ஆந்திர மாநில ஏரியில் 7 தமிழர்களின் உடல் சடலமாக மிதந்தது பெரும் பரபரப்பை ஏற்படுத்தியுள்ளது.

இந்தியாவின் ஆந்திர மாநிலம் கடப்பா அருகே உள்ள ஒண்டமிட்டா ஏரியில், 7 நபர்களின் உடல் சடலமாக மிதப்பதாக பொலிசாருக்கு தகவல் கிடைத்துள்ளது.

அதன் அடிப்படையில் சம்பவ இடத்திற்கு விரைந்து சென்ற ஆந்திர பொலிசார், உடல்களை மீட்டு விசாரணையை தொடங்கினர்.

முதற்கட்ட விசாரணையில், சடலமாக மிதந்த 7 பேரும் தமிழகத்தைச் சேர்ந்த கூலித் தொழிலாளர்கள் என்பது தெரியவந்துள்ளது.

இவர்கள் செம்மரம் வெட்டுவதற்காக ஆந்திரா சென்றிருக்கலாம் என்றும் சந்தேகிக்கப்படுகிறது.

மேலும் தமிழகம் முழுவதும் பெரும் பரபரப்பை ஏற்படுத்தியுள்ள இந்த சம்பவம் குறித்து வழக்கு பதிவு செய்து விசாரணை நடத்தி வருவதாக ஆந்திர பொலிசார் தெரிவித்துள்ளனர்.

தமிழகத்தை அதிர வைத்த ஹாசினி கொலை வழக்கில் தஷ்வந்த் குற்றவாளி என செங்கல்பட்டு நீதிமன்றம் இன்று தீர்ப்பு வழங்கியுள்ளது.

ஆள்கடத்தல், பலாத்காரம், கொலை உள்ளிட்ட 5 பிரிவுகளின் கீழ் குற்றங்கள் நிரூபிக்கப்பட்டுள்ளதாக கூறிய நீதிபதி வேல்முருகன் தண்டனை விபரத்தை ஒத்தி வைத்து உத்தரவிட்டுள்ளார்.

முன்னதாக குற்றவாளி தஷ்வந்த் நீதிமன்றத்தில் ஆஜர்படுத்தப்பட்ட போது, நீதிமன்ற கதவுகள் மூடப்பட்டு பொலிஸ் தரப்பு மற்றும் அரசு தரப்பு வழக்கறிஞர்கள் மட்டுமே அனுமதிக்கப்பட்டனர்.

நேரடி சாட்சிகள் ஏதும் இல்லாததால் குற்றச்சாட்டுகளை அறிவியல் பூர்வமாக நிரூபித்ததாகவும், அதிகபட்ச தண்டனையை நீதிமன்றம் வழங்கும் எனவும் ஹாசினி தரப்பு வழக்கறிஞரான கண்ணதாசன் கூறியிருந்தது குறிப்பிடத்தக்கது.

நடந்தது என்ன?

சென்னை குன்றத்தூரைச் சேர்ந்த மென்பொறியாளர் தஷ்வந்த், மவுலிவாக்கத்தில் உள்ள அடுக்குமாடி குடியிருப்பில் வசித்து வந்த இவர், கடந்த ஆண்டு பிப்ரவரி மாதம், தனது பக்கத்து வீட்டை சேர்ந்த ஹாசினி எனும் 6 வயது சிறுமியை பாலியல் பலாத்காரம் செய்து கொன்றுள்ளார்.

இச்சம்பவம் தமிழகத்தில் பெரும் அதிர்ச்சியை ஏற்படுத்திய நிலையில், பொலிசார் தஷ்வந்தை குண்டர் சட்டத்தில் கைது செய்தனர்.

அதன் பின்னர் பிணையில் வெளியே வந்த தஷ்வந்த், கடந்த டிசம்பர் 2ஆம் திகதி தனது தாய் சரளாவை கொலை செய்துவிட்டு, அவரின் நகைகளை எடுத்துக் கொண்டு தப்பியுள்ளார்.

மும்பையில் பதுங்கியிருந்த அவரை, தனிப்படை பொலிசார் கைது செய்து அழைத்துச் சென்ற போது, விமான நிலையத்தில் இருந்து தப்பித்துள்ளார்.

பின்னர், மும்பை பொலிசாரின் உதவியுடன் தஷ்வந்தை கைது செய்த பொலிசார், அவரை புழல் சிறையில் அடைத்தனர். இதனைத் தொடர்ந்து, செங்கல்பட்டு மகளிர் நீதிமன்றத்தில் தஷ்வந்த் ஆஜர்படுத்தப்பட்டார்.

அப்போது நீதிபதியிடம் தனக்கு தண்டனை அளிக்குமாறு கோரிய தஷ்வந்த், பின்னர் தான் கொலை செய்யவில்லை என்று கூறினார்.

நித்தியானந்தாவை எந்த வழக்கில் இருந்தும் விடுவிக்க முடியாது என கர்நாடக நீதிமன்றம் தெரிவித்துள்ளது.

ஆரத்திராவ் என்ற பெண்ணை நித்தியானந்தா பலாத்காரம் செய்ததாக நித்தியானந்தாவின் உதவியாளராக இருந்த லெனின் என்பவர் வழக்கு தொடர்ந்தார்.

இந்த வழக்கானது கர்நாடக மாநிலம் ராம்நகர் நீதிமன்றத்தில் நடைபெற்று வருகிறது, இவ்வழக்கில் லெனின் கடந்த 2005ஆம் ஆண்டு முதல் 2010ஆம் ஆண்டு வரை பலாத்காரம் நடந்ததாக தெரிவித்திருந்தார்.

இதனைத் தொடர்ந்து நித்தியானந்தா, 5 வயது தன்மையுடன் இருப்பதாகவும், எனவே தன்னை பாலியல் பலாத்கார வழக்கில் இருந்து விடுவிக்க வேண்டும் என்றும், நீதிமன்றத்தில் மருத்துவ சான்றுடன் மனுத்தாக்கல் செய்தார்.<

இந்நிலையில் பலாத்கார வழக்கு மட்டுமல்ல எந்த வழக்கில் இருந்தும் நித்தியானந்தாவை விடுவிக்க முடியாது என, நித்தியானந்தா உட்பட 5 பேரின் மனுக்களை நீதிமன்றம் தள்ளுபடி செய்துள்ளது.

மேலும் பிப்ரவரி 28ஆம் திகதி முதல் நித்தியானந்தா மீதான வழக்குகளில் விசாரணை நடத்தப்படும் என்றும் ராம்நகர் நீதிமன்றம் தெரிவித்துள்ளது.

கள்ளக்காதலனுடன் சேர்ந்து கணவரை தீர்த்துக்கட்டிய பெண் 11 ஆண்டுகளுக்கு பின்னர் கைது செய்யப்பட்டுள்ளார்.

குமரி மாவட்டம் பள்ளியாடி பேராணிவிளையை சேர்ந்தவர் ராஜசேகர்(வயது 40), கட்டிட தொழிலாளியான இவருக்கு சுதா என்ற மனைவியும், ஒரு மகனும் உள்ளனர்.

வெளிநாட்டில் வேலை பார்த்து வந்த ராஜசேகர், கடந்த 2007ம் ஆண்டு தாய்நாட்டுக்கு திரும்பினார், சில நாட்களிலேயே திடீரென மாயமானார். அக்கம்பக்கத்தினர், சொந்தபந்தங்கள் சுதாவிடம் விசாரித்த போது, ராஜசேகர் மறுபடியும் வெளிநாடு சென்று விட்டதாக கூறியுள்ளார்.

கிட்டத்தட்ட 11 ஆண்டுகளாக ராஜசேகர் ஊர்பக்கம் வரவில்லை, இதனால் சந்தேகமடைந்த ராஜசேகரின் அண்ணன் ரவி பொலிசில் புகார் அளித்தார். இதன்பேரில் பொலிசார் விசாரணை நடத்தி வந்தனர், ஏற்கனவே தங்கியிருந்த வீட்டை வாடகைக்கு விட்டு விட்டு சுதா மகனுடன் வாகவிளை பகுதியில் இருந்தது தெரியவந்தது.

மேலும் கள்ளக்காதல் விவகாரத்தில் ராஜசேகர் கொலை செய்யப்பட்டதும் தெரியவந்தது. அதாவது, சுதாவுக்கும் அதே பகுதியை சேர்ந்த ஆன்றின் ஷிபு என்பவருக்கும் கள்ளக்காதல் இருந்ததாம், இதுபற்றி தெரியவர ராஜசேகர் மனைவியை கண்டித்துள்ளார்.

இந்நிலையில் சம்பவதினத்தன்று இருவரும் ஒன்றாக இருப்பதை ராஜசேகர் பார்த்து சத்தம் போட்டுள்ளார். இதில் இருவரும் சேர்ந்து அரிவாளால் வெட்டி கொலை செய்து கழிவறை தொட்டியிலும் உடலை வீசியுள்ளனர்.

இதனைதொடர்ந்து தடயவியல் நிபுணர்கள் சோதனை செய்ததில் குற்றம் நிரூபணமானது. சம்பவம் நடந்த 11 ஆண்டுகளுக்கு பின்னர் இருவரையும் பொலிசார் கைது செய்துள்ளனர்.

சென்னையில் இளம்பெண் மீது அசிட் ஊற்றி தீவைத்த இளைஞரை பொலிசார் கைது செய்துள்ளனர்.

மடிப்பாக்கம் பகுதியை சேர்ந்த ராஜா என்பவர் ரத்த பரிசோதனை நிலையம் நடத்தி வருகிறார். தனது ரத்த பரிசோதனை நிலையத்தில் பணி செய்து வந்த ஊழியர் யமுனாவிற்கு ராஜா பாலியல் தொல்லை கொடுத்து வந்துள்ளார்.

ராஜாவின் செயல்பாடுகளை யமுனா எதிர்த்து வந்த நிலையில், இன்று அவர் மீது அசிட் ஊற்றி தீ வைத்த ராஜா பின்னர் தப்பி ஓடியுள்ளார்.

இதையடுத்து வலியால் துடித்த யமுனா மீட்கப்பட்டு கீழ்பாக்கம் அரசு மருத்துவமனையில் சேர்க்கப்பட்டுள்ள நிலையில் அவருக்கு தீவிர சிகிச்சையளிக்கப்பட்டு வருகிறது.

இதுகுறித்த புகாரின் பேரில் தப்பியோடிய ராஜாவை பொலிசார் கைது செய்து, அசிட் வீச்சுக்கான காரணம் குறித்து அவரிடம் விசாரணை நடத்தி வருகிறார்கள்.

இந்தியாவில் உத்தரபிரதேசத்தில் திருமணமான இரண்டு நாளில் புதுமாப்பிள்ளை கொலை செய்யப்பட்டிருப்பது அதிர்ச்சியை ஏற்படுத்தியுள்ளது.

உத்தரபிரதேச மாநிலத்தின் கான்பூரை சேர்ந்தவர் லகன் சிங் என்ற வாலிபருக்கும் பிரியங்கா என்ற பெண்ணுக்கும் சில தினங்களுக்கு முன்னர் திருமணம் நடைபெற்றுள்ளது.

திருமணத்துக்கு பின்னர் உறவினர்கள் வீட்டுக்கு சென்று விருந்துகளில் கலந்து கொண்டு வந்த லகன் சிங் திருமணமான இரண்டு நாள் கழித்து திடீரென மாயமாகியுள்ளார்.

இது குறித்து பொலிஸாரிடம் முறைப்பாடு அளிக்கப்பட்ட நிலையில் யமுனை நதி அருகில் லகன் சிங்கின் மோட்டார் சைக்கிளை கண்ட மக்கள் பொலிஸாருக்கு தகவல் வழங்கியுள்ளனர்.

தகவலறிந்த பொலிஸார் அப் பகுதியை சுற்றி தேடிய நிலையில் லகன் அங்கு சடலமாக கண்டெடுக்கப்பட்டார்.

சம்பவம் குறித்து பொலிஸார் நடத்திய விசாரணையில் பிரியங்காவின் முன்னாள் காதலன் அஜய் கோயல் லகனை கொலை செய்தது தெரியவந்துள்ளது.

பிரியங்கா அஜய்யுடன் பழகிய நிலையில் பின்னர் தொடர்பை துண்டித்துள்ளார்.

இதையடுத்து லகனின் தொலைப்பேசி இலக்கத்தை எப்படியோ கண்டுப்பிடித்த அஜய் அவரை தொடர்ந்து மிரட்டி வந்துள்ளார்.

ஆனால் இது குறித்து லகன் வெளியில் சொல்லாமல் இருந்துள்ள நிலையிலேயே அஜய்யால் கொலை செய்யப்பட்டுள்ளார்.

லகனை கொலை செய்யும் அளவுக்கு அஜய் செல்வார் என தான் நினைக்கவில்லை என பிரியங்கா பொலிஸாரிடம் கூறியுள்ளார்.

சம்பவம் குறித்து வழக்குப்பதிவு செய்துள்ளபொலிஸார் தீவிர விசாரணை மேற்கொண்டு வருகிறனர்.