கோவையில் தனியார் விடுதி ஒன்றில் தங்கியிருந்த மாணவிகளுக்கு மது அருந்த கொடுத்து, விடுதி காப்பாளர் தவறான பாதைக்கு அழைத்து செல்ல முற்பட்டுள்ள சம்பவம் அதிர்ச்சியை ஏற்படுத்தியுள்ளது.

கோவை ஹாப்ஸ்காலேஜ் பகுதியில் தொழிலதிபர் ஜெகநாதன் என்பவருக்கு சொந்தமான ‘தர்சனா’ பெண்கள் விடுதி செயல்பட்டு வருகிறது. இங்கு 200க்கும் மேற்பட்ட மாணவிகள் தங்கியுள்ளனர். கடந்த சில நாட்களுக்கு முன்பு விடுதியின் உரிமையாளர் ஜெகநாதன், ஆர்.எஸ் புரத்தில் உள்ள தனியார் உணவகம் ஒன்றில் தன்னுடைய பிறந்த நாளை கொண்டாடியுள்ளனர்.

அதில் கலந்துகொள்வதற்காக 6 மாணவிகளை விடுதி காப்பாளர் புனிதா அழைத்து சென்றுள்ளார். அங்கு சென்ற மாணவிகளை மது அருந்த வற்புத்தியதோடு, அவர்களிடம் தவறாக நடக்கவும் விடுதி உரிமையாளர் ஜெகநாதன் முயன்றுள்ளார்.

இதனால் அதிர்ச்சியடைந்த மாணவிகள் அங்கிருந்து பாதியிலேயே கிளம்பிவிட்டனர். பின்னர் இதுகுறித்து தங்களது பெற்றோர்களிடம் தெரிவித்துள்ளனர். இதை கேட்டு ஆத்திரமடைந்த பெற்றோர்கள் தங்கள் உறவினர்களுடன் வந்து விடுதி நிர்வகித்திடம் வாக்குவாதத்தில் ஈடுபட்டுள்ளனர்.

மேலும் மாணவிகளின் எதிர்காலம் கருதி புகார் ஏதும் அளிக்காமல் வீடுகளுக்கு அழைத்து சென்றனர். ஆனால் இதனை கவனித்த அருகாமையில் பூ கடை வைத்திருக்க கூடிய பெண் காவல்நிலையத்தில் புகார் அளித்தார். இதனடிப்படையில் சம்பவ இடத்திற்கு வந்த பொலிஸார் விசாரணை மேற்கொண்டதோடு, இருவரின் பேரிலும் பெண்கள் வன்கொடுமை மற்றும் மிரட்டல் விடுத்தல் உள்ளிட்ட பிரிவுகளின் கீழ் வழக்கு பதிவு செய்தனர்.

இதற்கிடையில் தலைமறைவான ஜெகநாதன் மற்றும் புனிதாவை தற்போது பொலிஸார் தீவிரமாக தேடி வருகின்றனர்.

கடந்த சில மாதங்களுக்கு முன்பு அருப்புக்கோட்டையில் இயங்கி வரும் தனியார் கல்லூரி மாணவிகள் சிலரை தவறான பாதைக்கு அழைத்து செல்ல முற்பட்டது தொடர்பாக நிர்மலா தேவி என்ற பேராசிரியை கைது செய்யப்பட்ட சம்பவம் தமிழகம் முழுவதும் பலத்தை அதிர்வலைகளை ஏற்படுத்தியிருந்தது குறிப்பிடத்தக்கது.

காஞ்சிபுரம் மாவட்டத்தில் இறந்துபோன மனைவிக்கு சிலை வடித்து தினமும் அவருடன் 2 மணி நேரம் பேசுவருகிறார் கணவர் ஆசைத்தம்பி.

தனது காதல் வாழ்க்கை குறித்து ஆசைத்தம்பி கூறியதாவது, 1977 ஆம் ஆண்டு எனது மாமன் மகள் பெரியபிராட்டிக்கும் எனக்கு திருமணம் நடைபெற்றது. திருமணத்திற்கு பிறகு சென்னைக்கு குடியேறினோம்.

எங்களுக்கு இரண்டு பெண் குழந்தைகள். மனைவியின் வழிகாட்டுதலின்படி மளிகைக் கடை நடத்தினேன். கேபிள் டி.வி தொடங்கவும் அவர்தான் ஆலோசனை கூறினார்.

உடனே அந்தத் தொழிலிலும் ஈடுபட்டேன். கைநிறைய வருமானம் வந்தது. அவர் விருப்பப்படி இடம் வாங்கி வீடு கட்டினேன். எனக்கு எல்லாமே என் மனைவிதான். அவர் சொல்வதுதான் எனக்கு வேதவாக்காக இருந்தது.

என்னை அன்போடு வழிநடத்தினார். இந்நிலையில் தான் அவருக்கு புற்றுநோய் இருப்பது தெரியவந்தது. படுக்கையில் இருந்தபோதும், நான் உங்களுடன் தான் இருப்பேன் என எனக்கு ஆறுதல் கூறினார். ஆனால், கடந்தாண்டு ஆகஸ்ட் மாதம் இறந்துவிட்டார்.

பெரிய பிராட்டி அம்மாள் இறந்து 16-வது நாளன்று சிலை வடிக்கும் முயற்சில் ஈடுபட்டோம்.

5 அடி, ஓர் அங்குல உயரத்தில் சிலை உருவானது, அவர் இறந்த பத்தாவது மாதத்தில் சிலையை நிறுவினோம். சிலை வடிவத்தில் என்னோடும் என் குழந்தைகளோடும் வாழ்ந்துகொண்டிருக்கிறார்.

தினமும் அவரோடு இரண்டு மணி நேரம் பேசிவருகிறேன். சிலை வந்தபிறகு எனக்குப் பத்து வயது குறைந்ததுபோல உள்ளது என்கிறார் ஆசைத்தம்பி.

தமிழகத்தில் பலாத்காரம் செய்யப்பட்ட ரஷ்ய பெண் குற்றவாளிகளை அடையாளம் காட்டியுள்ளார்.

திருவண்ணாமலையில் அடுக்குமாடி குடியிருப்பில் தங்கியிருந்த ரஷ்ய பெண் பாலியல் பலாத்காரம் செய்யப்பட்ட சம்பவம் அதிர்வலைகளை ஏற்படுத்தியது. இச்சம்பவம் தொடர்பில் வழக்குபதிவு செய்த திருவண்ணாமலை பொலிசார் விசாரணை நடத்தி வந்தனர்.

விசாரணையில், அடுக்குமாடி குடியிருப்பின் உரிமையாளர் பாரதி, அவரது அண்ணன் நீலகண்டன், மணிகண்டன் மற்றும் வெங்கடேசன் என்ற நால்வரை கைது செய்து சிறையில் அடைத்தனர்.

இதற்கிடையே மருத்துவமனையில் சிகிச்சை பெற்று வந்த ரஷ்ய பெண் கடந்த 20ம் திகதி டிஸ்ஜார்ஜ் செய்யப்பட்டார்.

தற்போது ஆசிரமத்தில் தங்கவைக்கப்பட்டுள்ள ரஷ்ய பெண் முன்பு குற்றவாளிகளை அடையாளம் காட்டும் அணிவகுப்பு நடந்தது.

ஆரணி மாஜிஸ்திரேட்டு முன்னிலையில் நடந்த இந்த அணிவகுப்பில், குற்றவாளிகளை ரஷ்ய பெண் அடையாளம் காட்டியுள்ளார்.

இந்நிலையில் ரஷ்ய பெண்ணை பார்ப்பதற்காக அவரது தாய் தமிழகம் வந்துள்ளமை குறிப்பிடத்தக்கது.

இந்தியாவில் திருமணம் செய்து கொள்ள பெண் மறுத்ததால் ஆத்திரத்தில், அவரிடம் வெடிகுண்டு இருப்பதாக புரளியை கிளப்பிய இளைஞர் கைது செய்யப்பட்டுள்ளார்.

மும்பையை சேர்ந்தவர் ஹதிம்பாய் ஷயிவாலா (28). இவர் ஓன்லைன் திருமண தகவல் மையம் மூலம் ஏமனை சேர்ந்த 26 வயது பெண்ணுடன் நட்பாகியுள்ளார். பெண்ணிடம் தான் வசதியானவன் என ஷயிவாலா கூறியுள்ளார்.

இதையடுத்து மும்பையில் மருத்துவ சிகிச்சை பெற்று வரும் தனது தந்தையை பார்க்க ஏமனிலிருந்து வந்த அப்பெண், ஷயிவாலாவை சந்தித்துள்ளார்.

அப்போது தான் ஷியிவாலா வசதியானவர் இல்லை எனவும், கடையில் வேலை செய்பவர் எனவும் பெண்ணுக்கு தெரியவந்தது.

இதையடுத்து ஷியிவாலாவை மணக்கமுடியாது என கூறி ஏமனுக்கு திரும்ப அப்பெண் தயாரானார்.

ஆனால் அவர் தன்னை திருமணம் செய்ய வேண்டும் என மிரட்டிய ஷயிவாலா, அப்படி செய்யவில்லையெனில் பழிவாங்குவேன் என கூறியுள்ளார்.

இதையடுத்து பெண் ஏமனுக்கு செல்லும் விமானம் நிற்கும் மும்பையின் சத்ரபதி சிவாஜி விமான நிலையத்துக்கு போன் செய்த ஷயிவாலா, குறித்த பெண்ணிடம் வெடிகுண்டு இருப்பதாக கூறியுள்ளார்.

இதையடுத்து விமான நிலையத்துக்கு வந்த பெண்ணை அதிகாரிகள் சோதனை செய்த போது அது பொய் என தெரிந்தது.

அதிகாரிகளுக்கு போன் வந்த நம்பரை வைத்து அது ஷயிவாலா நம்பர் என்பதை அப்பெண் உறுதி செய்ததோடு, தன்னை தொடர்ந்து அவர் மிரட்டியதையும் கூறினார்.

இதையடுத்து உடனடியாக ஷயிவாலா வீட்டுக்கு சென்ற பொலிசார் அவரை கைது செய்தனர். அவர் மீது இரண்டு பிரிவுகளில் வழக்குப்பதிவு செய்யப்பட்டுள்ளது.

தமிழ்நாட்டில் அடுத்த மாதம் திருமணம் நடக்கவிருந்த நிலையில் இளைஞர் விபத்தில் சிக்கி உயிரிழந்துள்ள சம்பவம் சோகத்தை ஏற்படுத்தியுள்ளது.

பழவிளை அருகேயுள்ள பூவன்குடியிருப்பு பகுதியைச் சேர்ந்தவர் மணிபாரதி (23). மணிபாரதிக்கு திருமணம் நிச்சயிக்கப்பட்டிருந்த நிலையில் அடுத்த மாதம் திருமணம் நடக்கவிருந்தது.

இந்நிலையில் மணிபாரதி தனது நண்பர் பிரபாகரனுடன் நேற்று இரவு பைக்கில் தனது அக்கா வீட்டுக்கு சென்று கொண்டிருந்தார்.

அப்போது அவர்கள் சென்ற மைலாடி விலக்கு பகுதி அருகே பழைய பாலத்திற்கு பதிலாக புதிய பாலம் அமைக்கும் பணி நடந்து வந்தது.

ஆனால் பணிகள் சரியாக முடிக்கப்படாமல், அரைகுறையாக நிற்கிறது. ஒருபுறம் பணி முடிந்துள்ளது, அந்தப் பகுதியில் பெரிய பள்ளம் உள்ளது.

மணிபாரதியும் பிரபாகரனும் அந்தப் பகுதிக்கு பைக்கில் வந்தபோது, பைக் நிலைதடுமாறி பள்ளத்தில் விழுந்ததில் மணிபாரதி சம்பவ இடத்திலேயே பலியானார். பிரபாகரன் படுகாயமடைந்தார்.

சம்பவம் குறித்து தகவலறிந்த பொலிசார் மணிபாரதியின் சடலத்தை கைப்பற்றிய நிலையில் சம்பவம் குறித்து விசாரித்து வருகிறார்கள்.

சென்னையில் கள்ளக்காதலனை கொலை செய்த பெண் அது குறித்து பொலிசில் பரபரப்பு வாக்குமூலம் அளித்துள்ளார்.

மதுரவாயலை சேர்ந்தவர் ராஜேஷ். இவர் மனைவி நளினி. கடந்த 15-ஆம் திகதி ராஜேஷ், அவரின் நண்பர் குமரேசனுடன் மதுஅருந்திய நிலையில் காலையில் இறந்து கிடந்தார்.

கணவரின் மரணத்தில் சந்தேகம் இருப்பதாக நளினி பொலிசில் புகாரளித்த நிலையில், பொலிசார் நடத்திய விசாரணையில் ராஜேஷ் கொல்லப்பட்டது தெரியவந்தது.

குமரேசனே ராஜேஷுக்கு மதுவில் சயனைடு கலந்து கொடுத்து கொன்றது தெரியவந்தது.  ராஜேஷுக்கும் அந்தப்பகுதியைச் சேர்ந்த பத்மாவதிக்கும் பழக்கம் இருந்துள்ளது. பத்மாவதி திருமணமானவர்.

இந்நிலையில் குமரேசனுக்கும் பத்மாவதியுடன் தொடர்பு ஏற்பட்டது. இதையடுத்து ராஜேஷுடனான தொடர்பை பத்மாவதி விட்டுள்ளார்.

இதற்கு ராஜேஷ் எதிர்ப்பு தெரிவித்த நிலையில் குமரேசனுடன் சேர்ந்து ராஜேஷை பத்மாவதி கொன்றது தெரியவந்தது. இதையடுத்து பொலிசார் பத்மாவதியை கைது செய்தார்கள்.

அவர் அளித்துள்ள வாக்குமூலத்தில், கடந்த ஒன்றரை ஆண்டுக்கு முன்புதான் ராஜேஷை சந்தித்தேன். அதன்பிறகு நாங்கள் பழகினோம். அவருடன் குமரேசன் அடிக்கடி வீட்டுக்குவருவார். குமரேசனுடன் நான் பழகியது ராஜேஷுக்குப் பிடிக்கவில்லை. மேலும் ராஜேஷ், எனக்கு பல வகையில் தொல்லை கொடுத்தார்.

இதனால்தான் நெல்லூரிலிருந்து கொண்டு வந்த சயனைடு மூலம் ராஜேஷை குமரேசன் மூலம் கொலை செய்யத் திட்டமிட்டேன். மதுவால் ராஜேஷ் இறந்துவிட்டதாக அவரின் குடும்பம் நம்பியது.

ஆனால், பொலிசார் துப்பு துலக்கி எங்களைக் கண்டுப்பிடித்துவிட்டார்கள் என கூறியுள்ளார்.