நாட்டில் நிலவும் பாதுகாப்பு நிலைமைகளுக்கு மத்தியில் ஜனாதிபதி மைத்திரிபால சிறிசேனவின் புதல்வர் தஹாம் சிறிசேனவின் திருமண வைபவம் இன்று கொழும்பு ஹில்டன் ஹோட்டலில் நடைபெற்றது.

எல்கார்டோ நிறுவனத்தின் உரிமையாளரான ரொஹான் வீரரத்னவின் புதல்வியான நிபுனி என்ற பெண்ணை தஹாம் சிறிசேன திருமணம் செய்துக்கொண்டார்.

இந்த திருமணம் கொழும்பு ஷெங்கீரிலா ஹோட்டலில் நடத்தப்படவிருந்தது. அந்த ஹோட்டல் ஈஸ்டர் தினத்தில் பயங்கரவாத குண்டு தாக்குதல் நடத்தப்பட்டதால், திருமண வைபவம் ஹில்டன் ஹோட்டலில் நடத்தப்பட்டது.

திருமணத்தை முன்னிட்டு ஹோட்டலுக்கு அருகில் பாதுகாப்பு பலப்படுத்தப்பட்டிருந்தது. தண்ணீர் தாரை தாக்குதல் நடத்தும் வாகனங்களும் நிறுத்தப்பட்டிருந்தன. இந்த பாதுகாப்பு திட்டம் காரணமாக கொழும்பு கோட்டை பகுதியில் போக்குவரத்து நெரிசல் ஏற்பட்டுள்ளது.

நாட்டில் பல்வேறு பிரதேசங்களிலிருந்து மீட்கப்படும் வாள்கள் உள்ளிட்ட ஏனைய ஆயுதங்கள் தொடர்பான காணொளி பதிவுகளை ஒளிபரப்ப வேண்டாம் என அரசாங்க தகவல் திணைக்களம் சகல ஊடக நிறுவனங்களுக்கும் அறிவித்துள்ளது.

கடந்த 21 ஆம் திகதி உயிர்த்த ஞாயிறு தினத்தில் மேற்கொள்ளப்பட்ட தீவிரவாத தாக்குதலை தொடர்ந்து நாடு பூராகவும் மேற்கொள்ளப்பட்டு வரும் சோதனை நடவடிக்கையின் மூலம் வாள்கள் உள்ளிட்ட ஏனைய ஆயுதங்கள் மீட்கப்பட்டு வருகின்றன.

இது போன்ற காணொளி பதிவுகள் ஊடக நிறுவனங்களில் காணப்பட்டால் அவற்றை ஒளிபரப்ப வேண்டாம் என்பதே அரசாங்கத்தின் கோரிக்கை என அதன் பணிப்பாளர் நாயகம் நாலக்க கலுவெவ தெரிவித்துள்ளார்.

நாட்டில் கடந்த 21ஆம் திகதி இடம்பெற்ற தாக்குதல்களின் பின் மதங்களுக்கு இடையே முறுகல் நிலையை ஏற்படுத்தும் வகையிலான பதிவுகளை இட்ட பேஸ்புக் கணக்குகளை முடக்க நடவடிக்கை எடுக்கப்பட்டுள்ளது.

இதன் அடிப்படையில் 360 இற்கும் மேற்பட்ட பேஸ்புக் கணக்குகள் முடக்கப்படவுள்ளதாகவும், உண்மைக்கு புறம்பான தகவல்களை சமூக வலைத்தளங்களில் பதிவிட்ட 37 பேர் அடையாளம் காணப்பட்டுள்ளதாகவும் இது தொடர்பில் விசாரணை செய்யும் குழு தெரிவித்துள்ளது.

அவற்றில் பெரும்பாலனவை, தடை செய்யப்பட்ட தேசிய தௌஹீத் ஜமாத் அமைப்பின் உறுப்பினர்களுடையது என தெரியவந்துள்ளது.

சமூக வலைத்தளங்கள் ஊடாக தவறான பிரச்சாரங்களை பரப்புவோரைக் கண்டறிவதற்கு 24 மணிநேர கண்காணிப்பு நடவடிக்கைகள் முன்னெடுக்கப்படுவதாகவும் தெரிவிக்கப்படுகிறது.

அவ்வாறான கணக்குகளை முடக்குவதுடன் சம்பந்தப்பட்டவர்களை சட்டத்தின் முன் நிறுத்துவதற்கும் நடவடிக்கை எடுக்கப்பட்டுள்ளதாக சுட்டிக்காட்டப்பட்டுள்ளது.

பாடசாலைகளில் மாணவர்களின் வருகையை குறைக்கும் வகையில் பாதுகாப்பு தொடர்பான போலி பிரச்சாரங்களில் ஈடுபடுபவர்கள் தொடர்பில் தராதரம் பாராது நடவடிக்கை எடுக்கப்படும் என கல்வி அமைச்சு எச்சரிக்கை விடுத்துள்ளது.

மாணவர்களின் வருகையை கவனத்தில் கொள்ளாது அனைத்து ஆசிரியர்களையும் கல்வி நடவடிக்கைகளை முன்னெடுக்குமாறு கல்வி அமைச்சின் செயலாளர் நிஹால் ரணசிங்க அறிவித்துள்ளார்.

மாணர்களின் பாதுகாப்பு நடவடிக்கைகள் உறுதிப்படுத்தப்பட்டுள்ள போதிலும் வருகையில் காணப்படும் குறைபாடு காரணமாக பாடத்திட்டங்களை பூர்த்தி செய்வதில் சிக்கல் ஏற்பட்டுள்ளதாகவும் அவர் கூறியுள்ளார்.

இதேவேளை, பாடசாலைக்கு சமூகமளிக்கும் மாணவர்களுக்கான கல்வி நடவடிக்கைகள் உரிய முறையில் முன்னெடுக்கப்பட வேண்டும் என்றும் சுட்டிக்காட்டியுள்ளார்.

கொழும்பில் நடத்தப்பட்ட தற்கொலை குண்டுத்தாக்குதலில் காயமடைந்த நிலையில் சிகிச்சை பெற்று வந்த அமெரிக்க அதிகாரி ஒருவர் உயிரிழந்துள்ளார்.

Chelsea Decaminada என்ற பெண் அதிகாரி கடந்த 4ம் திகதி உயிரிழந்துள்ளதாக அறிவிக்கப்பட்டுள்ளது. Chelsea மீண்டு வருவார் என மிகுந்த எதிர்பார்ப்பு காணப்பட்டது. எனினும் அவரை இழந்து விட்டோம். இதிலிருந்து மீண்டு வர வேண்டும் என அவரது பெற்றோருக்காக பிரார்த்தனை செய்வதாக அமெரிக்க திணைக்களம் குறிப்பிட்டுள்ளது.

பொதுத்துறை ஆலோசகரின் அலுவலகத்தின் வணிக சட்ட மேம்பாட்டு திட்டத்தில் Chelsea திறமையான சர்வதேச திட்ட நிபுணராக செயற்பட்டு வந்தார் என்று அமெரிக்க வர்த்தக திணைக்களம் குறிப்பிட்டுள்ளது.

அவர் தனது வாழ்க்கையை பொது பணிக்காக அர்ப்பணித்த ஒருவராகும். அத்துடன் அவர் தனது நாட்டிற்காக அர்ப்பணிப்புடன் பணியாற்றினார் என திணைக்களம் குறிப்பிட்டுள்ளது.

மட்டக்களப்பில் சிசுவின் சடலம் ஒன்று நேற்று காலை பொலிஸாரால் மீட்கப்பட்டிருந்தது.

மட்டக்களப்பு – வாழைச்சேனை, வாகனேரி குடாமுனைக் கல் பகுதியில் பொதுமக்கள் வழங்கிய தகவலின் அடிப்படையில் பொலிஸார் சடலத்தை மீட்டுள்ளனர்.

இந்நிலையில் அப்பகுதியைச் சேர்ந்த கணவனால் கைவிடப்பட்ட 11 வயதான சிறுமியின் தாய் சந்தேகத்தின் பேரில் கைது செய்யப்பட்டுள்ளார்.

அத்துடன் குறித்த சிறுமி இச் சம்பவம் தொடர்பான மேலதிக விசாரணைக்காக வாழைச்சேனை பொலிஸ் நிலையத்தில் தடுத்து வைக்கப்பட்டுள்ளார்.

இச்சம்பவம் தொடர்பான மேலதிக விசாரணைகளை நீதிமன்றத்தின் உத்தரவின் பிரகாரம் மேற்கொண்டு வருவதாக வாழைச்சேனை பொலிஸார் தெரிவித்துள்ளனர்.

மாவனெல்லையில் ஐ.எஸ் பயங்கரவாதிகளின் ஆயுத களஞ்சியசாலை ஒன்று கண்டுபிடிக்கப்பட்டுள்ளது.

ஹிங்குல பகுதியிலுள்ள வர்த்தக நிலையம் ஒன்றில் இருந்து 700 கிலோ கிராம் வெடி மருந்துக்கள் படையினரால் மீட்கப்பட்டுள்ளன.

அத்துடன் பயங்கரவாத அமைப்பான தேசிய தௌஹீத் அமைப்புக்கு சொந்தமான இறுவட்டுக்களும் மீட்கப்பட்டுள்ளன.

கேகாலை இராணுவ முகாமிற்கு கிடைத்த தகவலுக்கு அமைய ஆயுத களஞ்சியம் கண்டுபிடிக்கப்பட்டுள்ளது.

இலங்கையின் பல்வேறு பகுதிகளில் ஐ.எஸ் பயங்கரவாத அமைப்புக்கு சொந்தமான ஆயுதங்கள் மற்றும் உடமைகள் என்பன கண்டுபிடிக்கப்பட்டுள்ளமை குறிப்பிடத்தக்கது.

-தமிழ்வின்-

மட்டக்களப்பு – காத்தான்குடி, புதுக்குடியிருப்பு பகுதியில் நேற்றிரவு இடம்பெற்ற வாகன விபத்தில் இருவர் படுகாயமடைந்துள்ளதாக பொலிஸார் தெரிவித்துள்ளனர்.

புதுக்குடியிருப்பு பிரதான வீதியில் எரிபொருள் நிரப்பு நிலையத்திற்கு முன்பாகவுள்ள மின்கம்பத்தில் மினிரக வாகனம் மோதி விபத்து ஏற்பட்டுள்ளது. இதனால் எரிபொருள் நிரப்பு நிலையத்தின் பெயர் பலகையும், மின்கம்பமும் சேதமடைந்துள்ளது.

மினிரக வாகனம் வேகக்கட்டுப்பாட்டை இழந்தமையினாலேயே இவ்விபத்து ஏற்பட்டிருக்கலாம் என தெரிவிக்கப்படுகிறது.

இவ்விபத்தில் படுகாயமடைந்த வாழைச்சேனையைச் சேர்ந்த 30 வயதுடைய நௌசாத், 29 வயதுடைய இர்ஷாத் மட்டக்களப்பு போதனா வைத்தியசாலையில் அனுமதிக்கப்பட்டுள்ளனர்.

இவ்விபத்து தொடர்பாக காத்தான்குடி போக்குவரத்து பொலிஸார் விசாரணைகளை மேற்கொண்டு வருகின்றனர்.