ஈரோட்டில் எலக்ட்ரீசியன் ஒருவர் நள்ளிரவில் மின்கம்பியில் தொங்கியபடி அங்குமிங்குமாக சுற்றியதை கண்டு பொதுமக்கள் அதிர்ச்சியடைந்தனர்.

கர்நாடக மாநிலத்தை சேர்ந்தவர் ஐரிங் (50), இவரது மனைவி சித்ரா, பொள்ளாச்சியை சேர்ந்தவர். தம்பதிக்கு சைனி (9) மற்றும் சைலோனி (12) என இரண்டு மகள்கள் உள்ளனர். சமீபத்தில் கணவருடன் ஏற்பட்ட சண்டையால் அவரை பிரிந்த சித்ரா கோவையில் உள்ள தாய் வீட்டில் வசித்து வந்தார்.

இந்நிலையில் ஐரிங்கின் இரு மகள்களும் தாயை பார்க்க வேண்டும் என கூறியதால் பெங்களூருவிலிருந்து தனது 2 மகள்களையும் அழைத்து கொண்டு பொள்ளாச்சிக்கு பேருந்தில் ஐரிங் சென்று கொண்டிருந்தார்.

அப்போது ஈரோட்டில் இரவு 11 மணிக்கு திடீரென கீழே இறங்கிய ஐரிங் அங்குள்ள மின் கம்பத்தில் வேகமாக ஏறினார்.
இதை பார்த்த பொது மக்கள் ஏதோ விபரீதம் ஏற்பட போகிறது என்று கருதி உடனடியாக மின் ஊழியர்களுக்கும், பொலிசாருக்கும் தகவல் கொடுத்தனர்.

இதையடுத்து துரிதமாக செயல்பட்ட மின்ஊழியர்கள் உடனடியாக அந்த பகுதியில் மின் இணைப்பை துண்டித்தனர். சம்பவ இடத்துக்கு பொலிசார் வந்த ஐரிங்கை கீழே இறங்க வலியுறுத்தியும் அவர் கேட்கவில்லை.

பின்னர் இரண்டு மணி நேரத்துக்கு பின்னர் ஐரிங்கை தீயணைப்பு வீரர்கள் பத்திரமாக மீட்டனர்.

விசாரணையில் ஐரிங் மனநலம் பாதிக்கப்பட்டு இருப்பதாக தெரியவந்த நிலையில், இதுகுறித்து அவர் உறவினர்களுக்கு தகவல் தெரிவிக்கப்பட்டது.

இதையடுத்து சம்பவ இடத்துக்கு வந்த உறவினர்கள் ஐரிங் மற்றும் அவர் மகள்களை அழைத்து சென்றார்கள்.

 
இந்தியாவின் மத்தியபிரதேச மாநிலத்தில் காதலிக்க மறுத்த காரணத்தால் இளைஞர் ஒருவர் இளம்பெண்ணை வாளால் தலையை துண்டித்து கொலை செய்துள்ள சம்பவம் அதிர்ச்சியை ஏற்படுத்தியுள்ளது.

மத்தியபிரதேச மாநிலத்தின் கோட்மா கிராமத்தில் குறித்த கொடூர சம்பவம் நடந்துள்ளது. இங்குள்ள பாடசாலை ஒன்றில் படித்து வந்துள்ளார் கொலை செய்யப்பட்ட பூஜா பனிகா. இவருக்கு சில ஆண்டுகளாக தொடர்ந்து காதல் கோரிக்கை விடுத்து வந்துள்ளார் இளைஞர் ஒருவர்.

ஆனால் தமது குடும்ப சூழல் கருதி அந்த காதல் கோரிக்கையை பூஜா ஏற்க மறுத்து வந்துள்ளார். ஒரு கட்டத்தில் ஆத்திரம் அடைந்த இளைஞர், தமது காதலுக்கு மறுப்பு தெரிவித்ததும் இன்றி, தம்மை புறக்கணிப்பதை பொறுத்துக் கொள்ள முடியாமல், அவர் பாடசாலைக்கு செல்லும் வழியில் காத்திருந்து குறித்த இளம்பெண்னை வாளால் வெட்டி தலையை துண்டித்து கொலை செய்துள்ளார்.

பின்னர் சம்பவ இடத்தில் இருந்து தலைமறைவாகியுள்ளார். இச்சம்பவத்தை நேரில் பார்த்த ஆசிரியர் ஒருவர் உடனடியாக பொலிசாருக்கு தகவல் அளித்துள்ளார்.

இதனிடையே சம்பவப்பகுதிக்கு விரைந்து வந்த பொலிசார் படுகொலை செய்யப்பட்ட இளம்பெண்ணின் உடலை மீட்டனர். மட்டுமின்றி கொலைக்கு பயன்படுத்தப்பட்ட நீண்ட வாளையும் கைப்பற்றியுள்ளனர். இச்சம்பவம் தொடர்பாக மேலதிக விசாரணை நடைபெற்று வருவதாக பொலிசார் தெரிவித்துள்ளனர்.

மற்றவர்கள் சத்தம் போட்டால் போடட்டும், நாம் அமைதியாக வேலை செய்வோம் என ரஜினிகாந்த் தனது ஆதரவாளர்களுக்கு அறிவுரை வழங்கி உள்ளார்.

அரசியல் கட்சியை தொடங்கும் பணிகளில் தீவிரமாக ஈடுபட்டுள்ள நடிகர் ரஜினிகாந்த், மாவட்ட ரீதியாக ரஜினி மக்கள் மன்றத்திற்கான நிர்வாகிகளை நியமித்து வருகிறார். அவ்வகையில், நேற்று நெல்லை மாவட்ட நிர்வாகிகள் நியமனம் தொடர்பாக, நிர்வாகிகளை சந்தித்து ஆலோசனை நடத்தினார்.

முந்தைய கூட்டங்களில் சென்னையில் இருந்தபடி காணொளி காட்சி மூலமாக நிர்வாகிகளுடன் ஆலோசனை நடத்திய நிலையில் முதல் முறையாக நேற்று நேரில் கலந்துரையாடல் நடத்தினார். ராகவேந்திரா மண்டபத்தில் நடந்த இந்த ஆலோசனையின்போது ரஜினி பேசியதாவது,

அரசியலில் எந்த விடயத்தையும் கவனமாக கையாள்வது அவசியம். அரசியலில் அடிப்படை கட்டமைப்பு தான் முக்கியம். 32 மாடி அஸ்திவாரம் போல 32 மாவட்டங்களில் கட்டமைப்பு முக்கியம். அனைத்து ரசிகர்களையும் சந்திக்க சில நாட்கள் ஆகும். மற்றவர்கள் சத்தம் போட்டால் போடட்டும். நாம் வேலையை அமைதியாக செய்வோம்.

என் ரசிகர்களுக்கு மற்றவர்கள் அரசியல் கற்றுத் தரவேண்டாம். நீங்கள் மற்றவர்களுக்கு அரசியலை கற்றுக்கொடுப்பவர்கள். விரைவில் உங்களை உங்கள் மாவட்டத்தில் சந்திக்கிறேன். பெருகி வரும் ரசிகர்களின் ஆதரவை பார்க்கும்போது அரசியலில் நம்மால் மாற்றத்தை ஏற்படுத்தமுடியும் என்ற நம்பிக்கை அதிகமாகி வருகிறது என்று அவர் பேசினார்.