அரசியல் கைதி ஆனந்த சுதாகரனின் குழந்தைகளை சந்திப்பதற்காக வாழைச்சேனை, கோரளைப்பற்று பிரதேச சபை உறுப்பினர் க.கமலநேசன் யாழ். சென்றுள்ளார். ஆனந்த சுதாகரனின் மனைவி யோகராணியின் 31ஆம் நாள் நிகழ்வு நேற்று இடம்பெற்றுள்ளது.

குறித்த நிகழ்வில் கலந்து கொண்ட அவர், யோகராணியின் ஆத்ம சாந்திக்காக பிரார்த்தித்துள்ளதுடன், இரு குழந்தைகளுடன் உரையாடி ஆறுதல் கூறியுள்ளார். இதன்போது கருத்து தெரிவித்த வாழைச்சேனை, கோரளைப்பற்று பிரதேச சபை உறுப்பினர்,

நாட்டிற்கு ஜனாதிபதியாக மைத்திரிபால சிறிசேனவை கொண்டு வந்த தமிழ் மக்களுக்கு நன்றிக்கடனாக ஆனந்த சுதாகரனை விடுதலை செய்வார்கள் என்று பார்த்த மக்களுக்கு ஏமாற்றத்தை தந்துள்ளார்.

அரசியல் கைதியான ஆனந்த சுதாகரனை புதுவருடத்திற்கு முன்பாக பொதுமன்னிப்பு வழங்கி விடுதலை செய்வதாகக் கூறிய ஜனாதிபதி, ஏன் இன்னும் மௌனம் கொண்டு விடுதலை செய்யாமல் உள்ளார்.

மனைவியின் மரணச்சடங்கிற்கு ஆனந்த சுதாகரன் சென்ற வேளை இரண்டு குழந்தைகள் கட்டி அனைத்து கதறியதையும், பெண் குழந்தை தகப்பனுடன் பஸ்ஸில் ஏறுவதையும் நாங்கள் பார்த்து மிகவும் வேதனையடைந்தோம்.

இதனை கருத்தில் கொண்டு அரசியல் கைதியான ஆனந்த சுதாகரன் விடுதலைக்காக சிறுபான்மை மக்கள் ஒன்றிணைந்து கையெழுத்து திரட்டி ஜனாதிபதிக்கு வழங்கினோம்.

இந்த இரண்டு குழந்தைகளும் தங்களது பாட்டியுடன் ஜனாதிபதியை சந்தித்த போது சித்திரை புதுவருடத்திற்கு முன்பாக அவரை பொதுமன்னிப்பு வழங்கி விடுதலை செய்வதாகக் கூறிய ஜனாதிபதி தற்போது பச்சிளம் குழந்தைகளை ஏமாற்றியது மிகவும் வேதனையை தருகின்றது.

அத்துடன், இந்த விடயமானது ஒட்டுமொத்தமாக சிறுபான்மை சமூகத்தினர் ஏமாற்றம் அடைந்துள்ளனர். எனவே ஜனாதிபதி இந்த விடயத்தில் கூடிய கவனம் செலுத்தி பிள்ளைகளின் நலனின் அக்கறை கொள்ளுமாறு கேட்டு கொள்கின்றறேன் என குறிப்பிட்டுள்ளார்.

இதேவேளை, இன்று அநேகமானோர் சித்திரை புத்தாண்டை மகிழ்ச்சியுடன் கொண்டாடி வருகின்ற இந்த சூழலில் தனது தந்தையின் விடுதலைக்காக காத்திருக்கும் குழந்தைகளை மனிதாபிமானத்துடன் அவர்களின் துயரத்தில் தானும் பங்கெடுக்கும் வகையில் மட்டக்களப்பு மாவட்டத்தின் வாழைச்சேனை, கோரளைப்பற்று பிரதேச சபை உறுப்பினர் க.கமலநேசன் யாழிற்கு விஜயம் மேற்கொண்டுள்ளார்.

இவ்வாறு மனித நேயத்துடன் செயற்படும் மக்கள் பிரதிநிதிகள் எம் மத்தியிலும் இன்றும் இருக்கின்றமை குறிப்பிடத்தக்கது.

கொழும்பில் தீ பற்றிக் கொண்டமையால் பெண்ணொருவர் பரிதாபமாக உயிரிழந்துள்ளார். குப்பை எரித்து கொண்டிருந்த இரண்டு பிள்ளைகளின் தாயின் ஆடையில் தீ பற்றியமையால் படுகாயமடைந்த நிலையில் வைத்தியசாலையில் அனுமதிக்கப்பட்டார்.

எனினும் சிகிச்சை பலனின்றி அவர் உயிரிழந்துள்ளார் என வைத்தியசாலை அதிகாரிகள் தெரிவித்துள்ளனர். ராஜபக்ச பேடிகே சீதேவிகா ராஜபக்ச என்ற 38 வயதான பெண் ஒருவரே இவ்வாறு உயிரிழந்துள்ளார்.

இந்த மரணம் தொடர்பான விசாரணையை கொழும்பு நகர மேலதிக திடீர் மரண ஆய்வாளர் மேற்கொண்டுள்ளார். மரணம் தொடர்பில் சாட்சி வழங்கிய கணவர், “உயிரிழந்திருப்பது எனது மனைவியாகும். எங்களுக்கு இரண்டு பிள்ளைகள் உள்ளனர். இரண்டாவது பிள்ளை பிறந்த பின்னர் அவர் மன ரீதியாக பாதிக்கப்பட்டார். அதன் பின்னர் காலை நேரங்களில் அவர் தாமதமாகவே எழும்புவார்.

சம்பவம் இடம்பெற்ற அன்று தான் மகளை ஞாயிறு பாடசாலையில் விட சென்றிருந்தேன். மனைவி, மகன் மற்றும் எனவும் அம்மாவும் வீட்டில் இருந்தார்கள். இதன் போது எனது அம்மா வீட்டை சுற்றியிருந்த குப்பைகளை சேகரித்து ஒரு இடத்தில் கொண்டு வந்து வைத்திருந்தார்.

இதன்போது காலையிலேயே குளிராக உணரவும் அந்த குப்பைக்கு மனைவி தீ வைத்துள்ளார். அது திடீரென அவரது ஆடையில் பட்டு உடல் முழுவதும் தீப்பற்ற ஆரம்பித்துள்ளது. தாய் தீயை கட்டுப்படுத்தி மனைவியை வைத்தியசாலைக்கு அழைத்து சென்றுள்ளார்” என குறிப்பிட்டார்.

மரணம் தொடர்பான மேலதிக விசாரணைகளை பொலிஸார் மேற்கொண்டு வருகின்றனர்.

இலங்கையில் இலத்திரனியல் கடவுச்சீட்டு தயாரிக்கும் பணி சிக்கல் நிலை ஏற்பட்டுள்ளதாக தகவல் வெளியாகி உள்ளது. இலத்திரனியல் கடவுச்சீட்டு தயாரிக்கும் பொறுப்பு De La Rue Lanka Currency and Security Print Ltd நிறுவனத்திற்கு வழங்கப்பட்டுள்ளது.

இந்த செயற்பாடு தொடர்பில் முழுமையான விசாரணை நடத்துமாறு உச்ச நீதிமன்றம், சட்டமா அதிபர் திணைக்களத்திற்கு உத்தரவிடப்பட்டுள்ளது. பிரித்தானியாவுக்கு சொந்தமான நிறுவனத்திடம் 1.2 பில்லியன் ரூபாவுக்கு கடவுச்சீட்டு அச்சிடம் ஒப்பந்தம் வழங்கப்பட்டிருந்தது.

இதற்கு எதிர்ப்பு தெரிவித்து PIC Lanka Pvt Ltd நிறுவனம் தாக்கல் செய்துள்ள அடிப்படை உரிமைகள் மனுவை விசாரணைக்கு எடுத்த நீதிமன்றம் அந்த உத்தரவை பிறப்பித்துள்ளது.

180 மில்லியன் செலவில் மிகவும் சிறந்த தரத்திலான இலத்திரனியல் கடவுச்சீட்டு தயாரிப்பதற்கு தாம் முன்வைத்த யோசனையை கருத்திற்கொள்ளாமல் குறித்த பிரித்தானியா நிறுவனத்திடம் ஒப்படைக்கப்பட்டுள்ளதாக மனுதாரர் தெரிவித்துள்ளார்.

அரசாங்க அச்சிடல் திணைக்களம் இவ்வாறு கண்டுக்கொள்ளாமல் செயற்பட்டுள்ளதாக நீதிமன்றத்தில் குறிப்பிடப்பட்டுள்ளமை குறிப்பிடத்தக்கது.

இலங்கை வங்கியில் ஏ.டி.எம் இயந்திர சேவையை பெற்றுக்கொள்ள சென்ற யுவதி ஒருவருக்கும், இராணுவவீரர் ஒருவருக்குமிடையில் கருத்து மோதல் ஏற்பட்டுள்ளதாக தெரிவிக்கப்படுகின்றது.

குறித்த சம்பவம் நேற்று பிற்பகல் புதுக்குடியிருப்பு பகுதியில் இடம்பெற்றுள்ளதுடன், ஏ.டி.எம் இயந்திர சேவையை பெற்றுக்கொள்வதற்காக யுவதிகள் சிலர் நீண்ட நேரம் வரிசையில் காத்திருந்துள்ளனர்.

இந்த நிலையில், அவர்களுக்கு பின்பு வந்த இராணுவ வீரர் ஒருவர் முந்திச் சென்று ஏ.டி.எம் அறைக்குள் நுழைந்து பணத்தை பெற்றுக்கொண்டு வெளியே வந்துள்ளார்.

இதன்போது, பின்வரிசையில் நின்ற யுவதி ஒருவர் குறித்த இராணுவ வீரரை அண்மித்து “நாங்களும் இதுக்குதான் நிற்கின்றோம்” என்று கூறியுள்ளார்.

இதனை தொடர்ந்து அந்த இராணுவீரர் எனக்காக கொமாண்டர் காத்திருக்கின்றார் என்று தமிழில் பதிலளித்துள்ளார். இதற்கு இந்த யுவதி மறுமொழியாக எனக்கும் எங்கள் கொமாண்டர் காத்திருக்கின்றார் என தெரிவித்துள்ளார்.

இந்த நிலையில், அந்த யுவதியின் பதிலைகேட்டு இராணுவ வீரர் குழம்பியுள்ளதுடன், இருவருக்கும் இடையில் கருத்து மோதல் ஏற்பட்டுள்ளதாக குறிப்பிடப்படுகின்றது.

-தமிழ்வின்-

வட்டவளை பொலிஸ் பிரிவிற்குட்பட்ட வட்டவளை தோட்டத்தில் நேற்று இரவு இடம்பெற்ற இரு குழுக்களுக்கிடையிலான மோதலில் ஒருவர் பலியானதுடன் மேலும் இருவர் படுகாயமடைந்துள்ளனர்.

பலியான நபர் கல்வீச்சுத் தாக்குதலுக்கு இலக்காகி உயிரிழந்துள்ளார் எனவும், அதே பகுதியைச் சேர்ந்த 70 வயதுடைய கே.பொன்னுசாமி என்பவரே இவ்வாறு உயிரிழந்துள்ளதாகவும் வட்டவளை பொலிஸார் தெரிவித்துள்ளனர்.

இரு குழுக்களுக்கு இடையில் மோதல் இடம்பெற்றநிலையில், அதனை விலக்கச் சென்ற குறித்த நபர் மோதலில் ஈடுபட்டவர்களின் கல்வீச்சுத் தாக்குதலுக்கு இலக்காகியுள்ளார் என தெரிவிக்கப்படுகின்றது.

படுகாயமடைந்த நிலையில் அவர் வட்டவளை வைத்தியசாலையில் அனுமதிக்கப்பட்டு பின்னர் சிகிச்சை பலனின்றி உயிரிழந்துள்ளதாக பொலிஸார் மேலும் தெரிவித்துள்ளனர்.

அத்துடன் தாக்குதலில் ஈடுபட்ட குழுவில் மேலும் இருவர் காயமுற்ற நிலையில் வட்டவளை வைத்தியசாலையில் அனுமதிக்கப்பட்டுள்ளதுடன் மோதல் சம்பவம் தொடர்பில் மேலதிக விசாரணையை ஆரம்பித்துள்ளதாக வட்டவளை பொலிஸார் தெரிவித்துள்ளனர்.

வெலிக்கடை சிறைச்சாலைக்குள் மாறுபட்ட வகையில் தயாரிக்கப்பட்ட தொலைபேசி ஒன்றை சிறைச்சாலை அதிகாரிகள் கண்டுபிடித்துள்ளனர். கைதி ஒருவருக்காக கொண்டு வந்த உணவு பொதியில் மர்மமான முறையில் கையடக்க தொலைபேசி ஒளித்து கொண்டு செல்லப்பட்டுள்ளது.

கைக்கடிகார வடிவில் வடிவமைக்கப்பட்ட கையடக்க தொலைபேசியை சிறைச்சாலை அதிகாரி கண்டுபிடித்துள்ளார். இவ்வாறான தொலைபேசி ஒன்றை கண்டுபிடித்த முதல் சந்தர்ப்பம் இதுவென சிறைச்சாலை அதிகாரிகள் தெரிவித்துள்ளனர்.

வெளிநாடு ஒன்றில் இந்த தொலைபேசி தயாரிக்கப்பட்டிருக்கலாம் என அதிகாரிகள் குறிப்பிட்டுள்ளனர். எனினும் இலங்கை ரூபாயில் கிட்டத்தட்ட 50 ஆயிரம் ரூபாயை விடவும் அதிகம் என நம்பப்படுகின்றது.

வெலிமடை பொலிஸ் பிரிவுக்குட்பட்ட கெப்பட்டிபொல பகுதியில் நேற்று மாலை 3.30 மணியளவில் இரு வான்கள் நேருக்கு நேர் மோதி விபத்துக்குள்ளானதில் ஒருவர் உயிரிழந்துள்ளதுடன் 16 பேர் படுகாயங்களுக்குள்ளானதாக பொலிஸார் தெரிவித்தனர்.

வெலிமடை – நுவரெலியா பிரதான வீதியில் கதிர்காமம் பகுதியிலிருந்து கொழும்பு பகுதியை நோக்கிச் சென்ற வான் ஒன்றும் நுவரெலியாவிலிருந்து கதிர்காமம் பகுதியை நோக்கி சென்று கொண்டிருந்த மற்றுமொரு வானும் கெப்பட்டிபொல சந்தியில் இவ்வாறு மோதி விபத்துக்குள்ளாகியுள்ளது.

இவ்விபத்தில் இரு வான்களிலும் பயணித்த 17 பேர் படுகாயங்களுக்குள்ளாகி வெலிமடை வைத்தியசாலையில் சேர்க்கப்பட்டு அதில் 10 பேர் மேலதிக சிகிச்சைக்காக பதுளை மாவட்ட வைத்தியசாலைக்கு மாற்றப்பட்டுள்ளதாக தெரிவிக்கப்படுகின்றது.

வைத்தியசாலையில் அனுமதிக்கப்பட்டவர்களில் ஒருவர் சிகிச்சைக்குப் பலனின்றி உயிரிழந்ததாக தெரிவிக்கப்படுகிறது. அதிக வேகம் மற்றும் கட்டுப்பாடு இல்லாததன் காரணமாகவே இவ்விபத்து இடம்பெற்றுள்ளதாகவும் பொலிஸார் மேலும் தெரிவித்தனர்.

இவ்விபத்துடன் தொடர்புடைய இரு வான்களையும் பொலிஸ் நிலையத்திற்கு கொண்டு செல்லப்பட்டுள்ளதுடன், சாரதிகளையும் கைது செய்துள்ளதாகவும் சம்பவம் தொடர்பான மேலதிக விசாரணைகளையும் மேற்கொண்டு வருவதாகவும் வெலிமடை பொலிஸார் தெரிவித்தனர்.

யாழ்.வடமராட்சி கடற்பரப்பில் மீனவர் ஒருவரின் வலையில் 10 ஆயிரம் கிலோவிற்கும் அதிமான மீன்கள் பிடிபட்டுள்ளது. வடமராட்சி கிழக்கு ஆழியவளை கடற்பரப்பில் கரைவலை தொழில் செய்யும் மீனவருக்கே இவ்வாறு மீன்கள் அகப்பட்டுள்ளது.

மீனவருடைய வலையில் சுமார் 20 ஆயிரம் கிலோ பாரை மீன் அகப்பட்டுள்ளது. இந்த மீனின் இன்றைய சந்தை பெறுமதி 1 1/2கோடி ரூபாய் எனவும் கூறப்படுகின்றது.
மேலும், இன்று குறித்த மீனவரிடம் இருந்து 30 இலட்சம் ரூபாய்க்கு மீன்கள் கொள்வனவு செய்யப்பட்டுள்ளதாகவும் குறிப்பிடப்பட்டுள்ளது.

இதேவேளை, இவ்வாறான அதிஷ்டம் மீனவர்களுக்கு எப்போதாவது, கிடைப்பதாகவும் இவ்வாறாக மீன் பிடிபடுவது ஆச்சரியம் எனவும் மீனவர்கள் கூறியுள்ளனர்.

கினிகத்தேனை பொலிஸ் பிரிவிற்குட்பட்ட கினிகத்தேனை யடிபேரிய பிரதேசத்தில் களனி கங்கையில் நீராட சென்ற யுவதி ஒருவர் உயிரிழந்துள்ளார். இச்சம்பவம் இன்று மதியம் 1.30 மணியளவில் இடம்பெற்றுள்ளதாக பொலிஸார் தெரிவித்தனர்.

இவ்வாறு உயிரிழந்தவர் 27 வயதுடைய ஒரு பிள்ளையின் தாயான கண்டி புப்புரஸ்ஸ பகுதியை சேர்ந்த துஷானி த சில்வா தொலைக்காட்சி ஒன்றின் நாடக நடிகை என தெரியவந்துள்ளது.

கண்டியில் இருந்து தனது குடும்பத்துடன் கித்துல்கலவிற்கு சுற்றுலா சென்றிருந்த போது, நீராடச் சென்ற இவர் அந்த அனர்த்தத்திற்கு முகங்கொடுத்துள்ளார். இவர் நீரில் முழ்கி காணாமல் போயுள்ள நிலையில், குடும்ப உறவினர்கள் மற்றும் பிரதேசவாசிகள் இணைந்து தேடியுள்ளதை தொடர்ந்து இவரின் சடலம் நீரில் மூழ்கிய இடத்தில் இருந்து சிறு தூரத்தில் இருந்து மீட்கப்பட்டுள்ளது.

உயிரிழந்த யுவதியின் சடலம் கிதுல்கல வைத்தியசாலையில் பிரேத அறையில் வைக்கப்பட்டுள்ளது. இச்சம்பவம் தொடர்பில் கினிகத்தேனை பொலிஸார் விசாரணைகளை மேற்கொண்டு வருகின்றனர்.