தூக்கில் தொங்கிய பெண் சிறைக்காவலர்

திருச்சியில் பெண் சிறைக்காவலர் தற்கொலை செய்துகொண்ட வழக்கில், காதலன் உட்பட மூன்று பேர் மீது வழக்கு பதிவு செய்து பொலிஸார் தீவிரமாக தேடி வருகின்றனர். கடலூர் மாவட்டம் பெரியகாட்டுபாளையத்தை சேர்ந்த செல்லமுத்து என்பவரின் மகள் செந்தமிழ்செல்வி (23).

இவர் திருச்சி காந்தி மார்க்கெட் மகளிர் தனி கிளை சிறையில் 2ம் நிலை வார்டனாக பணிபுரிந்து வந்தார். இவரும் திருச்சி மத்திய சிறையில் வார்டனாக பணிபுரிந்து வரும் வெற்றிவேல் (24) என்பவரும் காதலித்து வந்துள்ளனர். காவலர் பயிற்சி மேற்கொண்டபொழுது இருவருக்கும் இடையே பழக்கம் ஏற்பட்டு காதலாக மாறியிருக்கிறது.

இந்த விவகாரம் அதே சிறையில் வார்டனாக உள்ள வெற்றிவேலின் அண்ணன் கைலாசம் மற்றும் மகளிர் சிறையில் வார்டனாக பணிபுரிந்து வரும் அவருடைய மனைவி ராஜ சுந்தரி ஆகியோருக்கு தெரியவந்துள்ளது.

செந்தமிழ்செல்வி வேறு சமூகத்தை சேர்ந்த பெண் என்பதால், இருவரும் சேர்ந்து ஜாதி பெயரை சொல்லி திட்டியதாக தெரிகிறது. மேலும், வெற்றிவேல் தன்னுடைய காதலை முறித்துக்கொண்டு வேறு ஒரு பெண்ணை திருமணம் செய்துகொள்ளவும் தயாராகியுள்ளார்.

இதனால் மனமுடைந்த செந்தமிழ்செல்வி நேற்றைக்கு முன்தினம் தூக்குபோட்டு தற்கொலை செய்துகொண்டார். இந்த விவகாரமானது பெரும் பரபரப்பை ஏற்படுத்தியிருந்த நிலையில், செந்தமிழ்செல்வியின் பெற்றோர் கொடுத்த புகாரின் அடிப்படையில் பொலிஸார் வழக்கு பதிவு செய்துள்ளனர்.

மேலும் தலைமறைவாக உள்ள வெற்றிவேல், கைலாசம் மற்றும் ராஜசுந்தரியை பிடிக்க தனிப்படை அமைத்து பொலிஸார் தேடி வருகின்றனர். இதற்கிடையில் செந்தமிழ்செல்வியின் அறையில் சோதனை மேற்கொண்ட பொலிஸார், ‘என் சாவுக்கு யாரும் காரணமில்லை. எனக்கு வாழ பிடிக்கவில்லை’ என அவர் டைரியில் எழுதியிருந்ததாக பொலிஸார் கூறியுள்ளனர்.

பெற்ற மகளை கொலை செய்த தந்தை

ஆந்திர மாநிலத்தில் வேறு சமுகத்தை சேர்ந்த நபரை காதலித்ததால், பெற்ற மகளை தந்தையே துடிதுடிக்க கழுத்தை நெரித்து கொலை செய்துள்ள சம்பவம் பெரும் பரபரப்பை ஏற்படுத்தியுள்ளது. ஆந்திர மாநிலம் பிரகாசம் மாவட்டம் Kothapalem கிராமத்தை சேர்ந்த கோட்டா வெங்கட் ரெட்டி என்பவருடைய மகள் வைஷ்ணவி (20). தனியார் கல்லூரி ஒன்றில் படித்து வரும் வைஷ்ணவி, சக கல்லூரி மாணவர் ஒருவரை சில வருடங்களாகவே காதலித்து வந்துள்ளார்.

இதனை அறிந்துகொண்ட வெங்கட், பலமுறை மகளை கண்டித்து பார்த்துள்ளார். ஆனால் அதனை பொருட்படுத்தாத வைஷ்ணவி, தந்தையின் வார்த்தையை காதில் வாங்காமல் எதிர்த்து பேசி வந்துள்ளார். இந்த நிலையில் இன்று கல்லுரியிலிருந்து வேகமாகவே வைஷ்ணவி உடல்நிலை சரியில்லை எனக்கூறிவிட்டு வீடு திரும்பியுள்ளார்.

வீட்டிற்கு வந்த உடனே, தந்தைக்கும்-மகளுக்கும் இடையில் வாக்குவாதம் ஏற்பட்டுள்ளது. உங்களின் அனுமதி இல்லாமலே காதலனை திருமணம் செய்துகொள்வேன் என வைஷ்ணவி கூறியுள்ளார். இதில் ஆத்திரமடைந்த வெங்கட், திடீரென மகளின் கழுத்தை பிடித்து நெரித்து கொலை செய்துள்ளார்.

இந்த சம்பவம் அறிந்து வந்த பொலிஸார் வைஷ்ணவியின் உடலை கைப்பற்றி பிரேத பரிசோதனைக்கு அனுப்பி வைத்தனர். மேலும், வெங்கட்டை கைது செய்துள்ள பொலிஸார் ஆணவக்கொலையா? என்பது குறித்து விசாரணை மேற்கொண்டு வருவதாக தெரிவித்துள்ளனர்.

திருநங்கை அருணா

தமிழகத்தில் அன்று பாலியல் தொழில் செய்து வந்த திருநங்கை இன்று அதிலிருந்து மீண்டு தன்னுடைய சமூகத்திற்கு போராடி வருகிறார். நாமக்கல் மாவட்டம் அருணகிரி சுள்ளிப்பாளையம் பகுதியைச் சேர்ந்தவர் அருணா. பள்ளியில் படித்து கொண்டிருந்த இவருக்கு, ஐந்தாம் வகுப்பு படிக்கும் போது, தன் உடலில் ஏதோ மாற்றம் ஏற்படுவதை உணர்ந்துள்ளார்.

ஆனால் அப்போது இதற்கான மாற்றம் குறித்து அவருக்கு சரியாக தெரியவில்லை. இவரின் நடிவடிக்கையை பார்த்து அவரது பெற்றோர் திட்டியுள்ளனர். அதுமட்டுமின்றி பள்ளியில் பலரும் இவரை சீண்டியுள்ளனர். பத்தாவது முடித்து நாமக்கல் மாவட்டத்தில் முதல் மார்க் பெற்ற போதும் பலரின் கேலி, கிண்டல்களால், அவரால் படிப்பை தொடர முடியவில்லை.

இதனால் 1987-ஆம் ஆண்டு சென்னைக்கு ஓடி வந்த இவர், அங்கு இவர் சமூகத்துடன் சேர்ந்து கொண்டார். முதலில் கடைகளில் ஏறி காசு வாங்கிய இவர், அதன் பின் ஒரு வருடம் கழித்து அறுவை சிகிச்சை செய்துள்ளார். அதன் பின் தன்னுடைய அன்றாட வாழ்க்கைக்காக பாலியல் தொழிலில் இறங்கியுள்ளார். அப்போது இதைத் தவிர அவருக்கு வேறு வழியில்லை என்பதால், இந்த தொழிலில் இறங்கியுள்ளார்.

அப்போது பாலியல் ரீதியாக பல துன்புறுத்தல்களை அனுபவித்துள்ள இவர், நாள் ஒன்றிற்கு இத்தனை பேர் தான் என்று கணக்கில்லாமல் வாழ்ந்து வந்துள்ளார். வலி ஏற்படும் போது, மாத்திரைகள் கூட போட நேரமில்லாம தவித்து வந்துள்ளார். இப்படி இவரின் வாழ்க்கை சென்று கொண்டிருந்த போது, 1989-ல் தனியாக நடந்து சென்று கொண்டிருந்த போது, நான்கைந்து பேர் இவரை அழைத்து பாலியல் தொழிலுக்கு அழைத்துள்ளனர்.

ஆனால் இவர் வர மறுத்ததால், அவர்கள் அருணாவை சர்மாரியாக தாக்கியுள்ளனர். அதன் பின் அவர் சமூகத்தைச் சேர்ந்த சிலர் மீட்டு மருத்துவமனையில் அனுமதித்துள்ளனர். அந்தச் சம்பவத்தின் காரணமாகத்தான், தன் சமூகத்திற்கு ஏதாவது செய்ய வேண்டும் என்று முடிவு செய்துள்ளார். இது குறித்து அவர் கூறுகையில், இப்போது எல்லாம் திருநங்கைக்கு பிரச்சனை என்றால் 200 பேர் வருகிறார்கள். அப்போது இது எல்லாம் கிடையாது.

நான் அடைந்த கஷ்டத்திற்கு பின் 1998-ல் மகாராஷ்ட்ராவில் ஒரு நிறுவனத்தில் பகுதி நேர களப்பணியாளரா வேலைக்குச் சேர்ந்தேன். தேவதாசி பெண்களுடைய உரிமைக்காக அவங்களுடைய மறுவாழ்வுக்காக வேலை பார்த்தேன். அப்படியே படிப்படியா பதவி உயர்வு பெற்று ஆலோசகரா அதே நிறுவனத்தில் வேலை பார்த்தேன். 2002-ல் மீண்டும் தமிழகத்துக்கு வந்தேன்.

இங்கே திருநங்கைகள் உரிமைக்காக ஓர் அமைப்பைத் தொடங்கினேன். தமிழ்நாடு முழுக்க பாலியல் தொழில் செய்கிற பெண்கள், திருநங்கைகள் இவர்களுக்கான நோய் தடுப்பு விழிப்பு உணர்வு பணியையும், அவங்களுடைய உரிமைகள் மற்றும் மறுவாழ்வுக்காகவும் வேலை பார்த்தேன்.

2012-க்குப் பிறகு தென்னிந்திய திருநங்கையர் கூட்டமைப்பின் ஒருங்கிணைப்பாளரா இன்று வரை வேலை பார்த்து கொண்டிருக்கிறேன், திருநங்கைகள் உரிமைக்காக தொடர்ந்து போராடிக் கொண்டிருக்கிறேன் என்று கூறி முடித்துள்ளார்.

போராட்டத்தில் இறங்கிய பெண்

தமிழகத்தில் எட்டு மாத கைக் குழந்தையுடன் போராட்டத்தில் ஈடுபட்ட பெண்ணின் குடும்பத்தார் என்னை ஆண்மை இல்லாதவன் என்று திட்டியதாக கணவன் கூறியுள்ளார்.

சென்னை நொளம்பூரில் கணவருடன் சேர்த்து வைக்கக்கோரி 8 மாதக் கைகுழந்தையுடன் இன்ஜினீயர் பிரணிதா தர்ணா போராட்டத்தில் ஈடுபட்ட சம்பவம் பரபரப்பை ஏற்படுத்தியுள்ள நிலையில், அந்த பெண் எதற்காக போராட்டத்தில் இறங்கினார்? உண்மையில் என்ன நடந்தது என்பது குறித்து அந்த பெண்ணின் தந்தை பவலணனிடம் பிரபல தமிழ் ஊடகம் பேட்டி எடுத்துள்ளது.

அப்போது அவர் என்னுடைய மகள் பிரணிதாவுக்கும், தினேஷுக்கும் கடந்த 2009-ஆம் ஆண்டு திருமணம் நடந்தது. இன்ஜினியரான என் மகள் ஐடி நிறுவனத்தில் வேலை பார்த்து வந்தார். 2009-ல் 5 லட்சம் ரூபாய் சம்பளம் வாங்கினார்.

பாடசாலையில் முதல் மதிப்பெண் எடுத்தவர். ஆனால் அவளின் வாழ்க்கை திருமணத்திற்கு பின் கேள்வி குறியாகிவிட்டது. தினேஷ் இரண்டு முறை என்னுடைய மகளுக்கு விவாகரத்து நோட்டீஸ் அனுப்பினார். அதன் பின் தனக்கு நேர்ந்த கொடுமைகளைகளை பிரணிதா காவல்நிலையத்தில் புகார் அளித்தார்.

இந்த வழக்கு சென்று கொண்டிருந்த போது 2017-ஆம் ஆண்டு அவள் கர்ப்பமானதால், தினேஷ் விவாகரத்து வழக்கை வாபஸ் பெற்றுவிட்டு, என் வீட்டில் விட்டுச் சென்றார். குழந்தை பிறந்த போதும் அவர் அழைக்க வராததால் வீட்டிற்கு சென்றோம். ஆனால் அவர்கள் எங்களை வீட்டிற்குள் விடவில்லை, இதன் காரணமாகவே தர்ணா போராட்டத்தில் ஈடுபட்டார்.

மேலும் அவர் இன்ஜினியரிங் படித்ததாக கூறுகிறார். ஆனால் அவருக்கு அரியர்ஸ் இருக்கிறது. அவரின் அப்பா திமுக-வில் நல்ல நிலையில் இருப்பதால், பொலிசாரும் அவருக்கு சாதகமாக உள்ளனர். எங்களை இப்படி நயவஞ்சமாக ஏமாற்றிவிட்டனர் என்று வேதனையுடன் கூறியுள்ளார்.

இவர் இப்படி சொல்ல அதன் பின் தினேஷுடன் இது குறித்து கேட்ட போது, எனக்கும் பிரணிதாவுக்கும் திருமணம் நடந்த சில மாதங்களிலேயே தனிக்குடித்தனம் செல்ல வேண்டும் என்று பிரச்சனை செய்தார்.

அதுமட்டுமின்றி அடிக்கடி தாய் வீட்டிற்கு சென்றுவிடுவார். எங்கள் வீட்டிற்கு வருவார். அவள் இப்படியே நடந்து கொண்டதால், மனைவியுடன் சேர்த்து வைக்கும் படி நீதிமன்றத்தில் வழக்கு தொடர்ந்தேன். அதன் பின் சில மாதங்கள் என்னுடன் இருந்த அவள் மீண்டும் தனிக் குடித்தனம் செல்ல வேண்டும் என்று பிரச்சனை செய்து மீண்டும் அம்மாவின் வீட்டிற்கு சென்றுவிட்டாள்.

அவள் குடும்பத்தால் நான் நிறைய சங்கடங்களை சந்தித்துவிட்டேன்.திருமண முடிந்த நாளிலிருந்து இந்நாள் வரை என்னுடைய வாழ்க்கையே வழக்குகளில் ஆஜராகுவதிலேயே கடந்து செல்கிறது. எனக்கு குழந்தை பிறந்த போது, நான் வளையல் எல்லாம் போட்டு அழகு பார்த்தேன், நான் தான் அவளை மருத்துவமனையில் கவனித்து வந்தேன்.

நீதிமன்றத்தில் நடந்த விவாகரத்து வழக்கை குழந்தைக்காகவும் பிரணிதாவுக்காகவும் வாபஸ் பெற்றேன். குழந்தை பிறந்தபிறகு பிரணிதாவின் வீட்டுக்கு ஆசையாக நான் சென்றபோது என்னை அவர்கள் அவமானப்படுத்தினார்கள். என்னையும் என் குடும்பத்தினரையும் தரக்குறைவாகப் பேசினார்கள். அது ஏன் என்னை ஆண்மை இல்லாதவன் என்று கூட திட்டினார்கள்.

அப்போது தான் அவர்கள் என் மீது வரதட்சனை வழக்கு தொடர்ந்தனர். முன் ஜாமீன் பெற்ற நான் அவரின் குடும்பத்தினரின் நடவடிக்கைகளால் பெரிதும் பாதிக்கப்பட்ட நான், மீண்டும் விவாகரத்து கேட்டு வழக்கு தொடர்ந்தேன். அந்த வழக்கு நிலுவையில் இருக்கும் சமயத்தில் என்னையும் என் குடும்பத்தினரையும் அவமானப்படுத்தத்தான் கைக்குழந்தையுடன் வீட்டின் முன் தர்ணா போராட்டத்தில் ஈடுபட்டதாக கூறியுள்ளார்.

4 உயிர் தோழிகள்

இந்தியாவில் ஒரே நேரத்தில் நான்கு தோழிகள் கால்வாயில் குதித்து தற்கொலை செய்து கொண்ட சம்பவம் பரபரப்பை ஏற்படுத்தியுள்ளது. குஜராத் மாநிலத்தை சேர்ந்த மீனாட்சி தாகூர் (20), ஜம்னா (20), ஷீலா (18) மற்றும் ஹக்கி (16) ஆகிய நான்கு பேரும் அங்குள்ள கால்வாயில் குதித்து தற்கொலை செய்து கொண்டுள்ளனர்.

இதில் ஹக்கி என்ற சிறுமியை தவிர மற்ற மூவரும் திருமணமானவர்கள் ஆவார்கள். நால்வரின் சடலங்களும் இன்னும் கிடைக்காத நிலையில் அவர்கள் இறப்பதற்கு முன்னர் எழுதி வைத்திருந்த கடிதத்தை பொலிசார் கைப்பற்றியுள்ளனர். அதில், மீனாட்சிக்கு இதய நோய் உள்ளது, ஜம்னா திருமணத்துக்கு பின்னர் தனது கணவருடன் மகிழ்ச்சியாக இருக்கவில்லை.

அவர்கள் இருவரும் தற்கொலை செய்ய முடிவெடுத்தனர். மீனாட்சி மற்றும் ஜம்னா இல்லாமல் ஷீலா மற்றும் ஹக்கியால் வாழ முடியாது என்பதால் நால்வரும் தற்கொலை செய்து கொள்கிறோம், எங்கள் இறப்புக்கு வேறு யாரும் காரணமில்லை என எழுதப்பட்டுள்ளது.

சம்பவ இடத்தில் பெண்களின் செருப்புகளும் கைப்பற்றப்பட்ட நிலையில் அவர்களின் சடலங்களை தேடும் பணி நடைபெற்று வருகிறது.