மட்டக்களப்பிலும் சர்வதேச விமான நிலையம்

மட்டக்களப்பு விமான நிலையம், சர்வதேச விமான நிலையமாக அபிவிருத்தி செய்யப்படும் என அமைச்சர் பிரசன்ன ரணதுங்க தெரிவித்துள்ளார். இந்த அபிவிருத்தி நடவடிக்கைக்கு இந்திய அரசாங்கத்தின் முழுமையான ஆதரவு கிடைத்துள்ளதாக அவர் தெரிவித்துள்ளார்.

இலங்கையில் இந்திய உயர் ஸ்தானிகர் தரன்ஜித் சிங் மற்றும் அமைச்சர் பிரசன்ன ரணதுங்கவுக்கும் இடையில் இடம்பெற்ற கலந்துரையாடலில் இது தொடர்பில் அவதானம் செலுத்தப்பட்டுள்ளது. இந்திய அரசாங்கம் தனது விமான பயணங்களை மட்டக்களப்பு விமான நிலையம் வரை மேற்கொள்ள விரும்புவதாக அமைச்சர் கூறியுள்ளார்.

நாட்டிலுள்ள ஏனைய சர்வதேச விமான நிலையங்களான கட்டுநாயக்க, யாழ்ப்பாணம் ஆகிய விமான நிலையங்களுக்கு இந்திய விமான சேவைகள் ஆரம்பிக்கப்பட்டுள்ளது. மட்டக்களப்பு விமான நிலையத்தை சர்வதேச நிலையமாக அபிவிருத்தி செய்வதற்கான நடவடிக்கை மற்றும் ஏனைய நடவடிக்கைகள் முன்னெடுக்கப்படும் என அமைச்சர் தெரிவித்துள்ளார்.

புதிய நடைமுறை

எதிர்வரும் ஜனவரி மாதம் முதலாம் திகதியில் இருந்து சத்தம் குறைவாக பாடல்களை இசைக்காத தனியார் பேருந்துகள் தொடர்பில் முறைப்பாடு செய்யுமாறு அறிவுறுத்தப்பட்டுள்ளது.

இது தொடர்பில் 1955 என்ற இலக்கத்திற்கு தொடர்பு கொண்டு முறைப்பாடு செய்ய முடியும் அவர்கள் மீது கடுமையான நடவடிக்கை எடுக்கப் படும் எனவும் இலங்கை போக்குவரத்து ஆணைக்குழு பொது மக்களிடம் கேட்டுக்கொண்டுள்ளது.

அதிக சத்தமாக பேருந்துகளில் பாடல் இசைக்கப்படுவதன் காரணமாக பேருந்துகளில் பயணிப்போர் முகம் கொடுக்கும் சிக்கல்களை தவிர்க்க நடவடிக்கை எடுக்கப்பட்டுள்ளது.

இதற்காக 1000 பாடல்கள் கொண்ட இசைத்தட்டு ஒன்றை தேசிய போக்குவரத்து ஆணைக்குழு தயார் செய்துள்ளது. இந்த இசைத்தட்டு எதிர்வரும் 31ஆம் திகதி தனியார் பேருந்து உரிமையாளர்களுக்கு வழங்கப்படவுள்ளது.

அதற்கமைய ஜனவரி மாதம் முதலாம் திகதி முதல் இந்த இசைத்தட்டில் உள்ள பாடல்களை மாத்திரமே ஒலிபரப்பப்பட வேண்டும். சத்தமாக ஒலிபரப்பினால் 1955 என்ற இலக்கத்திற்கு முறைப்பாடு செய்ய முடியும் என ஆணைக்குழு கேட்டுக்கொண்டுள்ளது.

தடம்புரண்ட டிப்பர்

மன்னார் – கொழும்பு பிரதான வீதியின் கட்டையடம்பன் பகுதியில் விபத்தொன்று இடம்பெற்றுள்ளதாக தெரிவிக்கப்பட்டுள்ளது. மன்னார் நோக்கி வேகமாக சென்ற டிப்பர் வாகனமே தொலைபேசி கம்பத்தில் மோதி தடம்புரண்டு விபத்துக்குள்ளாகியுள்ளது.

நேற்று காலை குறித்த டிப்பரை சாரதி செலுத்தி சென்ற நிலையில் அவர் குறித்த விபத்தில் காயமேதுமில்லால் அதிஸ்ரவசமாக உயிர் தப்பியுள்ளதாக தெரிவிக்கப்படுகிறது.

மாடு ஒன்று குறுக்கே வந்ததாலேயே குறித்த விபத்து இடம்பெற்றுள்ளதாக சாரதி தெரிவித்துள்ள நிலையில் மேலதிக விசாரணைகளை பொலிஸார் மேற்கொண்டு வருகின்றனர்.

பாலசந்திரன் கிருபாலினி

கிளிநொச்சி மாவட்டத்தில் 2019 ஆம் ஆண்டுக்கான க.பொ.த உயர்தர பரீட்சை பெறுபேறுகளில் வர்த்தக பிரிவில் கிளிநொச்சி அக்கராயன் மகா வித்தியாலய மாணவி மாவட்ட ரீதியில் முதல் இடத்தை பெற்றுள்ளார்.

கிளிநொச்சி மாவட்டத்தில் அக்கராயன் ஒரு பின்தங்கிய கிராமம் அக் கிராமத்தின் அக்கராயன் மகா வித்தியாலயத்தில் கல்வி கற்ற பாலசந்திரன் கிருபாலினி என்னும் மாணவி இவ்வாறு மாவட்ட ரீதியில் முதல் இடம் பிடித்து சாதனை படைத்துள்ளார்.

குறித்த மாணவி ஊடகங்களுக்கு கருத்து தெரிவிக்கும் போது, தான் ஒரு கணக்காளராக வரவேண்டும் என்று தெரிவித்தார்.

அவசர எச்சரிக்கை

அண்மைக்காலமாக இலங்கையர்களுக்கு பாதிப்பை ஏற்படுத்தக் கூடிய வெளிநாட்டு தவறிய அழைப்புகள் (Missed call) பாரியளவு கிடைப்பதாக இலங்கை தகவல் தொழில்நுட்ப சங்கம் தெரிவித்துள்ளது.

இலங்கை கையடக்க தொலைபேசி பாவனையாளர்களுக்கு இவ்வாறான தவறிய அழைப்புகள் வருவது அதிகரித்துள்ளது.

பாவனையாளர்களுக்கு அறிமுகமில்லாத இலங்கை தொலைபேசி இலக்கங்களில் இருந்து பல்வேறு வகையான குறுந்தகவல்கள் கிடைப்பதாக தெரியவந்துள்ளதென தொழில்நுட்ப சங்கம் குறிப்பிட்டுள்ளது.

இலங்கை கையடக்க தொலைபேசி பயனாளர்கள் பெறுமதியான பரிசு வென்றுள்ளதாகவும், பரிசினை பெற ஒரு பணத்தொகையை செலுத்த வேண்டும் என குறும்தகவல்கள் அனுப்பப்படுகின்றன.

இவ்வாறு மோ சடியான முறையில் வரும் குறுந்தகவல்கள் குறித்து மிகவும் அவதானத்துடன் மக்கள் செயற்பட வேண்டும் என அறிவுறுத்தப்பட்டுள்ளது.

குறுந்தகவல்களில் கோரும் தனிப்பட்ட தகவல்கள் எதனையும் வழங்க வேண்டாம் எனவும், அவர்கள் வழங்கும் வங்கி கணக்கு இலக்கத்திற்கோ அல்லது bitcoin walletஇற்கு பணத்தை வழங்க வேண்டாம் என இலங்கையர்களுக்கு அறிவுறுத்தப்பட்டுள்ளது.

இதேவேளை வெளிநாட்டிலிருந்து பல்வேறு தொலைபேசி இலக்கங்கள் ஊடாக Missed call வருவதாகவும், அந்த இலக்கத்திற்கு மீண்டும் தொடர்பு கொண்டால் பெருமளவு பணம் பறிமுதல் செய்யப்படுவதுடன் தனிப்பட்ட தரவுகளும் திருடப்படுவதாக பல குற்றச்சாட்டுகள் முன்வைக்கப்பட்டுள்ளமை குறிப்பிடத்தக்கது.

சாரதி அனுமதிப் பத்திரம்..

வாகன சாரதி அனுமதிப் பத்திரத்தை விநியோகிப்பதற்காக SMS தொழிநுட்பத்தை பயன்படுத்த மோட்டார்வாகன போக்குவரத்து திணைக்களம் தீர்மானித்துள்ளது.

சாரதி அனுமதிப் பத்திரத்தை பெற்றுக்கொள்வதற்கான விண்ணப்பத்தை சமர்ப்பித்த பின் அதனை பூரணப்படுத்தி மீண்டும் வழங்குவதற்கான குறிப்பிட்ட நேரத்தை விண்ணப்பதாரருக்கு SMS மூலமாக அறிவிப்பதற்கு இந்த வேலைத்திட்டத்தின் மூலம் திட்டம் வகுக்கப்பட்டுள்ளது.

இது தொடர்பில் மோட்டார் வாகன போக்குவரத்து திணைக்களத்தின் பதில் ஆணையாளர் நாயகம் உபாலி ஜயசேகர தகவல் வெளியிட்டுள்ளார்.

இது குறித்து அவர் மேலும் கூறுகையில், திணைக்களத்தின் தொழிநுட்ப பிரிவின் ஒத்துழைப்புடன் இந்த புதிய நடவடிக்கையை 2 வார காலத்திற்குள் நடைமுறைப்படுத்துவதற்கு எதிர்பார்க்கப்பட்டுள்ளது.

வாகன சாரதி அனுமதிப் பத்திரத்தை பெற்றுக்கொள்வதற்கு தேவையுள்ள விண்ணப்பதாரர் தமது விண்ணப்ப படிவத்தை கையளித்தால் எமது அதிகாரிகள் 2 மணித்தியாலத்திற்கு பின் வருமாறு கூறுகின்றனர்.

இருப்பினும் சில சந்தர்ப்பத்தில் கால தாமதம் ஆவதினால் இந்த புதிய முறை ஊடாக சம்பந்தப்பட்ட விண்ணப்பதாரரின் சாரதி அனுமதிப்பத்திரம் தயாரிக்கப்பட்ட பின் அது குறித்து SMS ஊடாக அவருக்கு அறிவிக்க திட்டமிடப்பட்டிருப்பதாகவும் சுட்டிக்காட்டியுள்ளார்.

விசா கட்டணம் நீக்கம்

48 நாடுகளுக்கு விசாக் கட்டணம் நீக்கப்பட்டமையினால் இலங்கைக்கு பாரிய நெ ருக்கடி நிலை ஏற்பட்டுள்ளதாக தெரிவிக்கப்படுகிறது.

இலங்கை வரும் சுற்றுலா பயணிகளின் எண்ணிக்கையை அதிகரிக்கும் நோக்கில் விசா கட்டணத்தை நீக்க இலங்கை சுற்றுலா அபிவிருத்தி அதிகார சபை நடவடிக்கை எடுத்தது. இதன் காரணமாக 6000 மில்லியன் ரூபா வருமானத்தை இலங்கை இழந்து விட்டதாக தகவல் வெளியாகியுள்ளது.

கடந்த ஆகஸ்ட் மாதத்தில் இருந்து 48 நாடுகளிலிருந்து வரும் சுற்றுலா பயணிகளுக்கான விசா கட்டணம் அறவிடும் நடவடிக்கை நிறுத்தப்பட்டது.

ஒஸ்ட்ரியா, அவுஸ்திரேலியா, பெல்ஜியம், பல்கேரியா, கனடா, கம்போடியா, சீனா, குரோசியா, சைப்ரஸ், செக் குடியரசு, டென்மார்க், எஸ்தோனியா, பின்லாந்து, பிரான்ஸ், ஜேர்மனி, கிரீஸ், ஹங்கேரி, இந்தியா, இந்தோனேஷியா, ஐஸ்லாந்து, அயர்லாந்து, இஸ்ரேல், இத்தாலி, ஜப்பான், லத்வியா, லிதுவேனியா, லக்சம்பேர்க், மலேஷியா, மோல்டா, நெதர்லாந்து, நியூசிலாந்து, நோர்வே, பிலிப்பைன்ஸ், போலந்து, போர்த்துக்கல், ரொமேனியா, ரஷ்யா,

சிங்கப்பூர், தென் கொரியா, ஸ்லோவாகியா குடியரசு, ஸ்லோவேனியா, ஸ்பெயின், ஸ்வீடன், சுவிட்ஸர்லாந்து, தாய்லாந்து, உக்ரைன் மற்றும் ஐக்கிய இராச்சியம், அமெரிக்கா போன்ற நாடுகளுக்கே இவ்வாறு விசாக் கட்டணம் நீக்கப்பட்டிருந்தது.

உயிர்த்த ஞாயிறு தினத்தன்று இடம்பெற்ற சம்பவம் காரணமாக பாதிக்கப்பட்டுள்ள சுற்றுலாத் துறையை மீளக் கட்டியெழுப்புவதற்கும், சுற்றுலாப் பயணிகளின் எண்ணிக்கையை அதிகரிக்கும் நோக்கில் இந்த நடைமுறை அறிமுகம் செய்யப்பட்டமை குறிப்பிடத்தக்கது.

பாத்திமா முஸாதிகா

திருகோணமலை ஸாஹிறா கல்லூரியில் விஞ்ஞான பிரிவில் கற்ற மூதூர் ஷாபி நகரைச் சேர்ந்த மீராசா பாத்திமா முஸாதிகா விஞ்ஞான பிரிவில் திருகோணமலை மாவட்டத்தில் 01 ஆம் நிலையினை பெற்று மருத்துவ துறைக்கு தெரிவாகி தான் பிறந்த மூதூருக்கும், தனது பெற்றோருக்கும் பெருமை தேடிக் கொடுத்துள்ளார்.

மருத்துவ துறைக்கு தெரிவான முஸாதிகாவின் வீட்டுக்குச் சென்று அவர்களது குடும்பத்தாரோடு பேசும் சந்தர்ப்பம் இன்று காலை கிடைத்தது.

அதன்போது அவர்களது குடும்ப பின்னணியையும் முஸாதிக்கா கல்வி கற்ற கடின நிலையினையும் அறிய முடிந்தது.

இருப்பினும் சில விடயங்களை கருத்தில் கொண்டு விவரிக்க முடியவில்லை. அதனையும் தாண்டி மகிழ்ச்சியில் எமக்கு வழங்கிய உபசரிப்பு மெய்சிலிர்க்க வைத்தது. சுருங்க கூறினால் வறுமை கல்விக்கு தடையல்ல என்பதற்கு எடுத்து காட்டு முஸாதிக்கா.

முஸாதிக்காவின் எதிர்கால கனவு VOG ஆக வந்து இனமத பேதங்களுக்கு அப்பால் சேவையாற்ற வேண்டும் என்பதாகும் அது நிறைவேற இறைவன் அருள்புரிவானாக.

மாணவி சுடர்நிலா

முல்லைத்தீவு மாவட்டத்தின் புதுக்குடியிருப்பு பிரதேச செயலக பிரிவுக்குட்பட்ட கெருடமடு மடுக்கரை பகுதியில் வசித்து வருகின்ற குறித்த மாணவி இறுதி யு த்தத்தின் போது தனது தந்தையாரை இழந்த நிலையிலும் 3A சித்தி பெற்று சாதனை படைத்துள்ளார்.

அவருடைய தங்கை 2021 கலைப்பிரிவில் கல்வி கற்கின்ற நிலையில் குறித்த மாணவியின் சகோதரன் மேசன்வேலை செய்து தன்னுடைய தங்கைகள் இருவரையும் மிகுந்த கஷ்டத்தின் மத்தியில் கற்பித்த நிலையில் இம் மாணவி சாதனை படைத்துள்ளார்.

குறித்த மாணவியை மனதார வாழ்த்துவதுடன் பல்கலைக்கழக கல்விக்கு உதவிட நல்லுள்ளம் கொண்டவர்கள் முன்வருமாறு கோரிக்கை விடப்பட்டுள்ளது.

மாணவி சுவாகி

கிளிநொச்சி மாவட்டத்தில் உயிர் முறைமைகள் தொழில்நுட்பப் பிரிவில் கிளிநொச்சி மத்திய மகா வித்தியாலய மாணவி முதலாம் இடத்தைப் பெற்றுள்ளார்.

இவ்வருடம் ஓகஸ்ட் மாதம் நடைபெற்ற ஜி.சீ.ஈ. உயர்தரப் பரீட்சைப் பெறுபேறுகள் நேற்றிரவு வெளியிடப்பட்டன.

அந்தவகையில் கிளிநொச்சி மாவட்டத்தில் உயிர் முறைமைகள் தொழில்நுட்பப் பிரிவில் கிளிநொச்சி மத்திய மகா வித்தியாலய மாணவி சுவாகி சுந்தரமூர்த்தி 2 பி, 1 C பெறுபேறு பெற்றுள்ளார்.

இவர் கிளிநொச்சி மாவட்டத்தில் முதல் நிலையையும் அகில இலங்கை ரீதியில் 31 ஆவது இடத்தையும் பெற்று சாதனை படைத்துள்ளார்.