திருநெல்வேலி மாவட்டத்தில் பல வீடுகளில் பாத்திரம் கழுவி தனது மகனின் மருத்துவ கனவை நிறைவேற்றியுள்ளார் தாய் சிவசக்தி.

பாஸ்கர் – சிவசக்தி தம்பதியினரின் இளைய மகன் சுதாகர், கடந்த ஆண்டு நீட் தேர்வு எழுத விரும்புவதாக பெற்றோரிடம் தெரிவித்துள்ளர். தாய் சிவசக்தி அந்த பகுதியில் உள்ள பல வீடுகளில் பாத்திரம் கழுவி வீட்டு வேலைகள் செய்து வந்துள்ளார்.

நீட் தேர்வு பயிற்சிக்கு ஒன்றரை லட்ச ரூபாய் வரை செலவாகும் நிலையில், சிவசக்தி தனது நகைகளை விற்றதோடு மட்டுமல்லாமல் தான் வேலை பார்த்த பணத்தினை சேர்த்து வைத்து உதவி செய்துள்ளார்.

ஆனால் கடந்த ஆண்டு அவரால் நீட் தேர்வில் 161 மதிப்பெண்கள் மட்டுமே எடுக்க முடிந்தது. இருப்பினும் பெற்றோர் கொடுத்த ஊக்கத்தால் இரண்டாம் முறை நீட் தேர்வுக்கு எழுதி 303 மதிப்பெண்கள் பெற்ற அவருக்கு, நெல்லை மருத்துவ கல்லூரியில் இடம் கிடைத்துள்ளது.

தனது தந்தை இதய நோயால் பாதிக்கப்பட்டதால், இதய சிறப்பு மருத்துவராக வேண்டும் என சுதாகர் தெரிவித்துள்ளார்.

தமிழ்நாட்டில் சாலையில் கேட்பாரற்று கிடந்த 50 ஆயிரம் ரூபாய் பணத்தை பொலிசிடம் ஒப்படைத்த ஏழை மாணவனுக்கு பாராட்டு விழா நடத்த காவல்துறை முடிவு செய்துள்ளது.

ஈரோட்டை சேர்ந்த பாட்சா – அப்ரோஜ் பேகம் தம்பதியின் மகன் யாசின் அரசு பள்ளியில் 2ம் வகுப்பு படித்து வருகிறான்.

சில நாட்களுக்கு முன்னர் யாசின் பள்ளிக்கு சென்று கொண்டிருந்த போது சலையில் பை ஓன்று இருப்பதை பார்த்து அதை திறந்துள்ளான்.

அதில் 50,000 ரூபாய் இருந்த நிலையில் பையை எடுத்து கொண்டு ஆசிரியரிடம் சென்றுள்ளான். அந்த பையை பெற்றுக்கொண்ட ஆசிரியர் அதனை பொலிசாரிடம் யாசினை வைத்து கொண்டு ஒப்படைத்தார்.

பணத்தை பெற்றுக்கொண்ட காவல்துறை கண்காணிப்பாளர் சக்தி கணேசன் சிறுவனின் நேர்மையை பாராட்டி அவருக்கு வாழத்துகளை கூறினார். சிறுவனுக்கு பாராட்டு விழா நடத்தவும் பொலிசார் முடிவு செய்தனர்.

பள்ளி சீருடை கிழிந்த நிலையில் குடும்பம் ஏழ்மையான நிலையில் இருந்தபோதும் பணத்தை ஒப்படைத்த யாசினின் நேர்மையை பலரும் பாராட்டியுள்ளனர்.

ராணிப்பேட்டை காவல் நிலையத்தில் புகார் கொடுத்து விட்டு வெளியே வந்த பெண்ணை வெட்டி கொலை செய்த நபரை பொலிஸார் தேடி வருகின்றனர்.

வேலூர் அருகில் உள்ள ராணிப்பேட்டை செங்காடு பகுதியை சேர்ந்த சுகுணா (45) என்பவர் ராணிப்பேட்டை மகளிர் காவல் நிலையத்தில் புகார் அளித்து விட்டு வெளியே வரும்போது வெட்டி கொலை செய்யப்பட்டுள்ளார்.

இருசக்கர வாகனத்தில் வந்த அடையாளம் தெரியாத நபர் ஒருவர் காவல் நிலையத்தில் இருந்து வெளியேறி சென்று கொண்டிருந்த சுகுனவை கத்தியால் வெட்டி விட்டு தப்பி ஓடியதாக தெரிய வருகிறது.

அந்த இடத்திலேயே ரத்தவெள்ளத்தில் விழுந்து சுகுணா உயிர் இழந்தார். இவர் கணவனை இழந்தவர். இந்த சம்பவத்தால் அங்குள்ள மக்கள் பதட்டத்தில் இருக்கின்றனர்.

முதல் கட்ட விசாரணையில் சுகுணாவிற்கும் சுரேந்திரன் என்பவருக்கும் தொடர்பு இருந்ததாகவும் நேற்று மாலை குடித்து விட்டு சுகுணா வீட்டிற்கு சென்ற சுரேந்திரன் சுகுணாவோடு வாக்குவாதம் செய்ததாகவும் அதன்பின்னர் சுகுணாவை செங்கல்லால் தாக்கி விட்டு அங்கிருந்து 1000 ரூபாயை எடுத்து கொண்டு போனதாகவும் தெரிய வந்துள்ளது.

இது தொடர்பாகத்தான் சுகுணா புகார் அளிக்க காவல் நிலையம் வந்திருக்கிறார். இதனை அறிந்த சுரேந்திரன் ஆத்திரம் தாங்காமல் அவரது செய்கையை பின்தொடர்ந்து வந்த சுரேந்திரன் இந்த கொலை செயலை செய்து விட்டு தப்பி இருப்பதாக பொலிஸார் தரப்பில் கூறப்படுகிறது.

சுகுணாவின் உடலை பிரேத பரிசோதனைக்கு அனுப்பிய போலீசார் தலைமறைவான சுரேந்திரனை தேடி வருகின்றனர்.

இந்தியாவில் இளைஞர் ஒருவர் பாம்பு கடித்து மரணமடைந்த தனது தாயின் உடலை, பிரேத பரிசோதனைக்காக இருசக்கர வாகனத்தில் 38 கிலோ மீற்றர் தூரம் கொண்டு சென்ற சம்பவம் அதிர்ச்சியை ஏற்படுத்தியுள்ளது.

மத்திய பிரேச மாநிலம் திகாம்கர் மாவட்டத்தில் உள்ள மஸ்தாபூர் ஊரைச் சேர்ந்தவர் ராஜேஷ். இவரது தாய் குன்வார் பாய் பாம்பு கடியால் இறந்துவிட்டார்.

இதுதொடர்பாக, ராஜேஷ் பொலிசாருக்கு தகவல் கொடுத்தபோது, அவர்கள் பிரேத பரிசோதனைக்காக குன்வாரின் உடலை மருத்துவமனைக்கு கொண்டு வரும்படி கூறியுள்ளனர்.

ஆனால், அதற்கு வாகன வசதி செய்து தர அவர்கள் மறுத்து விட்டதாக கூறப்படுகிறது. அதன் பின்னர், வாகனத்தில் கொண்டு செல்ல பணமில்லாததால் ராஜேஷ் தனது இருசக்கர வாகனத்திலேயே தனது தாயின் உடலை கொண்டு செல்ல முடிவு செய்தார்.

அதன்படி, தனது தாயின் உடலை இருசக்கர வாகனத்தின் பின்பக்கம் கட்டி வைத்து, தனது ஊருலிருந்து சுமார் 35 கிலோ மீற்றர் தூரம் உள்ள மருத்துவமனைக்கு பயணம் செய்தார். இந்த காட்சியை பார்த்தவர்கள் வீடியோவாக பதிவு செய்து இணையதளத்தில் வெளியிட்டனர்.

இந்நிலையில், இச்சம்பவம் குறித்து மாவட்ட ஆட்சியர் அபிஜித் அகர்வால் கூறுகையில், ‘ஆம்புலன்சுக்கு அவர் தகவல் கொடுத்திருந்தால், நாங்கள் அனுப்பி வைத்திருப்போம். அது போன்ற எந்த முயற்சியிலும் அவர் ஈடுபடவில்லை.

ஆனாலும், பிரேத பரிசோதனை முடிந்த பின்னர் ஆம்புலன்ஸில் சொந்த ஊருக்கு அனுப்பி வைத்தோம்’ என தெரிவித்துள்ளார்.

இந்தியாவின் பல மாநிலங்களில் இது போன்று வாகன வசதியில்லாமல், இருசக்கரம் உள்ளிட்ட வசதியில்லாத வாகனத்தில் இறந்தவர்களின் உடலை கொண்டு செல்லும் அவலம் தொடர்ந்து நடந்து வருவது குறிப்பிடத்தக்கது.

அண்ணனின் இறப்புச் செய்தி கேட்ட அதிர்ச்சியில் அவரது தங்கை உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.

தூத்துக்குடியை சேர்ந்த திருப்பதி என்பவர் கிராம நிர்வாக அலுவலக உதவியாளராக பணியாற்றி வருகிறார். மதுவுக்கு அடிமையான இவர் சரியாக பணிக்கு செல்லாத காரணத்தால் 5 ஆண்டுகளுக்கு முன்னர் பணிநீக்கம் செய்யப்பட்டார்.

இதனால் விரக்தியில் இருந்த திருப்பதி, அளவுக்கதிகமாக மது குடிக்க ஆரம்பித்துள்ளார். இந்நிலையில் வீட்டில் யாரும் இல்லாத நேரத்தில் தூக்குபோட்டு தற்கொலை செய்துகொண்டார்.

திருமணம் செய்துகொள்ளாத இவர் தனது இரண்டு தங்ககைள் மீது அளவுகடந்த பாசம் வைத்திருந்துள்ளார். இந்நிலையில், இவரது இறப்பு செய்தி தொலைபேசி வாயிலாக இவரது தங்கை கற்பகவல்லிக்கு தெரிவிக்கப்பட்டது.

இந்த செய்தியை கேட்டுக்கொண்டிருந்தபோது தங்கை அதிர்ச்சியில் மயங்கி விழுந்துள்ளார். இவரை மருத்துவமனைக்கு கொண்டு சென்றபோது இவர் ஏற்கனவே இறந்துவிட்டதாக மருத்துவர்கள் தெரிவித்துள்ளனர். தற்போது, இருவரது உடலும் ஒன்றாக அடக்கம் செய்யப்பட்டுள்ளது.

ராஜஸ்தானில் சாலை விபத்தில் சிக்கி உயிருக்கு போராடி கொண்டிருந்தவர்களை காப்பாற்றுவதற்கான முயற்சிகளை மேற்கொள்ளாமல், இளைஞர்கள் சிலர் செல்பி எடுத்துள்ள சம்பவம் சர்ச்சையை ஏற்படுத்தியுள்ளது.

ராஜஸ்தான் மாநிலம், பார்மர் மாவட்டம் அருகே ஜெய்சால்மர் பகுதியில், இருசக்கர வாகனத்தில் சென்று கொண்டிருந்த 3 பேரின் மீது, பள்ளி வாகனம் மோதியதில் சம்பவ இடத்திலேயே ஒருவர் உயிரிழந்தார். மற்ற இவர்கள் ரத்த வெள்ளத்தில் உயிருக்கு போராடி கொண்டிருந்துள்ளனர்.

அப்பொழுது அங்கு ஓடிவந்த பொதுமக்களில் சிலர் காப்பாற்றுவதற்கான முயற்சிகளை மேற்கொள்ளாமல், செல்பி வீடியோ மற்றும் போட்டோ எடுத்துள்ளனர்.

இதற்கிடையில் சம்பவம் அறிந்து விரைந்து வந்த காவல்துறையினர், உயிருக்கு போராடி கொண்டிருந்த மற்ற இருவரையும் மீட்டு மருத்துவமனைக்கு அனுப்பி வைத்தனர். ஆனால் மருத்துவமனைக்கு செல்லும் வழியிலே இருவரும் உயிரிழந்தனர்.

பின்னர் இதுகுறித்து வழக்கு பதிவு செய்து காவல் துறையினர் விசாரணை மேற்கொள்ளும்பொழுது, விபத்தில் சிக்கியவர்கள், Parmanand (27), Gemaram (30) மற்றும் Chandaram (30) என்பது தெரிய வந்தது. குஜராத்தில் உள்ள சிமெண்ட் தொழிற்சாலையில் வேலை செய்து வரும் மூன்று பேரும், ராஜஸ்தானில் வேலைக்கு வந்துவிட்டு வீடு திரும்பும்பொழுதே விபத்து ஏற்பட்டுள்ளது தெரியவந்துள்ளது.

இதில், Gemraram தனது மனைவி மற்றும் 2 வயது மகனுடனும், Chandaram தனது பெற்றோரிடம் இருந்து பிரிந்து மனைவி மற்றும் 5 மாத மகளுடன் வசித்து வருவதும் தெரியவந்துள்ளது. அதேசமயம் Parmanand திருமணமாகாதவர் என்பது விசாரணையில் தெரியவந்துள்ளது.

கேரளாவை சேர்ந்த சிறுவன் தண்ணீரில் மூழ்கிய இருவரின் உயிரை காப்பாற்றிவிட்டு தன்னுடைய உயிரைவிட்ட சம்பவம் சோகத்தை ஏற்படுத்தியுள்ளது.

கன்னூர் மாவட்டத்தை சேர்ந்தவர் பிரோஸ் (14). இவர் ஐந்து நாட்களுக்கு முன்னர் அங்குள்ள கடற்கரை ஓரத்தில் தனது சகோதரர் பஹத் (13) மற்றும் அவர் நண்பருடன் சேர்ந்து கால்பந்து விளையாடி கொண்டிருந்தார்.

அப்போது பந்து கடல் உள்ளே சென்ற நிலையில் பஹத் அதை எடுக்க சென்றுள்ளார். இதையடுத்து நீரில் மூழ்க தொடங்கிய பஹத்தை காப்பாற்ற அவர் நண்பர் சென்ற போது அவரும் நீரில் மூழ்கினார்.

இதை பார்த்து அதிர்ச்சியடைந்த பிரோஸ் வேகமாக தண்ணீரில் இறங்கி பஹத்தையும், அவர் நண்பரையும் காப்பாற்றினார், ஆனால் துரதிஷ்டவசமாக அவர் தண்ணீரில் மூழ்கினார்.

இதையடுத்து சிறிது நேரம் கழித்து அங்கு வந்த சிலர் பிரோஸை மீட்டு மருத்துவமனைக்கு கொண்டு சென்றனர்.

அங்கு அவருக்கு தீவிர சிகிச்சையளிக்கப்பட்ட நிலையில் நேற்று பரிதாபமாக உயிரிழந்தார்.

இது குறித்து பேசிய பிரோஸின் தம்பி பஹத், என்னை காப்பாற்ற முயன்று அவன் உயிரிழந்துவிட்டான். மீண்டும் அவன் என்னிடம் வரவேண்டும் அல்லா என சோகத்துடன் கூறியுள்ளார்.

இதனிடையில் மிகபெரிய கால்பந்து ரசிகரான பிரோஸ் அவனுக்கு பிடித்த பிரான்ஸ் அணி விளையாடிய அரையிறுதி போட்டியை சொர்க்கத்திலிருந்து பார்த்திருப்பான் என நபர் ஒருவர் பேஸ்புக்கில் உருக்கமாக பதிவிட்டுள்ளார்.

கர்நாடக மாநிலம் பெங்களூர் வான்வெளி எல்லைக்குட்பட்ட பகுதியில், இரு விமானிகள் நேருக்குநேர் மோதவிருந்த விபத்து 200அடி இடைவெளியில் தவிர்க்கப்பட்டுள்ள சம்பவம் அதிர்ச்சியை ஏற்படுத்தியுள்ளது.

கடந்த 10-ம் தேதியன்று கோவையிலிருந்து ஹைதராபாத்திற்கு 162 பயணிகளுடன் இண்டிகோ விமானமும், பெங்களூரில் இருந்து கொச்சிக்கு 166 பயணிகளுடன் புறப்பட்ட விமானமும் பெங்களூர் எல்லைக்குட்பட்ட பகுதியில் நேருக்கு நேர் மோதவிருந்துள்ளது.

இதற்கிடையில் 200 அடி இடைவெளியின் போது விமான மோதல் தடுப்பு சிஸ்டம் அலாரம் (TCAS) ஒலிக்க துவங்கியுள்ளது.

இதனையடுத்து சுதாரித்துக் கொண்ட விமான ஓட்டிகள் உடனடியாக மோதலை தவிர்ப்பதற்கான பணிகளில் ஈடுபட்டு, பெரும் அசம்பாவிதம் ஏற்படாத வண்ணம் செயல்பட்டுள்ளனர்.

இச்சம்பவம் தொடர்பாக தற்போது விமான விபத்து புலனாய்வு வாரியம் தீவிர விசாரணை மேற்கொண்டு வருகிறது.