யாழ். போதனா வைத்தியசாலையில் இரட்டைக் குழந்தைகளில் ஒரு குழந்தை வேறொரு பெண்ணிற்கு வழங்கப்பட்டமை தொடர்பிலான வழக்கு விசாரணை அறிக்கையை சமர்ப்பிக்குமாறு குற்றப் புலனாய்வுப் பிரிவினருக்கு உத்தரவிடப்பட்டுள்ளது. குறித்த உத்தரவை நேற்று யாழ். நீதிவான் நீதிமன்றம் பிறப்பித்துள்ளது.

கடந்த 2005ஆம் ஆண்டு யாழ். போதனா வைத்தியசாலையில் பெண் ஒருவர் இரண்டு குழந்தைகளை பிரசவித்துள்ளார். இதேவேளை, அன்றைய தினத்தில் மற்றுமொரு பெண் குழந்தை பெற்றெடுத்துள்ளார்.

ஆனால் அவரின் சிசு இறந்துவிட்டதாக தெரியவந்துள்ள நிலையில் வைத்தியசாலை உத்தியோகத்தரினால் இரட்டை குழந்தைகளில் ஒரு குழந்தை மாற்றப்பட்டுள்ளன.

இது தொடர்பில் இரட்டை குழந்தைகளை பிரசவித்த பெண் யாழ்.பொலிஸ் நிலையத்தில் முறைப்பாடு செய்துள்ளார்.

சம்பவம் குறித்து விசாரணைகளை முன்னெடுத்த பொலிஸார், யாழ் நீதிவான் மன்றில் வழக்குத் தாக்கல் செய்துள்ளனர். இந்த வழக்கு நேற்றைய தினம் விசாரணைக்கு எடுத்துக் கொள்ளப்பட்டபோதே நீதிமன்றம் இந்த உத்தரவை வழங்கியுள்ளது.

மேலும்,முறைப்பாட்டில் எதிராளியாக குறிப்பிடப்பட்டுள்ள பெண் வெளிநாட்டில் உள்ளார் என குறிப்பிடப்படுகின்றது.

தரம் ஐந்து புலமைப் பரிசில் பரீட்சை பெறுபேறுகள் குறித்த மீள் மதிப்பீட்டில் 234 மாணவ மாணவியரின் புள்ளிகளில் மாற்றம் ஏற்பட்டுள்ளது.

கடந்த 2017ம் ஆண்டு ஆகஸ்ட் மாதம் நடைபெற்ற தரம் ஐந்து புலமைப் பரிசில் பரீட்சை பெறுபேறுகள் தொடர்பில் சுமார் திருப்தியில்லாத 20000 மாணவ மாணவியர் மீள் மதிப்பீட்டுக்காக விண்ணப்பம் செய்திருந்தனர்.

இவர்களில் 234 மாணவ மாணவியரின் பரீட்சை பெறுபேறுகளில் குறிப்பாக புள்ளிகளில் மாற்றம் ஏற்பட்டுள்ளது.

புள்ளிகளில் மாற்றம் ஏற்பட்டுள்ள மாணவ மாணவியரின் பெறுபேறுகள் கல்வி அமைச்சிற்கு அனுப்பி வைக்கப்பட்டுள்ளதுடன், மீள்மதிப்பீட்டுக்காக விண்ணப்பித்து புள்ளிகளில் மாற்றம் ஏற்படா மாணவ மாணவியரின் விபரங்கள் அந்தந்த பாடசாலைகளுக்கு அறிவிக்கப்பட்டுள்ளன.

இதேவேளை பரீட்சையில் அதிக புள்ளிகளைப் பெற்றுக்கொண்ட மாணவ மாணவியருக்கு பிரபல பாடசாலைகளில் அனுமதி வழங்கும் நடவடிக்கைகள் இந்த மாத இறுதிக்குள் பூர்த்தியாகும் என கல்வி அமைச்சு அறிவித்துள்ளது.

பாடசாலைகள் கிடைக்கப்பெறாத மாணவ மாணவியர் எதிர்வரும் மாதம் 15ம் திகதி வரையில் மேன்முறையீடு செய்ய முடியும் என அறிவிக்கப்பட்டுள்ளது.

மீன்பிடிப் படகொன்று, கார்களை ஏற்றி வரும் கப்பல் ஒன்றுடன் மோதியதில் இரு இலங்கை மீனவர்கள் உயிரிழந்துள்ளனர்.

மேலும், இந்த சம்பவத்தில் மூவர் காப்பாற்றப்பட்டுள்ளதோடு, ஒருவரைக் காணவில்லை எனவும் கடற்படைப் பேச்சாளர் குறிப்பிட்டுள்ளார்.

தெய்வேந்திரமுனை கடற்பகுதியில் வைத்து இந்த சம்பவம் இடம்பெற்றுள்ளது.

 
கிளிநொச்சி கொக்காவில் பகுதியில் இடம்பெற்ற வாகன விபத்தொன்றில் நால்வர் பலியாகியுள்ளனர். இச் சம்பவம் சற்று முன்னர் 8.30 மணியளவில் இடம்பெற்றுள்ளது.

கயஸ் வாகனம் ஒன்று இன்னொரு வாகனமொன்றுடன் நேருக்கு நேர் மோதியதிலேயே இவ் விபத்து சம்பவம் இம்பெற்றுள்ளது.

இந்த விபத்து மாங்குளம்- கொக்காவில் ஏ9 வீதியில் சற்று முன்னர் இடம்பெற்றுள்ளது. விபத்தில் படுகாயமடைந்தவர்கள் வைத்தியசாலையில் அனுமதிக்கப்பட்டுள்ளதாக தெரிவிக்கப்படுகின்றது.

சம்பவம் தொடர்பில் பொலிஸார் விசாரணைகளை முன்னெடுத்துள்ளனர்.

கண்டியில் உணவு, நீர் வழங்காமல் சிறை வைக்கப்பட்டிருந்த 94 வயதான தாய் ஒருவரை பொலிஸார் மீட்டுள்ளனர்.

கட்டுகஸ்தோட்டை யட்டியாவல பிரதேச வீட்டில் தாயை அடைத்து வைத்து மகள் கொடுமைப்படுத்தியுள்ளதாக பொலிஸார் தெரிவித்துள்ளனர்.

குறித்த தாய் சிறுநீர் மற்றும் மலம் கழித்து பல மாதங்களாகியும் அவற்றினை சுத்தப்படுத்தாமையினால் அவரது உடல் முழுவதும் பூச்சி, புழுக்கள் காணப்பட்டுள்ளன.

இருட்டு அறையை பொலிஸ் அதிகாரிகள் திறந்து பார்க்கும் போது, மிகவும் கெஞ்சியவாறு அவர் உணவு கோரியதாகவும் பொலிஸார் குறிப்பிட்டுள்ளனர்.

3 ஆண் பிள்ளைகள் மற்றும் 3 பெண் பிள்ளைகள் இந்த தாயார் உள்ளதாகவும், ஒரு மகள் இவ்வாறு தாயை தடுத்து வைத்துள்ளதாகவும், ஏனையவர்கள் தாயை பார்க்க இந்த மகள் அனுமதிப்பதில்லை என பொலிஸ் விசாரணைகளில் உறுதியாகியுள்ளது.

அந்த பகுதி மக்கள் தாயாருக்கு உணவு வழங்குவதற்கு முயற்சித்த போதிலும், அதற்கும் அந்த மகள் அனுமதிக்கவில்லை என பொலிஸார் குறிப்பிட்டுள்ளனர்.

தனது தாயை பார்க்க விடாமல் அடைத்து வைத்திருப்பது தொடர்பில் மகன் ஒருவர் பொலிஸ் நிலையத்தில் முறைப்பாடு செய்ததற்கமைய இன்றைய தினம் அவ்விடத்தை சோதனையிட்டு தாயை மீட்டுள்ளனர்.