம் நியாயமற்ற விலையில் பின்கதவால் இடம்பெறும் வியாபார நடவடிக்கைகளிலும், பொருட்களின் நிறையிலும் மோசடிகள் இடம்பெறுவது தொடர்பில் பொதுமக்கள் மிகவும் அவதானமாக இருக்க வேண்டும்.

இத்தகைய செயற்பாடுகளிற்கு நாம் சட்ட நடவடிக்கைகளை மேற்கொண்டு வருகின்றோம். வர்த்தகர்கள் முறையற்ற வியாபாரத்தின் மூலம் கொள்ளை இலாபம் சம்பாதிப்பதற்கான தருணம் இதுவல்ல. மாறாக சேவை மனப்பாங்குடன் தமது வியாபார நடவடிக்கைகளை முன்னைடுக்க வேண்டிய சமயம் இது.

அசாதாரண சூழ்நிலை ஆரம்பித்து ஊரடங்கு உத்தரவு பிறப்பிக்கப்பட்ட சமயம் முதல் இன்றுவரை (கிட்டத்தட்ட 3வாரங்கள்) 50க்கும் மேற்பட்ட முறையற்ற வியாபார நடவடிக்கைகளுக்கு எதிராக வழக்குகள் பதிவு செய்யப்பட்டுள்ளது.

அத்தியாவசிய பொருட்களை கொள்முதல் செய்து வினியோகிக்கும் பிரதான முகவர்களும் மக்களின் பொருளாதார சூழ்நிலையினை கருத்திற்கொண்டு குறைந்தபட்ச இலாபத்துடன் சில்லறை வியாபாரிகளுக்கு பொருட்களை வழங்குவதே வரவேற்கத்தக்கதும் நியாயமானதும்.

சூழ்நிலையினை தமக்கு சாதகமாக பயன்படுத்தும் சிலர் சிலவகை பொருட்களை வீட்டிற்குகொண்டு சென்று(Home delivery) கொடுக்கிறார்கள். இது மக்கள் தம் தேவையினை இலகுவான முறையில் பூர்த்தி செய்யமுடிகிறது என்ற தோற்றபாட்டை காட்டினாலும் இத்தகைய சேவைக்காக அவர்கள் அறவிடும் சேவைகட்டணம் என்பது சில சமயம் உயர்வாக காணப்படுகிறது.

இது தொடர்பிலும் மக்கள் விழிப்புடன் இருக்க வேண்டும் . அசாதாரண சூழ்நிலையிலும் நியாயமான விலையில் மக்கள் பொருட்களை பெற்றுக்கொள்ள கூடிய வகையில் வவுனியா மாவட்ட பாவனையாளர் அலுவல்கள் அதிகார சபை உத்தியோகத்தர்கள் விழிப்போடும் சமூக அக்கறையுடனும் பணியாற்றி வருகிறார்கள் என குறிப்பிடப்பட்டுள்ளது.