யாழ். வடமராட்சி கிழக்கு மருதங்கேணி பகுதியில் பண மோசடியில் ஈடுபட்ட ஒருவர் கைது செய்யப்பட்டுள்ளார்.

வெளிநாட்டுக்கு அனுப்புவதாகக் கூறி பண மோசடி செய்த குற்றச்சாட்டில் குறித்த நபரை கைது செய்துள்ளதாக பொலிஸார் குறிப்பிட்டுள்ளனர்.

மருதங்கேணி பகுதியைச் சேர்ந்த 45 வயதுடைய நபர் பருத்தித்துறையில் வைத்து நேற்றைய தினம் கைது செய்யப்பட்டுள்ளார்.

இவர் மருதங்கேணியைச் சேர்ந்த ஒருவரிடம் வெளிநாட்டுக்கு அனுப்புவதாகக் கூறி 6 இலட்சம் ரூபாவை வாங்கியுள்ளார். எனினும் பணம் கொடுக்கப்பட்டு நீண்ட காலம் ஆகியும் குறித்த நபர் அவரை வெளிநாட்டுக்கு அனுப்பும் எந்தச் செயலிலும் ஈடுபடாமல் தலைமறைவானார் என பாதிக்கப்பட்ட நபர் பொலிஸில் முறைப்பாடு செய்துள்ளார்.

இது தொடர்பில் விசாரணைகளை முன்னெடுத்த பருத்தித்துறை பொலிஸார் குறித்த சந்தேகநபரை கைது செய்துள்ளனர்.

 
பொகவந்தலாவ, போனோகோட் தோட்டத்தில் 10 வயது சிறுமியை துன்புறுத்திய குற்றச்சாட்டின் பேரில் குறித்த சிறுமியின் சித்தியும், மைத்துனரும் பொகவந்தலாவ பொலிஸாரால் கைது செய்யப்பட்டுள்ளனர்.

அத்துடன், பாதிக்கப்பட்ட தர்மராஜ் சர்மிலா என்ற 10 வயதுடைய குறித்த சிறுமியையும் பொலிஸார் மீட்டுள்ளனர்.

குறித்த சிறுமியின் தாயார் வெளிநாட்டில் பணிபுரிந்துவரும் நிலையில், அவரது தந்தையும் கொழும்பில் பணி புரிந்து வருகின்றார்.

இந்த சிறுமி கடந்த ஒன்பது வருடங்களாக தனது பாட்டியின் அரவணைப்பில் வாழ்ந்து வந்த நிலையில் கடந்த வருடம் குறித்த சிறுமியை அவரது சித்தியின் பொறுப்பில் விட்டுவிட்டு பாட்டி கொழும்புக்கு வேலைக்குச் சென்றுள்ளார்.

இந்நிலையில், குறித்த சிறுமியின் கல்வி நடவடிக்கைகளிற்காகவும், சிறுமியின் உணவு போன்ற செலவுகளுக்கும் மாதாந்தம் அவரின் தாயார் வெளிநாட்டில் இருந்து பணம் அனுப்புவதாக தெரிவிக்கப்படுகின்றது.

எனினும் குறித்த சிறுமியின் சித்தி சிறுமியை வீட்டு வேலைகளைச் செய்ய துன்புறுத்தியும், தடியினால் தாக்கியும் கொடுமை செய்துள்ளதாக பொலிஸாரின் விசாரணைகளிலிருந்து தெரியவருகின்றது.

இது தொடர்பில் குறித்த தோட்டத்தைச் சேர்ந்த பொதுமக்கள் பொலிஸாருக்கு தகவல் வழங்கியதன் காரணமாக குறித்த சிறுமியின் சித்தியும், மைத்துனரும் கைது செய்யப்பட்டுள்ளனர்.

இவ்வாறு மீட்கப்பட்டுள்ள சிறுமியின் உடலில் காயங்கள் காணப்படுவதாகவும், சட்ட வைத்திய அதிகாரியின் மருத்துவ பரிசோதனைக்காக சிறுமியை டிக்கோயா கிளங்கன் வைத்தியசாலையில் அனுமதித்துள்ளதாக பொலிஸார் தெரிவித்துள்ளனர்.

மேலும் கைது செய்யப்பட்ட இருவரும், இன்றைய தினம் ஹட்டன் நீதிமன்றத்தில் முன்னிலைப்படுத்த உள்ளதாக பொகவந்தலாவ பொலிஸார் தெரிவித்துள்ளனர்.

யாழ்ப்பாணம் நோக்கி பேருந்தில் பயணித்த பெண் ஒருவரிடம் இருந்து 15 இலட்சம் ரூபா பெறுமதியான தங்க நகைகளை கொள்ளையிட்ட சம்பவம் தொடர்பில் நால்வர் கைது செய்யப்பட்டுள்ளனர்.

கைது செய்யப்பட்டவர்கள் 27 தொடக்கம் 47 வயதுக்கு உட்பட்டவர்கள் என பொலிஸார் தெரிவித்துள்ளனர்.

பணம் சம்பாதிக்கும் நோக்கில் குறித்த நபர்கள் நீண்ட காலமாக இவ்வாறு கொள்ளை நடவடிக்கையில் ஈடுபட்டு வந்துள்ளதாக பொலிஸார் கூறியுள்ளனர்.

யாழ்ப்பாணத்தில் இருக்கும் உறவினர் வீட்டுக்கு பேருந்தில் சென்ற பெண்ணின் கைப்பையை வெட்டியெடுத்துக்கொண்டு நகையுடன் கொள்ளையர்கள் தப்பிச்சென்றிருந்தனர்.

இந்த சம்பவம் தொடர்பில் செய்யப்பட்ட முறைப்பாடுக்கு அமைய சந்தேகநபர்கள் கைது செய்யப்பட்டுள்ளனர். இந்நிலையில் பொலிஸார் மேலதிக விசாரணைகளை முன்னெடுத்துள்ளனர்.

வெளிநாடொன்றில் கொள்ளைச் சம்பவத்தில் ஈடுபட்ட ஆறு இலங்கையர்களுக்கு தலா 3 வருட சிறைத்தண்டனை விதிக்கப்பட்டுள்ளது.

டுபாயில் பாரிய பணத்தொகையை கொள்ளையடித்த இலங்கையர்களுக்கே இவ்வாறு தண்டனை விதிக்கப்பட்டுள்ளது.

கடந்த மே 6 ஆம் திகதி தாம் பணியாற்றும் நிறுவனத்திற்கு சொந்தமான வாகனத்தில் கொண்டு செல்லப்பட்ட பணப்பொதிகளில் இருந்து 1.198 மில்லியன் டினார் பணத்தை கொள்ளையடித்துள்ளனர்.

22 மற்றும் 29 வயதிற்குட்பட்ட இலங்கை காவலர்களே இவ்வாறு கொள்ளையடித்துள்ளனர். குறித்த ஆறு இலங்கையர்களும் ஒன்றாக திட்டமிட்டுள்ளதுடன், Al Muraqqabat பகுதியில் வாகனம் நிறுத்தப்பட்ட போது அவர்கள் பணத்தை திருடியுள்ளனர்.

திருடப்பட்ட சில தொகை பணத்தை வைத்திருந்த இரு இலங்கை சுத்திகரிப்பாளர்கள் மீது குற்றம் சாட்டப்பட்டுள்ளது.  குறித்த இரண்டு சுத்திகரிப்பாளர்களும் தங்கள் அடையாள அட்டைகளை பயன்படுத்தி, இலங்கை கணக்கிற்கு 84,000 டினார்களை மாற்றியுள்ளனர்.

அந்த 6 காவலர்களும் பெரிய பண தொகையை திருடியது போது அவர்களில் ஒருவர் அந்த பணத்தை பாதுகாத்து வந்துள்ளதாக தெரிவிக்கப்படுகின்றது.

பின்னர் அவர்கள் Al Rashidiyaவில் ஒரு குடியிருப்பு கட்டடத்தை பெற்றுக் கொண்டனர். அங்கு ஒவ்வொருவரும் 16,000 டினார் பணத்தை பெற்றுக் கொண்டனர். மீதமிருந்த ஏனைய செலவீனங்களுக்காக பயன்படுத்தி கொண்டுள்ளனர்.

பின்னர் பிரித்துக்கொண்ட பணத்தின் பெரும்பகுதி பணத்தை, பண பரிமாற்ற நிலையங்கள் மூலம் தங்கள் வீடுகளுக்கு அனுப்ப முடிவு செய்துள்ள நிலையில் பொலிஸாரிடம் சிக்கியுள்ளனர்.
இந்த நிலையில் இதுவரை டுபாய் குற்றவியல் நீதிமன்றத்தில் குறித்த 6 இலங்கையர்கள் தொடர்பில் இடம்பெற்ற வழக்கு விசாரணையில் குற்றச்சாட்டு உறுதியாகியுள்ளது.

அதற்கமைய அனைவருக்கும் தலா 3 வருட சிறைத்தண்டனை விதிக்கப்பட்டுள்ளது. சிறைத்தண்டனையின் பின்னர் குற்றவாளிகளை நாடு கடத்துமாறு நீதிமன்றம் உத்தரவிட்டுள்ளது.

மக்களின் தேவைக்கருதி 2800 மெற்றிக்தொன் எரிபொருளை சந்தைக்கு கொண்டு வருவதற்கு தீர்மானிக்கப்பட்டுள்ளதாக எரிபொருள் களஞ்சிய சாலை முனையம் தெரிவித்துள்ளது.

இதன் மூலம் நாட்டில் நிலவிவரும் எரிபொருள் தட்டுப்பாடு நிவர்த்தி செய்யப்படும் என அதன் நிர்வாக இயக்குனர் சஞ்ஜீவ விஜேரத்ன தெரிவித்துள்ளார்.

இதனிடேயே தரமற்ற எரிபொருளை திருகோணமலை ஐ.ஓ.சியில் இறக்குவதற்கு தயாராகும் செயற்பாடு ஒன்று நிலவுவதாகவும் அதற்கு அரசாங்கம் இடமளிக்காது எனவும் சுதந்திர சேவையாளர் சங்க பெற்றோலிய கிளையின் செயலாளர் ஜயந்த பரேயிகம குறிப்பிட்டுள்ளார்.

 
டயகமவிலிருந்து போடைஸ் ஊடாக ஹட்டன் நோக்கி சென்ற இலங்கை போக்குவரத்து சபைக்கு சொந்தமான பஸ் ஒன்று குடைசாய்ந்ததில் 28 பேர் படுகாயமடைந்துள்ளனர்.

டயகம ஹட்டன் பிரதான வீதியில் போடைஸ் என்.சி தோட்டப் பகுதியில் குறித்த பஸ் தலைகீழாக குடைசாய்ந்துள்ளது.

டயகம பகுதியிலிருந்து பயணிகளை ஏற்றிக் கொண்டு அட்டன் பகுதிக்கு சென்ற குறித்த பஸ் இன்று (04) மாலை பாதையை விட்டு விலகி சுமார் 80 அடி பள்ளத்தில் பாய்ந்து விபத்துக்குள்ளாகியுள்ளது.

பஸ் சாரதி கட்டுப்பாட்டை இழந்ததன் காரணமாகவே இந்த விபத்து நேர்ந்ததாக தெரியவந்துள்ளது.

இந்த விபத்தில் காயமடைந்த 28 பேரில் 6 பேர் பேராதெனிய வைத்தியசாலைக்கு, மாற்றப்பட்டுள்ளதாகவும், ஏனையோர் டிக்கோயா ஆதார வைத்தியசாலையில் சிகிச்சை பெற்று வருவதாகவும் வைத்தியசாலை வட்டாரங்கள் தெரிவித்தன.

மாற்றப்பட்டவர்களில் பெண் ஒருவர், நான்கு ஆண்கள், ஒரு குழந்தை என வைத்தியசாலை தரப்பினர் தெரிவித்தனர்.

 
மாத்தளையில் ஆற்றில் குளித்துக் கொண்டிருந்து காணாமல்போயிருந்த மூன்று சிறுமிகளில் இருவரின் உடல்கள் நேற்று மீட்கப்பட்டுள்ளதாக தெரிவிக்கப்படுகிறது.

நேற்று காலை காணாமல் போயிருந்த மூன்று சிறுமிகளில் ஒருவரின் சடலம், சம்பவ இடத்திலிருந்து 4 கிலோமீற்றர் தூரத்தில் கண்டுபிடிக்கப்பட்டுள்ளது.

இதேவேளை, ஏனைய இரு சிறுமிகளை மீட்பதற்கான நடவடிக்கைகள் மேற்கொள்ளப்பட்டு வந்த நிலையிலேயே இன்னுமொரு சிறுமியின் உடலும் மீட்கப்பட்டுள்ளது.

தற்பொழுது எஞ்சியுள்ள ஒரு சிறுமியை தேடும் பணிகள் முன்னெடுக்கப்பட்டு வருகின்றமை குறிப்பிடத்தக்கது.

இவ்வாறு உயிரிழந்தவர்கள் மற்றும் காணாமற் போனவர்களின் பெயர்கள் கிங்சிலி ரத்நாயக்க (வயது 40) சந்திராகாந்தி (வயது 59), வினுக்கி ரத்நாயக்க (வயது 13), ஹிருனி ரத்நாயக்க (வயது 4), ரவிந்திர லசந்த (வயது 39), ருவனி டில்ருக்ஷி (வயது 38) ரிஷாதி வீகிஷா (வயது 12), சந்துனி (வயது 12).