தமிழகத்தில் இரும்பு ஆணியை விழுங்கிய 5 வயது சிறுவனுக்கு தீவிர சிகிச்சையளிக்கப்பட்டு வருகிறது. ஓசூர் அருகே உள்ள போடிச்சிப்பள்ளி கிராமத்தைச் சேர்ந்த கல் உடைக்கும் தொழிலாளியின் மகன் விஸ்வநாத் (5). விஸ்வநாத் வீட்டின் முன்பு விளையாடி கொண்டிருந்த போது ஆணியை விழுங்கியுள்ளான்.

இதனைத் தொடர்ந்து உடனடியாக சிறுவனை அரசு ஆரம்ப சுகாதார நிலையத்திற்கு பெற்றோர்கள் அழைத்துச் சென்றனர். ஆனால் மருத்துவர்களால் ஆணியை எடுக்க முடியவில்லை. இதனையடுத்து மருத்துவர்களின் அறிவுரையின் பேரில் உடனடியாக ஓசூர் அரசு மருத்துவமனையில் சிறுவனை பெற்றோர்கள் அனுமதித்தனர்.

அங்கு அவனுக்கு எக்ஸ்ரே எடுத்து பரிசோதிக்கப்பட்ட போது விஸ்வநாத் விழுங்கிய ஆணி அவனது வயிற்றுப் பகுதியில் சிக்கி கொண்டதை பார்த்து மருத்துவர்கள் அதிர்ச்சியடைந்தனர். இதனையடுத்து, கிருஷ்ணகிரியில் உள்ள அரசு மருத்துவமனைக்கு சிறுவனை மருத்துவர்கள் அனுப்பி வைத்தனர்.

மருத்துவர்கள் விஸ்வநாத்தின் வயிற்றில் இருந்து ஆணியை எடுக்க சிரமப்பட்டு வருவதால் அவன் பெற்றோர் சோகத்திலும், கலக்கத்திலும் உள்ளனர்.

விழும்புரம் மாவட்டத்தில் திருமணமாகி 7 நாட்களில் புதுமாப்பிள்ளை தற்கொலை செய்துகொண்டது சோகத்தை ஏற்படுத்தியுள்ளது.

தனியார் நிறுவனத்தில் பணியாற்றி வரும் 26 வயதான சந்தோஷ் குமார் என்பவரும் மீனாவும் கடந்த 8 ஆண்டுகளாக காதலித்து வந்துள்ளனர். இருவரும் வெவ்வேறு சமூகத்தை சேர்ந்தவர்கள் என்பதால் இவர்களது காதலுக்கு பெற்றோர் எதிர்ப்பு தெரிவித்துள்ளனர்.

பெற்றோரின் எதிர்ப்பை மீறி கடந்த வாரம் இவர்கள் இருவரும் திருமணம் செய்துகொண்டு சென்னை மேற்கு மாம்பலத்தில் வாடகை வீட்டில் குடியேறினர்.

மீனா அசோக் நகரில் உள்ள பள்ளி ஒன்றில் ஆசிரியையாக வேலை செய்து வருகிறார். இந்நிலையில், பெற்றோர் தன் காதல் திருமணத்தை ஏற்கவில்லையே என நினைத்து சந்தோஷ்குமார் சில நாட்களாக மிகுந்த மன வருத்தத்தில் இருந்துள்ளார்.

இதற்கிடையில், தனது மனைவி கோயிலுக்கு சென்ற பிறகு வீட்டில் தனியாக இருந்த சந்தோஷ் குமார் தூக்குபோட்டு தற்கொலை செய்துகொண்டார்.

தனது காதல் கணவரை இழந்துவிட்ட மீனா கதறி அழுதுள்ளார். இது குறித்து பொலிசார் தொடர்ந்து விசாரணை நடத்தி வருகின்றனர்.

தமிழகத்தில் மாமியாரை கத்தியால் குத்தி கொலை செய்த மருமகனை பொலிசார் கைது செய்துள்ளனர். காஞ்சிபுரம் மாவட்டம் ஆதனூர் பகுதியை சேர்ந்தவர் சதீஷ்குமார் (32). இவர் கடந்த 6 வருடங்களுக்கு முன்பு சுஷ்மிதா (24) என்ற பெண்ணை திருமணம் செய்து கொண்டார்.

தம்பதிக்கு 4 வயதில் மகள் உள்ள நிலையில் கடந்த 2 வாரங்களுக்கு முன்னர் சதீஷ்குமாருக்கும், சுஷ்மிதாவிற்கும் இடையே தகராறு ஏற்பட்டது.

இதனால் தனது கணவருடன் கோபித்துக் கொண்டு சுஷ்மிதா தனது தாய் சித்ரா (40), வீட்டிற்கு சென்றுவிட்டார். இதற்கிடையே சதீஷ்குமார் தனது மனைவியை குடும்பம் நடத்த வருமாறு பலமுறை அழைத்தும் அவர் வர மறுத்துள்ளார்.

இந்நிலையில் நேற்று முன்தினம் இரவு சதீஷ்குமார், குடிபோதையில் மாமியார் வீட்டிற்கு சென்று மாமியார் சித்ராவிடம் சுஷ்மிதாவை தன்னுடன் வாழ்வதற்கு அனுப்பி வைக்கும்படி கேட்டுள்ளார்.

அதற்கு சித்ரா தன் மகளை அனுப்பி வைக்க மறுத்துள்ளார். இதனால் சித்ராவிற்கும், சதீஷ்குமாருக்கும் இடையே வாக்குவாதம் ஏற்பட்டது.

இதனால் ஆத்திரமடைந்த சதீஷ்குமார், மறைத்து வைத்திருந்த காய்கறி வெட்டும் கத்தியால் சித்ராவின் வயிற்று, கழுத்துப் பகுதியில் குத்திவிட்டு அங்கிருந்து தப்பி ஓடிவிட்டார்.

இதில் படுகாயமடைந்த, சித்ரா சம்பவ இடத்திலேயே ரத்த வெள்ளத்தில் துடிதுடித்து பரிதாபமாக இறந்தார். இது குறித்து தகவலறிந்த பொலிசார் சம்பவ இடத்துக்கு வந்து சித்ராவின் சடலத்தை கைப்பற்றினார். பின்னர் தலைமறைவாக இருந்த சதீஷ்குமாரை கைது செய்து விசாரணை நடத்தி வருகிறார்கள்.

கூடலூர் மாவட்டத்தில் இளம் வயது காதல் ஜோடி தங்களது காதலுக்கு பெற்றோர் எதிர்ப்பு தெரிவித்த காரணத்தால் உடலை துப்பாட்டாவில் கட்டிக்கொண்டு கிணற்றில் குதித்து தற்கொலை செய்துகொண்டனர்.

ஆலத்தூர் கிராமத்தை சேர்ந்த 10 ஆம் வகுப்பு படித்து வந்த 16 வயதான அபிராமியும், 18 வயதான சிவரஞ்சனும் காதலித்து வந்துள்ளனர். இவர்களது காதல் விவகாரம் அவர்களின் பெற்றோருக்கு தெரிய வந்தது. இதனால் அவர்கள் காதலுக்கு கடும் எதிர்ப்பு தெரிவித்தனர்.

இந்நிலையில் வீட்டை விட்டு வெளியேறிய காதல் ஜோடி அப்பகுதியை சேர்ந்த வேந்தன் என்பவரது விளைநிலம் பகுதியில் இருந்து கிணற்றுக்கு அருகில் பேசிக்கொண்டிருந்தனர். இதனை பார்த்த வேந்தன் அவர்களை விரட்டியுள்ளார்.

இந்நிலையில், இவர்கள் இருவரையும் பெற்றோர் தேடி வந்த நிலையில், தனது விளைநிலத்தில் இவர்களை கடைசியாக பார்த்த வேந்தன், மீண்டும் அங்கு சென்று பார்த்தபோது காதல் ஜோடியின் செருப்புகள் இருந்துள்ளன.

உடனே அவர் பொலிசாருக்கும், சிவரஞ்சன், அபிராமி ஆகியோரது பெற்றோருக்கும் தகவல் தெரிவித்தார். சம்பவ இடத்திற்கு வந்த பொலிசார், சிவரஞ்சனும், அபிராமியும் துப்பட்டாவால் உடலை சுற்றி கட்டிய நிலையில் நீரில் மூழ்கிக் கிடந்தது தெரியவந்ததையடுத்து அவர்களை மீட்டனர்.

இதையடுத்து பொலிசார் 2 பேரின் உடல்களையும் கைப்பற்றி பிரேத பரிசோதனைக்காக திட்டக்குடி அரசு மருத்துவமனைக்கு அனுப்பி வைத்தனர்.

இதுகுறித்து பொலிசார் வழக்குப்பதிவு செய்து விசாரணை நடத்தி வருகின்றனர்.புன்னகை மன்னன் படத்தை மிஞ்சும் அளவுக்கு இந்த இளம் காதலர்களின் தற்கொலை முடிவு இருந்துள்ளது. இவர்களின் சடலத்தை பார்த்து பெற்றோர் கதறி அழுதுள்ளது சோகத்தை ஏற்படுத்தியுள்ளது.

மகாராஷ்டிர மாநிலம் அகமதுநகர் மாவட்டத்தில் தனது மகள் வேறு சமூகத்தை சேர்ந்த நபரை திருமணம் செய்து கொண்ட காரணத்தால் கோபம் கொண்ட தந்தை அவரை உயிருடன் எரித்துக்கொலை செய்த தந்தையின் செயல் அதிர்ச்சியை ஏற்படுத்தியுள்ளது.

ருக்மணியும் மங்கேஷ் ரான்சிங்கும் கடந்த 6 மாதத்திற்கு முன்பு திருமணம் செய்துகொண்டனர். இவர்கள் இருவரும் வெவ்வேறு சமூகத்தை சேர்ந்தவர்கள்.

மங்கேஷ் குடும்பத்தினர் இந்த திருமணத்தை ஏற்றுக்கொண்டனர். ஆனால் ருக்மணி குடும்பத்தினருக்கு இந்த திருமணத்தில் விருப்பம் இல்லை. புதுமணதம்பதியினரை அவ்வப்போது மிரட்டி வந்துள்ளனர்.

இந்நிலையில், ருக்மணியின் பெற்றோர் அவரை ஏப்ரல் 30-ம் தேதி தங்கள் வீட்டுக்கு அழைத்துள்ளனர், தனது பெற்றோரின் அழைப்பை ஏற்று சென்ற ருக்மணியை அவரது பெற்றோர் கொடுமையாக அடித்துள்ளனர்.

இதனால் தனது கணவருக்கு போன் செய்து தன்னை வந்து அழைத்து செல்லுமாறு ருக்மணி கூறியுள்ளார். இதனால் மே 1 ஆம் திகதி மங்கேஷ், ருக்மணியின் வீட்டுக்குச் சென்றுள்ளார்.

ருக்மணியின் சித்தப்பாவும், மாமா உட்பட தந்தை ஆகியோர் ஒன்று சேர்ந்து ருக்மணி – மங்கேஷ் இருவரையும் அவர்கள் தாக்கினர். இருவரையும் கட்டிவைத்து அவர்கள் மீது பெட்ரோல் ஊற்றித் தீவைத்தனர். புதுமணத் தம்பதியான அவர்கள் இருவரும் உயிரோடு எரிந்துகொண்டிருந்தபோது அவர்கள் அனைவரும் கதவை சாத்திவிட்டு வெளியில் காத்திருந்தனர்.

இவர்களின் அலறல் சத்தம் கேட்ட அருகில் இருப்பவர்கள் விரைந்து வந்து ருக்மணி – மங்கேஷ் இருவரையும் புனே சசூன் மருத்துவமனைக்கு கொண்டு சென்றனர். 60-65 சதவீதம் தீக்காயம் அடைந்திருந்த ருக்மணி மே 5-ம் தேதி உயிரிழந்தார்.

40-45 சதவீதம் தீக்காயம் அடைந்த மங்கேஷ் நிலையும் கவலைக்கிடமாகவே உள்ளது. இருவரும் எரிக்கப்பட்ட இடத்தில் இருந்து பெட்ரோல் பாட்டில் உள்ளிட்ட சில பொருள்கள் பறிமுதல் செய்யப்பட்டுள்ளன. விசாரணை நடந்துவருகிறது என்று பொலிசார் தெரிவித்துள்ளனர்.

ருக்மணியின் பெற்றோர் தொடர்ந்து மிரட்டல் விடுத்து வருகிறார்கள் என பொலிசாரிடம் புகார் தெரிவித்தும் அவர்கள் அலட்சியம் காட்டினர் என மைத்துனர் மகேஷ் கூறியுள்ளார்.

இந்த சம்பவம் தொடர்பாக, ருக்மணியின் மாமா கணஷியாம் மற்றும் சித்தப்பா சுரேந்திர பாபுலால்பாரதி ஆகிய இருவரும் கைது செய்யப்பட்டுள்ளனர். ருக்மணியின் தந்தை ராம ராம்பால் பாரதியா தேடப்பட்டு வருகிறார் என பொலிசார் தெரிவித்துள்ளனர்.

குவைத் விமானநிலையத்தில் விமானத்தின் சக்கரத்தில் சிக்கி இந்தியர் ஒருவர் பலியான சம்பவம் அங்கு சோகத்தையும் அதிர்ச்சியையும் ஏற்படுத்தியுள்ளது.

மரணமடைந்த நபர் கேரள மாநிலம் திருவனந்தபுரத்தைச் சேர்ந்த ஆனந்த் ராமச்சந்திரன் என தெரியவந்துள்ளது. குவைத் ஏர்வேஸின் தொழில்நுட்ப பிரிவில் இவர் பணியாற்றிவருகிறார். இந்தச் சம்பவம் குவைத் சர்வதேச விமானநிலையத்தில் நிகழ்ந்துள்ளது.

சம்பவத்தின்போது விமானம் காலியாக இருந்துள்ளது. விமான நிலையத்தின் 4 ஆம் முனையத்திலிருந்து விமானத்தை அதன் நிறுத்துமிடத்துக்கு எடுத்துச் சென்றுள்ளனர்.

அப்போது விமானத்துக்கு அருகில் நின்று கொண்டு அதனை வேடிக்கைப் பார்த்துக் கொண்டிருந்த ஆனந்த் விமானத்தின் சக்கரத்தில் சிக்கி பரிதாபமாக பலியானதாக குவைத் ஏர்வேஸ் தெரிவித்துள்ளது.

இவரது உடல் புதன் கிழமை அவரது சொந்த ஊருக்கு வந்து சேரும் என்று எதிர்பார்க்கப்படுகிறது. இந்த விவகாரம் தொடர்பில் தேவையான விசாரணைகள் முடுக்கி விடப்பட்டுள்ளன. ஆனந்த் குவைத் ஏர்வேஸில் 2009 முதல் பணியாற்றி வருகிறார் என கூறப்படுகிறது.

இச் சம்பவம் ஆனந்த் ராமச்சந்திரனின் நெருங்கிய உறவினர்கள், குடும்பத்தினர் மற்றும் நண்பர்களிடையே அதிர்ச்சியையும் சோகத்தையும் ஏற்படுத்தியுள்ளது.