சமையல் எரிவாயு விலை 245 ரூபாவால் அதிகரிக்கப்பட்டுள்ளதை அடுத்து நாளை முதல் சோறு உணவு பொதி ஒன்றின் விலையை 10 ரூபாவால் அதிகரிக்க உள்ளதாக உணவகங்களின் உரிமையாளர்கள் சங்கம் தெரிவித்துள்ளது.

இதனை தவிர உணவகங்களின் ஏனைய உணவுகளின் விலைகளும் அதிகரிக்கப்படலாம் என உணவக உரிமையாளர்கள் சங்கத்தின் தலைவர் அசேல சம்பத் கூறியுள்ளார்.

உணவகங்களில் விற்பனை செய்யப்படும் உணவுகளுக்கு விலைகளை நிர்ணயம் செய்ய அதிகாரம் பெற்ற நிறுவனங்கள் எதுவும் இல்லை எனவும் இதனால், வெவ்வேறு உணவகங்களில் உணவுகளின் விலைகளில் வித்தியாசங்கள் இருக்கலாம் எனவும் அவர் குறிப்பிட்டுள்ளார்.

நேற்று நள்ளிரவு முதல் அமுலுக்கு வரும் வகையில் 12.5 கிலோ கிராம் சமையல் எரிவாயு கொள்கலன் ஒன்றின் விலை 245 ரூபா அதிகரிக்கப்பட்டது. இதனடிப்படையில், ஆயிரத்து 431 ரூபாவுக்கு விற்பனை செய்யப்படும் சமையல் எரிவாயு கொள்கலன் ஒன்றில் விலை ஆயிரத்து 676 ரூபாவாக அதிகரிக்கப்பட்டுள்ளது.

மாத்தறை அக்குரஸ்ஸ பிரதேசத்தை சேர்ந்த ஒருவர் தனது முச்சக்கர வண்டியை 24 மணி நேரமும் நோயாளர்களை அழைத்துச் செல்லும் இலவச அம்பியூலன்ஸ் வண்டியாக பயன்படுத்தி வருகிறார்.

அக்குரஸ்ஸ, இலுப்பெல்ல கிராமத்தை சேர்ந்த சமிந்த சிசிர குமார என்ற இந்த நபர் இரண்டு பிள்ளைகளின் தந்தை. இவர் தனது வாழ்வாதார தொழிலாக முச்சக்கர வண்டியை ஓட்டி வருகிறார்.

அக்குரஸ்ஸ பிரதேசத்தை சேர்ந்த மக்கள் நோயாளி ஒருவரை வைத்தியசாலைக்கு கொண்டு செல்ல வேண்டுமாயின் சமிந்த சிசிர குமாரவுக்கு தொலைபேசி அழைப்பை எடுத்தால் போதும். அவர் அழைத்த இடத்திற்கு உடனடியாக சென்று, இலவசமாக நோயாளியை வைத்தியசாலைக்கு அழைத்துச் செல்வார் என பிரதேசவாசிகள் தெரிவித்துள்ளனர்.

இலவசமாக இவர் சேவை செய்து வருவதால், சிலரது அவமதிப்புகளால் சில சந்தர்ப்பங்களில் கசப்பான அனுபவங்களை எதிர்நோக்கியுள்ளார்.

இலவசமாக தான் செய்து வரும் சேவை குறித்து கருத்து வெளியிட்டுள்ள சம்பத் சிசிர குமார, “ நான்கு வருடங்களுக்கு முன்னர் இந்த அம்பியூலன்ஸ் சேவையை ஆரம்பித்தேன். நாம் பிறந்து இறக்கும் மனிதர்கள். இறக்கும் போது நாம் வாழ்நாளில் செய்தவைகளை மட்டுமே எம்முடன் எடுத்துச் செல்வோம்.

இதனால், நாம் நல்ல பணிகளை செய்ய வேண்டும். இதன் காரணமாகவே இப்படியான சேவையை ஆரம்பிக்க எண்ணினேன். நான் இந்த சேவையை செய்யும் போது சில நேரம் ஏமாற்றப்படுகிறேன். என்னை அவமதிப்புக்கு உள்ளாக்கும் சம்பவங்கள் இதற்கு முன்னர் நடந்துள்ளன.

எனக்கு அப்படி செய்ய வேண்டாம் என தயவுடன் கேட்டுக்கொள்கிறேன். அப்படி செய்பவர்களுக்கு எனது உதவி சில நேரம் தேவைப்படக் கூடும்” எனக் கூறியுள்ளார்.

மனித சமூகத்தில், மனிதாபிமானத்தை மறந்து பணத்திற்கு பின்னால் ஓடி திரியும் இந்த காலத்தில் அக்குரஸ்ஸ சமிந்த சிசிர குமார உலகத்திற்கு முன்னுதாரணமாவார் என தெரிவிக்கப்பட்டுள்ளது.

களுபோவில வைத்தியசாலையில் அனுமதிக்கப்பட்ட நிலையில் உயிரிழந்த இளைஞனின் 33 இலட்சம் ரூபாய் பெறுமதியான நகைககள் காணாமல் போயுள்ளதாக பொலிஸ் முறைப்பாடு செய்யப்பட்டுள்ளது.

தெஹிவளையில் இடம்பெற்ற வாகன விபத்தில் படுகாயமடைந்த நிலையில் களுபோவில வைத்தியசாலையில் அனுமதிக்கப்பட்ட இளைஞன் உயிரிழந்துள்ளார்.

குறித்த இளைஞன் அணிந்திருந்த 33 லட்சம் பெறுமதியான நகைகளை வைத்தியசாலை ஊழியர்கள் எடுத்து மேசை ஒன்றின் மீது வைத்துள்ளனர். எனினும் அவை திடீரென காணாமல் போயுள்ளமை தொடர்பில் விசாரணை ஆரம்பிக்கப்பட்டுள்ளது.

உயிரிழந்த இளைஞனின் நகைகள் காணாமல் போயுள்ளதாக இளைஞனின் தந்தை பொலிஸ் நிலையத்தில் மேற்கொண்ட முறைப்பாட்டிற்கமைய இந்த விசாரணைகள் ஆரம்பிக்கப்பட்டுள்ளதாக பொலிஸார் தெரிவித்துள்ளனர்.

அதற்கமைய சம்பவம் தொடர்பில் வைத்தியசாலையின் அதிகாரிகள் மற்றும் ஊழியர்கள் 10 பேரிடம் விசாரணை மேற்கொள்ளப்பட்டுள்ளது.

இளைஞனின் கழுத்தில் இருந்த சங்கிலி, பென்டன், கைச்சங்கிலி ஆகியவைகளே இவ்வாறு காணாமல் போயுள்ளன.

மோட்டார் சைக்களிலில் சென்று கொண்டிருந்த போது தெஹிவளையில் வைத்து விபத்திற்கு முகம் கொடுத்துள்ளார். பின்னர் அவசர அம்பியுலன்ஸ் சேவை ஊடாக அவர் களுபோவில வைத்தியசாலைக்கு கொண்டு செல்லப்பட்டுள்ளார். எனினும் களுபோவில வைத்தியசாலையில் வைத்து அவர் உயிரிழந்துள்ளார் என தெரிவிக்கப்படுகின்றது.

சிலாபம், இரணவில பிரதேசத்தில் திடீரென பாரிய அளவு மீன்கள் சிக்கியுள்ளதாக தெரிவிக்கப்படுகின்றது. அதற்கமைய கிட்டத்தட்ட 50,000 கிலோ கிராம் மீன் பிடிக்கப்பட்டுள்ளதாக அந்தப் பகுதி மீனவர்கள் தெரிவித்துள்ளனர்.

நேற்று மாலை இந்த மீன்கள் தங்கள் வலைக்கு சிக்கியதாக மீனவர்கள் குறிப்பிட்டுள்ளனர். நீண்ட காலமாக இரணவில கடற்பகுதியில் இவ்வளவு பாரிய அளவு மீன்கள் கிடைத்ததில்லை என குறிப்பிடப்படுகின்றது.

கடலில் கிடைத்த அதிஷ்டம் காரணமாக பெருமளவு பணம் கிடைத்துள்ளதாக மீனவர்கள் மகிழ்ச்சி தெரிவித்துள்ளனர்.

முல்லைத்தீவில் நிகழ்வு ஒன்றுக்காக வருகைத்தந்திருந்த அதிதிகளுக்கு வழமையை விட சிறப்பான வரவேற்பளிக்கப்பட்டுள்ளது.

முல்லைத்தீவில் வன்னிக்குறோஸ் மகளிர் பேரவையின் முல்லைத்தீவு மாவட்ட அணியின் 1ஆம் ஆண்டு நிறைவு விழா, புதுக்குடியிருப்பு பொன்விழா மண்டபத்தில் இன்று இடம்பெற்றது. இதற்கு நாடாளுமன்ற உறுப்பினரான மாவை சேனாதிராசா, சிவமோகன், சத்தியலிங்கம் உட்பட பல அதிதிகள் வருகைத்தந்திருந்தனர்.

இதன்போது புதுகுடிருப்பில் மகளிர் அணியினர் மேள வாத்தியங்களை இசைத்து அவர்களை வரவேற்றுள்ளார்கள்.வழமையாக ஆண்களே அனைத்து நிகழ்வுகளிலும் நாதஸ்வரம், மேளம் இசைப்பார்கள். ஆனால் இங்கு பெண்கள் மேளம் மற்றும் நாதஸ்வரம் இசைத்து அதிதிகளை வரவேற்றுள்ளனர்.

இவ்வாறு பெண்கள் தவில், நாதஸ்வரம், மேள வாத்தியங்கள் இசைத்த காட்சியை கண்டுகளிப்பதற்கு அந்தப் பகுதியில் இருந்து ஆயிரக்காணக்கான பொது மக்கள் ஒன்று கூடியிருந்தமை குறிப்பிடத்தக்கது.

கனடாவில் மிருகங்களைப் போன்று பத்து பேர் கொல்லப்பட்டதாக இலங்கையை சேர்ந்த பெண்ணொருவர் கண்ணீருடன் தெரிவித்துள்ளார். கனடாவில் வாழ்ந்து வரும் ரங்கிக்கா கருணாதிலக்க என்ற இலங்கை பெண்மணி, அந்நாட்டு ஊடகம் ஒன்றுக்கு கருத்து தெரிவித்துள்ளார்.

கடந்த திங்கட்கிழமை ரொரன்டோவில் இடம்பெற்ற பயங்கரவாத தாக்குதல் குறித்து அவர் கருத்து வெளியிட்டார். இந்த அனர்த்தத்தில் தனது நண்பி ரேனுகா அமரசிங்க படுகொலை செய்யப்பட்டமை ஏற்றுக் கொள்ள முடியவில்லை.

ரேனுகா மரணத்தை தழுவும் வயதை கொண்டிருக்கவில்லை. இதுவொரு கொடுமையான நிகழ்வு. தாக்குதல் சம்பவத்தில் அவர் காயங்களுடன் தப்பியிருப்பார் என்றே நம்பியிருந்தேன். எனினும் அவர் உயிரிழந்திருப்பார் என நான் நினைக்கவில்லை.

இது எப்படி நடந்திருக்கும். வீதியில் உயிரிழந்து கிடக்க வேண்டியவர்கள் அல்ல அவர்கள். மிருகங்கள் போன்று கொல்லப்பட்டனர். மிருகங்கள் கூட இப்படி உயிரிழக்குமா என தெரியவில்லை.

ரேனுகா எனது சகோதரி போன்ற ஒருவராகும். 13 வருடங்களாக அவரை எனக்குத் தெரியும். கடந்த இரண்டு வருடங்களில் நாங்கள் மிகவும் நெருக்கமானோம்.

தனது ஏழு வயது மகனுடன் சந்தோஷமாக வாழ்ந்து வந்தார். பிள்ளைக்கு இனி யார் தாயை கொடுப்பார்கள்.  அவரது மரணத்தை தாங்கிக் கொள்ள முடியாது. அதனை கற்பனை கூட செய்ய முடியவில்லை. அவர் எங்கள் மனங்களில் எப்போதும் இருப்பார்…” என ரங்கிக்கா கண்ணீருடன் தெரிவித்துள்ளார்.

கடந்த திங்கட்கிழமை இடம்பெற்ற பயங்கரவாத தாக்குதலில் 10 பேர் கொல்லப்பட்டதுடன், 15 பேர் காயமடைந்தனர். பத்துப் பேரில் இலங்கையின் ஹொரண பிரதேசத்தை சேர்ந்த ரேனுகா அமரசிங்க என்ற 48 வயதான பெண் கொல்லப்பட்டிருந்தார்.

யாழ்ப்பாணம் – காரைநகர் கருங்காலி முருகன் ஆலயத்தின் தேர் திடீரென சரிந்து விழுந்துள்ளது.
கருங்காலி முருகன் ஆலயத்தின் வருடாந்த தேர்த் திருவிழா இன்று நடைபெற்று வருகின்றது.

இதன்போது தேர் வலம் வந்துகொண்டிருக்கும் போதே சரிந்து விழுந்ததாக தெரிவிக்கப்படுகின்றது. இதில் எவருக்கும் ஆபத்து ஏற்படவில்லை என்றும் தெரிவிக்கப்பட்டது.

தேர்த்திருவிழா ஆரம்பிக்கப்பட்டு இறுதியில் தேரின் இருப்பிடத்திற்கு வரும் போதே இந்த அனர்த்தம் ஏற்பட்டுள்ளது.