பம்பலப்பிட்டியில் காரொன்று தீடீரென தீப்பற்றி எரிந்துள்ளதாக தெரிவிக்கப்படுகிறது.

இந்த சம்பவம் இன்று பிற்பகல் டுப்பிளிகேஷன் வீதியில் வைத்து இடம்பெற்றுள்ளதாக தெரியவருகிறது.

இந்த நிலையில் குறித்த பகுதியில் கடும் வாகன நெரிசல் ஏற்பட்டுள்ளமை குறிப்பிடத்தக்கது.

வடமாகாண சபையிலிருந்தோ அல்லது வடமாகாண சுகாதாரத்துறை அமைச்சின் அலுவலகத்திலிருந்தோ எமது நிரந்தர நியமனம் தொடர்பாக எழுத்து மூலமான அறிவிப்புக்கள் எதுவும் நாடாளுமன்றத்தின் கவனத்திற்குக் கொண்டு செல்லப்படவில்லை என சுகாதாரத் தொண்டர்கள் குற்றச்சாட்டை முன்வைத்துள்ளனர்.

வவுனியாவில் இன்று இடம்பெற்ற ஊடக சந்திப்பில் கலந்து கொண்டு கருத்து தெரிவிக்கும் போதே இதனை தெரிவித்துள்ளனர். தொடர்ந்தும் அவர்கள் கருத்து தெரிவிக்கையில்,

நாடாளுமன்றத்தில் எமது நிரந்தர நியமனம் குறித்து எதிர்க்கட்சித் தலைவருடன் கலந்துரையாடல் ஒன்றினை மேற்கொள்வதற்கு வட பகுதியிலிருந்து 50 பேர் கடந்த 18, 19ஆம் திகதிகளில் நாடாளுமன்றத்திற்கு சென்றிருந்தோம்.

எனினும் தவிர்க்க முடியாத காரணத்தினால் எதிர்க்கட்சித் தலைவரை சந்தித்து கலந்துரையாட முடியவில்லை. அதற்கு பதிலாக 19ஆம் திகதி எதிர்க்கட்சித் தலைவரின் செயலாளருடனும், பிரதி செயலாளருடனும் எமது நியமனம் தொடர்பாக கலந்துரையாடல் ஒன்றை மேற்கொண்டிருந்தோம்.

அந்த கலந்துரையாடலின்போது எம்மால் நடத்தப்பட்ட போராட்டங்கள் மற்றும் சந்திப்புக்கள் தொடர்பாக வட மாகாண சபையிலிருந்தோ அல்லது வட மாகாணத்திற்கு பொறுப்பான சுகாதார அமைச்சிலிருந்தோ எழுத்து மூலமாக அறிக்கை எதுவும் அனுப்பிவைக்கப்படவில்லை என்பதை எம்மை சந்தித்த எதிர்க்கட்சித் தலைவரின் செயலாளரும், பிரதி செயலாளரும் தெரிவித்தனர்.

அங்கிருந்து உடனடியாக எதிர்கட்சித் தலைவரின் செயலாளர், வடமாகாண சுகாதார அமைச்சருடன் எமக்கு முன் நிலையிலேயே தொலைபேசியில் உரையாடினார்.

இதன்படி, கடந்த காலங்களில் இடம்பெற்ற கலந்துரையாடலின்போது எந்த கல்வித்தகமை அடிப்படையில் எங்களை உள்ளீர்ப்பு செய்யப்பட்டதோ அதற்கு அமைவான ஒரு வேண்டுகோளினையும் சேவைக்கால அடிப்படைக்கான வேண்டுகோளினையும் இதுவரையிலும் நாடாளுமன்றத்தின் கவனத்திற்கு அனுப்பிவைக்கப்படவில்லை என்ற நிலைமையை அவதானிக்க கூடியதாக இருந்தது.

எமது கோரிக்கை தொடர்பில் வட மாகாணசபையிலிருந்து அல்லது வட மாகாண சுகாதார அமைச்சினூடாக நாடாளுமன்றத்திற்கு கடிதம் அனுப்பப்பட்டால் அமைச்சரவை கூட்டத்தில் அது ஏற்றுக்கொள்ளப்பட்டு அதற்கான சம்மதம் தெரிவிக்கப்படும் என எமக்கு கூறப்பட்டது.

ஆனால் இன்று வரையிலும் வடக்கிலிருந்து எமது நிரந்தர நியமனம் தொடர்பாக எழுத்து மூலமாக ஆவணங்கள் எவையும் நாடாளுமன்றத்திற்கு செல்லவில்லை என குறிப்பிட்டுள்ளனர்.

வெளிநாடுகளுக்கு பணிப்பெண்களாக செல்லும் இலங்கையர்கள் பெரும் அவமானங்களுக்கு உள்ளாவதாக தகவல் வெளியாகி உள்ளது.

இலங்கைக்கு அதிகளவான அந்நிய செலாவணியை பெற்றுக்கொடுக்கும் நபர்களாக வெளிநாடுகளில் பணியாற்றும் பெண்களே உள்ளனர்.

இலங்கையின் பொருளாதாரத்திற்கு பாரிய சேவைகளை வழங்கும் வெளிநாட்டு பணி பெண்களுக்கு இலங்கையில் கௌரவம் கிடைப்பதில்லை.

இவ்வாறான நிலையில் மத்திய கிழக்கு நாடுகளுக்கு பணிப்பெண்களாக செல்லும் செல்லும் பெண்களுக்கு வேறு ஆடை ஒன்று வழங்கப்பட்ட தகவல் வெளியாகி உள்ளது.

டுபாய் ஹீ அல் டூரா என்ற தொழில் நிறுவனம் ஒன்று இலங்கை பணியாளர்களுக்கு இவ்வாறு புதிய ஆடை ஒன்றை வழங்கியுள்ளது. இந்த பெண்கள் பணிப்பெண் என அடையாளப்படுத்துவதற்காக இவ்வாறு புதிய ஆடை வழங்கப்பட்டுள்ளது.

மஞ்சள் மற்றும் கறுப்பு நிறத்திலான ஆடைகள் குறித்த இலங்கை பணிப்பெண்களுக்கு வழங்கப்பட்டுள்ளது.

இவ்வாறான செயற்பாடுகள், பணிப்பெண்களாக செல்வோரை அவமானப்படுத்தும் நடவடிக்கையாக உள்ளதென சமூக வலைத்தளங்களில் பலரும் கருத்து வெளியிட்டு வருகின்றனர்.

மாதம்பேயில் வயோதிப பெண்ணொருவரை உறவினர்கள் கைவிட்டுச் சென்றுள்ளனர்.

பனிரென்தாவ பொது மயானத்தில் 70 வயதான பெண் ஒருவரை உறவினர்கள் தனித்து விட்டு சென்றுள்ள நிலையில் மீட்கப்பட்டுள்ளார். பிரதேச மக்கள் இணைந்து அந்த வயோதிப பெண்ணை பொலிஸாரிடம் ஒப்படைப்பதற்கு நடவடிக்கை மேற்கொண்டுள்ளனர்.

நேற்று பிற்பகல் மயானத்தில் உள்ள பாழடைந்த கட்டடத்திற்கு பெண் ஒருவர் உள்ளதாக, பொதுமக்கள் பொலிஸாரிடம் அறித்துள்ளனர்.

மோட்டார் சைக்கிளில் வந்த நபரால் அவர் இவ்வாறு விட்டுச் செல்லப்பட்டுள்ளதாக விசாரணையின் மூலம் கண்டறியப்பட்டுள்ளது. இவ்வாறு விட்டு செல்லப்பட்டவரின் அடையாளம் இன்னமும் உறுதி செய்யப்படவில்லை. பிரதேச மக்கள் அந்த பெண்ணுக்கு ஆடை மற்றும் தேவையான பொருட்களை வழங்கியுள்ளனர்.

மாதம்பே பொலிஸ் அதிகாரிகளினால் குறித்த பெண்ணுக்கு சிகிச்சை வழங்குவதற்காக கல்முருவ பிரதேச வைத்தியசாலையில் அனுமதிப்பதற்கு நடவடிக்கை மேற்கொள்ளப்பட்டுள்ளது.

இந்த பெண் யார் எனவும், மயானத்தில் விட்டு சென்றது யார் என்பது தொடர்பிலும் மாதம்பே பொலிஸார் விசாரணை மேற்கொண்டு வருகின்றனர்.

பெலியத்த, நாகுலுகம பகுதியில் பெண் ஒருவர் கூரிய ஆயுதமொன்றினால் தாக்கப்பட்டு கொடூரமான முறையில் படுகொலை செய்யப்பட்டுள்ளதாக பொலிஸார் தெரிவித்துள்ளனர்.

இந்நிலையில், சந்தேகநபரான கொலை செய்யப்பட்ட பெண்ணின் கணவன் அப்பகுதியில் இருந்து தப்பிச் சென்று, தலைமறைவாகியுள்ளதாகவும் பொலிஸார் தெரிவிக்கின்றனர்.

கணவன் மற்றும் மனைவிக்கு இடையில் நீண்ட காலமாக இருந்த பிரச்சினை தீவிரமடைந்ததன் காரணமாகவே குறித்த பெண் படுகொலை செய்யப்பட்டுள்ளதாக தெரிவிக்கப்பட்டுள்ளது.

சம்பவம் குறித்து பொலிஸார் மேலதிக விசாரணைகளை மேற்கொண்டுள்ளனர்.

யாழ்ப்பாணத்தில் வெவ் வேறு சம்பவங்களில் திடீரென மயங்கிய மூவர் உயிரிழந்துள்ளனர். கொக்குவில், பலாலி, சங்கானையைச் சேர்ந்தவர்களே இவ்வாறு உயிரிழந்துள்ளனர்.

கொக்குவில் கிழக்கைச் சேர்ந்த 60 வயதான கார்த்திகேசு கதிர்காமலிங்கம் என்ற ஆறு பிள்ளைகளின் தந்தை, வீட்டில் பாக்கு இடித்துக் கொண்டிருந்துள்ளார். திடீரென அவர் மயங்கிச் சரிந்துள்ளார். மயங்கியவரை உறவினர்கள் உடனடியாக யாழ்ப்பாணம் போதனா வைத்தியசாலைக்கு கொண்டு சென்றுள்ளனர். எனினும் அவர் உயிரிழந்துள்ளதாக வைத்தியர்கள் தெரிவித்துள்ளனர்.

பலாலியை சேர்ந்த 30 வயதான குணசீலன் குயின்சன்என்ற இளைஞன் நேற்றுக் காலை தனது வீட்டில் காலை உணவாக பிட்டுச் சாப்பிட்டுள்ளார். பின்னர் அவருக்கு வாந்தி ஏற்பட்டதுடன் மயக்கமடைந்து வீழ்ந்துள்ளார். மயக்கமடைந்தவரை உடனடியாக தெல்லிப்பழை வைத்தியசாலையில் சேர்த்துள்ளனர். அவர் உயிரிழந்து விட்டதாக தெரிவிக்கப்பட்டதுடன் சடலம் யாழ்ப்பாணம் போதனா வைத்தியசாலைக்கு அனுப்பி வைக்கப்பட்டுள்ளது.

மன்னார் பெரிய தம்பம் பகுதியைச் சேர்ந்த ராமன் இராசதுரை (வயது-60) என்ற முதியவர் யாழ்ப்பாணம் சங்கானை தொட்டிலடிப்பகுதியில் உள்ள உறவினர் வீட்டுக்கு 20ஆம் திகதி வந்துள்ளார். தொட்டிலடிச் சந்தியில் உள்ள பேருந்து நிலையத்தில் பேருந்துக்காக காத்துக் கொண்டிருந்துள்ளார். திடீரென மயங்கி வீழ்ந்துள்ளார். அவ்விடத்தில் நின்றவர்கள் உடனடியாக சங்கானை வைத்தியசாலையில் சேர்பித்துள்ளனர்.

எனினும் அவர் இறந்து விட்டதாக தெரிவிக்கப்பட்டதுடன் உடல் யாழ்ப்பாணம் போதனா வைத்தியசாலைக்கு அனுப்பி வைக்கப்பட்டுள்ளது. இறப்பு விசாரணைகளை யாழ்ப்பாணம் போதனா வைத்தியசாலையில் திடீர் இறப்ப விசாரணை அதிகாரி ந.பிரேமகுமார் மேற்கொண்டார்.

முல்லைத்தீவு – ஒட்டுசுட்டான், மாங்குளம் வீதியில் யானைகளின் அட்டகாசத்தால் பகல் நேரங்களில் கூட அச்சத்துடன் இருக்க வேண்டிய நிலை ஏற்பட்டுள்ளதாக பொதுமக்கள் சுட்டிக்காட்டியுள்ளனர். இது தொடர்பில் அவர்கள் மேலும் கூறுகையில்,

ஒட்டுசுட்டான், மாங்குளம் வீதியில் யானைகளின் அட்டகாசம் அதிகரித்துள்ளது. இதனால் குறித்த விதியூடாக பயணிக்கும் மக்கள் பெரும் அச்சத்துடன் பயணத்தை மேற்கொள்ள வேண்டியுள்ளது.

இது போன்று பெருமளவான யானைகள் இதற்கு முன் இங்கு இருக்கவில்லை. இந்த யானைகள் இலங்கையின் தென்பகுதியில் இருந்து கொண்டு வந்து விடப்பட்டுள்ளன.

யானைகள் கொண்டுவந்து விடப்பட்டமை தொடர்பில் அண்மையில் வட மாகாண முதலமைச்சரிடமும் சுட்டிக்காட்டப்பட்டிருந்தது.

எனவே சம்பந்தப்பட்ட அதிகாரிகள் இந்த விடயம் தொடர்பில் விரைவில் கவனமெடுக்க வேண்டும் என கோரிக்கை விடுத்துள்ளனர்.

உலக சந்தையில் எரிபொருளின் விலை மேலும் அதிகரித்துள்ளதாக துறைசார் வல்லுனர்கள் தெரிவித்துள்ளனர்.

அமெரிக்க டொலரின் பெறுமதியில் ஏற்பட்டுள்ள வீழ்ச்சி மற்றும் சவூதி அரேபியாவில் எரிபொருள் விநியோகத்தில் ஏற்பட்டுள்ள வீழ்ச்சி போன்ற காரணத்தினால் எரிபொருள் விலை அதிகரிப்பதாக தெரிவிக்கப்படுகின்றது.

வார இறுதியில் அமெரிக்க WTI கச்சா எண்ணெய் ஒரு பீப்பாய் 71 அமெரிக்க டொலர் விலையை நெருங்கியுள்ளது.

உலகில் அதிகம் பயன்படுத்தப்படும் ப்ரென்ட் ரக கச்சா எண்ணெய் ஒரு பீப்பாய் 73.11 அமெரிக்க டொலராக அதிகரித்துள்ளது.

இதன் காரணமாக இலங்கையில் எரிபொருள் விலை அதிகரிக்கும் வாய்ப்புகள் உள்ளதாக தெரிவிக்கப்படுகின்றது.

பிரான்ஸில் இருந்து யாழ்ப்பாணம் சென்ற இளைஞன் ஒருவர் திடீரென உயிரிழந்துள்ளதாக வைத்தியசாலைத் தகவல்கள் தெரிவிக்கின்றன.

சுதுமலை தெற்கு மானிப்பாய் சேர்ந்த 38 வயதான ஜோசெப் அருள்தாஸ் என்பவரே இவ்வாறு உயிரிழந்துள்ளார்.

நேற்று தேனீர் குடித்துக் கொண்டிருந்த குறித்த இளைஞன், திடீரென மயக்கமடைந்து வீழ்ந்துள்ளார். அவரை உடனடியாக வைத்தியசாலையில் சேர்க்கப்பட்ட போதும் அவர் உயிரிழந்துவிட்டதாக வைத்தியர்கள் தெரிவித்துள்ளனர்.

கடந்த சில தினங்களுக்கு முன்னர் வெளிநாட்டிலிருந்து தாயகம் திரும்பியவர் யாழ்ப்பாணம் சென்றுள்ளார்.

யாழ்ப்பாணத்திலுள்ள தனது தாயாரின் வீட்டில் தங்கியிருந்த வேளையில் இந்த அனர்த்தம் ஏற்பட்டுள்ளது.

இறப்பு தொடர்பான விசாரணையை யாழ்ப்பாணம் போதனா வைத்தியசாலை திடீர் இறப்பு விசாரணை அதிகாரி ந.பிரேமகுமார் மேற்கொண்டார்.

வெளிநாட்டிலிருந்து வந்த மகன் திடீரென மரணம் அடைந்தமை, தாயாருக்கு பெரும் அதிர்ச்சியை ஏற்படுத்தியுள்ளதாக தெரிவிக்கப்படுகிறது.

இந்தியாவில் இருந்து சட்டவிரோதமாக இலங்கைக்குள் நுழைய முயற்சித்த குற்றச்சாட்டில் சிறுவன் உட்பட இருவர் கைது செய்யப்பட்டுள்ளனர்.

நான்கு வயது சிறுவன் மற்றும் 28 வயதான நபர் ஒருவரையும் இலங்கை கடற்படையினர் கைது செய்துள்ளனர். தலைமன்னார் பகுதியில் வைத்து குறித்த இருவரும் கைது செய்யப்பட்டுள்ளனர்.

குறித்த இருவரும் கிளிநொச்சியில் வாழ்ந்த நிலையில், போர் அனர்த்தம் காரணமாக இந்தியாவுக்கு புலம்பெயர்ந்தவர்கள் என முதற்கட்ட விசாரணையில் தெரியவந்துள்ளது.

சந்தேக நபர்களை இலங்கை பொலிஸாரிடம் ஒப்படைத்து சட்டரீதியான நடவடிக்கை எடுக்கப்படவுள்ளது. அதற்கு முன்னர் தலைமன்னாரில் உள்ள இராணுவ தளத்திற்கு இருவரும் அழைத்து செல்லப்பட்டுள்ளனர்.