தமிழகத்தில் தாயும் தந்தையும் அடுத்தடுத்து உயிரிழந்த நிலையில் அவர்களின் இரண்டு பிள்ளைகள் சரியான ஆதரவு இல்லாமல் தவித்து வருகின்றனர்.

மதுரையை சேர்ந்தவர் சந்தானம் (45). ஜோதிடர். இவர் மனைவி செல்லம்மாள் (40). தம்பதிக்கு ஜெயச்சந்திரன் (15), ஜெயந்தி (13) என இரு பிள்ளைகள் உள்ளனர். மஞ்சள்காமாலையால் பாதிக்கப்பட்ட செல்லம்மாள் சிகிச்சை பலனின்றி கடந்த 4ம் திகதி உயிரிழந்தார்.

சர்க்கரை நோயாளியான சந்தானம் செல்லம்மாள் பிரிவை தாங்கமுடியாமல் மனவேதனையில் இருந்த நிலையில் அந்த சோகத்திலேயே 6ம் திகதி மரணமடைந்தார்.

இதனால் தம்பதியின் பிள்ளைகள் ஆதரவற்று தவித்தார்கள். ஜெயச்சந்திரன், ஜெயந்தியின் தாத்தா, பாட்டி அவர்களை பராமரித்து வருகிறார்கள். வயதான இவர்களால் சிறார்களின் பராமரிப்பு செலவுகளை ஏற்க முடியவில்லை.

இதனால் நல்ல உள்ளம் கொண்டோர் அவர்களுக்கு உதவ கோரிக்கை வைக்கப்பட்டுள்ளது. பெற்றோரை இழந்து வாடும் ஜெயச்சந்திரன் மற்றும் ஜெயந்தி கூறுகையில், பெற்றோரை இழந்த எங்களால் விடுதியில் சேர்ந்து தனித்தனியாக வாழ இயலாது.

அப்பா, அம்மா வாழ்ந்த வீட்டில் இருந்தே கல்வியை தொடர விரும்புகிறோம், மேல்படிப்பு படிக்க ஆசை என கூறியுள்ளனர்.

தலைமறைவான தாய்

தமிழகத்தில் தனது குழந்தையை பெண்ணிடம் பொய் சொல்லி ஒப்படைத்துவிட்டு தலைமறைவான தாயை பொலிசார் தேடி வருகின்றனர். ஈரோட்டை சேர்ந்தவர் மகேஸ்வரி (65). இவர் கடந்த மாதம் 19ம் திகதி கண் அறுவை சிகிச்சைக்காக அரசு மருத்துவமனையில் சேர்ந்தார்.

சிகிச்சை முடிந்து சில நாட்கள் உள்நோயாளியாக சிகிச்சை பெற்று வந்தார். அப்போது பக்கத்து படுக்கையில் இருந்த வேணி என்பவர், மகேஸ்வரி மற்றும் அவருடைய மகளுடன் பழகி வந்தார். சம்பவத்தன்று வேணி, தனது அப்பாவின் கண் அறுவை சிகிச்சைக்காக தஞ்சாவூர் செல்வதாகவும், அதுவரை தனது மகன் பிரகதீசை (5) பார்த்து கொள்ளுமாறும் மகேஸ்வரியின் மகளிடம் கூறி உள்ளார்.

அதைத்தொடர்ந்து அவர் தனக்கு தெரிந்த சிவா என்பவரின் மனைவி சாலேத் (22) என்பவரை அறிமுகம் செய்து வைத்து, குழந்தையை இவர் பார்த்துக்கொள்வார் என்று வேணியிடம் கூறியுள்ளார்.

பின்னர் வேணி தனது மகனை சாலேத்திடம் ஒப்படைத்துவிட்டு, நாளை வந்து குழந்தையை வாங்கிச் செல்வதாக கூறிவிட்டு அங்கிருந்து சென்றுவிட்டார். ஆனால் ஒருவாரம் ஆகியும் வேணி குழந்தையை வாங்க வராததால் சந்தேகமடைந்த சாலேத் இதுபற்றி பொலிஸ் புகார் அளித்தார்.

விசாரணையில், குழந்தையை விட்டு சென்ற வேணிக்கு கடன் பிரச்சினை இருந்து வந்ததும், அவரால் குழந்தையை வளர்க்க முடியாததால் சாலேத்திடம் விட்டுச்சென்றதும் தெரியவந்தது. இதையடுத்து வேணியை பொலிசார் தேடி வருகிறார்கள்.

மனைவி எடுத்த அதிர்ச்சி முடிவு

சென்னை ஆவடி பகுதியில் மம்தா என்ற பெண்மணி தனது மகனின் பிறந்தநாளுக்கு கணவர் ஆடை வாங்கிகொடுக்காத காரணத்தால் தற்கொலைக்கு முயன்றுள்ள சம்பவம் பரபரப்பை ஏற்படுத்தியுள்ளது.

வட மாநிலத்தை சேர்ந்த பானு பிரசாத் என்பவர் கடந்த 6 ஆண்டுகளாக ஆவடி பகுதியில் தனது மனைவி மம்தா மற்றும் 4 வயது மகனுடன் வசித்துவந்துள்ளார். பானிபூரி விற்கும் தொழில் செய்து வந்த இவரது மகன் ராஜூவுக்கு நேற்று பிறந்தநாள் என்பதால் புது ஆடை வாங்கி தருமாறு மம்தா கூறியுள்ளார்.

ஆனால், தன்னிடம் பணம் இல்லை என்பதால், தாமதமாக வாங்கி தருகிறேன் என கூறியுள்ள்ளார். இதனால் கணவன் மனைவிக்கிடையே பிரச்சனை ஏற்பட்டுள்ளது.

இதையடுத்து பானுபிரசாத் பானிபூரி விற்பதற்காக வெளியில் சென்றுவிட்டார். பின்னர் இரவு 9 மணிக்கு வீட்டுக்கு வந்த அவர் தனது மனைவி எடுத்துள்ள முடிவை பார்த்து கதறி அழுதுள்ளார்.
மனைவி மம்தாவும், அவரது மகன் ராஜ் இருவரும் கழுத்து அறுக்கப்பட்ட நிலையில் உயிருக்கு போராடிக்கொண்டிருந்தனர்.

இதையடுத்து அக்கம்பக்கத்தினர் ஓடிவந்து உயிருக்குப் போராடிக்கொண்டிருந்த 2 பேரையும் மீட்டு, சென்னை கீழ்ப்பாக்கம் அரசு மருத்துவமனைக்கு சிகிச்சைக்காக சேர்த்தனர்.

விசாரணையில், பானு பிரசாத் வெளியே சென்ற பிறகு கணவர் மேல் உள்ள ஆத்திரத்தில் விரக்தி அடைந்து காய் நறுக்கும் கத்தியை எடுத்து மம்தா தனது மகன் ராஜூவின் கழுத்து, வாய், கை ஆகிய பகுதிகளில் அறுத்து விட்டு தானும் கழுத்தை அறுத்துக்கொண்டு தற்கொலைக்கு முயன்றது தெரியவந்தது.

சடலமாக கிடந்த இளம் ஆசிரியர்

சென்னையில் தனியார் பள்ளியின் வகுப்பறையில் இளம் வயது ஆசிரியர் தூக்கில் தொங்கிய நிலையில் சடலமாக மீட்கப்பட்டுள்ள சம்பவம் பரபரப்பை ஏற்படுத்தியுள்ளது. நீலாங்கரையில் தனியார் பள்ளி ஒன்று அமைந்துள்ள நிலையில் இன்று வழக்கம் போல மாணவர்கள் வந்த போது எட்டாம் வகுப்பறையில் ஆசிரியர் அந்தோணி ஜெனிபர் என்பவர் தூக்கில் சடலமாக தொங்கியபடி இருந்தார்.

இதை பார்த்து அதிர்ச்சியடைந்த மாணவர்கள் ஆசிரியர்களுக்கு தகவல் கொடுத்த நிலையில் பின்னர் பொலிசாருக்கு தகவல் சொல்லப்பட்டது. சம்பவ இடத்துக்கு வந்த பொலிசார் சடலத்தை கைப்பற்றிவிட்டு பிரேத பரிசோதனைக்கு அனுப்பினர்.

அந்தோணி தூக்கில் தொங்கிய வகுப்பறையின் தரையில் ரத்தத்துளிகள் சிதறிக்கிடந்த நிலையில் அவர் உடலில் எந்த காயங்களும் இல்லை என தெரியவந்தது.

பொலிசார் கூறுகையில், திருமணமாகாத அந்தோணி 8-ம் வகுப்பு, 9-ம் வகுப்புக்கு பாடம் நடத்திவந்தார், அவர் 8ஆம் வகுப்பறையில் தான் தங்கியிருந்தார். உடலில் காயங்கள் இல்லாத சமயத்தில் எப்படி ரத்தத் துளிகள் அங்கு சிதறிக்கிடக்கின்றன என்று விசாரித்து வருகிறோம் என கூறியுள்ளனர்.

முதற்கட்ட விசாரணையில் பள்ளியில் ஆசிரியர்கள் மற்றும் மாணவர்களிடம் அந்தோணிக்கு எந்தவொரு பிரச்சனையும் இல்லை என தெரியவந்துள்ளது. சம்பவம் குறித்து பொலிசார் தீவிரமாக விசாரணை நடத்தி வருகின்றனர்.

கணவர் வாக்குமூலம்

கிருஷ்ணகிரி மாவட்டத்தில் கவுதமி என்ற பெண் கொலை செய்யப்பட்ட விவகாரத்தில் கணவர் கைது செய்யப்பட்டுள்ள நிலையில் கொலைக்கான காரணம் குறித்து வாக்குமூலம் அளித்துள்ளார். ராஜஸ்தான் மாநிலம் ஜோத்பூரில் ராணுவ வீரராக பணிபுரிந்து வருகிறார் ராஜேஷ். இவருக்கும் கவுதமி என்ற பெண்ணுக்கு திருமணமாகி ஒரு மகன் மற்றும் மகள் உள்ளனர்.

இந்நிலையில் தலையணையால் முகத்தை அமுக்கி கவுதமி கொலை செய்யப்பட்டு கிடந்த நிலையில், விடுமுறையில் ஊருக்கு வந்திருந்த கணவரிடம் விசாரணை நடத்தியதில் அவர் கொலை செய்தது தெரியவந்துள்ளது.

கொலை குறித்து அவர் பொலிசில் அளித்துள்ள வாக்குமூலத்தில், எனக்கும் கலைவாணி என்ற பெண்ணுக்கும் கடந்த ஒன்றரை ஆண்டுகளாக கூடா நட்பு இருந்தது. இதுகுறித்து கவுதமி அறிந்து என்னை கண்டித்தார்.

உனது மனைவி உயிரோடு இருக்கும்வரை நமக்கும் சந்தோஷம் இருக்காது, எனவே அவளை கொலை செய்துவிடு என கலைவாணி என்னிடம் தெரிவித்தாள். இதற்காக நான் விடுமுறை எடுத்து ஜோத்பூரில் இருந்து விமானத்தில் பெங்களூருவிற்கு வந்தேன்.

எனது குழந்தைகள் 2 பேரும் அவருடைய தாத்தா, பாட்டி வீட்டில் இருந்தனர். எனது மனைவியுடன் சிறிதுநேரம் பேசிக்கொண்டிருந்துவிட்டு, அவள் தூங்கியபின்னர் தலையணையை வைத்து முகத்தில் அமுக்கி கொலை செய்தேன். அதன்பின்னர், அவள் கழுத்தில் அணிந்திருந்த நகைகளை எடுத்துக்கொண்டு சென்னை வந்து அங்கிருக்கும் சேட் கடையில் விற்றேன். நகைக்காக இந்த கொலை நடந்ததாக பொலிசாரை திசை திருப்ப திட்டமிட்டேன் என வாக்குமூலம் அளித்துள்ளார்.