வவுனியாவில் நேற்று பிற்பகல் வேளையில் பாடசாலைக்கு புதிய வகுப்பறைக் கட்டடம் அமைக்கும் பணிகள் இடம்பெற்றுக் கொண்டிருக்கையில் திடீரென்று கட்டப்பட்ட தூண் இரண்டு சரிந்து வீழ்ந்துள்ளது. இதில் எவருக்கும் காயங்கள் ஏற்படவில்லை என்று பாடசாலை தரப்பினர் தெரிவித்துள்ளனர். இச்சம்பவம் குறித்து மேலும் தெரியவருகையில்,

வவுனியா தெற்கு வயலத்திற்குட்பட்ட மூன்றுமுறிப்பு வவுனியா ஸ்ரீ குணானந்த ஆரம்பப் பாடசாலைக்கான புதிய வகுப்பறைக்கட்டிடம் தற்போது அமைக்கப்பட்டு வருகின்றது. அப்பணிகள் இடம்பெற்றுக் கொண்டிருக்கையில் நேற்று முன்தினம் அமைக்கப்பட்ட ஒரு பகுதிக்கான தூண் நிறுத்தப்பட்டுள்ளது.

நேற்று பிற்பகல் வேளையில் திடீரென்று நிறுத்தப்பட்ட தூண்களில் இரண்டு சரிந்து வீழ்ந்துள்ளது. இதனால் எவருக்கும் காயங்கள் ஏற்படவில்லை. அத்துடன் நிறுத்தப்பட்டு தூணுக்கு அத்திவாரம் இடப்படும் அடிப்பகுதியிலிருந்து கம்பிகள் அமைக்கப்பட்டு கட்டடவேலைகள் இடம்பெற்றிருக்கவில்லை இடைநடுவில் கம்பிகள் இணைக்கப்பட்டு பொருத்தி வைக்கப்பட்டு கட்டடப்பணிகள் இடம்பெற்றுள்ளது தெரியவந்துள்ளது.

இதன் பாரத்தினாலேயே தூண் திடீரென்று பாரம் தாங்க முடியாமல் வீழ்ந்துள்ளது. இதையடுத்து வவுனியா தெற்கு கல்வி வலயத்தின் கட்டட பொறியியலாளரிடம் தொடர்பு கொண்டபோது,

குறித்த பாடசாலை வகுப்பறைக்கான கட்டடம் நிர்மானிக்கும்போது குறித்த தூணிற்கு கம்பிகள் வைப்பதற்கு திட்டத்தில் தெரிவித்திருக்கவில்லை எனினும் இடையில் கம்பிகள் வைத்து கொங்கிறீட் அமைக்கப்பட்டபோது பாரம் தாங்க முடியாமல் அதற்கு அணைக்கப்பட்டிருந்த பலகைகளின் பாரத்தினால் வீழ்ந்திருக்கலாம் என்று தெரிவித்துள்ளார்.

எனினும் இன்று வீழ்ந்த வகுப்பறைக்கான புதிய கட்டடத்தின் தூண் அவசர அவரசமாக மீண்டும் கட்டியெழுப்பப்பட்டுள்ளதுடன் இன்று அமைக்கப்பட்ட தூணிற்கு அத்திவாரம் இடப்படும் அடியிலிருந்து கம்பிகள் அணைக்கப்பட்டு தூண் நிறுத்தப்பட்டுள்ளது வியப்பினை ஏற்படுத்தியுள்ளது.

இதையடுத்து கட்டட பொறியியலாளரிடம் குறித்த பாடசாலைக்கான வகுப்பறையின் வரைபடத்தினைக்காண்பிக்குமாறு கோரியபோது அதனை காட்டுவதற்கு மறுத்துள்ளதுடன் இவ்வாறான கட்டடம் ஒன்று ஏற்கனவே குறித்த வவுனியா தெற்கு கல்வி வலய கட்டட பொறியியலாளரின் மேற்பார்வையில் செக்கட்டிப்புலவு பாடசாலைக்கு அமைக்கப்பட்டுள்ளதாகவும் அவர் தெரிவித்துள்ளார்.

ஒரு பாடசாலைக்கான வகுப்பறை அமைக்கும்போது அதன் தன்மைகள் தரமான பொருட்கள் கட்டடத்தின் தன்மை என்பன பரிசீலிக்கப்படுவதுடன் அதன் பின்னர் வரைபடம் அமைக்கப்பட்டு சீமெந்தின் அளவுகள், கம்பிகளின் வலுக்கள் என்பன வரைபடத்தில் காண்பிக்கப்பட்டிருத்தல் வேண்டும்.

கட்டடம் நிர்மாணிக்கும் ஒப்பந்ததாரர்கள் ஒப்பந்தம் மேற்கொள்வதுடன் அதற்கான செலவுகளும் தெரிவிக்கப்பட்டு மதிப்பீட்டு அறிக்கை தயார் செய்யப்பட்டு கட்டடப்பணிகள் ஆரம்பிக்கப்படுவது வழக்கம். அவ்வாறு மேற்கொள்ளும் அரச திணைக்களம் ஒன்றின் பாடசாலை வகுப்பறைக்கட்டடம் திடீரென்று இடிந்து வீழ்ந்துள்ளது பல கோணங்களில் சிந்திக்க வைத்துள்ளது.

எனவே இன்று திடீரென இடிந்து வீழ்ந்ததுபோல இனிவரும் காலங்களிலும் இவ்வாறான ஒரு அசம்பாவிதம் இடம்பெறாமல் இருக்க தற்போது அமைக்கப்படும் கட்டடப்பணிகளை நிறுத்தி மீள் சுழற்சி மேற்கொள்ளப்பட்டு புதிய பொறியியலாளரின் மேற்பார்வையில் மேற்கொள்ளப்படவேண்டும் எனவும் பிரச்சனைகளை இனங்கண்டு அதற்குரிய தீர்வுகளை உயரதிகாரிகள் வழங்க வேண்டும் எனவும் பெற்றோர்கள் கோரி வருகின்றனர்.‌

வவுனியா செட்டிகுளம் சின்னத்தம்பனை பகுதியில் தந்தையின் வாகனத்தில் மோதி சிறுமி பலியான சம்பவம் அப்பகுதியை பெரும் சோகத்தில் ஆழ்த்தியுள்ளது.

வவுனியா செட்டிகுளம் சின்னத்தம்பனை பகுதியில் உள்ள சுதர்ஷன் நேற்றைய தினம் (09.05.2018) காலை தனது ஐந்து வயது மகளான ருஷா என்பவரை முன்பள்ளி பாடசாலைக்கு தனது கயஸ் ரக வாகனத்தில் ஏற்றி சென்று இறக்கிய சமயத்தில் தனது மகள் வாகனத்தின் முன் பக்கமாக கடப்பதை அவதானிக்காத தந்தை வாகனத்தை முன் நோக்கி நகர்த்திய போது மகள் மீது வாகனத்தை மோதியுள்ளார்

இதில் படுகாயமடைந்த சிறுமி வவுனியா பொது வைத்தியசாலையின் அதிதீவிர சிகிச்சை பிரிவில் சிகிச்சை பெற்று வந்த நிலையில் இன்று சிகிச்சை பலனின்றி உயிரிழந்துள்ளார்.

வவுனியா சிறைச்சாலையில் இடம்பெறும் ஊழல் குற்றச்சாட்டிற்கு எதிராக இன்று (10.05.2018) வவுனியா சட்டத்தரணிகள் ஒரு மணித்தியாலயம் (11 மணி தொடக்கம் 12 மணிவரை) பணிப்புறக்கணிப்பில் ஈடுபட்டனர்.

இப் பணிப்பறக்கணிப்பு தொடர்பாக வவுனியா மாவட்ட சட்டத்தரணிகள் சங்கத்தின் தலைவரும் மூத்த சட்டத்தரணியுமான மு.சிற்றம்பலம் கருத்து தெரிவிக்கையில்,

வவுனியா சிறைச்சாலையில் இடம்பெறும் அராஜகங்களை எதிர்த்து தாமாக குரல் கொடுக்க முடியாத விளக்கமறியல் கைதிகள் சார்பிலே சட்டத்தரணிகளான நாங்கள் அவர்களுடைய நிலைமைகளை வெளி உலக மக்களுக்குத் தெரிவிப்பதற்காகத்தான் இன்றைய பணிப்பறக்கணிப்பு மேற்கொள்ளப்பட்டுள்ளது.

வவுனியாவில் சிறைச்சாலை உருவாக்கப்படும் போது வடபகுதியிலிருந்து வெளி மாவட்டங்களுக்கு வெளியேற முடியாத மக்களுக்கு உதவியாக இருக்கும் என்ற அடிப்படையிலே அது ஏற்படுத்தப்பட்டது.

ஒரு கைதி நீட்டி நிமிர்ந்து படுப்பதானால் ஒரு நாளைக்கு மூவாயிரம் ரூபா கொடுக்கவேண்டும் அங்குள்ள சிறைக்காவலர்களுக்கு ஒரு தொலைபேசி அழைப்பினை உள்ளிருந்து வெளியே எடுப்பதாக இருந்தால் ஒரு நிமிடத்திற்கு நூறு ரூபா கொடுக்கவேண்டும்.

வவுனியா நீதிமன்றம் கஞ்சா, அபின் போன்ற போதைப் பொருட்கள் பாவனையில் இறுக்கமாக நிலையை கடைப்பிடிக்கின்றது. ஆனால் சிறைச்சாலையில் நீதிமன்றம் எதைத்தடுக்க நினைக்கின்றதோ அது தாராளமாகவே கிடைக்கின்றது.

ஏழைகள் துன்புறுத்தப்படுவதும் ஏழைகளுடைய பணம் வஞ்சிக்கப்படுவதும் ஏழைகளின் கஸ்டத்தில் ஒரு சிலர் பணம் சம்பாதிக்கின்றதை நிறுத்த வேண்டும் பொதுமக்கள் மத்தியிலே நாங்கள் பல முயற்சிகளை மேற்கொண்டிருந்தோம். பொதுமக்கள் தொடர்பில் போதிய விழிப்பணர்வு இல்லாத காரணத்தினால் இன்றைய பணிப்புறக்கணிப்பினை மேற்கொண்டுள்ளோம்.

உடனடியாக இங்கு கடமையாற்றும் அனைத்து உத்தியோகத்தர்களும் மாற்றப்பட்டு புதிதாக உத்தியோகத்தர்கள் நியமிக்கப்படவேண்டும். சிறைச்சாலை ஆணையாளர் நாயகம் சுதந்திரமாக பாரபட்சமற்ற ஒரு குழுவை அமைத்து இங்கு இடம்பெறுகின்ற அநீதிகளுக்கு சாட்சிகள் மூலம் ஒழுக்காற்று நடவடிக்கை மேற்கொள்ளவேண்டும்.

இந்த விடயங்களை செய்ய முடியாது விட்டால் விளக்கமறியல் சிறைச்சாலையை மூடி விடவும் சிலருக்கு பணம் சம்பாதிப்பதற்காக சிறைச்சாலை இருக்கக்கூடாது மக்களுடைய தேவைக்கே சிறைச்சாலை.

சிறைச்சாலையில் இடம்பெறும் அநீதிகளை நாங்கள் லஞ்ச ஊழல் ஆணைக்குழுவின் கவனத்திற்கு கொண்டு வர நடவடிக்கை மேற்கொள்ளப்பட்டுள்ளது. ஒரு நீதிமன்றத்தில் தண்டம் விதிக்கப்பட்டு நீதிமன்ற சிறைக்கூடத்தில் வைக்கப்பட்ட ஒருவர் தனக்கு விதிக்கப்பட்ட தண்டத்தைச் செலுத்தி விரைவாக வெளியேறுவதனால் அங்கு நின்ற சிறைக்காவலருக்கு நூறு ரூபாய் வழங்கவேண்டும்.

நீதியின் மூக்கின் நுனியில் இந்த அநியாயம் நடைபெறுகின்றது. இவற்றை வெளிக்காட்டுவதற்காகவே இன்றைய வெளிநடப்பினை மேற்கொண்டுள்ளதாக மேலும் தெரிவித்தார்.

வவுனியா வளாகத்தின் பம்பைமடுவில் அமைந்துள்ள வியாபார கற்கைகள் பீடத்தில் கல்வி பயிலும் சிங்கள மாணவர்கள் அங்கு புத்தர் சிலை ஒன்றை நிறுவுவதற்கு அதற்கான கூடாரத்தை கடந்த சில வாரங்களுக்கு முன் அமைத்தனர்.

பல்கலைக்கழகத்தில் அனுமதி பெறாது மாணவர்கள் மேற்கொண்ட இந்த முயற்சியை பல்கலைக்கழக நிர்வாகம் தடுத்து நிறுத்தியது. இதன் போது சிங்கள மாணவர்களால் பல்கலைக்கழக நிர்வாகத்தினருக்கு அச்சுறுத்தல் விடப்பட்டது. பூங்கா வீதியிலுள்ள வளாக அலுவலகத்தின் வாயில் கதவைப் பூட்டி சிங்கள மாணவர்கள் எதிர்ப்பை வெளியிட்டதால் பதற்ற நிலை ஏற்பட்டு வவுனியா வளாகம் காலவரையரையின்றி மூடப்பட்டது.

அதனையடுத்து இக் குழப்பத்திற்கு காரணமான மாணவர்களுக்கு எதிராக நிர்வாகம் ஒழுக்காற்று நடவடிக்கை மேற்கொள்ள தயாரான நிலையில் அதனை நிறுத்துமாறு கோரியே இன்று (10.05.2018) காலை 10 மணிமுதல் வவுனியா மன்னார் வீதியில் அமைந்துள்ள காமினி மகா வித்தியாலயத்திற்கு முன்பாக 100க்கு மேற்பட்ட பல்கலைக்கழக சிங்கள மாணவ, மாணவிகள் ஒன்றுகூடி ஆர்ப்பாட்டம் ஒன்றினை மேற்கொள்வதற்கு தயாராகி வருவதாக தெரியவருகின்றது.

வவுனியா நகரசபை மைதானத்தில் நேற்று (09.05) வவுனியா இந்துக் கல்லூரிக்கும், மன்னார் சித்திவிநாயகர் இந்துக் கல்லூரி மாணவிகளுக்கும் இடையே கடினபந்து போட்டி இடம்பெற்றது. இலங்கை பெண்கள் கிரிகெட் கட்டுப்பாட்டு சபையின் ஏற்பாட்டில் வன்னி மாவட்டத்தில் மாணவிகளுக்கு இடையேயான கடினப்பந்து சுற்றுப்போட்டி முதன்முதல் நேற்றைய தினம் இடம்பெற்றது.

நேற்று இடம்பெற்ற வன்னியின் சமரை (Battle of Vanni) மன்னார் சித்தி விநாயகர் பெண்கள் அணியை எதிர்த்து விளையாடிய வவுனியா கோவில்குளம் இந்துகல்லூரியின் பெண்கள் அணி வெற்றி கொண்டது.

மு.இராதாகிருஷ்ணன் (வலயகல்விப் பணிப்பாளர்-வவுனியா தெற்கு) தலைமையில் இடம்பெற்ற நிகழ்வில் பிரதம விருந்தினராக திருமதி விஜயலக்சுமி கேதீஸ்வரனும் (வடமாகாண முதலமைச்சரின் அமைச்சு செயலாளர்) சிறப்பு விருந்தினராக திருமதி அப்சரி திலகரத்தினவும் ( இலங்கை பெண்கள் கிரிகெட் கட்டுபாட்டு சபை) கலந்து கொண்டனர்.

வவுனியா புதிய பேரூந்து நிலையத்தில் நேற்று (09.05.2018) மாலை 4 மணியளவில் கேரள கஞ்சாவுடன் ஒருவரை வவுனியா பொலிஸார் கைது செய்துள்ளனர். யாழ்ப்பாணத்திலிருந்து வவுனியா நோக்கி பயணிக்கும் பேரூந்தில் கேரள கஞ்சா கடத்துவதாக வவுனியா பொலிஸாருக்கு கிடைத்த ரகசிய தகவலின் அடிப்படையில்,

வவுனியா புதிய பேரூந்து நிலையத்தில் குறித்த பேரூந்தினை பொலிஸார் சோதனையிட்ட சமயத்தில் 2கிலோ 72 கிராம் கேரள கஞ்சாவினை தம்வசம் வைத்திருந்த குற்றச்சாட்டில் புதுக்குடியிருப்பு பகுதியினை சேர்ந்த 35 வயதுடைய சந்தேகநபர் ஒருவரை பொலிஸார் கைது செய்துள்ளனர்.

அத்துடன் யாழ்ப்பாணத்திலிருந்து திருகோணமலை சென்ற பேரூந்தினை நேற்று மாலை வவுனியா புதிய பேரூந்து நிலையத்திற்கு அருகே சந்தேகத்தின் அடிப்படையில் சோதனையிட்ட சமயத்தில் 2 கிலோ கேரள கஞ்சாவினை பொலிஸார் கைப்பற்றியுள்ளதுடன் சந்தேகநபர் எவரையும் பொலிஸார் கைது செய்யவில்லை

மேலதிக விசாரணைகளின் பின்னர் புதுக்குடியிருப்பு பகுதியினை சேர்ந்த சந்தேகநபரையும் கைப்பற்றப்பட்ட கேரள கஞ்சாவினையும் வவுனியா மாவட்ட நீதிவான் நீதிமன்றத்தில் ஆஜர்படுத்தவுள்ளதாக பொலிஸார் மேலும் தெரிவித்தனர்.