உள்ளூர் சட்டங்கள் மீறப்பட்ட எந்தவொரு சாதனையை தாங்கள் அங்கீகரிக்க மாட்டோம் என கின்னஸ் உலக சாதனை பதிவுகளின் மூத்த PR முகாமையாளர் Doug Male உறுதிப்படுத்தியுள்ளார்.

இந்த விடயங்களை நாங்கள் முக்கியமாக கருத்திற்கொள்வோம் என அவர் கொழும்பு ஊடகமொன்றுக்கு தெரிவித்துள்ளார்.

கடந்த செப்டெம்பர் மாதம் 21 ஆம் திகதி கண்டி நகரில் ருவன் புஷ்பகுமார மற்றும் சஜினி பிரியங்கிகா சுரவீரவின் திருமணத்தின் போது உலக சாதனை நிலைநாட்ட முயற்சிகள் மேற்கொள்ளப்பட்டன.

நீண்ட ஒசரி சேலையை அணியும் கின்னஸ் உலக சாதனையை முறியடிக்கும் முயற்சியில் ஈடுபட்ட போதும் உலகளாவிய ரீதியில் எதிர்மறையான விமர்சனங்களையே பெற்றுள்ளனர்.

புதிய உலக சாதனையை ஏற்படுத்தும் முயற்சிக்கு 250 பாடசாலை மாணவர்கள் பயன்படுத்தப்பட்டமை பெரும் சர்ச்சையை ஏற்படுத்தியுள்ளது.

திருமண நாளன்று அதிகாலையிலிருந்து பிற்பகல் 2.30 மணி வரை கட்டாயப்படுத்தி, கன்னொறுவ – கண்டி சாலையில் 3.5 கீலோ மீற்றர் தூரம், குறித்த மாணவர் நிற்க வைக்கப்பட்டுள்ளனர்.

நாங்கள் ஒரு விண்ணப்பத்தை பெற்றுள்ளோம், எனினும் விண்ணப்பத்தை பற்றிய விபரங்களை இன்னும் விவாதிக்க முடியாமல் உள்ளதென Doug Male தெரிவித்துள்ளார்.

அது சாதனையாக இருந்தாலும், மாணவர்களை தவறான முறையில் ஈடுபடுத்தப்பட்டமை தொடர்பில் முன்னெடுக்கப்படுகின்ற விசாரணைகள் தொடர்பில் கின்னஸ் உலக சாதனை பதிவு முகாமையாளர் கருத்து வெளியிட்டுள்ளார்.

இந்த சாதனையை உறுதி செய்வதென்றால், சுயாதீனமான சாட்சி அறிக்கைகள் உட்பட ஒரு மிக விரிவான மற்றும் கடுமையான வழிகாட்டு நெறிமுறைகள் மற்றும் ஆதாரங்கள் அவசியமாகும்.

சான்றுகளின் பின்னர் நிபுணர்கள் ஒரு குழு மதிப்பாய்வு செய்ததனை தொடர்ந்து இறுதி முடிவு செய்யப்படும் என அவர் குறிப்பிட்டுள்ளார்.

நாட்டின் பல பகுதிகளிலும் 65 பெண்கள் உட்பட பலரை ஏமாற்றி 10 கோடி ரூபாவுக்கும் மேல் மோசடி செய்த நபர் பொலிஸாரிடம் சிக்கியுள்ளார்.

குறித்த நபருக்கு முன்னதாகவே பகிரங்க பிடியாணை பிறப்பிக்கப்பட்டிருந்த நலையில், கம்பஹா யக்கலமுல்ல பிரதேசத்தில் வைத்து பொலிஸாரால் கைது செய்யப்பட்டுள்ளார்.

அரசியல்வாதிகள், பொலிஸ் அதிகாரிகள், வர்த்தகர்கள் மற்றும் பல பகுதிகளைச் சேர்ந்த முக்கிய நபர்களுடன் நெருக்கமாக பழகி ஆடம்பர வாழ்க்கை வாழ்ந்து கொண்டு மிகவும் தந்திரமான முறையில் பல வருடங்களாக இந்த நபர் மோசடியில் ஈடுபட்டு வந்துள்ளார்.

காலி – ஹினிதும, நெவசிமுல்ல பிரதேசத்தை சேர்ந்த கார்தி ஹேவகே அருணகுமார என்ற நபரே இவ்வாறு கைது செய்யப்பட்டுள்ளார்.

தற்போது தெரியவந்துள்ள சம்பவங்களின் அடிப்படையில் சந்தேகநபர் 65 பெண்களை பல வழிகளில் ஏமாற்றி பணத்தை மோசடி செய்துள்ளார்.

இந்த பெண்களில் திருமணமானவர் மற்றும் திருமணமாகாத பெண்களும் அடங்குகின்றனர். இவர்களில் 40 பெண்களிடம் இந்த சந்தேகநபர் பாலியல் ரீதியான தொடர்புகளை கொண்டிருந்ததாக பொலிஸார் தெரிவித்துள்ளனர்.

இறக்குமதி செய்யப்படும் பெரிய வெங்காயத்திற்கு 100 வீத வரி அறவிடுமாறு ஜனாதிபதி மைத்திரிபால சிறிசேன, நிதி அமைச்சுக்கு ஆலோசனை வழங்கியுள்ளார்.

உள்நாட்டு விவசாயிகள் எதிர்நோக்கியுள்ள பிரச்சினை குறித்து ஆராய்ந்த பின்னர் ஜனாதிபதியால் இந்த ஆலோசனை வழங்கப்பட்டுள்ளதாக ஜனாதிபதி ஊடகப் பிரிவு விடுத்துள்ள அறிக்கையில் தெரிவிக்கப்பட்டுள்ளது.

இந்த ஆலோசனைக்கு அமைய, எதிர்வரும் நாட்களில் இறக்குமதி செய்யப்படும் பெரிய வெங்காயத்திற்கு முழுமையாக வரி அறவிடப்படும் என அந்த அறிக்கையில் சுட்டிக்காட்டப்பட்டுள்ளது.

இதன் மூலம் உள்நாட்டு விவசாயிகளுக்கு நியாயமான விலையில் பெரிய வெங்காயத்தை விற்பனை செய்ய முடியும் எனவும் அந்த அறிக்கையில் மேலும் குறிப்பிடப்பட்டுள்ளது.

நிறுத்தி வைத்திருந்த லொறியில் மோதிய முச்சக்கரவண்டி ஒன்று, 30 அடி பள்ளத்தில் கவிழ்ந்ததில், அப் பகுதியில் இருந்த வீடொன்று சேதமடைந்துள்ளது.ஹட்டன் – காமினிபுர பகுதியில் இந்த சம்பவம் இடம்பெற்றுள்ளது.

இதனையடுத்து, முச்சக்கரவண்டியை செலுத்தியவரும் அதில் பயணித்தவரும் தப்பி ஓடியுள்ளனர். விபத்து தொடர்பிலான மேலதிக விசாரணையை ஹட்டன் பொலிஸார் மேற்கொள்கின்றனர்.

இன்று நள்ளிரவு முதல் அமுலுக்கு வரும் வகையில் 12.5 கிலோகிராம் LP சமையல் எரிவாயுவின் விலை 110 ரூபாவால் அதிகரிக்கப்பட்டுள்ளது.

அதற்கான நுகர்வோர் அதிகார சபையின் அனுமதிக் கடிதம், காஸ் நிறுவனங்களுக்கு அனுப்பி வைக்கப்பட்டுள்ளதாக அமைச்சின் செயலாளர் சிந்தக லொக்கு ஹெட்டி தெரிவித்தார்.

தென் கொரியாவின் – யேசூ பிரதேசத்தில் தொழில் புரிந்து வந்த மாத்தறை ஹந்துகல பெலியத்தகும்புர பிரதேசத்தை சேர்ந்த இளைஞர் மர்மமான முறையில் காணாமல் போயுள்ளதாக அவரது பெற்றோர் தெரிவித்துள்ளனர்.

இளைஞனுக்கு என்ன நடந்தது என்பது குறித்த தகவல்கள் இதுவரை தெரியவரவில்லை என அவரது பெற்றோர் கூறியுள்ளனர்.

நுவன் சத்துரங்க என்ற இந்த இளைஞனின் தாயாரான எம்.குமுது ஜானகி புற்று நோயாள் பாதிக்கப்பட்டவர். இளைஞனின் தந்தையான கே.எல்.குணபூஜித சுவாச நோயினால் பாதிக்கப்பட்டுள்ளார். இளைஞனின் ஒரே சகோதரரான சம்பத் சந்தருவான் பாடசாலையில் கல்வி கற்று வருகிறார்.

இதனால் வீட்டின் பொருளாதார பொறுப்பை சுமக்க வேண்டிய குடும்பத்தின் மூத்த பிள்ளையான நுவன் சத்துரங்க கடந்த 2016ஆம் ஆண்டு ஏப்ரல் 19ஆம் திகதி தொழிலுக்காக தென் கொரியாவுக்கு சென்றுள்ளார்.

தென் கொரியாவின் – யேசூ பிரதேசத்தில் மீன்பிடி தொழிலில் அவர் ஈடுபட்டு வந்துள்ளார். தினமும் பெற்றோர் மற்றும் சகோதரருடன் தொலைபேசியில் உரையாடி அவர்களின் நலன் விசாரிப்பது நுவன் சத்துரங்கவின் வழக்கம் என பெற்றோர் கூறுகின்றனர்.

கடந்த 6ஆம் திகதி பெற்றோரை தொலைபேசியில் தொடர்புக்கொண்ட நுவன் அதற்கு பிறகு தொலைபேசி அழைப்பை எடுக்கவில்லை. இதன் காரணமாக வெளிநாட்டு வேலைவாய்ப்பு பணிகத்திடம் விசாரித்த போது இன்னுமொருவருடன் படகில் சென்றுக்கொண்டிருந்த போது கடலில் விழுந்துள்ளதாக தெரியவந்துள்ளது.

இவர்கள் படகில் புறப்பட்டுச் செல்வது கடற்கரையில் பொருத்தப்பட்டுள்ள பாதுகாப்பு கெமராக்களில் பதிவாகியுள்ளது.

நுவன் சத்துரங்கவுடன் படகில் சென்ற நபர் குருணாகல் பிரதேசத்தை சேர்ந்தவர் என தெரியவந்துள்ளது. பெற்றோர் அவரை தொடர்புக்கொண்டு விசாரித்த போது படகை ஓட்டிய நுவன் சத்துரங்க இரவு 10 மணியளவில் படகில் இருந்து தூக்கி எறியப்பட்ட கடலில் விழுந்ததாகவும், கயிற்றின் உதவியுடன் அவரை காப்பாற்ற முயற்சித்த போது அது தோல்வியடைந்தாகவும் நுவனின் பெற்றோரிடம் குருணாகல் பிரதேசத்தை சேர்ந்த நபர் கூறியுள்ளார்.

சம்பவம் நடந்து இரண்டு வாரத்தின் பின்னர், தமது மகனுக்கு ஏற்பட்ட நிலைமை தொடர்பாக சந்தேகம் ஏற்பட்டுள்ளதாகவும், மகனுக்கு ஏற்பட்ட நிலைமை சம்பந்தமாக நியாயத்தை நிறைவேற்றுமாறு பெற்றோர் உட்பட நெருக்கமானவார்கள் கோரிக்கை விடுத்துள்ளனர்