வவுனியாவில் வழமைக்கு திரும்பிய இலங்கை போக்குவரத்து சபையின் சேவைகள்!!

வவுனியாவில் வழமைக்கு திரும்பிய..

வவுனியாவில் பல்வேறு கோரிக்கைகளை முன்வைத்து இலங்கை போக்குவரத்து சபையினர் கடந்த மூன்று நாட்களாக தொடர் பணிப்புறக்கணிப்பு போ ராட்டத்தை முன்னெடுத்து வந்தனர்.

இ.போ.ச ஊழியர்களுக்கான 2016.30 , 2016.02 அரச நிர்வாக சம்பள சுற்றறிக்கையின் படி புதிய சம்பள முறை துரிதமாக நடைமுறைப்படுத்த கட்டாயப்படுத்தி அகில இ.போ.ச ஊழியர்களினால் செயற்படுத்தப்பட்ட தொழிற்சங்க போ ராட்டத்திற்கு செப்டம்பர் மாதம் 4ம் திகதியுடன் ஒருவருடம் பூர்த்தியாகின்றது.

இலங்கை போக்குவரத்து சபை ஊழியர் சம்பளப் போ ராட்டம் ஒராண்டு நிறைவுபெற்றும் புதிய சம்பளம் ரூபா 2500 வழங்கப்படவில்லை. எனவே இதற்கு தீர்வு கிடைக்கும் வரை தொடர் வேலை நிறுத்த போ ராட்டத்தில் அகில இலங்கை ரீதியிலுள்ள இ.போ.ச ஊழியர்கள் கடந்த (16.09.2019) காலை ஆரம்பித்த தொடர் வேலை நிறுத்த போ ராட்டம் மூன்றாவது நாளான நேற்று (18.09.2019) மாலையுடன் நிறைவுக்கு வந்தது.

இ.போ.ச ஊழியர்களினால் முன்வைக்கப்பட்ட கோரிக்கையினை அரசாங்கம் ஏற்று விரைவில் தீர்க்கமான முடிவு அறிவிக்கப்படும் என அறிவிக்கப்பட்டமையினையடுத்து வேலை நிறுத்த போ ராட்டம் கைவிடப்பட்டது.

கோரிக்கையினை அரசாங்கம் ஏற்றுள்ளமையினையடுத்து இ.போ.ச வவுனியா சாலையில் நேற்று மாலை ஊழியர்கள் வெடி கொழுத்தி கொண்டாடினார்கள். தற்போது வவுனியாவில் இ.போ.ச மற்றும் தனியார் பேரூந்துகள் இணைந்து பொதுமக்களுக்கு சேவையினை வழங்கி வருகின்றன.

வவுனியாவில் யாழிலிருந்து கொழும்பு செல்லும் புகையிரத்திற்காக 15 நிமிடங்களாக மூடப்பட்டிருந்த பாதுகாப்புக் கடவை!!

15 நிமிடங்களாக மூடப்பட்டிருந்த பாதுகாப்புக் கடவை

வவுனியா நகசபை பூங்கா வீதியில் அமைந்துள்ள புகையிரத பாதுகாப்பு கடவை இன்று (19.09.2019) காலை சுமார் 15 நிமிடங்களாக மூடப்பட்டிருந்தமையினால் அவ்வீதியூடாக பயணித்த பொதுமக்கள் மற்றும் வாகனசாரதிகள் பல்வேறு இன்னல்களுக்கு முகங்கொடுத்திருந்தனர்.

குறித்த ரயில்வே பாதுகாப்பு கடவைக்கு அருகே 100 மீற்றர் தொலைவில் (வவுனியா புகையிரத நிலையத்திற்கு அருகே) காணப்படும் ரயில்வே பாதுகாப்பு கடவை திறக்கப்பட்டிருந்த போதிலும் இப் பாதுகாப்பு கடவை சுமார் 15 நிமிடங்களாக மூடப்பட்டிருந்தது.

இவ்விடயம் தொடர்பாக பாதுகாப்பு கடவையில் கடமையாற்றும் ஊழியரிடம் வினவிய போது, எனது கட்டுப்பாட்டு அறைக்கான மின்சாரம் துண்டிக்கப்பட்டுள்ளது.

இன்றும் சில நிமிடங்களில் யாழ்ப்பாணத்திலிருந்து கொழும்பு நோக்கி பயணிக்கவுள்ள ரயில் வருகை தரவுள்ளது. இதன் காரணமாகவே 15 நிமிடங்களுக்கு முன்பாக பாதுகாப்பு கடவையினை மூடியதாக தெரிவித்தார்.

குறித்த பாதை 15 நிமிடங்களாக மூடப்பட்டிருந்தமையினால் அவ் வழியூடாக பயணித்த பல வாகனங்கள் மாற்றுப்பாதையூடாக தங்களது பயணத்தினை தொடர்ந்தனர்.

இலங்கையில் அனைவருக்கும் கிடைக்கவுள்ள ஒரேயொரு நாள் வாய்ப்பு!!

ஒரேயொரு நாள் வாய்ப்பு

அனைத்து சுற்றுலா பயணிகளுக்கும் சிகிரியாவில் இருந்து சூரிய உதயத்தை பார்வையிட சந்தர்ப்பத்தை ஏற்படுத்தி கொடுக்கும் வகையிலான நடவடிக்கையொன்று எடுக்கப்பட்டுள்ளது. இந்த விடயத்தை மத்திய கலாச்சார நிதியத்தின் சிகிரியா திட்ட முகாமையாளர் மேஜர் அநுர நிஷாந்த தெரிவித்துள்ளார். மேலும் கூறுகையில்,

அந்தவகையில் எதிர்வரும் 27ஆம் திகதி சிகிரியாவை அதிகாலை ஐந்து மணிக்கே திறப்பதற்கு தீர்மானம் எடுக்கப்பட்டுள்ளது. பிதுரங்கல பகுதிக்கு பெரும்பாலான சுற்றுலா பயணிகள் சூரிய உதயத்தை பார்வையிட செல்கின்றனர்.

இதனை அடிப்படையாக வைத்தே சுற்றுலா பயணிகளுக்கு சூரிய உதயத்தை பார்வையிட சந்தரப்பத்தை ஏற்படுத்தி கொடுக்கும் வகையிலான மேற்படி நடவடிக்கை எடுக்கப்பட்டுள்ளது.

வழமையாக சிகிரியாவை பார்வையிடுவதற்கான அனுமதி சீட்டு விநியோகமானது காலை 6 மணி தொடக்கம் மாலை 5 மணி வரையில் இடம்பெறும். இவ்வாறான நிலையில் உலக சுற்றுலா தினமான எதிர்வரும் 27ஆம் திகதி அதிகாலை 5 மணி முதல் குறித்த நடவடிக்கை மேற்கொள்ளப்படும்.

இதன்மூலம் சிகிரியாவிலிருந்து சூரிய உதயத்தை பார்வையிடும் வாய்ப்பை சுற்றுலாப் பயணிகள் பெற்றுக் கொள்ள முடியும் என குறிப்பிட்டுள்ளார்.

கொழும்பில் காணாமல் போன இரட்டை சிறுமிகள் கண்டுபிடிப்பு : நடந்தது என்ன?

சிறுமிகள் கண்டுபிடிப்பு

கொழும்பு சென்ற நிலையில் காணாமல் போன இரட்டை சகோதரிகள் கண்டுபிடிக்கப்பட்டுள்ளதாக பொலிஸார் தெரிவித்துள்ளனர். ஹிக்கடுவ பிரதேசத்தில் உறவினர் ஒருவர் எச்சரித்தமையினால் கோபமடைந்து வீட்டை சென்ற சிறுமிகள் காணாமல் போயிருந்தனர்.

இந்நிலையில் நேற்று மாலை குறித்த இருவரும் மாவனெல்ல வீடு ஒன்றில் கண்டுபிடிக்கப்பட்டுள்ளனர். பொலிஸாருக்கு கிடைத்த தகவலுக்கமைய மேற்கொள்ளப்பட்ட சோதனை நடவடிக்கையின் போது, சிறுமிகள் கண்டுபிடிக்கப்பட்டதாக உயர் பொலிஸ் அதிகாரி ஒருவர் தெரிவித்துள்ளனர்.

சிறுமிகள் இருவரும் தற்போது வைத்திய பரிசோதனைக்காக மாவனெல்ல வைத்தியசாலையில் அனுமதிக்கப்பட்டுள்ளனர். ஹிக்கடுவ பெண்கள் பாடசாலையில் கல்வி கற்கும் ரஷ்மி மற்றும் சித்மி என்ற 14 வயது இரட்டை சிறுமிகளே காணாமல் போயிருந்தனர் என்பது குறிப்பிடத்தக்கது.

கிளிநொச்சியில் உயிருக்கு போராடும் குழந்தை : உதவி செய்ய முன்வாருங்கள் : பகிர்ந்து உதவுங்கள்!!

உதவி செய்ய முன்வாருங்கள்

கிளிநொச்சி பகுதியில் வசித்து வரும் திலீபன் சாந்தினி தம்பதிகளின் மூன்றாவது மகள் இனுஷா இதய நோயினால் பாதிக்கப்பட்டு உயிருக்கு போராடிக் கொண்டிருக்கின்றார். இக்குழந்தையின் தந்தையார் முன்னாள் போராளி தாயாரின் சகோதரி மாவீரா் ஆவார்.

இவ்வாறு போரினால் பாதிக்கப்பட்டு மிகவும் வறுமையான நிலையில் வாழ்ந்து வருகின்றார்கள் கொழும்புக்கு ஒவ்வொரு வாரமும் சென்று சிகிச்சை பெற வேண்டியுள்ளது.

தற்போது அவசரமாக இதயத்தில் சந்திரசிகிச்சை செய்ய வேண்டும் என்று வைத்தியார்கள் தெரிவித்தள்ளனார் கொழும்பில் ஒரு மாதம் தாங்கியிருந்து சந்திரசிகிச்சை செய்ய வேண்டும்.

ஆனால் தந்தையார் கூலி வேலை செய்து குடும்பத்தை நடத்திவருகின்றார் இவர்களினால் வாரம் ஒரு முறை கொழும்பு சென்று சிகிச்சை பெறுவது என்பது கடினமான விடயமாகும்.

அத்துடன் ஒரு மாதம் தாங்கி நின்று பிள்ளையின் சந்திரசிகிச்சை செய்ய பணவசதி இன்றி கஷ்டப்படுகின்றார்கள் பிள்ளையின் உயிரைக் காக்கவும் இவர்களின் குடும்பநிலையை கருத்தில் கொண்டு உதவி செய்ய முன்வருங்கள்.

உங்களிடம் இல்லாததை கடவுளிடம் கேட்கின்றீர்கள் உங்களிடம் இருப்பதை இல்லாதவர்களுக்கு கொடுங்கள் நீங்களும் கடவுளாக பார்க்கப்படுவீர்கள்.

வவுனியா மாவட்ட செயலகத்தில் இந்து சமய அறநெறிக்கல்வி கொடி தினம்!!

அறநெறிக்கல்வி கொடி தினம்

இந்து சமய அறநெறிக்கல்வியின் முக்கியத்துவத்ததை உணர்த்தும் விதமாக இந்து சமய கலாசார அலுவல்கள் திணைக்களம் இம்மாதம் 1 ஆம் திகதி முதல் 30ம் திகதி வரை நாடு முழுவதும் இந்து சமய அறநெறி கல்வி கொடிதினத்தை அனுஸ்டிப்பதற்கு தீர்மானித்துள்ளது.

அந்தவகையில் குறித்த நிகழ்வு நேற்று (18.09) வவுனியா மாவட்ட செயலகத்தில் உதவி மாவட்ட செயலாளர் நா.கமலதாஸ் தலைமையில் நடைபெற்றது.

மங்கள விளக்கேற்றபட்டு, அறநெறி கீதம் இசைக்கபட்டு ஆரம்பமான குறித்த நிகழ்வில் கலந்துகொண்ட அனைவருக்கும் அறநெறி கொடிகள் வழங்கிவைக்கப்பட்டது.

நிகழ்வில் முதன்மை அதிதியாக கலந்து கொண்ட வவுனியா மாவட்டசெயலர் எம்.கனீபா அறநெறிக் கல்வியின் முக்கியத்துவம் தொடர்பாக உரையாற்றியிருந்தார்.

நிகழ்வில் மாவட்ட செயலக உயர் அதிகாரிகள், உத்தியோகத்தர்கள், ஊழியர்கள் என பலரும் கலந்து கொண்டமை குறிப்பிடதக்கது.

வவுனியாவில் வலயக்கல்வி அலுவலகத்தினை முற்றுகையிட்ட பெற்றோர்கள்!!

வவுனியாவில்..

தமது பகுதிகளில் அமைந்துள்ள பாடசாலைகளிற்கு ஆசிரியர் பற்றாக்குறை நிலவுவதாக தெரிவித்து வவுனியா மகாகச்சகொடிய, மருதமடு, அலகல்லை போன்ற பகுதிகளில் வசிக்கும் பெற்றோர்கள் வவுனியா தெற்கு வலயக்கல்வி அலுவலகத்தினை முற்றுகையிட்டிருந்தனர். இந்த சம்பவம் நேற்று இடம்பெற்றிருந்தது. இதன்போது கருத்து தெரிவித்த பெற்றோர்கள்..

“தமது பிள்ளைகள் கற்கும் பாடசாலைகளில் ஆசிரியர் பற்றாகுறை நீண்ட காலமாக நிலவி வருகிறது. இதனால் மாணவர்களின் கல்வி தரம் வீழ்ச்சியடைந்த நிலையில் காணப்படுகின்றது.

ஆசிரியர் நியமனங்களின் போது அனைத்து வசதிகளும் காணப்படுகின்ற தேசிய பாடசாலைகளிற்கே முக்கியத்துவம் அளிக்கபடுகின்றது. அப்படியாயின் எமது பிள்ளைகள் எந்தவகையில் கல்வி நடவடிக்கைகளை மேற்கொள்ள முடியும்.

நாம் வீதி கேட்கவில்லை, வீடு கேட்கவில்லை, ஆனால் எமது பிள்ளைகளுக்கு பெறுமதியான கல்வி வேண்டும். அதனையே கேட்கிறோம். எனவே மிக விரைவாக எமது பாடசாலைகளிற்கு ஆசிரியர்களை நியமிப்பதற்கு அதிகாரிகள் நடவடிக்கைகளை எடுக்க வேண்டும்.

அத்துடன், வவுனியா மாவட்டத்திலிருந்து தேசிய கல்வியற்கல்லூரிகளிற்கு தெரிவு செய்யபட்டு வெளியேறும் சிங்கள ஆசிரியர்களை வவுனியாவில் அமைந்துள்ள சிங்கள பாடசாலைகளிற்கே நியமிக்க வேண்டும் என்றும் கோரிக்கை முன்வைத்திருந்தனர்.

இது தொடர்பாக வவுனியா வலயக்கல்வி அதிகாரி மு.இராதாகிருஸ்ணனிடம் கலந்துரையாடிய அவர்கள் மழையையும் பொருட்படுத்தாது வலயகல்வி பணிமனை முன்பாக நீண்ட நேரம் குழுமியிருந்தனர்.

இது தொடர்பாக வவுனியா தெற்கு வலயக்கல்வி பணிப்பாளர் மு.இராதாகிருஸ்ணனிடம் வினவியபோது, “அவர்களது கோரிக்கை தொடர்பாக மத்திய கல்வி அமைச்சு மற்றும் மாகாண கல்வி திணைக்களத்திற்கு தெரியப்படுத்தவுள்ளேன்.

அத்துடன் மிகவிரைவில் தற்காலிகமாக அவர்களிற்கு ஏதாவது தீர்வினை வழங்கமுடியுமா என்பது தொடர்பாக ஆராய்ந்து நடவடிக்கை எடுக்க இருப்பதாக” அவர் தெரிவித்தார்.

மட்டக்களப்பில் இடம்பெற்ற விபத்து : சிறுவன் பரிதாபமாக பலி!!

மட்டக்களப்பில் இடம்பெற்ற விபத்து

மட்டக்களப்பு – மகிழுர் பகுதியில் இடம்பெற்ற விபத்தில் காயமடைந்த சிறுவன் ஒருவர் மட்டக்களப்பு போதனா வைத்தியசாலையில் உயிரிழந்துள்ளார். கடந்த வெள்ளிக்கிழமை நண்பருடன் மோட்டார் சைக்கிளில் சென்றபோது மின்கம்பத்தில் மோதுண்டு படுகாயமடைந்த நிலையில் மட்டக்களப்பு போதனா வைத்தியசாலையில் அனுமதிக்கப்பட்டிருந்தார்.

பெரியகல்லாறு, காளிகோவில் வீதியை சேர்ந்த ஜெ.கேதுசன் (13வயது )என்னும் சிறுவனே வைத்தியசாலையில் அனுமதிக்கப்பட்டிருந்த நிலையில், சிசிக்சை பலன் இன்றி உயிரிழந்துள்ளார். சடலம் மட்டக்களப்பு போதனா வைத்தியசாலையில் சடலம் வைக்கப்பட்டுள்ளது.

இந்நிலையில், பிரேத பரிசோதனையின் பின்னர் உறவினர்களிடம் சடலம் ஒப்படைக்கப்பட்டுள்ளது. குறித்த சிறுவனின் மரணம் காரணமாக பெரியகல்லாறு கிராமம் சோகத்தில் மூழ்கியுள்ளது.

மாணவனின் அபூர்வ கண்டுபிடிப்பு : ஜனாதிபதி மைத்திரி கொடுத்த பரிசு!!

அபூர்வ கண்டுபிடிப்பு

இலங்கையில் பாடசாலை மாணவன் ஒருவரின் அபூர்வ கண்டுபிடிப்புக்கு ஜனாதிபதி மைத்திரிபால சிறிசேன பரிசு வழங்கியுள்ளார்.

ஒருவர் எழும்பி நடக்கும் போது பட்டரி ஒன்று சார்ஜ் ஆகும் உபகரணம் ஒன்றை மாணவன் தயாரித்துள்ளார். அதற்கு “Walking charger” என பெயரிட்டுள்ளார்.

திருகோணமலை, தன்தலாவ மஹா வித்தியாலயத்தில் உயர்தரம் கற்று வரும் சத்துர மதுமால் என்ற மாணவன் இதனை தயாரித்துள்ளார்.

இந்த கண்டுபிடிப்புக்கு ஜனாதிபதி ஐந்து இலட்சம் பரிசு வழங்கியுள்ளார். இது தொடர்பான நிகழ்வு நேற்று ஜனாதிபதி செயலகத்தில் நடைபெற்றது.

புதிய கண்டுபிடிப்புகள் மூலம் தேசிய மற்றும் சர்வதேச வெற்றிகளை சத்துர மதுமால் பெற்றுள்ளமை குறிப்பிடத்தக்கது.

வவுனியாவில் வைத்தியசாலையில் ஆபத்தான நிலையில் அனுமதிக்கப்பட்ட யானை தாக்கிய விமானப்படை வீரர்!!

விமானப்படை வீரர்

பதவியா பகுதியில் குடிமனைக்குள் புகுந்த யானை தாக்கியதில் விமானப்படை வீரர் ஒருவர் படுகாயமடைந்து ஆபத்தான நிலையில் வவுனியா வைத்தியசாலையில் அனுமதிக்கப்பட்டுள்ளார்.

இன்று இடம்பெற்ற இச்சம்பவம் தொடர்பில் மேலும் தெரியவருவதாவது, அனுராதபுரம், பதவியா பகுதியில் உள்ள தனது வீட்டில் இருந்து கடமைக்கு செல்வதற்காக காலை புறப்பட்ட விமானப்படை வீரர் ஒருவரை அப்பகுதி குடிமனைக்குள் புகுந்து நின்ற யானை தாக்கியுள்ளது.

இதனையடுத்து படுகாயமடைந்த குறித்த விமானப்படை வீரரை அப்பகுதி மக்கள் மீட்டு நோயாளர் காவு வண்டியில் வவுனியா வைத்தியசாலைக்கு அனுப்பி வைத்தனர். வைத்தியசாலையின் அவசர சிகிச்சைப் பிரிவில் குறித்த நபர் அனுமதிக்கப்பட்டுள்ளார். இதில் 40 வயதுடைய விமானப்படை வீரரே படுகாயமடைந்தவராவார்.

வவுனியா பாடசாலைகளில் மாணவர்களுக்கு விழிப்புணர்வு செயற்றிட்டம்!!

விழிப்புணர்வு செயற்றிட்டம்

முதியோரின் விழுமியங்கள் மாணவரை நம்பிக்கை உள்ளவராக வளர்க்கும் விழிப்புணர்வு செயற்றிடம் வவுனியா கோவில்குளம் இந்துக் கல்லூரியில் கல்லூரி அதிபர் பூலோகசிங்கம் தலைமையில் இன்று காலை 7.30 மணிக்கு இடம்பெற்றது.

இதில் மாணவர்களின் பல்வேறு ஆக்க இலக்கிய நிகழ்வுகளும் நடைபெற்றன. சிறப்பு நிகழ்வாக மாவட்ட சமூக சேவை உத்தியோகத்தர் செ.ஸ்ரீநிவாசன் மூத்தோர் மாண்பு பற்றி உரை நிகழ்த்தினார்.

ஈன்று புறந்தருதல் தாய்க்குக் கடன் சான்றோன் ஆக்குதல் தந்தை கடன் என்ற வாசகத்திற்கிணங்க தாய் தந்தையரை மதிக்கும் பழக்கத்தை சிறு வயதில் இருந்து பின்பற்றும் பிள்ளை சமூகத்தையும் மதிக்கக்கற்றுக்கொள்ளும் நல்ல பிரஜையாக வளர்வார்கள்.

பிள்ளைகள் நம்பிக்கையுள்ளவராக மாற வேண்டுமானால் மூத்தோர் வாழ்க்கை முறையையும் மூத்தோரின் சிந்தனைகளையும் தேடி வாசிக்கக் கற்றுக் கொள்ள வேண்டும்.

நாளைய சமூகத்தின் சிற்பிகளாக விளங்க இருக்கும் மாணவர்கள் தம்மை பற்றிய உயர்ந்த எண்ணங்களைக்கொண்டிருக்க வேண்டும். வானளாவ நினைத்தால் தான் நாம் பனை அளவாவது உயர முடியும் என்பதை மாணவர்கள் புரிந்து கொண்டு வாழப்பழக வேண்டும் எனவும் குறிப்பிட்டார்.

சர்வதேச முதியோர் தினத்தை முன்னிட்டு வவுனியாவில் ஒவ்வொரு பாடசாலைகளிலும் முதியோர் விழிப்புணர்வு செயல்திட்டங்கள் தொடர்ச்சியாக வலயக் கல்விப்பணிமனையுடன் இணைந்து மாவட்ட சமூக சேவை அலுவலகத்தால் முன்னெடுக்கப்பட்டு வருவது குறிப்பிடத்தக்கது.

36 மணி நேரத்தில் 80 மில்லியன் மக்கள் உயிரிழக்கும் ஆபத்து : மருத்துவ நிபுணர்கள் எச்சரிக்கை!!

மருத்துவ நிபுணர்கள் எச்சரிக்கை

உலகில் 80 மில்லியன் மக்களை 36 மணி நேரத்தில் ம ரணத்திற்கு உள்ளாக்கக் கூடிய காய்ச்சல் நோய் தொற்று மீண்டும் பரவும் ஆபத்து ஏற்பட்டுள்ளதாக மருத்துவ நிபுணர்கள் எச்சரிக்கை விடுத்துள்ளனர்.

“ஸ்பெனிஷ் ஃபுளு” என பெயரிடப்பட்டுள்ள காய்ச்சலை ஏற்படுத்தும் வைரஸ் ஒரு நூற்றாண்டுக்கு முன்னர் பரவியதுடன் உலகில் மூன்று பேரில் ஒருவருக்கு ஆபத்தை ஏற்படுத்தியது. இதன் காரணமாக 50 மில்லியன் பேர் உயிரிழந்தனர். தற்போது இந்த வைரஸ் பரவினால், அதனால், பெரிய ஆபத்து ஏற்படும் எனவும் மருத்துவ நிபுணர்கள் சுட்டிக்காட்டியுள்ளனர்.

உலக சுகாதார அமைப்பின் முன்னாள் தலைவர் ஒருவரின் தலைமையிலான நிபுணர்களின் “உலக தயார் நிலை கண்காணிப்பு குழு” மூலம் இது சம்பந்தமான உலக தலைவர்களுக்கு தெளிவுப்படுத்த விசேட அறிக்கை ஒன்றை வழங்கியுள்ளனர். அந்த அறிக்கையில் இந்த ஆபத்து பற்றி கூறியுள்ளனர்.

மிக வேகமாக பரவும் ஆபத்துள்ள இந்த “ஸ்பெனிஷ் ஃபுளு” வைரஸ் மூலம் உலகம் முழுவதும் பல மில்லியன் மக்கள் மரணிக்க செய்யவும் பொருளாதாரத்தை சீர்குலைக்கவும் தேசிய பாதுகாப்பை சிறிய காலத்திற்கு ஸ்தம்பிக்க செய்ய முடியும் எனவும் தெரியவருகிறது.

உலகம் முழுவதும் பரவி வரும் ஒபேலா வைரஸ் நோயை கட்டுப்படுத்த எடுத்துள்ள நடவடிக்கை போன்ற நடவடிக்கைகள் மூலம் “ஸ்பெனிஷ் ஃபுளு” பரவலை தடுக்க முடியாது எனவும் அறிக்கையில் கூறப்பட்டுள்ளது.

இந்த “ஸ்பெனிஷ் ஃபுளு” வைரஸ் குறித்து இதற்கு முன்னர் விடுத்த எச்சரிக்கையை உலக தலைவர்கள் கவனத்தில் கொள்ளவில்லை என நிபுணர்கள் தெரிவித்துள்ளனர்.

முன்னாள் நோர்வே பிரதமரும் உலக சுகாதார அமைப்பின் பணிப்பாளருமான கலாநிதி Bro Harlem Brundtland மற்றும் சர்வதேச செஞ்சிலுவை மற்றும் செம்பிறை சங்கங்களின் செயலாளர் Alhadj As Sy உள்ளிட்ட நிபுணர்கள் இந்த அறிக்கையை தயாரித்துள்ளனர்.

அரச நிறுவனங்களில் தற்காலிகமாக பணியாற்றுவோருக்கு இன்ப அதிர்ச்சி!!

இன்ப அ திர்ச்சி

அரச நிறுவனங்களில் 180 நாட்கள் பணி புரிந்த தற்காலிக, நாள் சம்பள, ஒப்பந்த, நிவாரண, பதில் நியமன ஊழியர்களுக்கு நிரந்தர நியமனம் வழங்க முடிவு செய்யப்பட்டுள்ளது.

இது தொடர்பான சுற்றுநிரூபத்தை அமுல்படுத்துவது தொடர்பில் பிரதமர் ரணில் விக்ரமசிங்க, நிதியமைச்சர் மங்கள சமரவீர, அரச நிர்வாக அமைச்சர் ரஞ்சித் மத்தும பண்டார ஆகியோரினால் முன்வைக்கப்பட்ட யோசனைக்கு அமைச்சரவை அனுமதி வழங்கியுள்ளது.

அரச நிர்வாக 25/2014 மற்றும் 25/2014/01 ஆகி சுற்றுநிரூபங்கள் வெளியிடப்பட்ட சந்தர்ப்பத்தில் அந்த சுற்றுநிரூபத்தில் குறிப்பிடப்பட்ட விடயங்களை பூர்த்தி செய்ய முடியாமல் போனதன் காரணமாக நிரந்தர நியமனத்தைப் பெற்றுக் கொள்ளமுடியாத ஊழியர்களுக்கு குறித்த நியமனம் வழங்க முடிவு செய்யப்பட்டுள்ளது.

அத்துடன் சுற்றுநிரூபம் வெளியிடப்பட்ட பின்னர் தேவையின் அடிப்படையில் அரச நிறுவனங்களில் ஆரம்ப தரங்களுக்கு உட்பட்ட பதவிகளுக்கு தற்காலிக, நாள் சம்பளம், ஒப்பந்த, நிவாரண, பதில் நியமன, நிவாரண அடிப்படையில் இணைக்கப்பட்டு 2019.09.01 தினத்தன்று 180 நாட்களுக்கு மேலாக சேவையாற்றியுள்ள ஊழியர்கள் உரிய தகுதிகளை பூர்த்தி செய்யும் நிலையில் அவர்களை நிரந்தரமாக்கி, ஓய்வூதியத்துடன் நியமனம் வழங்குவதற்கு முடிவு செய்யப்பட்டுள்ளது.

-தமிழ்வின்-

சமையல் எரிவாயு மற்றும் பால் மாவின் விலைகளில் திடீர் மாற்றம்!!

எரிவாயு மற்றும் பால் மா

சமையல் எரிவாயு சிலிண்டரின் விலை குறைக்கப்படவுள்ளதாக வாழ்க்கை செலவுக் குழு அறிவித்தல் விடுத்துள்ளது.

இந்நிலையில், இன்று நள்ளிரவு முதல் 12.5 கிலோ கிராம் சமையல் எரிவாயு சிலிண்டரின் விலை 250 ரூபாவினால் குறைக்கப்படவுள்ளதாக அறிவிக்கப்பட்டுள்ளது.

அண்மையில் சமையல் எரிவாயு சிலிண்டரின் விலை அதிகரிக்கப்பட்டிருந்த நிலையில், தற்போது மீண்டும் விலை குறைக்கப்படவுள்ளது. அதே வேளை 400 கிரம் பால் மாவின் விலை 20 ரூபாவினால் அதிகரிக்கப்பட உள்ளமை குறிப்பிடத்தக்கது.

ஜனாதிபதித் தேர்தல் திகதி சற்று முன்னர் வெளியிடப்பட்டது!!

ஜனாதிபதித் தேர்தல்

ஜனாதிபதி தேர்தல் எதிர்வரும் நவம்பர் மாதம் 16 ஆம் திகதி நடைபெறும் என சற்று முன்னர் தேர்தல்கள் ஆணைக்குழு அறிவித்துள்ளது.

அடுத்த மாதம் 7 ஆம் திகதி முதல் வேட்பு மனு தாக்கல் செய்ய முடியும் என தேர்தல்கள் ஆணைக்குழு அறிவித்துள்ளது.

இது தொடர்பான வர்த்தமானி அறிவித்தல் இன்று நள்ளிரவு வௌியிடப்படும் என தேசிய தேர்தல்கள் ஆணைக்குழு அறிவித்துள்ளது.

கோர விபத்தில் இருவர் பலி : மூவர் படுகாயம்!!

கோர விபத்தில்..

அனுராதபுரத்தில் ஏற்பட்ட கோர விபத்தில் இருவர் உயிரிழந்ததுடன் மேலும் மூவர் படுகாயம் அடைந்துள்ளனர். ஹபரனையில் வேன் ஒன்றும் ஓட்டோவும் நேருக்கு நேர் மோதிக் கொண்டதில் விபத்து ஏற்பட்டுள்ளது.

அதிக வேகம் காரணமாக இந்த விபத்து இடம்பெற்றுள்ளதாக பொலிஸார் தெரிவித்துள்ளனர். ஹபரனையில் வேன் ஒன்றும் ஓட்டோவும் நேருக்கு நேர் மோதிக் கொண்டதில் விபத்து ஏற்பட்டுள்ளது.

விபத்தில் காயமடைந்தவர்கள் தம்புள்ளை மற்றும் ஹபரனை வைத்தியசாலைகளில் அனுமதிக்கப்பட்டுள்ளதாக பொலிஸார் தெரிவித்துள்ளனர்.