மஹியங்கனை, மாபகடவெவ பகுதியில் காட்டு யானையின் தாக்குதலுக்கு இலக்காகி இரு சிறுமிகள் உயிரிழந்துள்ளதாக பொலிஸார் தெரிவித்துள்ளனர்.

இந்த சம்பவம் நேற்றிரவு இடம்பெற்றுள்ளதாகவும் பொலிஸார் குறிப்பிட்டுள்ளனர். இதில் ஒரே குடும்பத்தைச் சேர்ந்த 9 மற்றும் 11 வயதுடைய இரண்டு சிறுமிகளே உயிரிழந்துள்ளனர்.

மஹியங்கனை பகுதியில் யானையின் தாக்குதலுக்கு இலக்காகி மரணிப்பவர்களின் எண்ணிக்கை நாளுக்கு நாள் அதிகரித்துச் செல்லும் நிலை காணப்படுகின்றது.

அந்த வகையில் நேற்று இரவு இரண்டு சிறுமிகள் யானையின் தாக்குதலுக்கு இலக்காகி உயிரிழந்துள்ளமை அப்பகுதி மக்களை பெரும் சோகத்தில் ஆழ்த்தியுள்ளது.

முல்லைத்தீவு மாவட்டத்தில் அடை மழை காரணமாக பொதுமக்களின் இயல்பு நிலை தொடர்ச்சியாக பாதிக்கப்பட்டுள்ளது.

குறித்த மாவட்டதில் இம்மாதம் ஆரம்பத்தில் இருந்து பெய்துவரும் கடும் மழை காரணமாக தாழ்நில பிரதேசங்கள் வெள்ளத்தில் மூழ்கியுள்ளன.

தற்காலிக வீடுகளில் வசிக்கும் பொதுமக்கள் கடும் சவால்களை எதிர்கொண்டுள்ளதோடு அன்றாடம் கூலிவேலை செய்து உழைப்பவர்களும் பொருளாதார நெருக்கடியினை சந்தித்துள்ளனர். அத்தோடு கடற்தொழிலும் முற்று முழுதாக பாதிப்படைந்துள்ளது.

பிரதான வீதி போக்குவரத்து ஸ்தம்பித நிலை அடைந்துள்ளதுடன் புனரமைப்பு செய்யப்படாத உள்வீதிகள் வெள்ளத்தில் மூழ்கியுள்ளன.

மேலும் குளங்களில் நீர் மட்டம் உயர்வடைந்துள்ளதுடன் நந்நிக்கடல் மற்றும் நாயாறு கடல் ஏரிகள் பெருங்கடலை நோக்கி மிகவேகமாக நகர்கின்றது.

இடிமின்னல் தாக்கத்துடன் தொடரும் கடும் மழை காரணமாக தற்பொழுது சில பிரதேசங்களில் மின்தடை ஏற்பட்டுள்ளது.

ரணில் – சுமந்திரன்

சபாநாயகர் கரு ஜயசூரிய இரட்டை நாக்குடையவர் என அமைச்சர் விமல் வீரவன்ச தெரிவித்துள்ளார். நாடாளுமன்றில் தற்பொழுது நடைபெற்று வரும் செய்தியாளர் சந்திப்பில் அவர் இதனை குறிப்பிட்டுள்ளார்.

அவர் மேலும் கூறுகையில், நாடாளுமன்றில் நடைபெறும் நாடகத்தில் பங்கேற்க விரும்பாத காரணத்தினால் நாம் அவையை விட்டு வெளியேறி சென்றோம். நாடாளுமன்றம் தற்பொழுது ரணில், சுமந்திரன் மற்றும் அனுர ஆகியோரின் கட்டுப்பாட்டுக்குள் கொண்டு வரப்பட்டுள்ளது.

நாட்டில் பிரதமர் இல்லை, அவைத் தலைவர் இல்லை என கூறும் கரு ஜயசூரிய எவ்வாறு சம்பந்தனை எதிர்க்கட்சித் தலைவர் என அழைக்கின்றார். இதன்மூலம் கரு ஜயசூரியவின் இரட்டை நிலைப்பாடு அம்பலமாகின்றது. இவ்வாறான ஓர் நிலைமையின் கீழ் நாடாளுமன்றில் அமர்ந்திருப்பதில் பயனில்லை என அவர் சுட்டிக்காட்டியுள்ளார்.

-தமிழ்வின்-

இன்றைய நாடாளுமன்ற அமர்வில் முதலில் மஹிந்த அணியினருக்கு உரையாற்றுவதற்கு சந்தர்ப்பம் வழங்கப்பட்டது. முதலாவதாக தினேஸ் குணவர்தன உரையாற்றியிருந்தார். தொடர்ந்து விமல் வீரவங்ச, டக்ளஸ், அநுர உள்ளிட்ட பலர் உரையாற்றினார்கள்.

இதன்போது விமல் வீரவங்ச மிகவும் ஆக்ரோசமாக உரையாற்றினார். இதன்போது ரணில் விக்ரமசிங்கவின் பெயரை கூறி உரையாற்றியிருந்தார்.

இவருடைய பேச்சுக்கு நாடாளுமன்றில் பெரும் சத்தம் போட்டதுடன், அவரை பேச விடாமல் கூச்சலிட்டுள்ளனர்.

தொடர்ந்து சபாநாயகர் கரு ஜெசூரிய செய்வது சட்டவிரோதமான செயல் எனக் கூறி விமலும் நாடாளுமன்றத்தை புறக்கணித்து வெளிநடப்பு செய்துவிட்டார்.

நாடாளுமன்ற தெரிவுக்குழு உறுப்பினர் எண்ணிக்கை தொடர்பில் இன்று நாடாளுமன்றத்தில் வாக்கெடுப்பு நடத்தப்பட்டது.

சபாநாயகர் கரு ஜயசூரிய தலைமையில் நடைபெற்ற வாக்கெடுப்பின் போது, மஹிந்த ராஜபக்ச தலைமையிலான ஆளும் கட்சி தோல்வி கண்டுள்ளது.

121 – 0 என்ற பெரும்பான்மையில் வாக்கெடுப்பு வெற்றி பெறற்தாக சபாநாயகர் அறிவித்துள்ளார்.

யோசனையை சமர்ப்பித்த ஐக்கிய தேசிய முன்னணி, தமிழ் தேசியக்கூட்டமைப்பு மற்றும் மக்கள் விடுதலை முன்னணி என்பன ஆதரவாக 121 வாக்குகளை வழங்கின. எனினும் மஹிந்த ராஜபக்ச தலைமையிலான ஆளும் கட்சியினர் வெளிநடப்பு செய்தனர்.

நாடாளுமன்ற தெரிவுக்குழுவில் அரசாங்கக்கட்சியான பொதுஜன ஐக்கிய முன்னணியின் 7 பேரை பெயரிட்டிருந்தது. எனினும் அதற்கு 5 உறுப்பினர்களையே ஒதுக்க முடியும் என்று சபாநாயகர் தெரிவித்திருந்தார். இந்தநிலையில் அதனை ஆட்சேபித்து ஆளும் கட்சியின் அனைத்து உறுப்பினர்களும் வெளிநடப்பு செய்தனர்.

தெரிவு குழு உறுப்பிர்களை தெரிவு செய்யும் வாக்கெடுப்பினை சபாநாயகர் இலத்திரனியல் முறையில் மேற்கொண்டார்.

அந்த வாக்கெடுப்பிற்கமைய பெரும்பான்மையுடன் நிறைவேற்றப்பட்டுள்ளது. 121 வாக்குகள் ஆதரவாக கிடைத்துள்ளதென சபாநாயகர் அறிவித்துள்ளார்.

-தமிழ்வின்-

அர்ச்சகர் பரிதாபமாக பலி

பொன்னாலைப் பாலத்தில் நேற்று மாலை 6.30 மணியளவில் இடம்பெற்ற விபத்தொன்றில் அர்ச்சகர் ஒருவர் உயிரிழந்துள்ளார் எனத் தெரிவிக்கப்படுகின்றது. தனியார் பேருந்து, மோட்டார் சைக்கிள், துவிச்சக்கரவண்டி என்பன இந்த விபத்தில் சிக்கிக்கொண்டன. சம்பவம் தொடர்பில் மேலும் தெரியவருவதாவது,

காரைநகரில் உள்ள ஆலயம் ஒன்றில் பூசை செய்துவிட்டு பாலத்தால் மோட்டார் சைக்கிளில் திரும்பிக் கொண்டிருந்த அர்ச்சகர், கடற்றொழிலுக்குச் சென்றுவிட்டு துவிச்சக்கரவண்டியில் வந்துகொண்டிருந்தவரை முந்திச்செல்ல முற்பட்டார்.

இதன்போது துவிச்சக்கரவண்டியுடன் விபத்துக்குள்ளாகி யாழ்ப்பாணத்தில் இருந்து காரைநகர் நோக்கிச் சென்றுகொண்டிருந்த தனியார் பேருந்துடனும் அவரது மோட்டார் சைக்கிள் மோதியுள்ளது. அர்ச்சகர் வீதியில் விழுந்து மோட்டார் சைக்கிளுடன் இழுத்துச் செல்லப்பட்டார். அவரது தலைக்கவசம் மற்றும் மோட்டார் சைக்கிள் என்பன சேதமடைந்திருந்தன. துவிச்சரவண்டியில் சென்றவர் கடலுக்குள் பாய்ந்த நிலையில் அவரும் காயமடைந்தார்.

அர்ச்சகர் நோயாளர் காவு வண்டியில் ஏற்றப்பட்டபோது சுயநினைவற்ற நிலையில் காணப்பட்டார் என அங்கிருந்தவர்கள் தெரிவித்தனர். எனினும் அவர் உயிரிழந்துவிட்டார் என வைத்தியாசாலைத் தகவல்கள் தெரிவித்தன. விபத்து இடம்பெற்றவேளை சாரதி பேருந்தை நிறுத்துவதற்காக முற்பட்டபோது பாலத்தில் எதிர்த்திசையில் தரித்து விடப்பட்டிருந்த மற்றொரு மோட்டார் சைக்கிளுடனும் பேருந்து மோதியுள்ளது. இதனால் அந்த மோட்டார் சைக்கிளும் சேதமடைந்துள்ளது.

மேற்படி விபத்தில் வடலியடைப்பை சேர்ந்த அர்ச்சகரே உயிரிழந்துள்ளார் என பொலிஸார் தெரிவித்துள்ளனர். மேலும், பொன்னாலையைச் சேர்ந்த ரகுநாதன் புஸ்பகாந்தன் (வயது 33) என்பவர் காயமடைந்தார். உயிரிழந்தவரின் சடலம் தற்போது யாழ்.போதனா வைத்தியசாலையில் வைக்கப்பட்டுள்ளது.

காயமடைந்தவரும் போதனா வைத்தியசாலையில் சேர்க்கப்பட்டார் என தெரிவிக்கப்படுகின்றது. சம்பவம் இடம்பெற்ற இடம் ஊர்காவற்றுறை பொலிஸ் பிரிவிற்கு உட்பட்டது எனினும், வட்டுக்கோட்டைப் பொலிஸார் உடனடியாக அங்கு சென்று விசாரணைகளை மேற்கொண்டதுடன் ஊர்காவற்றுறை பொலிஸார் வரும்வரை போக்குவரத்து ஒழுங்குகளை மேற்கொண்டமை குறிப்பிடத்தக்கது.

மக்கள் விடுதலை முன்னணியும், தமிழ் தேசியக் கூட்டமைப்பும் இணைந்து செயற்பட வேண்டிய தேவை ஏற்பட்டுள்ளதாக மக்கள் விடுதலை முன்னணியில் தலைவர் அநுரகுமார திஸாநாயக்க தெரிவித்துள்ளார்.

இந்திய ஊடகமான “தி இந்துவிற்கு” வழங்கிய செவ்வியிலேயே அவர் இவ்வாறு கூறியுள்ளார். தொடர்ந்தும் கருத்து வெளியிட்டுள்ள அவர்,

ஐக்கிய தேசிய கட்சியும், மகிந்த ராஜபக்ச தரப்பினரும் சர்வதேசமூகத்திற்கு காண்பிப்பதற்காகவும், தங்கள் பலத்தை காண்பிப்பதற்காகவும் தமிழ்தேசிய கூட்டமைப்பினை பயன்படுத்தியுள்ளனர்.

இரு கட்சிகளின் தலைவர்களும் தமிழ் தேசிய கூட்டமைப்பினருடன் நேர்மையாக நடந்துகொள்ளவில்லை. அவர்கள் தங்கள் நலனிற்காக தமிழ் தேசிய கூட்டமைப்பை பயன்படுத்தினார்கள்.

இந்நிலையில், வடக்கிலும், தெற்கிலும் ஒடுக்குமுறை அரசாங்கங்களால் பாதிக்கப்பட்ட தரப்பினரை மக்கள் விடுதலை முன்னணியும், தமிழ் தேசியக் கூட்டமைப்பு பிரதிநிதித்துவம் செய்கின்றன.

ஆகையினால், ஜனநாயக உரிமைகளை பாதுகாப்பதற்காக இணைந்து போராடவேண்டிய கடமை எங்களுக்கு இருக்கின்றது. இரு கட்சிகளும் கொள்கையின் அடிப்படையில் பணியாற்றுகின்றன.

எனவே, அவ்வாறான அணுகுமுறையை கொண்டுள்ள இந்த இரு கட்சிகளும் இணைந்து பணியாற்ற முடியும். சில விடயங்கள் தொடர்பில் எங்கள் மத்தியில் கருத்துவேறுபாடுகள் இருக்கின்றன.

எனினும், எதிர்காலத்தில் நாங்கள் இணைந்து பணியாற்ற முடியும். மக்கள் விடுதலை முன்னணியிடம் இரகசிய நிகழ்ச்சிநிரல் இல்லை. அதேபோல் தமிழ்தேசிய கூட்டமைப்பிடமும் அவ்வாறான இரகசிய நிகழ்ச்சி நிரல் இல்லை.

இவ்வாறான வெளிப்படை தன்மை காணப்படுவதால் ஒருவருக்கு மற்றையவரின் நிலைப்பாடு தெரியும். எனவே நாங்கள் சிறப்பாக இணைந்து செயற்பட முடியும்” என அவர் மேலும் தெரிவித்துள்ளார்.

-தமிழ்வின்-