இந்தியாவின் மராட்டிய மாநிலத்தில் மொடல் காதலியின் நடத்தையில் சந்தேகப்பட்ட காதலன், கொடூர ஆயுதத்தால் அவரது கழுத்தை இரண்டாக துண்டித்து கொலை செய்துள்ள சம்பவம் அதிர்ச்சியை ஏற்படுத்தியுள்ளது.

குறித்த சம்பவத்தில் தொடர்புடைய நபரை கைது செய்துள்ள பொலிசார் மேலதிக விசாரணையில் ஈடுபட்டு வருகின்றனர்.

கொலை செய்யப்பட்ட ஜோதி சிங் மும்பையில் செயல்பட்டுவரும் மதுபான விடுதிகளில் நடனக் கலைஞராகவும், மொடலாகும் இருந்து வருகிறார்.

ஜோதி சிங் பணிபுரிந்து வந்த நடன பார்களில் வாடிக்கையாளராக இருந்த பிரதேஷ் பட்டேல் ஏற்கனவே திருமணமான நிலையிலும் இவருடன் தொடர்பை ஏற்படுத்திக் கொண்டுள்ளார். நாளடைவில் இது காதலாக மாறவே இருவரும் அடிக்கடி பட்டேலின் குடியிருப்பு ஒன்றில் சந்தித்து வந்துள்ளனர்.

இந்த நிலையில் கடந்த மாதம் 27 ஆம் திகதி பட்டேலின் பிறந்த நாளை கொண்டாடும் பொருட்டு திம்பா பகுதியில் அமைந்துள்ள அவரது குடியிருப்புக்கு ஜோதி சிங் சென்றுள்ளார்.

அங்கிருந்து இருவரும் புத்தாண்டை மும்பையில் கொண்டாடும் பொருட்டு சென்றுள்ளனர். பின்னர் மீண்டும் திம்பா திரும்பியுள்ளனர்.

இதனிடையே 2 ஆம் திகதி தமது வாகன ஓட்டுனர் மற்றும் அவரது மனைவியுடன் ஜோதி சிங் பட்டேலின் குடியிருப்புக்கு சென்றுள்ளதாக கூறப்படுகிறது. அங்கு இருவருக்கும் இடையே திடீரென்று வாக்குவாதம் ஏற்படவும், நடத்தையில் சந்தேகம் இருப்பதாகவும் கூறி திட்டியுள்ளனர்.

இதில் ஆத்திரமடைந்த பட்டேல் அங்கிருந்த கொடூர ஆயுதத்தால் ஜோதியின் கழுத்தை வெட்டி இரண்டாக துண்டித்துள்ளார்.

இச்சம்பவத்தால் அதிர்ச்சியுற்ற ஜோதியின் வாகன ஓட்டுனரும் அவரது மனைவியும் உடனடியாக பொலிசாரிடம் நடந்தவற்றை கூறி புகார் அளித்துள்ளனர்.

இதனையடுத்து விசாரணை மேற்கொண்ட பொலிசார் தற்போது பட்டேலை கைது செய்துள்ளனர்.

 
தமிழகத்தில் பள்ளி பேருந்துக்கு ஓட்டுநராக இருந்தவர் தற்போது 40 கோடிக்கு அதிபராக சொகுசு வாழ்க்கை வாழ்ந்துள்ள சம்பவம் வெளிச்சத்திற்கு வந்துள்ளது.

சென்னை கேளம்பாக்கத்தைச் சேர்ந்தவர் வெங்கடரமணன், இவருக்கு மூன்று குழந்தைகள் உள்ளனர், இவரது மனைவி அரசுப் பள்ளியில் பணியாற்றி வருகிறார். தனியார் பள்ளிக்கு வாகன ஓட்டுநரான வெங்கடரமணன் அதற்கிடையில் ரியல் எஸ்டேட் தொழில் செய்து வந்துள்ளார்.

இதில் வருமானம் அதிகம் வருவதைக் கண்ட அவர், ஓட்டுனர் வேலையை உதறி தள்ளிவிட்டு முழுநேரம் ரியல் எஸ்டேட் தொழிலில் இறங்கினார்.

அதன்பின் சென்னையில் ஒரு அலுவலகம் சொகுசு கார் என பந்தாவாக இருந்துள்ளார், அந்த நேரத்தில் பிரதீப்குமார் என்பவர், காஞ்சிபுரம் மாவட்டத்தில் 35 ஏக்கர் நிலம் வாங்கித்தரும்படி வெங்கடரமணனை அணுகியுள்ளார். இதில் வெங்கடரமணன் 1.70 கோடி ரூபாயை ஏமாற்றிவிட்டதாக கூறி, பிரதீப் குமார் காவல்நிலையத்தில் புகார் அளித்துள்ளார். இதையடுத்து பொலிசார் வெங்கடரமணனை பிடிக்க தனிப்படை அமைத்தனர்.

அதற்குள் சென்னையைச் சேர்ந்த மற்றொரு நபரும் அவர் மீது மோசடி புகார் கொடுத்துள்ளார். தொடர்ந்து அவர் மீது மோசடி புகார்கள் வந்ததால், பொலிசார் அவரை கூடிய விரைவில் பிடிப்பதற்கு துரிதமாக செயல்பட்டனர்.

இதை அறிந்த வெங்கடரமணன் வடமாநிலத்திற்கு தப்பிச் சென்றுள்ளார். இதனால் மூன்று வருடமாக வடமாநிலத்தில் அவர் தலைமறைவாக இருந்துள்ளார்.

தொடர்ந்து பொலிசார் அவரை தேடிவந்த வேளையில், அவர் மஹாராஷ்டிராவில் இருக்கும் தகவல் பொலிசாருக்கு தெரியவந்துள்ளது. உடனடியாக அங்கு விரைந்த பொலிசார் அவர் குறித்து விசாரணை மேற்கொண்ட போது, அங்கு நிறுவனம் ஒன்று நடத்தி வருவதை கண்டுபிடித்துள்ளனர்.

நிறுவனத்திற்கு சென்ற பொலிசார் அவரின் புகைப்படத்தை காண்பித்து கேட்ட போது, அவர்கள் வெங்கடரமணா இருக்கும் இடத்தை கூறியுள்ளனர். குறித்த இடத்திற்கு சென்ற பொலிசார் அவரை பொறி வைத்து மடக்கி பிடித்து சென்னைக்கு அழைத்து சென்றனர்.

இது குறித்து பொலிசார் கூறுகையில், இவர் மீது 40 கோடி ரூபாய்க்கு மோசடி புகார்கள் வந்துள்ளன. சென்னையில் ரியல் எஸ்டேட் அலுவலகம் நடத்தியபோது மஹாராஷ்டிராவைச் சேர்ந்த பெண் பணியாற்றியுள்ளார்.

தமிழகத்தில் பொலிசார் இவரை தேடுகின்றனர் என்று தெரிந்தவுடன் அப்பெண் உதவியுடன் மஹாராஷ்டிராவிற்கு சென்றுள்ளார், அங்கு ஒரு கம்பெனியை நடத்தி வந்ததுடன், மும்பையில் இந்திரா ஏர் பிரைவேட் லிமிடெட் என்ற பெயரில் ஹெலிகாப்டரை வாடகைக்கு விட்டுள்ளார்.

இதற்காக 6 கோடி ரூபாய்க்கு ஹெலிகாப்டர் வாங்கியுள்ளார். பொலிசார் தொடர்ந்து தேடி வந்ததால் மும்பை, மஹாராஷ்டிரா என தலைமறைவாக வாழ்ந்து வந்துள்ளார்.

அதுமட்டுமின்றி பொலிசாரிடம் சிக்காமல் இருக்க வேண்டும் என்பதற்காக செயற்கை போனை அவர் பயன்படுத்தியுள்ளார். உடனடியாக அவர் குறித்து தகவல் வந்ததால், அவரை அங்கு சென்று கைது செய்தோம்.

கைது செய்யப்பட்ட அவர் என் மீது புகார் கொடுத்த அனைவருக்கும் நான் கொடுக்க வேண்டிய பணங்களை கொடுத்து விடுகிறேன், எனக்கு கோடிக் கணக்கில் சொத்து இருக்கிறது என்னை விட்டு விடுங்கள் என்று கூறினார்.

இருந்த போதிலும் அவரது சொத்து விவரங்கள் குறித்து தொடர்ந்து விவரங்களை சேகரித்து வருவதாக கூறியுள்ளனர்.

 
இந்தியாவில் இளைஞர் ஒருவர் கடத்தி வரப்பட்டு விருப்பத்துக்கு மாறாக அவருக்கு திருமணம் நடத்தி வைக்கப்பட்டுள்ளது அதிர்ச்சியை ஏற்படுத்தியுள்ளது.

பீகார் மாநிலத்தில் தான் இச்சம்பவம் நடந்துள்ளது. வினோத் யாதவ் என்ற இளைஞர் அங்குள்ள இரும்பு ஆலையில் பொறியாளராக பணிபுரிந்து வருகிறார். வேறு இடத்துக்கு பணியிடை மாற்றம் வேண்டும் என வினோத் விண்ணப்பித்திருந்த நிலையில் ஒரு கும்பல் அவரிடம் வந்து தங்களுக்கு அமைச்சரை தெரியும் என கூறியுள்ளனர்.

அமைச்சரிடம் சென்று பணியிடை மாற்றம் குறித்து கோரிக்கை வைத்தால் உடனடியாக நடக்கும் என ஆசை வார்த்தை கூறி அவரை மொகமா நகருக்கு அழைத்து சென்றுள்ளனர்.

ஒரு இடத்தில் வினோத்தை அடைத்து வைத்த அவர்கள் அங்கிருந்த பெண்ணை திருமணம் செய்ய வற்புறுத்தியுள்ளனர். இதற்கு வினோத் மறுக்கவே தங்களிடம் இருந்த ஆயுதங்களை காட்டி மிரட்டியுள்ளனர். இதோடு சம்பவ இடத்தில் இருந்த பெண்களும் வினோத்துக்கு எதிராக செயல்பட்டு அவரை திருமணம் செய்ய வற்புறுத்தினார்கள்.

வினோத் கதறி அழுது கெஞ்சியும் அதை காதில் வாங்கி கொள்ளாத கும்பல் அவரை பெண்ணுக்கு கட்டாய திருமணம் செய்து வைத்துள்ளார்கள்.

சம்பவத்தை அங்கிருந்தவர் வீடியோவாக எடுத்து இணையத்தில் வெளியிட அது வைரலானது. இதையடுத்து பொலிசார் இது குறித்து விசாரித்து வருகிறார்கள்.

பீகாரில் இது போன்ற கட்டாய திருமணங்கள் அதிகளவில் நடந்து வருவது குறிப்பிடத்தக்கது.

ஆர்கே நகரில் ஓட்டுக்கு 20 ஆயிரம் ரூபாய் கொடுத்து டிடிவி தினகரன் வெற்றி பெற்றுள்ளதாக நடிகர் கமல்ஹாசன் குற்றஞ்சாட்டியுள்ளார்.

சென்னை ஆர்கே நகர் தொகுதி இடைத்தேர்தலில் சுயேட்சை வேட்பாளர் டிடிவி தினகரன் அபார வெற்றி பெற்றார். வாக்கு எண்ணிக்கை நடந்து 10 நாட்கள் ஆகிவிட்ட நிலையில் இதுகுறித்து நடிகர் கமல்ஹாசன் தனியார் வார இதழில் கருத்து தெரிவித்துள்ளார்.

அதில் சுயேட்சையாக போட்டியிட்ட வேட்பாளர் 20 ஆயிரம் ரூபாய் வரை கொடுத்ததாகவும், ஆர்கே நகர் மக்கள் 20 ரூபாய் டோக்கன்களுக்கு விலை போய்விட்டதாகவும் வேதனை தெரிவித்துள்ளார்.

அதே போல ஆளும் கட்சி சார்பில் ஆர்கே நகர் வாக்காளர்களுக்கு தலா 6 ஆயிரம் ரூபாய் கொடுக்கப்பட்டதாக தெரிவித்துள்ளார்.

பணம் பெற்று வாக்களிப்பது என்பது பிச்சை பெறுவது போன்றது என்றும், அதுவும் திருடனிடம் பிச்சை எடுப்பது போன்ற ஒரு கேவலம் எங்கேயாவது உண்டா என்றும் விமர்சித்துள்ளார்.